Deuteronomio 25:1-19
-
Chapbil noʼox li vachʼ chichʼ akʼele (1-3)
-
Mu stakʼ akʼbel svosal tot vakax kʼalal chpechʼ ta tekʼel trigoe (4)
-
Chikʼbe yajnil li anima xchiʼil ta vokʼele (5-10)
-
Li kʼusi mu stakʼ tsakel kʼalal tstsak sbaik ta majele (11, 12)
-
Skʼan lek tsʼakal li spʼisoltake (13-16)
-
Skʼan xichʼ lajesbel skʼoplal li j-amaleketike (17-19)
25 »Mi oy lik skʼopik chaʼvoʼ viniketike, xuʼ xbat yakʼ sbaik ta chapanel ta stojolal li jchapanvanejetike,+ vaʼun li jchapanvanejetike chalik ti buchʼu tukʼe chʼabal smul xchiʼuk chalik ti buchʼu chopole oy smul.+
2 Mi sta-o xichʼ majel li buchʼu chopole,+ li jchapanvaneje akʼo yal mantal ti akʼo spatan sbae xchiʼuk teuk skʼeloj ti kʼalal chichʼ majele. Jaʼ jech yepal akʼo yichʼ jisbel vachʼ ti kʼu stsatsal li smule.
3 Xuʼ xakʼbe 40 ta moj vachʼ,+ pe skʼan jech noʼox yepal xakʼbe. Yuʼun mi chakʼbe to mas vachʼ ti mu xa jechuk albile, ta kʼexlal xa chkom li avermanoe.
4 »Mu xavakʼbe svosal li tot vakax kʼalal yakal chpechʼilan ta tekʼel li trigoe.+
5 »Mi oy jayvoʼ viniketik ti sbankil yitsʼin sbaik ti jmoj nakalike, pe ti cham junuk yuʼunik ti muʼyuk xkom junuk skereme, mu stakʼ xmalij ta yan li antse. Li xchiʼil ta vokʼel buchʼu chame jaʼ chbat yikʼbe li yajnile.+
6 Li sba skerem chvokʼe jaʼ chichʼbe sbi li anima xchiʼil ta vokʼele+ sventa mu xtupʼ sbi li ta Israele.+
7 »Mi mu skʼan xikʼbe yajnil li anima xchiʼil ta vokʼele, skʼan xbat ta stojolal moletik ta yochebal jteklum li ants ti cham smalale, xi akʼo yalbe li moletike: ‹Li xchiʼil ta vokʼel jmalale mu skʼan ti kuxuluk-o ta Israel sbi li xchiʼil ta vokʼele. Mu skʼan xikʼun akʼo mi jaʼ oy ta sba›.
8 Li moletike skʼan stakik ta ikʼel sventa xchiʼinik ta loʼil. Pe mi mu skʼan jutebuk xchiʼuk ti xi chale: ‹Mu jkʼan xkikʼ›,
9 li ants une chnopaj batel ta stojolal li xchiʼil ta vokʼel smalal kʼalal jaʼo te skʼeloj li moletike, akʼo slokʼbe xonob,+ akʼo stubtabe sat xchiʼuk xi skʼan xale: ‹Jaʼ jech chichʼ pasbel li vinik ti mu skʼan xiktabe stsʼunbal li xchiʼil ta vokʼele›.
10 Mi jech xa ox kʼot ta pasele, li ta Israele xi chichʼ ojtikinbel yutsʼ yalal* li vinike: ‹Yutsʼ yalal ti buchʼu laj yichʼ lokʼbel xonobe›.
11 »Mi oy tstsak sbaik ta majel chaʼvoʼ viniketike, mi tal pojatuk yuʼun yajnil li buchʼu chlaj ta majele xchiʼuk mi la xmichʼbe skʼunil li yan vinike,
12 skʼan xatuchʼbe lokʼel skʼob li antse. Mu me aboluk sba xavil.*
13 »Skʼan me mu chaʼpʼejuk ton te tikʼil ta avolsa ti chtun avuʼun ta kiloe,+ ti jpʼej kʼox xchiʼuk ti jpʼej mukʼe.
14 Li ta anae mu me chaʼtosuk avuʼun li kʼusi chapʼis-oe,+ ti jun kʼox xchiʼuk ti jun mukʼe.
15 Skʼan me tsʼakaluk lek li akiloe, ti mu me x-elkʼaje xchiʼuk skʼan me tsʼakaluk li spʼisol avuʼune, ti mu me x-elkʼaje sventa jal xakuxi li ta balumil ti chakʼbot li Jeova Dios avuʼune.+
16 Yuʼun li buchʼu jech tspas taje muʼyuk tukʼ, toj chopol chil li Jeova Dios avuʼune.+
17 »Teuk me ta ajol li kʼusi la spasboxuk ta be li Amalek kʼalal lalokʼik tal ta Ejiptoe,+
18 ti tal snupot ta be sventa stsak ta kʼop li buchʼutik nom tijil xtalik ta apate, ti jaʼo kʼalal lubemot xchiʼuk kʼalal mu xa ox xuʼ avuʼune. Muʼyuk la xiʼta* li Diose.
19 Mi yakʼ xa ox akux avoʼonton li Jeova Dios avuʼun ti muʼyuk xa tstsakot ta kʼop junuk avajkontra li ta balumil ti bu chakʼ arextoin*+ li Jeova Dios avuʼune, skʼan me xatupʼbe skʼoplal ta j-echʼel li Amalek ta yolon vinajele.+ Mu me xchʼay xavaʼi taje.
