Deuteronomio 26:1-19
26 »Kʼalal cha-ochik xa batel li ta balumil ti bu yaloj Jeova Dios avuʼun ti chakʼbot ta arextoe,* mi laj xa ox avichʼe xchiʼuk mi te xa ox nakalote,
2 skʼan xatsob tal jvokʼuk li sba sat kʼusitik chlokʼ ta osile, jaʼ li kʼusitik chatsob li ta avosil chakʼbot Jeova Dios avuʼune. Chʼamo ta junuk moch, vaʼun ichʼo batel ti bu tstʼuj sventa xichʼ muyubtabel sbi li Jeova Dios avuʼune.+
3 Skʼan xbat akʼel li pale ti stsakoj yabtel li vaʼ orae, xi xkʼot avalbee: ‹Tal kalbe Jeova Dios avuʼun ti liʼ xa oyun li ta balumil ti jech laj yakʼ ye Jeova ta stojolal jmoltotaktik ti chakʼbutik li osile›.+
4 »Li palee tstsakbot ta akʼob li moch avichʼoj batele, vaʼun te chakʼ ta yeloval li skajleb smoton Jeova Dios avuʼune.
5 Vaʼun, xi jamal xaval ta yeloval li Jeova Dios avuʼune: ‹Li jtote jaʼ jun j-aram vinik+ ti xtal xbat noʼoxe,* yal batel ta Ejipto+ xchiʼuk te naki kʼuchaʼal jyanlum, jayvoʼik toʼox li buchʼutik te oy ta snae.+ Pe kʼalal te kʼote, pas ta mukʼta jteklum, tsatsub xchiʼuk epajik ta jyalel.+
6 Laj yilbajinunkutik li j-ejiptoetike, tsots laj yutsʼintaunkutik xchiʼuk tsots la smosoinunkutik.+
7 Jaʼ yuʼun, lik jkʼankutik vokol ta stojolal Jeova, ti jaʼ Sdios li jmoltotakutike. Li Jeovae laj yaʼi li kʼusi laj kalkutike, laj yil ti tsots jvokolkutike, ti chʼabal lek kʼusi chkʼot ta jtojolalkutike xchiʼuk ti abol jbakutik ta utsʼintaele.+
8 Jech oxal, li Jeovae ta yipal skʼob xchiʼuk ta sjuʼel la slokʼesunkutik li ta Ejiptoe,+ chakʼ xiʼel li kʼusitik la spase, la spas senyailtak xchiʼuk skʼelobiltak juʼelal.+
9 Ta tsʼakale, liʼ laj yikʼunkutik tale, laj yakʼbunkutik li balumil liʼe, jun balumil ti bu oy lek leche xchiʼuk pome.+
10 Liʼ kichʼoj talel li sba sat jtsʼunob lokʼ ta kosil ti jaʼ yakʼojbun li Jeovae›.+
»Te xavakʼ ta yeloval li Jeova Dios avuʼune xchiʼuk te xanijan aba ta stojolal li Jeova Dios avuʼune.
11 Jech xkuxet noʼox avoʼonton ta skoj li kʼusitik lekik laj yakʼbot li Jeova Dios avuʼune xchiʼuk ti laj yakʼbe li buchʼutik te oy ta anae. Kuxetuk noʼox avoʼonton xchiʼuk li jlevietike xchiʼuk li jyanlumetik ti te xchiʼukoxuk ta nakleje.+
12 »Li ta yoxibal jabile, mi laj xa ox atsob li jun ta lajlajuneb+ chlokʼ ta skotol li kʼusitik chatsʼune, jaʼ xkaltik, li ta sjabilal chichʼ akʼel li jun ta lajlajunebe, li kʼusi la atsobe skʼan xavakʼbe jlevietik, jyanlumetik, ololetik ti chamem stotike xchiʼuk li antsetik ti chamem smalalik ti te nakalik ta yutil ateklumale, jaʼ tslajesik jaʼ to ti kʼuxi xnoj lek xchʼutike.+
13 Xi skʼan xaval ta yeloval li Jeova Dios avuʼune: ‹Laj xa jlokʼes ta jna li kʼusitik chʼule, laj xa kakʼbe li jlevietike, li jyanlumetike, li ololetik ti chamem stotike xchiʼuk li antsetik ti chamem smalalike,+ jech la jpas kʼuchaʼal laj avalbun mantale. Jtsakoj ta venta xchiʼuk jtukʼulanoj lek li amantaltake.
14 Kʼalal oy buchʼu cham kuʼune, muʼyuk la jveʼ jutebuk li kʼusi chʼule. Kʼalal ibal jbae,* muʼyuk la jtsak jutebuk mi jaʼuk laj kakʼ jutebuk ta sventa li buchʼutik chamemike. La jchʼunbe smantal li Jeova Dios kuʼune xchiʼuk la jpas skotol li kʼusitik laj aval akʼo jpase.
15 Jaʼ yuʼun, akʼo tal asat voʼot ti te nakalot ta chʼul vinajele, akʼbo bendision li ateklumal Israele xchiʼuk akʼbo bendision li balumil laj avakʼbunkutike,+ li balumil ti bu oy lek leche xchiʼuk pome,+ jech xapas kʼuchaʼal laj avakʼ ave ta stojolal li jmoltotakutike›.+
16 »Li avi kʼakʼale, chalbot mantal Jeova Dios avuʼun ti akʼo xavakʼ ta akuxlejal li mantaletik liʼe xchiʼuk li kʼusitik chapanbil yuʼune. Skʼan xavakʼ ta akuxlejal, skʼan xachʼun ta sjunul avoʼonton+ xchiʼuk ta sjunul akuxlejal.
17 Li avie, laj xa yal stuk Jeova ti jaʼ chkʼot ta Dios avuʼun mi jech-o chaxanav li ta sbetake, mi chachʼunbe li smantaltake,+ li kʼusitik chapanbil yuʼune+ xchiʼuk mi chavaʼibe li kʼusitik chale.
18 Li avi xtoke, li Jeovae laj xa yaʼibot ti chakʼot ta steklumal ti stuk xa noʼox jech*+ jech onoʼox kʼuchaʼal yalojbot ta jamale xchiʼuk laj xa yaʼibot ti chachʼunbe skotol li smantaltake.
19 Li stuk une mas tsots akʼoplal chabat yuʼun ti jaʼ mu sta li yan lumetik spasoje.+ Mi chavakʼ ta ilel ti chʼul jteklumot ta stojolal li Jeova Dios avuʼune,+ kʼupil kʼoptabilot chakʼot yuʼun, tsvinajes batel akʼoplal xchiʼuk ichʼbil ta mukʼ chakʼot yuʼun jech onoʼox kʼuchaʼal jamal yalojbote».
Tsʼibetik ta yok vun
^ O «apukulale; apartee».
^ O jaʼ van skʼoplal «ti poʼot xa xchame».
^ O «ti ep sbalile».
