Deuteronomio 27:1-26
27 Li Moises xchiʼuk li moletik ta Israele xi laj yalbeik mantal li jteklume: «Chʼunik me skotol li mantaletik yakal chkalboxuk avie.
2 Jech xtok, ti kʼusi kʼakʼalil chajelavik li ta jot Jordan sventa xabatik li ta osil ti chakʼboxuk li Jeova Dios avuʼunike, latso mukʼtik tonetik xchiʼuk bono ta tan.+
3 Mi lajelav xa oxe, jaʼ te xatsʼiba skotol li Mantaletik liʼe sventa x-och avuʼunin li osil ti chakʼbot li Jeova Dios avuʼune, jun balumil ti bu oy lek leche xchiʼuk pom jech kʼuchaʼal yalojbot ta jamal li Jeova ti jaʼ Sdios amoltotake.+
4 Mi echʼ xa ox atuchʼik li Jordane, te xalatsik ta vits Ebal+ li tonetike xchiʼuk bonik ta tan jech kʼuchaʼal yakal chkalboxuk avie.
5 Jech xtok, te xavaʼanbe jun skajleb smoton li Jeova Dios avuʼune, ta tonetik chichʼ vaʼanel li skajleb matanale. Mu me stakʼ xavokʼ ta takʼin li tonetike.+
6 Spʼejekil me li tonetik chatunes sventa xavaʼanbe li skajleb smoton Jeova Dios avuʼune xchiʼuk jaʼ te xachikʼbe smoton li Jeova Dios avuʼune.
7 Skʼan xavakʼ milbil matanal sventa jun oʼontonal+ xchiʼuk te noʼox xatiʼ,+ vaʼun xkuxet noʼox avoʼonton ta yeloval li Jeova Dios avuʼune.+
8 Li ta tonetike lekuk xpʼejlajet ta kʼelel ti kʼu yelan chatsʼiba skotol li kʼusitik chal li Mantal liʼe».+
9 Vaʼun, li Moises xchiʼuk li paleetik ti jaʼ jlevietike la xchiʼinik ta loʼil li Israele, xi laj yalbeike: «Israel, anchan, chikintao avaʼi. Li avi kʼakʼale lakʼot xa ta steklumal li Jeova Dios avuʼune.+
10 Skʼan xachikintabe li kʼusi chal Jeova Dios avuʼune xchiʼuk skʼan xavakʼ ta akuxlejal li smantaltak ti yakal chkalbot avie».+
11 Li vaʼ kʼakʼale, xi laj yalbe mantal jteklum li Moisese:
12 «Mi laj xa ox atuchʼik li Jordane, li nitilulaletik ti te skʼan svaʼan sbaik ta vits Guerisim+ sventa xakʼbeik bendision li jteklume jaʼik Simeon, Levi, Juda, Isakar, Jose xchiʼuk Benjamin.
13 Li nitilulaletik te tsvaʼan sbaik ta vits Ebal+ sventa xchopol kʼoptavanike jaʼik Ruben, Gad, Aser, Sabulon, Dan xchiʼuk Neftali.
14 Li jlevietike xi tsots yechʼomal yeik tstakʼbeik sjunul li jteklum Israele:+
15 »‹Chopol kʼoptabil chkom li buchʼu oy kʼusi tspasbe slokʼole+ o ti tspas junuk lokʼol ta unijesbil takʼin+ ti toj chopol chil Jeovae,+ ti yabtel noʼox yok skʼob li buchʼu lek spas yuʼun pʼijil abtelale* xchiʼuk ti te nakʼal* yuʼune›. (Xi skʼan stakʼ sjunul li jteklume: ‹¡Jechuk!›).*
16 »‹Chopol kʼoptabil chkom li buchʼu tspʼaj stot o smeʼe›.+ (Xi skʼan stakʼ sjunul li jteklume: ‹¡Jechuk!›).
17 »‹Chopol kʼoptabil chkom li buchʼu tsnetʼbe stsʼak yosil xchiʼile›.+ (Xi skʼan stakʼ sjunul li jteklume: ‹¡Jechuk!›).
18 »‹Chopol kʼoptabil chkom li buchʼu chakʼ xanavuk echʼel ta yan-o be li jun maʼsate›.+ (Xi skʼan stakʼ sjunul li jteklume: ‹¡Jechuk!›).
19 »‹Chopol kʼoptabil chkom li buchʼu tsokes ti kʼu yelan chichʼ chapanel junuk jyanlum,+ junuk olol ti chamem stote o junuk ants ti chamem smalale›.+ (Xi skʼan stakʼ sjunul li jteklume: ‹¡Jechuk!›).
20 »‹Chopol kʼoptabil chkom li buchʼu chchiʼinbe ta vayel yajnil stote, yuʼun chakʼ ta kʼexlal li stote›.+ (Xi skʼan stakʼ sjunul li jteklume: ‹¡Jechuk!›).
21 »‹Chopol kʼoptabil chkom li buchʼu chchiʼin ta vayel kʼusiuk noʼox chonbolomale›.+ (Xi skʼan stakʼ sjunul li jteklume: ‹¡Jechuk!›).
22 »‹Chopol kʼoptabil chkom li buchʼu chchiʼin ta vayel xvix o yixlel ti jaʼ stseb stot o stseb smeʼe›.+ (Xi skʼan stakʼ sjunul li jteklume: ‹¡Jechuk!›).
23 »‹Chopol kʼoptabil chkom li buchʼu chchiʼin ta vayel smeʼniʼe›.+ (Xi skʼan stakʼ sjunul li jteklume: ‹¡Jechuk!›).
24 »‹Chopol kʼoptabil chkom li buchʼu smalaoj xa onoʼox xchiʼil sventa tsmile›.+ (Xi skʼan stakʼ sjunul li jteklume: ‹¡Jechuk!›).
25 »‹Chopol kʼoptabil chkom li buchʼu chchon sba ta takʼin* sventa tsmil* li buchʼu* muʼyuk smule›.+ (Xi skʼan stakʼ sjunul li jteklume: ‹¡Jechuk!›).
26 »‹Chopol kʼoptabil chkom li buchʼu mu xchʼun li kʼusitik chal li Mantal liʼe›.+ (Xi skʼan stakʼ sjunul li jteklume: ‹¡Jechuk!›).
Tsʼibetik ta yok vun
^ O «¡Jaʼ jech kʼotuk ta pasel!».
^ O «mukul».
^ O «li buchʼu snaʼ yabtelanel teʼ xchiʼuk takʼine».
^ O «tstsak michʼob kʼabal».
^ O «tslomes».
