Deuteronomio 28:1-68
28 »Mi chachikinta lek li kʼusi chal Jeova Dios avuʼune xchiʼuk mi chakʼel lek sventa xavakʼ ta akuxlejal skotol li smantaltak yakal chkalbot avie, li Jeova Dios avuʼune mas tsots akʼoplal chabat yuʼun ti jaʼ mu sta li yan lumetik ta balumile.+
2 Mi jech-o chachikintabe li Jeova Dios avuʼune, chtal ta atojolal skotol li bendision liʼe,+ chtal snupot ta be:
3 »Chata bendision li ta jteklume xchiʼuk chata bendision li ta osiltike.+
4 »Tsta bendision li anichʼnabtake,*+ li sat kʼusitik chatsʼune xchiʼuk li stsʼunbal achonbolomtake. Tsta bendision li achʼiom vakaxtake xchiʼuk li achʼiom chijtake.+
5 »Tsta bendision li amoche+ xchiʼuk li svotsʼobil kʼusitik avuʼune.+
6 »Chata bendision ta skotol li kʼusi chapase.
7 »Li Jeovae chakʼ atsal li avajkontratak chtal stsakot ta kʼope.+ Jun noʼox be bu ch-ochik talel kʼalal chtal stsakot ta kʼope, pe ta vukub xa be chjatavik batel avuʼun.+
8 Li Jeovae chal mantal ti chichʼ bendision li yavil kʼusitik avuʼune+ xchiʼuk tsta bendision skotol li kʼusitik chapase. Ta melel, chakʼbot bendision li ta osil chakʼbot Jeova Dios avuʼune.
9 Li Jeovae tstʼujot sventa xakʼot ta chʼul jteklum ti jaʼ yuʼun stuk+ jech onoʼox kʼuchaʼal yaloj ta jamale.+ Ti jech tspase, jaʼ ta skoj ti jech-o chachʼunbe li smantaltak Jeova Dios avuʼune xchiʼuk ti chaxanav li ta sbetake.
10 Chaʼiik skotol jteklumetik ti ta sbi Jeova ojtikinbilote,+ vaʼun chiʼtaoxuk skotolik.+
11 »Li Jeovae chakʼ epajuk anichʼnabtak, chakʼ epajuk achonbolomtak xchiʼuk lek tsatin yuʼun li kʼusitik chatsʼun li ta balumil+ ti laj yakʼ ye Jeova ta stojolal amoltotak ti chakʼbote.+
12 Tsjam yavil skʼulejal li Jeovae, jaʼ xkaltik, li vinajele, sventa xakʼ talel voʼ ta yorail li ta avosile+ xchiʼuk sventa xakʼbe bendision skotol li kʼusitik chapase. Chavakʼbe ta chʼom yantik jteklumetik li kʼusitik oy avuʼune, yan li voʼote muʼyuk kʼusi chakʼan ta chʼom.+
13 Mas tsots akʼoplal chabat yuʼun li Jeovae+ xchiʼuk muʼyuk chakʼ spasot ta mantal li yantike; mi chachʼun li smantaltak Jeova Dios avuʼun ti yakal chkalbot avi sventa xavakʼ ta akuxlejal xchiʼuk sventa xachʼune, mas mukʼ akʼoplal chabat.
14 Mu me xakʼejpʼuj* ta batsʼikʼob mi jaʼuk ta tsʼetkʼob*+ ti chavikta aba ta spasel skotol li kʼusi yakal chkalboxuk avie, ti jaʼ xa chlik atsʼakli batel li yan diosetik ti chlik tunan ta stojolale.+
15 »Pe mi muʼyuk chachikintabe li kʼusi chal Jeova Dios avuʼune, mi muʼyuk chakʼel lek ti xavakʼ ta akuxlejal skotol li tojobtaseletik xchiʼuk li smantaltak yakal chkalbot avie, chtal ta atojolal skotol li chopol kʼoptaeletik liʼe xchiʼuk chtal snupot ta be:+
16 »Chopol kʼoptabil chakom li ta jteklume xchiʼuk chopol kʼoptabil chakom li ta osiltike.+
17 »Chopol kʼoptabil chkom li amoche+ xchiʼuk li svotsʼobil kʼusitik avuʼune.+
18 »Chopol kʼoptabil chkom li anichʼnabtake,*+ li sat kʼusitik chatsʼune, li achʼiom vakaxtake xchiʼuk li achʼiom chijtake.+
19 »Chopol kʼoptabil chkom skotol li kʼusi chapase.
20 »Li Jeovae chakʼ taluk ta atojolal li chopol kʼoptaele, jaʼ chakʼ kʼotuk ta pasel ti mu xa xanaʼ kʼusi chapase xchiʼuk chakʼbot kastigo ta skotol li kʼusitik chapase jaʼ to mi laj avichʼ lajesele xchiʼuk ti anil chachame. Jech tspas ta skoj li kʼusitik chopol la apase xchiʼuk ti laj avikta komele.+
21 Li Jeovae napʼal chkom yuʼun ta abekʼtal li chamele jaʼ to mi la stupʼ akʼoplal li ta balumil chakʼ avuʼunine.+
22 Li Jeovae chakʼ stsakot tuberkulosis,* tsatsal kʼokʼ,+ situbel, chamel ti chkʼakʼub abekʼtal yuʼune, chakʼ taluk espada ta atojolal,+ chakʼ taluk ikʼ ti chchikʼvane xchiʼuk chtakij li kʼusitik atsʼunoje.+ Skotol taje te snutsojot-o jaʼ to mi lalaje.
23 Tspas ta kovre li vinajel te oy ta ajole xchiʼuk tspas ta takʼin li balumil te oy ta avolone.+
24 Li voʼ chyal tal ta vinajele, li Jeovae tskʼatajes ta pukuk* kʼalal chyal tal ta atojolale jaʼ to mi laj avichʼ lajesele.
25 Li Jeovae te noʼox skʼeloj kʼalal tstsalot li avajkontratake.+ Jun noʼox abe bu cha-och batel kʼalal chbat atsak ta kʼope, pe ta vukub xa be chajatav lokʼel yuʼun. Jech xtok, chiʼik-o avuʼun skotol ajvaliletik ta balumil ta skoj li kʼusitik chopol chanuptane.+
26 Li abekʼtalike jaʼ sveʼel chkʼot skotol li mutetik ta vinajele xchiʼuk skotol li chonbolometik ta osiltike. Muʼyuk buchʼu tsibtasan lokʼel.+
27 »Li Jeovae chakʼ stsakot kʼaʼemal chin jech kʼuchaʼal li chin ojtikinbil ta Ejiptoe, tstsakot emorroide* chamel xchiʼuk yan chameletik ta anukulil ti muʼyuk xa xpoxile.
28 Li Jeovae chachuvajib yuʼun, chapas ta maʼsat+ xchiʼuk mu xa xanaʼ kʼusi chapas yuʼun.*
29 Akʼo mi oʼlol kʼakʼal, ta maxmaxtabil* chaxanav jech kʼuchaʼal chanav jun maʼsate+ xchiʼuk muʼyuk lek chbat avuʼun li kʼusiuk noʼox chapase. Ta smanyail sjolik tsloʼlaoxuk xchiʼuk nopoltik noʼox chalaj ta j-elekʼ ti muʼyuk buchʼu tskoltaote.+
30 Chamak junuk tseb, pe yan-o vinik tstsatsal tsak sventa xchiʼin ta vayel. Chavaʼan ana, pe muʼyuk chanaklebin.+ Chatsʼun a-uva, pe muʼyuk chatulbe sat.+
31 Te akʼeloj tsmilik li stot avakaxe, pe muʼyuk chatiʼ. Te akʼeloj chelkʼanik batel li avuroe xchiʼuk muʼyuk xa tsut-o tal. Li avajkontratake chikʼan batel li achijtake, pe muʼyuk buchʼu tskoltaot.
32 Te akʼeloj kʼalal chichʼ ikʼel batel ta yan jteklum li akeremtak xchiʼuk atsebetake.+ Chakʼan tsutik talel, pe muʼyuk yipal chavaʼi li akʼobe.
33 Li sat kʼusitik chatsʼun xchiʼuk skotol li kʼusitik chchʼi ta avosile jaʼ chtal slajes yan jteklumetik ti mu xavojtikine.+ Ta smanyail sjolik tsloʼlaoxuk xchiʼuk chakʼ avokolik.
34 Chachuvajib yuʼun li kʼusi chil asate.
35 »Li Jeovae chakʼ stsakot kʼaʼemal chin ta sjol avakan xchiʼuk ta avoʼ ti toj kʼuxik xchiʼuk ti muʼyuk xpoxile, chakʼ stsakot ta sjunul abekʼtal ti chlik ta avakan kʼalal to ta ajole.
36 Tsnutsot lokʼel li Jeovae xchiʼuk tsnuts lokʼel li ajvalil atʼujoje, chikʼot batel ta yan lum ti mu xavojtikine xchiʼuk ti muʼyuk laj yojtikinik li amoltotake.+ Te chlik tunan ta stojolal yan diosetik ti pasbil ta teʼ xchiʼuk ta tone.+
37 Chiʼik-o avuʼun yantik ta skoj li kʼusitik chopol chanuptane xchiʼuk chavichʼ labanel, jech xtok, chchopol loʼilajik ta atojolal li jteklumetik ti bu chakʼ batan li Jeovae.+
38 »Chavichʼ batel ep atsʼunob li ta avosile, pe jutuk noʼox chatsobbe sat,+ yuʼun chlaj ta kʼulub.
39 Chatsʼun a-uva xchiʼuk chachabi lek, pe muʼyuk chavuchʼ vino mi jaʼuk chatsobbe jutebuk sat,+ yuʼun chlaj ta chon.
40 Oy ep steʼel oliva ta sjunul li avosile, pe muʼyuk chajaxbe aba li s-aseiteale, yuʼun chlilij stuk li sate.
41 Chvokʼ akeremtak xchiʼuk atsebetak, pe muʼyuk te chchiʼinoxuk-o, yuʼun chukbil ch-ikʼatik batel.+
42 Li teʼetik avuʼune xchiʼuk li kʼusitik chchʼi ta avosile chlaj ta volel ta bikʼtal chonetik.*
43 Li jyanlum ti te nakal ta atojolale jujun kʼakʼal chtoy batel skʼoplal, yan li voʼote jujun kʼakʼal chchʼay batel akʼoplal.
44 Oy kʼusi chakʼbot ta chʼom, pe li voʼote muʼyuk kʼusi x-ayan avuʼun sventa xavakʼbe ta chʼom.+ Mas tsots skʼoplal chbat, yan li voʼote muʼyuk tsots akʼoplal chabat.+
45 »Skotol li chopol kʼoptael taje+ chkʼot ta atojolal, chlik snutsot xchiʼuk chtal snupot ta be jaʼ to mi laj avichʼ lajesele,+ yuʼun muʼyuk la achikintabe li kʼusi laj yalbot li Jeova Dios avuʼune, muʼyuk la achʼunbe li tojobtaseletik xchiʼuk li smantaltak laj yalbote.+
46 Taje jech chkom ta atojolal xchiʼuk ta stojolal anitilulal, jaʼ chtun ta senyail sbatel osil xchiʼuk nabil-o chkom li kʼusi chkʼot ta pasel ti labal sbae,+
47 yuʼun kʼalal solel ep kʼusi x-ayan avuʼune, maʼuk ta muyubajel xchiʼuk maʼuk ta sjunul avoʼonton latun ta stojolal li Jeova Dios avuʼune.+
48 Li Jeovae jaʼ tstak talel ta atojolal li avajkontratake xchiʼuk chlik tunan ta stojolalik+ kʼalal jaʼo chaviʼnaje,+ kʼalal jaʼo takin avoʼontone, kʼalal jaʼo chʼabal lek akʼuʼ apokʼe xchiʼuk kʼalal jaʼo chʼabal kʼusi x-ayan avuʼun jutebuke. Jaʼ chakʼ ta anukʼ li kʼatlom takʼin jaʼ to ti kʼuxi slajesbot akʼoplale.
49 »Li Jeovae tstak talel jun jteklum ti nom to chlik talel+ yoʼ stsakot ta kʼope, ta jot to stiʼil balumil chlik talel; xvilet xa tal kʼuchaʼal jkot aguila,+ mu xavaʼibe skʼop li jteklume.+
50 Li jteklume toj xibal sba ta kʼelel, muʼyuk xkʼuxul yoʼonton ta stojolal li moletike mi jaʼuk lek chil li kerem tsebetike.+
51 Jaʼ tstiʼik li yol achonbolomtake xchiʼuk jaʼ tslajesik li kʼusitik chlokʼ ta avosile jaʼ to mi laj avichʼ lajesele. Muʼyuk kʼusi chiktabot jutebuk li ta avosile, mi jaʼuk achʼ vino, aseite, mi jaʼuk vakax o chʼiom chij jaʼ to mi laj avichʼ lajesele.+
52 Chtal sjoyobtaoxuk, te bajal chakom yuʼunik li ta jteklumetik ta skotol li avosile jaʼ to mi lom yalel li tayal tsatsal muroetik ti jaʼ apatoj-o avoʼontone. Ta melel, te bajal chakom yuʼunik ta ateklumal ta sjunul avosil ti laj yakʼbot li Jeova Dios avuʼune.+
53 Kʼalal jech chkʼot ta pasele, te xa noʼox chlik atiʼ li anichʼnabe,*+ chlik atibe sbekʼtal akeremtak xchiʼuk atsebetak ti jaʼ yakʼojbot li Jeova Dios avuʼune, jech chapas ta skoj ti tsots tajek avokol xchiʼuk ta skoj ti sjoyobtaojot li avajkontrae.
54 »Li vinik ti chʼabal kʼusi palta yuʼun xchiʼuk ti kʼuxubinbil ti te achiʼuk ta nakleje muʼyuk chakʼ ta ilel xkʼuxul yoʼonton ta stojolal li xchiʼil ta vokʼele, ta stojolal li yajnil ti lek stsakoj ta ventae o li skeremtak ti kuxulik toe,
55 jech xtok, muʼyuk tskʼelan jutebuk kʼalal tstibe li sbekʼtal skeremtake, yuʼun muʼyuk xa kʼusi x-ayan yuʼun ta skoj ti tsots tajek svokol li ateklumale xchiʼuk ta skoj ti joyobtabil yuʼun li avajkontratake.+
56 Li ants ti chʼabal kʼusi palta yuʼun+ xchiʼuk ti kʼuxubinbil ti te achiʼuk ta nakleje, ti mu jaʼuk skʼan xanav ta tʼan-ok* li ta lumtike muʼyuk chakʼ ta ilel xkʼuxul yoʼonton ta stojolal li smalal ti lek stsakoj ta ventae o ta stojolal li skerem o stsebe
57 mi jaʼuk chakʼ ta ilel xkʼuxul yoʼonton ta stojolal li kʼusi chlokʼ ta sjap yoʼ kʼalal mi vokʼ xa ox li yole xchiʼuk li yalabtak laj yile, yuʼun ta mukul tstiʼ skotol ta skoj ti toj tsots tajek svokol li ateklumale xchiʼuk ta skoj ti joyobtabil yuʼun li avajkontratake.
58 »Mi muʼyuk chakʼel lek ti xavakʼ ta akuxlejal li kʼusitik chal li Mantal tsʼibabil ta livro liʼe+ xchiʼuk mi muʼyuk chaxiʼta li biil ti jun yutsile xchiʼuk ti toj labal sbae,+ ti jaʼ li sbi Jeova+ Dios avuʼune,
59 tsots me avokol chakʼbot li Jeovae xchiʼuk chakʼbe svokol li anichʼnabtake, li vokolile toj tsots xchiʼuk chjalij,+ jech xtok, chakʼ taluk tsatsal chameletik ti chjalije.
60 Jaʼ chakʼ taluk ta atojolal li chameletik ta Ejipto ti chaxiʼ toʼox yuʼune, jaʼ chlik napʼiuk ta abekʼtal.
61 Pe maʼuk noʼox, yuʼun li Jeovae chakʼ taluk ta atojolal skotol chameletik o vokoliletik ti muʼyuk liʼ tsʼibabil ta slivroal li Mantale jaʼ to mi laj avichʼ lajesele.
62 Ta skoj ti muʼyuk xachikintabe li kʼusi chal Jeova Dios avuʼune, uni jayvoʼ xa noʼox chakomik+ akʼo mi epoxuk toʼox tajek jech kʼuchaʼal li kʼanaletik ta vinajele.+
63 »Ti kʼu toʼox yelan la skʼupin Jeova kʼalal epaj yuʼun li kʼusitik avuʼunik xchiʼuk kʼalal la-epajik yuʼune, jaʼ jech tskʼupin xtok sventa tslajesoxuk xchiʼuk tsmiloxuk li Jeovae, chichʼ tupʼel akʼoplalik li ta balumil chakʼ avuʼuninike.
64 »Tspukot batel ta yantik balumil li Jeovae, ta jujujot to stiʼil balumil tspukot batel,+ jaʼ te chlik tunan ta stojolal li diosetik ti pasbil ta teʼ xchiʼuk ta tone, jaʼ li diosetik ti mu xavojtikin xchiʼuk ti muʼyuk laj yojtikinik li amoltotake.+
65 Muʼyuk bu jun avoʼonton xchiʼuk li jyanlumetike+ xchiʼuk muʼyuk bu xuʼ xatekʼan jutebuk li avakane. Ti kʼusi noʼox chakʼ kʼotuk ta pasel ta atojolal li Jeovae jaʼ ti chavul noʼox avoʼontone,+ ti mu xa xavil lek osile xchiʼuk ti mu xa noʼox xanaʼ kʼusi chapas chavaʼie.+
66 Ta xiʼel noʼox oy li akuxlejale, chaxiʼ noʼox mi oy kʼusi chanuptan ta akʼobaltik xchiʼuk ta kʼakʼaltik; muʼyuk bu jun avoʼonton chavaʼi ti kuxulote.
67 Xi chaval jujun sobe: ‹¡Koʼontonuk xa xmal kʼakʼal!›. Xi chaval ta jujun mal kʼakʼal xtoke: ‹¡Koʼontonuk xa sakub osil!›. Jech chaval ta skoj ti chavaʼi xiʼel ta avoʼontone xchiʼuk ta skoj li kʼusi chata ta kʼelele.
68 Li Jeovae chakʼ sutan batel ta Ejipto, ta varko chabat yuʼun, jaʼ te cha-echʼ batel li ta be ti xi laj kalbote: ‹Muʼyuk xa chavil-o›. Te chachon abaik ta mosoil xchiʼuk ta kiarail ta stojolal li avajkontratake, pe muʼyuk buchʼu tskʼan tsmanoxuk».
Tsʼibetik ta yok vun
^ Literal «sat avalajebe».
^ O «surtokʼob».
^ O «xakʼejev; xatsʼepʼuj».
^ Literal «sat avalajebe».
^ O «sak-obal».
^ O «lum».
^ Jaʼ jtos chin ti chchʼi ta sbe kikʼobaltike.
^ O «ch-alub avoʼonton yuʼun».
^ O «maxmaxpikbil; jaxjaxpikbil».
^ O «bikʼtal chonetik ti stsʼoʼet chbakʼ xikʼike».
^ Literal «sat avalajebe».
^ O «ta vix-akan; kʼalal chʼabal xonob».
