Deuteronomio 29:1-29
29 Liʼe jaʼ li kʼusi chal li trato ti albat yuʼun Jeova li Moises ti akʼo spas xchiʼuk li jteklum Israel te ta Moabe, pe parte-o li trato la spas xchiʼukik ta Orebe.+
2 Vaʼun, li Moisese la stsob skotol li Israele xchiʼuk xi laj yalbee: «Laj avil ta asatik skotol li kʼusi pasbat yuʼun Jeova li faraon ta yosilal Ejiptoe, li kʼusi pasbat skotol li yajtuneltake xchiʼuk sjunul li yosile,+
3 ti laj avil ta asatik laj yakʼbe tsatsal kastigoe,* ti laj yakʼ ta ilel mukʼtik senyaile xchiʼuk li skʼelobiltak juʼelale.+
4 Pe li avie, li Jeovae muʼyuk-o yakʼojboxuk ta avoʼontonik sventa xavaʼibeik smelolal, mu to xavilik osil yuʼun xchiʼuk mu to xavaʼiik kʼoponel yuʼun.+
5 ‹Li 40 jabil la jbeiltasoxuk ta takixokol balumile+ muʼyuk xlaj li akʼuʼ apokʼike xchiʼuk muʼyuk xlaj li axonob alapojike.+
6 Muʼyuk xaveʼik pan xchiʼuk muʼyuk xavuchʼik vino o kʼusiuk noʼox yan poxetik ti chyakubtasvane sventa xanaʼik ti voʼon Jeova Diosun avuʼunike›.
7 Kʼalal liʼ lavulik ta tsʼakale, tal stsakutik ta kʼop li ajvalil Seon ta Esbone+ xchiʼuk li ajvalil Og ta Basane,+ pe tsal kuʼuntik.+
8 Vaʼun, laj kichʼbetik li yosilike, jaʼ laj kakʼbetik ta xrextoik* li jrubenetike, li jgadetike xchiʼuk li j-oʼlol snitilulal Manasese.+
9 Jaʼ yuʼun, pasik me kʼusitik chal li trato taje xchiʼuk skʼan xachʼunik sventa lek xbat skotol li kʼusi chapasike.+
10 »Li avie, liʼ vaʼaloxuk akotolik ta yeloval Jeova Dios avuʼunike, liʼ oy li joliletik ta jujuchop anitilulalike, li moletik avuʼunike xchiʼuk li j-abteletik avuʼunike, skotol li viniketik ta Israele.
11 Liʼ vaʼalik ek li anichʼnabike, li avajnilike+ xchiʼuk li jyanlumetik+ ti te nakal ti bu apasoj akarpanaike, liʼ oyik ek li buchʼutik tstsobbot tal asiʼe xchiʼuk li buchʼutik tslupbot tal avaʼale.
12 Ti liʼ vaʼalote, jaʼ sventa xa-och ta strato li Jeova Dios avuʼune, taje jamal laj yichʼ alel, jaʼ li trato tspas xchiʼuk voʼot li Jeova Dios avuʼune,+
13 sventa xakʼot ta steklumal li avie+ xchiʼuk sventa xkʼot ta Adios ek+ jech kʼuchaʼal jamal yalojbote xchiʼuk ti jech laj yakʼ ye ta stojolal li amoltotak ti jaʼ li Abraan,+ Isaak+ xchiʼuk Jakobe.+
14 »Maʼuk noʼox xchiʼuk voʼoxuk ta jpas li trato liʼe ti jamal chichʼ alele,
15 yuʼun te skʼoplalik ek li buchʼutik liʼ jchiʼuktik avi ta yeloval li Jeova Dios kuʼuntike xchiʼuk li buchʼutik muʼyuk liʼ jchiʼuktik avie.
16 (Yuʼun anaʼojik lek kʼu yelan jkuxlejaltik kʼalal te toʼox nakalutik ta yosilal Ejiptoe xchiʼuk ti kʼu yelan lij-echʼ talel ta mukʼtik lumetik kʼalal lijlokʼ tale.+
17 La atabeik ta kʼelel li kʼusitik chopol oy yuʼunike xchiʼuk li santoik ti ibalik xa noʼox sba*+ ti pasbilik ta teʼ, ta ton, ta plata xchiʼuk ta oroe).
18 Kʼelo me abaik ti mu me oyuk junuk vinik o junuk ants, junuk utsʼ alalil o jchopuk nitilulal avuʼunik ti chkʼejpʼuj* yoʼonton ta stsʼakliel li Jeova Dios avuʼun ti jaʼ chbat yichʼ ta mukʼ li sdios yan lumetike.+ Jech xtok, kʼelo me abaik ti mu me oyuk junuk krixchano ta atojolalik ti xkoʼolaj ta yibel teʼ ti oy svenenoal li sat chakʼe o ti xkoʼolaj ta chʼail tsʼiʼlele.+
19 »Mi oy buchʼu yaʼioj xa ox ti vaʼ yelan jamal laj yichʼ alele, vaʼun ti tsʼakal to xi chlik yal ta yoʼonton sventa tstoy sbae: ‹Jun koʼonton akʼo mi jaʼ ta jpas li kʼusi tskʼan koʼontone›, ti chil-o svokol stuk xchiʼuk li yantik ta skoj ti jech chale,
20 muʼyuk ch-akʼbat-o perton yuʼun li Jeovae.+ Li kʼusi chkʼot ta pasele jaʼ ti tstsan skʼakʼal yoʼonton Jeova ta stojolal li vinik taje. Skotol li chopol kʼoptaeletik liʼ tsʼibabil ta livroe jaʼ chkʼot ta stojolal.+ Li Jeovae tstupʼbe skʼoplal sbi li ta yolon vinajele.
21 Li Jeova une chchʼak lokʼel ta stojolal yantik nitilulal ta Israel sventa sta svokol ta skoj li chopol kʼoptaeletik te tsʼibabil ta slivroal li Mantale.
22 »Li jaykʼol kuxlejal chtal avuʼunik ta tsʼakale xchiʼuk li jyanlumetik ti nom to bu likemik tale chakʼik venta li vokolil oy ta avosilike xchiʼuk li chameletik stakoj tal Jeovae,
23 ti naka asufre tstak tal, naka atsʼam xchiʼuk ti chkʼakʼ avosilike, jaʼ yuʼun muʼyuk xa chatsʼunolajik xchiʼuk muʼyuk xa kʼusi chchʼi talel mi jaʼuk chvokʼ tsʼiʼleltik, jech chkʼot ta pasel jech kʼuchaʼal laj yichʼ lajesel li Sodoma xchiʼuk Gomorrae,+ li Adma xchiʼuk Seboyim+ ti lajik ta skʼakʼal yoʼonton xchiʼuk ta skapemal sjol li Jeovae,
24 vaʼun xi chlik yalik xchiʼuk skotol li yan lumetike: ‹¿Kʼuxi xa noʼox ti jech la spasbe Jeova li osil liʼe?+ ¿Kʼu yuʼun ti tsan tajek skʼakʼal yoʼontone?›.
25 Xi chlik yalike: ‹Jaʼ ta skoj ti laj yiktabeik li strato Jeova+ ti jaʼ Sdios smoltotakike. Jaʼ li trato la spas xchiʼuk kʼalal la slokʼesan ta yosilal Ejiptoe.+
26 Jaʼ bat tunikuk xchiʼuk jaʼ bat snijan sbaik ta stojolal li diosetik ti mu xojtikinike, jaʼ li diosetik ti albatik ti mu stakʼ xichʼik ta mukʼe.+
27 Vaʼun, tsan skʼakʼal yoʼonton Jeova ta stojolal li balumile, jaʼ laj yakʼ kʼotuk ta stojolal skotol li chopol kʼoptaeletik ti liʼ tsʼibabil ta livroe.+
28 Jaʼ yuʼun, li Jeovae ta skʼakʼal yoʼonton xchiʼuk ta skapemal sjol la snutsan lokʼel li ta yosilike+ xchiʼuk chopol tajek laj yil li kʼusitik la spasike, jech oxal laj yikʼan batel ta yan balumil, jaʼ ti bu oyik avie›.+
29 »Li kʼusitik nakʼal* skʼoplale jaʼ yuʼun li Jeova Dios kuʼuntike,+ pe li kʼusitik akʼbil xa ta naʼele jaʼ kuʼuntik sbatel osil xchiʼuk jnitilulaltik sventa xkakʼ ta jkuxlejaltik skotol li kʼusitik chal Mantale.+
Tsʼibetik ta yok vun
^ O «prevaetike».
^ O «spukulalik; sparteik».
^ Li ta ebreo kʼope xuʼ van te nitil skʼoplal ta jpʼel kʼop ti «tsoʼ» skʼan xale, jaʼo chichʼ alel kʼalal oy kʼusi chichʼ pʼajele. Kʼelo Glosario, ibal sba.
^ O «chkʼejev; tstsʼepʼuj».
^ O «mukul».
