Deuteronomio 3:1-29
3 »Laje, lijsut tal xchiʼuk lijbat ti bu Sbelel Basan sbie. Vaʼun, li ajvalil Og ta Basane lokʼ snuputik ta be xchiʼuk skotol steklumal sventa tstsakutik ta kʼop te ta Edrei.+
2 Li Jeovae xi laj yalbune: ‹Mu xaxiʼta, yuʼun chkakʼ ta akʼob, chkakʼbot ta akʼob skotol li steklumale xchiʼuk li yosile. Jech chapasbe jech kʼuchaʼal la apasbe li Seone, jaʼ li ajvalil yuʼun j-amorreoetik ti te toʼox nakal ta Esbone›.
3 Jaʼ yuʼun, li Jeova Dios kuʼuntike laj yakʼ ta jkʼobtik li ajvalil Og ta Basane xchiʼuk skotol li steklumale. La jmiltik li ajvalile, mi junuk buchʼu kuxul kom li ta jteklume.
4 Laj kuʼuninbetik skotol li jteklumetik yuʼunike. Mi junuk jteklum kol kuʼuntik. Laj kuʼunintik li 60 jteklumetike, skotol li yosilal Argob ti jaʼ sventainoj li Og ta Basane.+
5 Skotol li jteklumetik taje lek joyajtik ta tayal muro, ep ta chʼoj stiʼ xchiʼuk ep stakʼinaltak. Jech xtok, laj kuʼunintik epal bikʼtal lumetik.
6 Pe la jlajesbetik-o skʼoplal+ jech kʼuchaʼal la jpasbetik li ajvalil Seon ta Esbone. La jlajesbetik-o skʼoplal li jteklumetik yuʼunike, kʼalal ta viniketik, antsetik xchiʼuk ololetik.+
7 Laj kikʼtik lokʼel li chonbolometike xchiʼuk li kʼusitik la jpojtik ta jteklumetike.
8 »Li vaʼ kʼakʼale, laj kichʼbetik yosil li chaʼvoʼ ajvalil ti jaʼ j-amorreoetik+ ti te oyik ta yosilal Jordane, ti chlik ta stenlejaltik Arnon* kʼalal to ta vits Ermone+
9 (li vits taje Sirion yakʼojbeik sbi li jsidonetike, yan li j-amorreoetike Senir yakʼojbeik sbi),
10 skotol li jteklumetik ta stenlejaltike, ta sjunul li Galaade xchiʼuk sjunul Basan kʼalal to ta Saleka xchiʼuk ta Edrei,+ jaʼ li jteklumetik ti jaʼ sventainoj li Og ta Basane.
11 Yuʼun li ajvalil Og ta Basane kʼajomal xa ox stuk kuxul li ta stsʼunbal jrefaetike. Li skajonale ta takʼin* laj yichʼ pasel xchiʼuk te to oy ta Raba ti bu oy li j-ammonetike. Li skajonale baluneb xukʼubil* snatil xchiʼuk chanib xukʼubil sjamlej, jaʼ ti kʼu onoʼox snatil li jun xukʼubile.
12 Li vaʼ kʼakʼale, laj kuʼunintik li osil liʼe: chlik ta Aroer+ ti te oy ta stsʼel li stenlejaltik Arnone* xchiʼuk li j-oʼlol vitstikaltik yuʼun Galaade. Jaʼ laj kakʼbe jrubenetik xchiʼuk jgadetik+ li jteklumetik yuʼunike.
13 Pe li skomenal* yosilal Galaad xchiʼuk sjunul li yosilal Basan ti jaʼ sventainoj Ogue laj kakʼbe li j-oʼlol snitilulal Manasese.+ Sjunul li yosilal Argob ti jaʼ yuʼun Basane nabil ti jaʼ toʼox yosil li jrefaetike.
14 »Li Jair+ ti jaʼ xnichʼon Manasese laj yuʼunin sjunul li yosilal Argob+ kʼalal to ta stsʼak yosilik li jguesuretik xchiʼuk jmaakatetike.+ Ta skoj li sbie, Avot-Jair*+ laj yakʼbe sbi sjunlej li yosilal Basane, jech-o kʼalal to avie.
15 Li Makire+ jaʼ laj kakʼbe li yosilal Galaade.
16 Li jrubenetik xchiʼuk jgadetike+ jaʼ laj kakʼbeik li osil chlik ta Galaad kʼalal to ta stenlejaltik Arnone,* jaʼ kʼot ta tsʼak yuʼunik li oʼlol stenlejaltike. Jech xtok, kʼot kʼalal to ta Jabok, jaʼ li stsʼak yosil j-ammonetik ta stenlejaltike,
17 kʼot kʼalal to ta Araba, ta Jordan xchiʼuk li ta tsʼak ti chlik ta Kineret kʼalal to ta nab Arabae, jaʼ li nab Muerto* ti te chpaj ta yok vits Pisga ta stukʼil slokʼeb kʼakʼale.+
18 »Xi laj kalbeik mantale: ‹Li Jeova Dios avuʼunike laj xa yakʼ avuʼuninik li osil liʼe. Skotol li viniketik ti tsots yoʼontonike ta stsak batel yabtejebik, jaʼ jbabe chbatik, jaʼ patil to li achiʼiltakik ta vokʼele, li j-israeletike.+
19 Li jteklumetik laj kakʼboxuke jaʼ noʼox te chnakiik komel li avajnilik, li anichʼnabik xchiʼuk li achonbolomike (lek jnaʼoj ti ep achonbolomike).
20 Jaʼ to chasutik talel mi akʼbat xa ox xkux yoʼontonik yuʼun Jeova li achiʼiltakik ta vokʼel jech kʼuchaʼal la spas ta atojolalike. Jaʼ to chasutik talel mi laj xa ox yuʼuninik li osil ch-akʼbatik yuʼun li Jeova Dios yuʼunik ta jot ukʼum Jordane. Chasutik talel ti bu la ata arextoik* kuʼune›.+
21 »Xi laj kalbe mantal Josue li vaʼ kʼakʼale:+ ‹Laj avil ta asat ti kʼusi la spasbe chaʼvoʼ ajvaliletik li Jeova Dios avuʼunike. Li Jeovae jech tspasbe skotol li ajvaliletik ti butik chajelave.+
22 Mu xaxiʼik yuʼun, yuʼun jaʼ tspak akʼoplalik stuk+ li Jeova Dios avuʼunike›.
23 »Li vaʼ kʼakʼale, la jkʼanbe vokol li Jeovae, xi laj kalbee:
24 ‹Kajval Jeova ti voʼot Mukʼul Jpasmantalote, lik xa avakʼ ta ilel amukʼulal ta stojolal li avajtunele xchiʼuk ti oy sjuʼel li akʼobe,+ yuʼun ¿mi oy xa noʼox van yan dios ta vinajel o ta balumil ti jech chakʼ ta ilel sjuʼel stsatsal jech kʼuchaʼal chavakʼ ta ilel voʼote?+
25 Avokoluk, akʼo jelavkun, akʼo bat jkʼel li lekil balumil ta jot xokon Jordane, jaʼ li lekil vitstikaltik xchiʼuk li Libanoe›.+
26 Pe xkapet-o tajek sjol Jeova ta jtojolal ta akojik,+ jaʼ yuʼun muʼyuk la xchikintabun. Kʼajomal noʼox xi laj yalbun li Jeovae: ‹¡Anchan xa! Mu xa jkʼan xavalbun skʼoplal taje.
27 Muyan batel li ta jol vits Pisgae,+ kʼelo noʼox batel li osil ta smaleb kʼakʼale, ta norte, ta sur xchiʼuk ta slokʼeb kʼakʼal, yuʼun muʼyuk chatuchʼ jelavel li Jordane.+
28 Vaʼano li Josuee,+ patbo yoʼonton xchiʼuk tsatsubtasbo yoʼonton, yuʼun jaʼ chtuchʼ jelavel,+ jaʼ jbabe chbat yuʼun li jteklume, jaʼ chakʼbe xrextoinik* li osil chbat akʼele›.
29 Taje te kʼot ta pasel skotol kʼalal te toʼox nakalutik ta stenlejaltik ta yeloval Bet-Peore.+
Tsʼibetik ta yok vun
^ O «beoʼtik ta stenlejaltik Arnon».
^ O jaʼ van skʼoplal «ikʼal basalto ton».
^ Li jun xukʼubile jaʼ 44.5 sentimetro snatil. Kʼelo Apendise B14.
^ O «beoʼtik ta stenlejaltik Arnone».
^ O «skomelal».
^ Jaʼ skʼan xal ‹karpanaetik ta jteklum yuʼun Jair›.
^ O «beoʼtik ta stenlejaltik Arnone».
^ Literal «nab Salado».
^ O «apukulalik; aparteik».
^ O «ta spukulalik; sparteinik».
