Deuteronomio 31:1-30
31 Li Moisese lokʼ batel, bat xchiʼin ta loʼil skotol li Israele,
2 xi laj yalbe yaʼiike: «Li avie, kichʼoj xa 120 jabil.+ Mu xa xuʼ jbeiltasoxuk batel,* yuʼun xi laj yalbun li Jeovae: ‹Muʼyuk chatuchʼ jelavel li Jordane›.+
3 Jaʼ jbabe chbat avuʼunik li Jeova Dios avuʼunike, jaʼ tslajesbe skʼoplal ta atojolalik li mukʼtik lumetik liʼe xchiʼuk voʼoxuk chavichʼbeik li yosilike.+ Jech kʼuchaʼal yaloj onoʼox li Jeovae, jaʼ tsbeiltasoxuk Josue+ sventa xatuchʼik jelavel li Jordane.
4 Li Jeovae jech tspasbe kʼuchaʼal la spasbe li Seon+ xchiʼuk Og+ ti jaʼ ajvaliletik yuʼun li j-amorreoetike xchiʼuk jech kʼuchaʼal la spasbe li yosilik kʼalal la slajesbe skʼoplal li jteklumetik taje.+
5 Mi laj yakʼ ta avok ta akʼobik Jeova li avajkontraike, jech me xapasbeik kʼuchaʼal chal skotol li mantaletik laj kalboxuke.+
6 Tsotsuk avoʼontonik+ xchiʼuk mu me xachibajik. Mu xaxiʼik xchiʼuk mu xnik avoʼontonik yuʼun,+ yuʼun te xchiʼukoxuk ta xanbal li Jeova Dios avuʼunike. Muʼyuk chiktaoxuk xchiʼuk muʼyuk tstenoxuk komel».+
7 Li Moises une la stak ta ikʼel li Josuee xchiʼuk xi laj yalbe kʼalal te skʼeloj skotol li Israele: «Tsotsuk avoʼonton xchiʼuk mu xachibaj,+ yuʼun voʼot chavikʼ batel ta osil li jteklume, jaʼ li osil ti laj yakʼ ye Jeova chakʼbe li smoltotakike. Voʼot chavakʼbe ta xrextoik.*+
8 Jaʼ jbabe chbat avuʼun li Jeovae xchiʼuk te chchiʼinot-o.+ Muʼyuk chiktaot xchiʼuk muʼyuk tstenot komel. Mu xaxiʼ xchiʼuk mu xnik avoʼonton».+
9 Li Moisese la stsʼiba li Mantal taje,+ laje laj yakʼbe skotol li moletik ta Israele xchiʼuk li paleetik ti jaʼ jlevietik ti jaʼ chkuchik batel li xkaxail strato Jeovae.
10 Xi laj yalanbe mantal li Moisese: «Li ta vukvuk jabil kʼalal jaʼo yorail li sjabilal kolebale,+ kʼalal jaʼo Skʼinal Axibalnaetike,*+
11 kʼalal jaʼo chtal skotol Israel ta yeloval li Jeova Dios avuʼun+ ti bu stʼujoje, skʼan te xavapta li Mantal liʼe sventa xaʼi skotol li Israele.+
12 Tsobo li jteklume,+ li viniketike, li antsetike, li ololetike xchiʼuk li jyanlumetik ti te nakal ta ateklumale sventa xchikintaik, sventa xaʼibeik smelolal xchiʼuk xiʼtaik* li Jeova Dios avuʼunike xchiʼuk akʼo skʼelik lek sventa xakʼ ta xkuxlejalik skotol li kʼusitik chal li Mantal liʼe.
13 Vaʼun, li xnichʼnabik ti mu to xojtikinik li Mantale chlik xchikintaik+ xchiʼuk chlik xchanik xiʼtael li Jeova Dios avuʼunike, jech tspasik ti kʼu sjalil chkuxiik li ta osil ti chbat avuʼuninik ta jot Jordane».+
14 Vaʼun, li Jeovae xi laj yalbe li Moisese: «Jutuk xa skʼan xacham,+ tako ta ikʼel li Josuee xchiʼuk te xabatik ta karpana sventa tsobobbail sventa xkakʼbe yabtel».+ Jaʼ yuʼun, batik li Moises xchiʼuk Josuee, te la svaʼan sbaik li ta karpana sventa tsobobbaile.
15 Te laj yakʼ sba ta ilel ta karpana li Jeovae, te laj yakʼ sba ta ilel li ta jvol toke,* li jvol toke te laj yakʼ sba ta yochebal karpana.+
16 Vaʼun, li Jeovae xi laj yalbe li Moisese: «Poʼot xa tajek skʼan xacham,* vaʼun li jteklume chlik yichʼik ta mukʼ li sdios jyanlumetik ti te nakalik ta sjoylejal ti bu chbat nakiikuke.+ Chlik yiktaikun+ xchiʼuk muʼyuk chichʼik ta mukʼ li jtrato la jpas xchiʼukike.+
17 Tstsan skʼakʼal koʼonton ta stojolalik li vaʼ kʼakʼale,+ ta xkiktaik+ xchiʼuk muʼyuk chkakʼ ta ilel jsat ta stojolalik+ jaʼ to mi laj skʼoplalike. Xi chlik yalik kʼalal mi laj xa ox snuptan ep svokolik+ xchiʼuk kʼalal oyik ta vul oʼontone: ‹¿Mi mu van jaʼuk ta skoj ti muʼyuk liʼ oy ta jtojolaltik li Dios kuʼuntik ti jech chkil jvokoltike?›.+
18 Pe li vaʼ kʼakʼale, muʼyuk chkakʼ ta ilel jsat ta skoj li kʼusitik chopol tspasik kʼalal chbat stsʼakliik yan diosetike.+
19 »Tsʼibaik li kʼejoj liʼe+ xchiʼuk akʼbeik xchan li j-israeletike.+ Akʼo skomes ta sjolik* sventa xvul ta sjolik kʼusi chkʼot ta pasel kʼalal muʼyuk chchʼunbeik smantal li Diose.+
20 Kʼalal mi laj xa ox kikʼik ochel li ta balumil ti laj kakʼ ke ta stojolal li smoltotakike,+ jun balumil ti bu oy lek leche xchiʼuk pome,+ mi veʼik xa ox ti lek noj kom xchʼutik xchiʼuk mi oy xa ox ep kʼusitik yuʼunike,*+ jaʼ chlik stsʼakliik li yan diosetike, jaʼ chtunik ta stojolal xchiʼuk muʼyuk xa chichʼikun ta mukʼ xchiʼuk muʼyuk xa tstsakik ta mukʼ li jtratoe.+
21 Mi la snuptan svokolik xchiʼuk mi oyik ta vul oʼontone,+ li kʼejoje jaʼ chtun sventa xvul ta sjolik kʼusi chkʼot ta pasel kʼalal muʼyuk chchʼunbeik smantal li Diose (yuʼun skʼan mu xchʼay ta sjolik kʼejoj li snitilulalike), yuʼun li voʼone xkojtikin xa onoʼox kʼusi yakal chchʼi ta yoʼontonik+ kʼalal mu to ch-ochik kuʼun li ta balumil ti kakʼoj ke chkakʼbeike».
22 Jaʼ yuʼun, li vaʼ kʼakʼale, li Moisese la stsʼiba li kʼejoje xchiʼuk laj yakʼbe xchan li j-israeletike.
23 Vaʼun, laj yakʼbe* yabtel li Josue+ xnichʼon li Nune, xi laj yalbee: «Tsotsuk me avoʼonton xchiʼuk mu xachibaj,+ yuʼun voʼot chavikʼ batel j-israeletik li ta osil ti kakʼoj ke chkakʼbeike,+ te ta jchiʼinot-o».
24 Kʼalal naka noʼox tsuts yuʼun stsʼibael ta jlik livro skotol li kʼusitik chal li Mantale,+
25 li Moisese xi laj yalbe mantal li jlevietik ti jaʼ yabtel chkuchik batel li xkaxail strato Jeovae:
26 «Ichʼik batel li slivroal Mantale,+ te xavakʼik ta xokon li xkaxail+ strato Jeova Dios avuʼunike, jaʼ chkʼot ta testigo ti chal ti oy amulike.
27 Yuʼun jnaʼoj lek ti chatoy abaike+ xchiʼuk ti mu xachʼunik mantale.*+ Mi batsʼi jtoybaoxuk xa onoʼox ta stojolal Jeova ti liʼ to kuxulune, ¡mas to chatoy abaik mi chamemun xa oxe!
28 Ikʼbeikun talel skotol li moletik ta jujuchop anitilulalike xchiʼuk li j-abteletik avuʼunike, yuʼun chkalbe yaʼiik ta xchikinik. Ta jvaʼan ta testigo ta stojolalik li vinajel xchiʼuk balumil sventa x-albat ti oy smulike.+
29 Yuʼun jnaʼoj lek ti toj chopol kʼusitik chlik apasik+ mi licham xa oxe xchiʼuk chakʼejpʼujik* lokʼel li ta be ti laj kakʼ avojtikinike. Vaʼun, chavil avokolik ta jelavel+ ta skoj ti jaʼ chlik apasik li kʼusi chopol chil Jeovae xchiʼuk chasokbeik yoʼonton ta skoj li kʼusi chapasike».
30 Te yaʼioj sjunul tsobobbail yuʼun Israel kʼalal la xchol ta alel Moises skotol li kʼusitik chal li kʼejoj liʼe:+
Tsʼibetik ta yok vun
^ Literal «xi-och xilokʼ».
^ O «spukulalik; sparteik».
^ O «Nakʼobbailetik ti te noʼox kʼuk sjalil chtune».
^ Literal «jtel toke».
^ O «xbat achiʼin amoltotak».
^ Literal «Akʼbeik ta ye».
^ Literal «mi jupʼik xa oxe».
^ Yaʼeluke, jaʼ skʼoplal Dios.
^ Literal «ti teʼtsinan anukʼike».
^ O «chakʼejevik; chatsʼepʼujik».
