Deuteronomio 32:1-52
32 «Chikintao avaʼi, vinajel, voʼon chikʼopoj,aʼio avaʼi balumil li kʼusi chlokʼ ta kee.
2 Li chanubtasel kuʼune chyal talel kʼuchaʼal voʼ ta vinajel;li kʼusi chlokʼ ta kee jech chpʼaj* kʼuchaʼal tsʼujul,jech kʼuchaʼal kʼinobal ti chkʼot ta yaxaltikexchiʼuk jech kʼuchaʼal kʼalal chakʼ tsots voʼ ta tsʼiʼleltike.
3 Yuʼun voʼon chkakʼ ta ojtikinbel sbi li Jeovae.+
¡Albeik skʼoplal yutsilal li Dios kuʼuntike!+
4 Li Mukʼta Tone tukʼ li yabteltake,+yuʼun tukʼ skotol li kʼusitik tspase.+
Jaʼ jun Dios ti tukʼ yoʼontone,+ mu spas li kʼusi muʼyuk tukʼe;+melel kʼusi chal xchiʼuk tukʼ yoʼonton.+
5 Jaʼ stukik li buchʼutik toj chopol kʼusi tspasike.+
Maʼuk xnichʼnabtak Dios; li xchopolilike jaʼ yuʼun stukik.+
¡Jaʼ jkʼol kuxlejal ti toj chopol xchiʼuk ti muʼyuk stukʼilike!+
6 Bol jteklum ti muʼyuk apʼijile,+¿mi sta-o ti jech chapasbe li Jeovae?+
¿Mi mu jaʼuk Atot ti lavokʼ talel yuʼune?+¿Mi mu jaʼuk la spasot xchiʼuk ti lakʼot yuʼun ta mukʼta lume?
7 Vuleso ta ajol li kʼusi kʼot ta pasel ta voʼnee;tsako ta venta ti jaykʼol kuxlejal laj echʼanuke.
Jakʼbo atot, jaʼ xuʼ chalbot smelolal;+jakʼbo li moletik avuʼune, jaʼ chcholboxuk smelolal.
8 Kʼalal laj yakʼbe xrexto* mukʼta lumetik li Dios ti toj toyol oye,+kʼalal ta jujuntal butik bat yuʼun li xnichʼnabtak Adane,*+lek laj yakʼbe stsʼak li jujun jteklume,+jaʼ la stsak ta venta ti kʼu yepal xnichʼnab li Israele.+
9 Li xrexto* Jeovae jaʼ li steklumale;+jaʼ li Jakobe.+
10 Te la sta ta takixokol balumil,+ta xokol balumil ti bu x-avlajet chonbolometike.+
La sjoy sventa xchabi, la stukʼulan+xchiʼuk jech la xchabi kʼuchaʼal yuninal* sat.+
11 Jech la spas kʼuchaʼal aguila ti te xjoyet chvil ta stase,te xvilet ta sba yalab,chlichʼan xikʼ sventa xkuch batel,tskajan batel ta snatil kʼukʼumal,+
12 jaʼ noʼox stuk Jeova la sbeiltas;*+muʼyuk koltaat yuʼun mi junuk sdios jyanlumetik.+
13 Te laj yakʼ xanavuk ta toyol osiltik,+jaʼ yuʼun la slajes li kʼusi chchʼi ta yaxaltike.+
Laj yakʼbe slajes pom ti te la slokʼes ta mukʼta tayal tonexchiʼuk laj yakʼbe slajes aseite ti la slokʼes ta tsatsal tone,
14 laj yakʼbe slajes mantekiya ti pasbil ta yaʼlel xchuʼ vakaxe xchiʼuk laj yakʼbe yuchʼ yaʼlel xchuʼ chijetik,laj yakʼbe stiʼ chijetik ti bu ven lekike,*tot chijetik ta Basan xchiʼuk tot tentsunetik,jmoj laj yakʼbe slajes xchiʼuk trigo ti bu ven lekike;+laj avuchʼ vino ti pasbil ta yaʼlel uvae.
15 Kʼalal lek xa ox jupʼem li Jesurune,* likvan ta tekʼel ta skoj stoyobbail.
Lajupʼ xa, lachʼi xa xchiʼuk xatoyet xa chavaʼi aba.+
Jaʼ yuʼun, laj yikta li Dios ti jaʼ pasate+xchiʼuk la sten komel li Mukʼta Ton ti jaʼ jpojvanej yuʼune.
16 La sabeik skʼakʼal yoʼonton ta skoj sdios jyanlumetik;+chopol laj yaʼi sba yuʼunik ta skoj li kʼusitik chopol tspasike.+
17 Jaʼ laj yakʼbeik milbil matanal li pukujetike, maʼuk li Diose,+jaʼ li diosetik ti mu toʼox xojtikinike,achʼ diosetik ti jaʼ to laj lokʼanuk tale,diosetik ti muʼyuk laj yojtikinik li smoltotakike.
18 Chʼay ta avoʼonton li Mukʼta Ton+ ti jaʼ la xchiʼinot ta xchʼute,muʼyuk xvul ta ajol li Dios ti jaʼ la svokʼesot tale.+
19 Kʼalal laj yakʼ venta li Jeovae, la spʼaj+ta skoj ti chopol kʼusi tspasik li yalab xnichʼnabike.
20 Jaʼ yuʼun, xi laj yale: ‹Ta jnakʼ* jsat ta stojolalik;+te chkil kʼusi chkʼot ta pasel ta stojolalik.
Jaʼ jkʼol kuxlejal ti chopol tajek stalelalike,+alab nichʼnabiletik ti muʼyuk stukʼil yoʼontonike.+
21 La sabeikun skʼakʼal koʼonton* ta skoj ti laj yichʼik ta mukʼ li kʼusi maʼuk melel diose;+chopol laj kaʼi jba yuʼunik ta skoj li santoik ti muʼyuk sbalile.+
Jaʼ yuʼun, ta xkakʼ itʼixajikuk yoʼontonik ta skoj jun jteklum ti muʼyuk sbalile;+chopol chaʼi sbaik kuʼun ta skoj jun bol jteklum.+
22 Yuʼun li skʼakʼal koʼontone tstsan yuʼun kʼokʼ,+xtiltun* skʼakʼal kʼalal to ta yutil Mukinal,*+ta xchikʼ li balumile xchiʼuk li kʼusitik te chchʼie,chtil* yuʼun kʼalal to ta yok vitsetik.
23 Chkepajesbe li svokolike;ta jtʼilesbeik batel skotol li jflechatake.
24 Lubem tajek chkomik ta skoj viʼnal,+lajem tajek chkomik ta skoj ti tstsakatik ta tsatsal kʼokʼe xchiʼuk chopol kʼu yelan chichʼik lajesel.+
Ta jtak talel chonbolometik ta stojolalik ti chtiʼatike+xchiʼuk svenenoal kiletel chonetik ti ta pukuk* chanavike.
25 Li ta panae* te chlajik ta espada;+li ta yut nae oy xiʼel chaʼi+li kereme xchiʼuk li tojol tsebe,li kʼox olole xchiʼuk li buchʼu sakchijan xa sjole.+
26 Xiuk laj kale: «Ta jpukik batel;muʼyuk xa buchʼu tsta ta nabel skʼoplalik»,
27 pe muʼyuk jech laj kal ta skoj ti chixiʼ yuʼun li kajkontratake,+yuʼun xuʼ yan-o kʼusi tsnopik li jkontrainvanejetike.+
Xuʼ xi chalike: «Kuch kuʼuntik ta juʼel jtuktik;+maʼuk ta sjuʼel Jeova jech kʼot ta pasel».
28 Yuʼun jaʼik jun jteklum ti chʼayem snopobil yuʼunike*xchiʼuk mu xaʼibeik jutebuk smelolal.+
29 ¡Ti pʼijikuk to jutuke!+ Tsnopbeik to skʼoplal ti jechuke.+
Tsvules to ta sjolik jechuk li kʼusi kʼot ta stojolalike.+
30 ¿Kʼuxi xa noʼox tsnuts batel yuʼun jmil ta voʼ li jun noʼox krixchanoe+xchiʼuk kʼuxi xa noʼox chjatav batel yuʼun lajunmil ta voʼ mi kʼajomal noʼox chaʼvoʼike?
Mu xuʼ, jaʼ to mi chonbat ta skʼobik yuʼun li Mukʼta Ton yuʼunike+xchiʼuk jaʼ to mi akʼbat ta skʼobik yuʼun li Jeovae.
31 Yuʼun li mukʼta ton yuʼunike mu xkoʼolaj kʼuchaʼal li Mukʼta Ton kuʼuntike,+taje jech snaʼojik ek li kajkontratike.+
32 Li s-uvaike te likem talel ta Sodoma,te likem talel ta yosilal Gomorra.+
Oy svenenoal li sat s-uvaike,toj chʼaik li jujuchoj sate.+
33 Li svinoike jaʼ svenenoal kiletel chon,jaʼ svenenoal kovra chonetik ti chmilvane.
34 Skotol li kʼusitik spasojike te kʼejel* kuʼunxchiʼuk kakʼojbe lek seyoal.+
35 Voʼon oy ta jba ta jpak xchiʼuk voʼon chkakʼbe stojol,+jaʼ stojol chkʼot kuʼun ti kʼalal tstsul yakanike,+yuʼun nopol xa skʼakʼalil ti tsta svokolike,anil noʼox chvul ta stojolalik li kʼusi smalaojike›.
36 Jaʼ chchapan steklumal li Jeovae,+chkʼuxubaj ta yoʼonton* yajtuneltak+mi laj yil ti chʼabal xa yipal yuʼunikexchiʼuk mi jaʼ xa noʼox komemik li buchʼu mu snaʼ spak skʼoplalik xchiʼuk ti kʼunibemik xae.
37 Vaʼun, xi ta xale: ‹¿Bu oy li diosetik avuʼunik une,+li mukʼta ton ti bu asaʼoj anakʼobbailike,
38 ti ta toʼox slajesik li sjupʼemal milbil matanal chavakʼike,*ti ta toʼox xuchʼik li matanal vino chavakʼike?+
Akʼo likikuk tal, akʼo skoltaoxuk.
Jaʼ akʼo kʼotuk ta anakʼobbailik.
39 Avi une akʼik venta, li voʼone, voʼon Diosun,+muʼyuk yan dios, jtuk noʼox.+
Voʼon chimilvan xchiʼuk voʼon chkakʼ kuxlejal yan velta.+
Voʼon chiyayijesvan,+ voʼon chipoxtavan xtok,+mi oy buchʼu och ta jkʼobe, muʼyuk xa buchʼu xuʼ xpojat.+
40 Yuʼun ta jtoy muyel jkʼob ta vinajel,vaʼun xi chkale: «Jamal chkal ta skoj ti kuxulun sbatel osile»,+
41 mi la juxbe ye li j-espada ti stsʼayayet noʼoxexchiʼuk mi la jchapan jkʼob sventa xichapanvane,+ta jpakbe sutel li kajkontratake,+chkakʼbeik stoj li buchʼutik tspʼajikune.
42 Chkakʼ yakubikuk ta chʼichʼ li jflechatakexchiʼuk chkakʼbe stiʼ bekʼet li j-espadae,jaʼ xchʼichʼelik li buchʼutik chamemike xchiʼuk li buchʼutik tikʼajtik ta chukele,jech xtok, ta stibeik sjol li jnitvanejetik yuʼun jkontrainvanejetike›.
43 Muyubajanik, mukʼtik lumetik, xchiʼuk li buchʼutik te nakaloxuke,+yuʼun jaʼ tspakbe skʼoplal li xchʼichʼel yajtuneltake,+tspakbe sutel li yajkontratake+xchiʼuk tsakubtasbe li yosilal steklumale».
44 Vaʼun, tal li Moisese xchiʼuk la xchol ta alel skotol li kʼusi chal li kʼejoje, te yaʼioj sjunul li jteklume,+ te xchiʼuk Osea*+ ti jaʼ xnichʼon li Nune.
45 Kʼalal laj xa ox yoʼonton yalbel skotol Israel li kʼusi tsʼibabile,
46 xi laj yal li Moisese: «Akʼo ta avoʼontonik skotol li pʼijubtasel ti yakal chkalboxuk avi+ sventa xavalbeik anichʼnabik ti akʼo skʼelik lek sventa xakʼ ta xkuxlejalik skotol kʼusitik chal li Mantal liʼe.+
47 Yuʼun maʼuk me ti muʼyuk stu li kʼusi chkale, jaʼ sventa xakuxiik.+ Ta skoj li kʼusitik chkale, xuʼ jal tajek xakuxiik li ta balumil chbat avuʼuninik mi la atuchʼik jelavel li Jordane».
48 Li Jeovae xi laj yalbe Moises li vaʼ kʼakʼale:
49 «Muyan batel li ta vitstikaltik Abarime,+ batan ta vits Nebo+ ti te xkom ta yosilal Moab ta yeloval Jerikoe. Kʼelo batel li yosilal Kanaan ti chkakʼbe yuʼunin li j-israeletike.+
50 Te chacham ta vits ti bu chamuy batele, vaʼun chavichʼ ikʼel batel ti bu oy li amoltotake,* jech chacham kʼuchaʼal li abankil Aaron ta vits Ore+ xchiʼuk ti laj yichʼ ikʼel batel ti bu oy li smoltotake,
51 yuʼun achaʼvoʼalik muʼyuk tukʼ laj avakʼ abaik ta jtojolal kʼalal te oyoxuk xchiʼuk j-israeletik ta stsʼel voʼ ta Meriba+ ta Kades ti te oy ta takixokol balumil ta Sine, muʼyuk la achʼultajesikun ta yeloval li jteklum Israele.+
52 Ta nom noʼox chakʼel batel li osile, muʼyuk chajelav batel li ta osil chkakʼbe jteklum Israele».+
Tsʼibetik ta yok vun
^ O «tstsʼuj».
^ O «spukulal; sparte».
^ O jaʼ van skʼoplal «krixchanoetike».
^ O «spukulal; sparte».
^ O «yunenal».
^ Jaʼ xkaltik, li Jakobe.
^ Literal «jupʼemike».
^ Jaʼ skʼan xal ‹jun ti buchʼu tukʼ yoʼontone›. Jech chichʼ albel skʼoplal Israel ti chakʼ ta aʼiel ti tsots skʼoplale.
^ O «jmuk».
^ O «Itʼixaj koʼonton yuʼunik».
^ O «xloklun; xpulpun».
^ O «tstsan».
^ O «lum».
^ O «pat nae».
^ O jaʼ van skʼoplal «ti mu xchikintaik tojobtasele».
^ O «nakʼal».
^ O «chopol chaʼi sba ta stojolal».
^ O «li ven lekil milbil matanal chavakʼike».
^ Jaʼ sbatsʼi bi li Josuee. Li skomkom bie jaʼ Osea. Li snatil bie jaʼ Osaya ti jaʼ skʼan xal ‹pojbil yuʼun Jeova› o ‹pojvan xa li Jeovae›.
^ Taje jaʼ jun nichimal loʼil ti jaʼ chalbe skʼoplal kʼalal oy buchʼu chchame.
