Deuteronomio 34:1-12
34 Vaʼun, li Moisese te bat li ta takixokol balumil ta stenlejaltik yuʼun Moabe, te bat ta vits Nebo+ ta toyolaltik Pisga+ ta yeloval Jeriko.+ Li Jeovae laj yakʼbe yil skotol li osil ti chlik ta Galaad kʼalal to ta Dane+
2 xchiʼuk skotol li yosil Neftalie, li yosil Efraine, li yosil Manasese, skotol li yosil Juda kʼalal to ta nab ta smaleb kʼakʼale,*+
3 li yosilal Neguebe,+ li yosilal Jordane,+ li stenlejaltik Jerikoe, li jteklum bu tsʼunajtik xane xchiʼuk kʼalal to ta yosilal Soar.+
4 Li Jeovae xi laj yalbe li Moisese: «Leʼe jaʼ li osil ti laj kakʼ ke ta stojolal Abraan, Isaak xchiʼuk Jakob kʼalal xi laj kalbeike: ‹Jaʼ chkakʼbe anitilulal›.+ Ta xkakʼ avil li osile, pe muʼyuk chajelav batel».+
5 Ta tsʼakale, li Moises ti jaʼ yajtunel li Jeovae te cham ta yosilal Moab jech kʼuchaʼal yaloj onoʼox li Jeovae.+
6 Te la smuk ta stenlejaltik ta yosilal Moab ta yeloval Bet-Peor. Pe muʼyuk buchʼu snaʼ bu xkom smukinal kʼalal to avie.+
7 Li Moisese yichʼoj xa ox 120 jabil kʼalal chame.+ Lek to xil osil xchiʼuk lek to tsatsal vinik.
8 Li jteklum Israele 30 kʼakʼal laj yokʼitaik Moises li ta takixokol balumil ta stenlejaltik yuʼun Moabe.+ Vaʼun, tsuts ti kʼu sjalil skʼan xokʼitaike xchiʼuk ti kʼu sjalil skʼan xat yoʼontonik ta stojolal li Moisese.
9 Li Josue xnichʼon li Nune oy lek spʼijil, yuʼun li Moisese laj yakʼ skʼob ta stojolal;+ li j-israeletike lik xchikintabeik li kʼusi chale, jech la spasik jech kʼuchaʼal albat mantal yuʼun Jeova li Moisese.+
10 Pe muʼyuk-o ayanem yan j-alkʼop ta Israel jech kʼuchaʼal li Moises+ ti lek tajek ojtikinat yuʼun*+ li Jeovae.
11 La spas skotol li senyailtak, li skʼelobiltak juʼelal ti albat yuʼun Jeova akʼo bat spas ta yosilal Ejiptoe, ta stojolal faraon, ta stojolal yajtuneltak xchiʼuk ta sjunul li yosile.+
12 Li Moisese laj yakʼ ta ilel tsatsal juʼelal ti labal sba laj yil skotol li Israele.+
Tsʼibetik ta yok vun
^ Jaʼ xkaltik, li Mukʼta nabe, li nab Mediterraneoe.
^ Literal «laj yilbe sba satik».
