Deuteronomio 4:1-49
4 »Israel, chikintao avaʼi li mantaletik xchiʼuk li kʼusitik chapanbil ti yakal chkakʼ avaʼiik avi kʼuxi ta chʼunele sventa jech chakuxiik+ xchiʼuk xuʼ cha-ochik li ta balumil ti chakʼ avuʼuninik li Jeova ti jaʼ Sdios amoltotakike.
2 Mu me xavakʼbeik xchiʼil li mantal yakal chkalboxuke xchiʼuk mu me xachʼayik mi jutebuk,+ jaʼ chʼunik li smantaltak Jeova Dios avuʼunik ti yakal chkalboxuke.
3 »Laj avil ta asat atukik li kʼusi la spasbe Baal ta Peor li Jeovae; li Jeova Dios avuʼunike la slajesbe skʼoplal skotol li buchʼutik te xtijet* ta spat li Baal ta Peore.+
4 Yan li voʼoxuke kuxuloxuk to ti kʼu avepalik te xanapʼetik ta stojolal li Jeova Dios avuʼunike.
5 Jech xtok, laj kakʼ anaʼik li mantaletik xchiʼuk li kʼusitik chapanbil+ jech kʼuchaʼal laj yalbun li Jeova Dios kuʼune sventa xachʼunik xtok kʼalal mi laj avuʼuninik li osile.
6 Skʼan me xachʼunik lek,+ mi jech chapasike, chavakʼbeik yil jteklumetik ti pʼijoxuke+ xchiʼuk ti xavaʼibeik smelolale.+ Kʼalal mi laj yaʼibeik skʼoplal skotol li mantaletik oy avuʼunike, xi chlik yalike: ‹Li mukʼta lum liʼe toj pʼijik ta melel xchiʼuk lek xaʼibeik smelolal›.+
7 Yuʼun ¿mi oy junuk mukʼta lum ti nopol oy ta stojolalik li sdiosik kʼalal tstaik ta naʼele? ¿Mi mu jaʼuk noʼox nopol oy ta jtojolaltik li Jeova Dios kuʼuntik kʼalal ta jtatik ta naʼele?+
8 ¿Mi oy xa noʼox jech junuk mukʼta lum ti oy mantaletik yuʼunik xchiʼuk kʼusitik tukʼ chapanbil jech kʼuchaʼal skotol li Mantal yakal chkalboxuk avie?+
9 »Ichʼo me apʼijil xchiʼuk kʼelo me aba sventa mu xchʼay xavaʼi li kʼusi laj avil ta asate xchiʼuk sventa mu xchʼay ta avoʼonton ti kʼu sjalil kuxulote. Jech xtok, skʼan xavakʼbe yojtikin li anichʼnabtake xchiʼuk li amamobtake.+
10 Xi laj yalbun Jeova Dios avuʼun kʼalal te vaʼalot ta yeloval Jeova ta Orebe: ‹Tsobbun talel li jteklum sventa xaʼiik li kʼusi chkale,+ sventa jech xuʼ xchanik kʼu yelan chiʼtaikun*+ ti kʼu sjalil kuxulik ta balumile xchiʼuk sventa xchanubtas li yalab xnichʼnabike›.+
11 »Jaʼ yuʼun, lanopajik talel xchiʼuk te vaʼal lakomik ta yok vits, li vitse xtiltun* skʼakʼal ti chkʼot kʼalal to ta vinajele,* ikʼub tajek osil, tal tok xchiʼuk pimub tajek li toke.+
12 Lik skʼoponoxuk tal ta kʼokʼ+ li Jeovae. Laj avaʼibeik yechʼomal li jujupʼel kʼope, pe muʼyuk kʼusi la ataik ta kʼelel,+ jaʼ noʼox laj avaʼiik li yechʼomal eile.+
13 Xchiʼuk laj yalboxuk li strato ti skʼan xatsakik ta ventae,+ li Lajuneb Mantale.*+ Laje, la stsʼiba ta chaʼpech ton.+
14 Li vaʼ kʼakʼale, laj yalbun Jeova ti akʼo xkalboxuk li mantaletik xchiʼuk li kʼusitik chapanbil yuʼune, ti skʼan xachʼunik ti bu chbat naklanik li ta osil ti jaʼ chavuʼuninike.
15 »Jaʼ yuʼun, kʼelo me abaik —ta skoj ti muʼyuk kʼusi laj avilik kʼalal la skʼoponoxuk ta kʼokʼ li Jeova ta Orebe—
16 sventa mu chopoluk kʼusi xapasik ta skoj ti oy kʼusi chavaʼanbeik slokʼole, mi slokʼol vinik o ants,+
17 mi slokʼol jkotuk chonbolom ta balumil, mi slokʼol jkotuk mut ti chvil ta vinajele,+
18 mi slokʼol ti kʼusiuk noʼox xkilet chanav ta lumtike o slokʼol jkotuk choy ti oy ta voʼ ta yolon balumile.+
19 Kʼalal chatoy muyel asat ta vinajele, mi la ata ta kʼelel li kʼakʼale, li lunae* xchiʼuk li kʼanaletike —skotol li soltaroetik ta vinajele—, mu me sloʼlabot avoʼonton, mu me xanijan aba ta stojolal xchiʼuk mu me xavichʼ ta mukʼ.+ Taje jaʼ yakʼojbe skotol jteklumetik ta yolon vinajel li Jeova Dios avuʼune.
20 Pe li voʼoxuke laj yikʼoxuk li Jeovae xchiʼuk la slokʼesoxuk li ta orno ti bu chichʼ unijesel takʼine, jaʼ li ta Ejiptoe, sventa xakʼotik ta jteklum ti jaʼ yuʼun* stuk+ jech kʼuchaʼal kʼotemoxuk li avie.
21 »Voʼoxuk ta akojik ti ilin tajek ta jtojolal+ li Jeovae xchiʼuk laj yalbun ta jamal ti muʼyuk ta jtuchʼ jelavel li Jordane xchiʼuk laj yalbun ti muʼyuk chibat li ta lekil osil ti bu chakʼbot ta arexto* li Jeova Dios avuʼune.+
22 Voʼone liʼ noʼox chicham ta osile; muʼyuk ta jtuchʼ jelavel li Jordane,+ pe li voʼoxuke chatuchʼik jelavel xchiʼuk chavuʼuninik li lekil balumile.
23 Kʼelo me abaik ti mu xchʼay xavaʼiik li trato la spas xchiʼuk voʼoxuk li Jeova Dios avuʼunike,+ jech xtok, mu me kʼusi xapasbeik slokʼol, kʼusiuk noʼox slokʼol ti mu xakʼ apasik li Jeova Dios avuʼunike.+
24 Yuʼun li Jeova Dios avuʼune jaʼ jun kʼokʼ ti chchikʼvane,+ jaʼ jun Dios ti stuk noʼox tskʼan ichʼel ta mukʼe.+
25 »Mi ayan avalab anichʼnabik xchiʼuk mi ayan amamobtakik xchiʼuk mi jal xa tajek lachʼi lakʼopojik ta balumile, pe ti chopol kʼusi chlik apasik xchiʼuk ti kʼusiuk noʼox slokʼol chlik apasik+ xchiʼuk ti chlik apasik li kʼusi chopol ta sat li Jeova Dios avuʼunik ti jaʼ chopol-o chaʼi sba avuʼunike,+
26 jpʼel skʼoplal xchiʼuk anil noʼox chlaj akʼoplalik li ta balumil ta jot Jordan ti chavuʼuninike, ta melel ta jvaʼan ta testigo avi li vinajel xchiʼuk balumil ti jech chkʼot ta atojolalike. Muʼyuk chajalijik te, jpʼel skʼoplal chavichʼik lajesel.+
27 Tspukoxuk batel ta yantik lum+ li Jeovae, jayvoʼ xa noʼox kuxul chakomik+ li ta lumetik ti bu la spukoxuk batel li Jeovae.
28 Te chlik tunanik yuʼun diosetik ti pasbilik ta teʼ xchiʼuk ta ton ti ta skʼob noʼox krixchano pasbile,+ jaʼ li diosetik ti mu kʼusi xilike, ti mu xaʼiik kʼoponele, ti mu snaʼ xveʼike xchiʼuk ti mu kʼusi xaʼibeik yikʼe.
29 »Mi te chlik asaʼ li Jeova Dios avuʼune, ta melel chata+ mi ta sjunul avoʼonton xchiʼuk mi ta sjunul akuxlejal+ chlik ajakʼ ta stojolale.
30 Kʼalal chavil avokole xchiʼuk kʼalal jech chkʼot ta atojolal ta tsʼakal taje, chasut ta stojolal li Jeova Dios avuʼune xchiʼuk chlik achikintabe li kʼusi chale.+
31 Yuʼun li Jeova Dios avuʼune jaʼ jun Dios ti snaʼ xkʼuxubinvane.+ Muʼyuk tstenot komel, muʼyuk chakʼ chaman xchiʼuk muʼyuk chchʼay ta sjol li trato laj yalbe ta jamal li amoltotake.+
32 »Jakʼbo skʼoplal li kʼusitik kʼotem ta pasel ta voʼne kʼalal chʼabalot toʼoxe, ti kʼuxi lik spas vinik ta balumil li Diose; sabo skʼoplal kʼalal to ta jujujot stiʼil vinajel. ¿Mi oy van kʼusi mukʼ jech kʼotem ta pasel junuk velta o mi oy van aʼibil skʼoplal junuk velta jech kʼuchaʼal taje?+
33 ¿Mi oy junuk jteklum ti yaʼiojbe yechʼomal ye Dios ti te chkʼopoj talel ta kʼokʼ jech kʼuchaʼal avaʼioje xchiʼuk ti xuʼ to xkuxie?+
34 ¿Mi oy xa onoʼox jech spasoj Dios ti chikʼ lokʼel jun jteklum ta stojolal yan jteklum ti bu laj yakʼ ta ilel ti chchapanvane, ti laj yakʼ ta ilel li senyaile, li skʼelobil juʼelale,+ ti tspas kʼope,+ ti oy stsatsal skʼobe,+ ti oy sjuʼele, ti chakʼ xiʼel kʼusi tspas+ jech kʼuchaʼal laj avil ta asatik la spas ta atojolalik li Jeova Dios avuʼunik ta Ejiptoe?
35 Li voʼoxuke laj xa avichʼik akʼbel ta ilel li kʼusitik taje yoʼ xanaʼik ti jaʼ melel Dios+ li Jeovae xchiʼuk ti muʼyuk buchʼu yan jech kʼuchaʼal li stuke.+
36 Ta vinajel to laj yakʼ avaʼibe yechʼomal ye sventa stukʼibtasot. Li ta balumile laj yakʼ avil li mukʼta kʼokʼ yuʼune, vaʼun te ta kʼokʼ laj avaʼibe li yechʼomal yee.+
37 »Ta skoj ti skʼanoj amoltotak xchiʼuk ti la stʼujbe li snitilulalik tal yuʼunik ta tsʼakale,+ te skʼelojot stuk kʼalal ta stsatsal sjuʼel la slokʼesot ta Ejiptoe.
38 La snuts lokʼel ta atojolal jteklumetik ti mas mukʼtik xchiʼuk ti mas tsotsike sventa xakʼbot avuʼunin li yosilik ti jaʼ chkʼot ta arexto* jech kʼuchaʼal kʼotem ta pasel avie.+
39 Jaʼ yuʼun li avi kʼakʼale, teuk me ta ajol xchiʼuk akʼo ta avoʼonton ti jaʼ melel Dios ta vinajel xchiʼuk ta balumil li Jeovae.+ Muʼyuk yan.+
40 Skʼan me xachʼunbe li smantaltak ti yakal chkalbot avi sventa lek chbat akuxlejal xchiʼuk xkuxlejal anichʼnabtak ti chtal avuʼun ta tsʼakale xchiʼuk sventa jal xakuxi li ta balumil chakʼbot li Jeova Dios avuʼune».+
41 Li vaʼ kʼakʼale, li Moisese la xchʼak komel oxib jteklum li ta jot xokon Jordan ta stukʼil slokʼeb kʼakʼale.+
42 Mi oy buchʼu mu yolbajuk la smil xchiʼil ti muʼyuk onoʼox xtiʼet sjol ta stojolale,+ skʼan te xjatav batel ta junuk li jteklumetik taje sventa mu xichʼ milel.+
43 Li baʼyel jteklume jaʼ Beser+ ti te xkom ta takixokol balumil ta stenlejaltik ti jaʼ sventa li jrubenetike, li june jaʼ Ramot+ ti te xkom ta Galaad ti jaʼ sventa li jgadetike, li yane jaʼ Golan+ ti te xkom ta Basan ti jaʼ sventa li jmanasesetike.+
44 Taje jaʼ li Mantal+ akʼbatik yuʼun Moises li jteklum Israele.
45 Taje jaʼ li snaʼobile, li mantaletike xchiʼuk li kʼusitik chapanbil ti akʼbatik yuʼun Moises kʼalal lokʼik ta Ejipto li j-israeletike,+
46 li ta yosilal Jordan ta stenlejaltik ta yeloval Bet-Peor+ ta slumal Seon ti jaʼ ajvalil yuʼunik li j-amorreoetik ti te toʼox nakal ta Esbone.+ Taje jaʼ li ajvalil ti tsalat yuʼun Moises xchiʼuk j-israeletik kʼalal lokʼik ta Ejiptoe.+
47 Laj yichʼbeik li yosile xchiʼuk li yosil ajvalil Og+ ta Basane, jaʼ li chaʼvoʼ ajvalil yuʼun j-amorreoetik ti te toʼox oyik ta yosilal Jordan ta stukʼil slokʼeb kʼakʼale.
48 Chlik ta Aroer+ ti te xkom ta stiʼil stenlejaltik Arnon* kʼalal to ta vits Siyon, jaʼ xkaltik, li Ermone.+
49 Laj yuʼuninik xtok sjunul li Araba ta stukʼil slokʼeb kʼakʼal ta yosilal Jordane xchiʼuk li nab Araba* ti te chpaj ta yok vits Pisgae.+
Tsʼibetik ta yok vun
^ O «xnapʼet».
^ O «xloklun; xpulpun».
^ Literal «kʼalal to ta yoʼonton vinajele».
^ Literal «li Lajunpʼel Kʼope». Ojtikinbil kʼuchaʼal Decálogo xtok.
^ O «li ue».
^ O «xrexto; spukulal; sparte».
^ O «apukulal; aparte».
^ O «apukulal; aparte».
^ O «beoʼtik ta stenlejaltik Arnon».
^ Jaʼ xkaltik, nab Salado o nab Muerto.
