Deuteronomio 5:1-33
5 Li Moisese la stsob skotol li Israele, xi laj yalbee: «Chikintao avaʼi, Israel, li mantaletik xchiʼuk li kʼusitik chapanbil yakal chkalboxuk avie. Skʼan xachanik xchiʼuk xakʼelik lek ti xavakʼ ta akuxlejalike.
2 Li Jeova Dios kuʼuntike la spas jun trato xchiʼuk voʼotik li ta Orebe.+
3 Maʼuk xchiʼuk jmoltotaktik ti la spas trato li Jeovae, jaʼ la spas xchiʼuk voʼotik ti kʼu yepal kuxulutik to avie.
4 Akʼelojbe aba asatik xchiʼuk Jeova kʼalal te la xchiʼinoxuk ta loʼil ta vits kʼalal kʼopoj ta kʼokʼe.+
5 Li vaʼ kʼakʼale, ta oʼlol vaʼalun likom yuʼun Jeova xchiʼuk voʼoxuk sventa jelubtasboxuk li skʼop Jeovae,+ yuʼun muʼyuk xamuyik batel ta vits ta skoj ti laxiʼik yuʼun li kʼokʼe.+ Xi laj yale:
6 »‹Voʼon Jeova Diosun avuʼun ti la jlokʼesot ta yosilal Ejipto ti bu toʼox tikʼilot ta mosoile.+
7 Mu me xavichʼ ta mukʼ yan diosetik, skʼan jaʼ noʼox voʼon xavichʼun ta mukʼ.+
8 »›Mu me oyuk kʼusi xapasbe slokʼol+ mi jaʼuk kʼusi ti xkoʼolaj kʼuchaʼal li kʼusitik oy ta vinajele, li kʼusitik oy ta balumile o li kʼusitik oy ta voʼe.
9 Mu me xanijan aba ta stojolalik xchiʼuk mu me buchʼu stijbot avoʼonton ti chatun ta stojolalike,+ yuʼun li Jeova Diosun avuʼune jaʼ Diosun ti jtuk noʼox ta jkʼan ichʼel ta mukʼe.+ Chkakʼbe kastigo alab nichʼnabiletik ta skoj smul li totiletike. Li buchʼutik tspʼajune chkakʼbe kastigo kʼalal to ta yoxkʼolal xchiʼuk ta xchankʼolal kuxlejal.+
10 Pe chkakʼbe ta ilel tukʼil kʼanelal* ta smilal noʼox ta kʼol kuxlejal li buchʼu skʼanojikune xchiʼuk ti chchʼunik jmantaltake.
11 »›Skʼan mu ixtoluk noʼox avuʼun li sbi Jeova Dios avuʼune,+ yuʼun li Jeovae muʼyuk chkol yuʼun ta kastigo li buchʼu ixtol noʼox yuʼun li sbie.+
12 »›Chabio me li skʼakʼalil savadoe sventa chʼuluk avuʼun jech kʼuchaʼal laj yalbot mantal li Jeova Dios avuʼune.+
13 Vakib noʼox kʼakʼal skʼan xapas skotol li avabtele,+
14 li ta svukubal kʼakʼale, jaʼ jun savado sventa li Jeova Dios avuʼune.+ Mu me xapas jtosuk avabtel+ mi jaʼuk spas yabtel akerem, atseb, amoso, akiara, stot avakax, avuro mi jkotuk atsʼunbal chonbolom xchiʼuk mi jaʼuk li jyanlum ti te nakal ta ateklumale,+ taje jaʼ sventa xkux amoso xchiʼuk akiara jech kʼuchaʼal chakux eke.+
15 Vuleso me ta ajol ti la-echʼ ta mosoil li ta yosilal Ejiptoe, pe ta yipal skʼob xchiʼuk ta sjuʼel la slokʼesot tal+ li Jeova Dios avuʼune. Jaʼ yuʼun, li Jeova Dios avuʼune laj yalbot ti akʼo xachabi li skʼakʼalil savadoe.
16 »›Ichʼo ta mukʼ atot ameʼ+ jech kʼuchaʼal laj yalbot mantal li Jeova Dios avuʼune sventa jal xakuxi xchiʼuk sventa junuk avoʼonton xa-echʼ li ta balumil chakʼbot li Jeova Dios avuʼune.+
17 »›Mu xamilvan.+
18 »›Mu xaloʼla anup achiʼil.+
19 »›Mu xa-elkʼaj.+
20 »›Mu xajut kʼop* kʼalal chavaʼan aba ta testigo ta stojolal li achiʼile.+
21 »›Mu xapichʼ oʼontabe li yajnil achiʼile.+ Jech xtok, mu me xapichʼ oʼontabe li sna achiʼile, li yosile, li smosoe, li skiarae, li xvakaxe, li svuroe o yan kʼusitik ti oy yuʼun li achiʼile›.+
22 »Li Jeovae jech laj yalbe mantaletik* ta vits sjunul li tsobobbail avuʼunike, ti tsots kʼopoj tal ta kʼokʼ, ta tok xchiʼuk ta pimil toke,+ muʼyuk xa kʼusi yan laj yal. Ta tsʼakale, la stsʼiba ta chaʼpech ton, laje laj yakʼbun.+
23 »Kʼalal naka noʼox laj avaʼibeik yechʼomal ye ta pimil toke, kʼalal jaʼo xpulpun skʼakʼal li jol vitse,+ nopajik tal ta jtojolal skotol li joliletik ta jujuchop nitilulale xchiʼuk li moletik avuʼunike.
24 Xi laj avalbeikune: ‹Laj xa yakʼbutik ta ilel smukʼulal xchiʼuk yutsilal li Jeova Dios kuʼuntike xchiʼuk laj xa kaʼibetik yechʼomal ye li ta kʼokʼe.+ Laj xa kiltik ti xuʼ kuxul xkom+ li buchʼu chchiʼinat ta loʼil yuʼun Diose.
25 Pe ¿kʼu yuʼun ti liʼ noʼox jkʼeloj jbatik chijchame? Yuʼun xuʼ xijlaj yuʼun li mukʼta kʼokʼ liʼe. Mi jech-o chkaʼibetik yechʼomal ye li Jeova Dios kuʼuntike, chijchamutik ta melel.
26 Yuʼun ¿buchʼu xa noʼox ta skotol krixchanoetik ti muʼyuk xcham kʼalal laj yaʼibe yechʼomal ye kuxul Dios ta kʼokʼ jech kʼuchaʼal voʼotike?
27 Voʼot nopajan batel sventa xavaʼi kʼusi chal li Jeova Dios kuʼuntike. Voʼot chavalbunkutik skotol li kʼusi chal Jeova Dios kuʼuntike, li voʼonkutike ta jchikintakutik xchiʼuk ta jpaskutik›.+
28 »Laj yaʼi Jeova li kʼusi laj avalbeikune, jaʼ yuʼun xi laj yalbun li Jeovae: ‹Laj kaʼi kʼusitik laj yalbot li jteklume, lek skotol li kʼusi chalike.+
29 ¡Ti jechuk-o yoʼontonik chiʼtaikun*+ xchiʼuk ti xchʼunik li jmantaltake;+ toj lek chbat xkuxlejalik sbatel osil xchiʼuk yalab xnichʼnabik un bi!+
30 Batan, xi xavalbe yaʼiike: «Sutanik batel ta akarpanaik».
31 Pe voʼote liʼ xakome, chkalbot skotol li mantaletike xchiʼuk li kʼusitik chapanbile sventa xachanubtasan xchiʼuk sventa xakʼ ta xkuxlejalik li ta osil ta xkakʼbe yuʼuninike›.
32 Skʼan me xavakʼ lek ta avoʼontonik spasel jech kʼuchaʼal yalojboxuk li Jeova Dios avuʼunike.+ Mu me xakʼejpʼujik* ta batsʼikʼob mi jaʼuk ta tsʼetkʼob.*+
33 Skʼan me te xaxanavik-o li ta be yakʼojboxuk ta ilel li Jeova Dios avuʼunike+ sventa jal xakuxiik xchiʼuk sventa junuk avoʼonton xa-echʼik li ta balumil chavuʼuninike.+
Tsʼibetik ta yok vun
^ O «slekil yutsil oʼontonal».
^ O «Mu xanop kʼop; Mu xa-epal kʼopoj».
^ Literal «jaypʼel kʼop».
^ O «xakʼejevik; xatsʼepʼujik».
^ O «surtokʼob».
