Deuteronomio 9:1-29
9 »Chikintao avaʼi, Israel: chajelav xa batel avi li ta jot Jordan+ sventa xapojbe yosil li jteklumetik ti mas mukʼtik xchiʼuk ti mas xuʼ yuʼunike,+ jaʼ li mukʼta jteklumetik xchiʼuk ti kʼotem kʼalal to ta vinajel li smuroaltake.*+
2 Li krixchanoetik tee xuʼ yuʼunik xchiʼuk jun to snatikil, jaʼ li xnichʼnabtak j-anaketik+ ti xi avaʼiojbe skʼoplalike: ‹¿Buchʼu xa noʼox xuʼ yuʼun stsak ta kʼop li xnichʼnabtak Anake?›.
3 Jaʼ yuʼun li avie, teuk me ta ajol ti jaʼ jbabe chbat li Jeova Dios avuʼune.+ Li Diose jaʼ jun kʼokʼ ti chchikʼvane+ xchiʼuk ti tslajesbe skʼoplalike. Ta asat chchapan sventa xanuts lokʼel ta anil xchiʼuk xalajesbe skʼoplalik jech kʼuchaʼal yalojbot ta melel li Jeovae.+
4 »Mu xiuk xaval ta avoʼonton kʼalal snutsojan xa ox lokʼel ta atojolal li Jeova Dios avuʼune: ‹Jaʼ ta skoj ti toj tukʼ kʼusitik ta jpas ti laj yakʼ kuʼunin Jeova Dios li osil liʼe›.+ Moʼoj, ti tsnuts lokʼel ta atojolal li Jeovae jaʼ ta skoj ti toj chopol li jteklumetike.+
5 Maʼuk ta skoj ti toj tukʼ kʼusitik chapase mi jaʼuk ta skoj ti tukʼ avoʼonton ti chavuʼuninbe li yosilike. Moʼoj, ti tsnuts lokʼel ta atojolal li Jeovae,+ jaʼ ta skoj ti toj chopol li jteklumetike xchiʼuk sventa xkʼot ta pasel yuʼun li kʼusi laj yalbe ta jamal amoltotak li Jeovae, jaʼ li Abraan,+ Isaak+ xchiʼuk Jakobe.+
6 Jech oxal, teuk me ta ajol ti maʼuk ta skoj ti yuʼun tukʼ kʼusitik chapas ti chakʼ avuʼunin Jeova Dios avuʼun li lekil osil liʼe, yuʼun jaʼot jun jteklum ti tsots avoʼontone.*+
7 »Vuleso ta ajol, mu me xchʼay xavaʼi ti kʼu yelan la asabe skʼakʼal yoʼonton Jeova Dios avuʼun li ta takixokol balumile.+ Ti kʼuxi lalokʼik ta yosilal Ejipto kʼalal to avi ti liʼ xa oyoxuk ta osile, jech-o la atoy abaik talel ta stojolal li Jeovae.+
8 La asabeik skʼakʼal yoʼonton Jeova xtok li ta Orebe, jaʼ yuʼun li Jeovae ilin tajek, chapal xa ox sventa slajes akʼoplalik.+
9 Kʼalal limuy batel ta vits sventa xbat kichʼ talel li pechpech tonetike,+ jaʼ li chaʼpech ton sventa trato ti la spas Jeova xchiʼuk voʼoxuke,+ te likom 40 kʼakʼal xchiʼuk 40 akʼobal li ta vitse.+ Muʼyuk kʼusi la jlajes xchiʼuk muʼyuk kʼusi laj kuchʼ.
10 Li Jeovae laj yakʼbun li chaʼpech ton ti ta sniʼ skʼob stuk Dios la stsʼibae, te tsʼibabil skotol li kʼusi laj yalboxuk Jeova kʼalal kʼopoj ta kʼokʼ li ta vits kʼalal jaʼo te tsoboloxuke.+
11 Kʼalal echʼ xa ox li 40 kʼakʼal xchiʼuk 40 akʼobale, laj yakʼbun Jeova li chaʼpech tone, jaʼ li pechpech tonetik sventa tratoe.
12 Xi laj yalbun li Jeovae: ‹Batan, yalan batel ta anil, yuʼun sok xa li ateklumal ti la alokʼes talel ta yosilal Ejiptoe.+ Anil laj yiktaik li be ti bu laj kalbeik ti akʼo te xbatike. La spasik jun lokʼol ta unijesbil takʼin›.+
13 Xi to laj yalbun li Jeovae: ‹Kiloj xa ti tsots yoʼonton* li jteklum liʼe.+
14 Jaʼ yuʼun, akʼo jlajesbeik skʼoplal sventa jtupʼbe sbiik li ta yolon vinajele, voʼot xa chkakʼ kʼotan ta jun lum ti mas tsots xuʼ yuʼun xchiʼuk ti mas epike›.+
15 »Vaʼun, lisut yalel tal li ta vits kʼalal jaʼo xtiltun* skʼakʼale,+ te jtsakoj yalel tal ta xchibal jkʼob+ li chaʼpech ton sventa tratoe.
16 ¡Laj kil ti asaʼoj xa amulik ta stojolal li Jeova Dios avuʼunike! La apasik slokʼol jkot chʼiom tot vakax ta unijesbil takʼin. Anil laj aviktaik li be ti bu laj yalboxuk Jeova ti akʼo te xabatike.+
17 La jtsak li chaʼpech tone, ta xchibal jkʼob la jip yalel xchiʼuk te la jvochʼ ta asatik.+
18 La jkejan jpatan jba ta stojolal Jeova jech kʼuchaʼal la jpas ta slikebale, 40 kʼakʼal xchiʼuk 40 akʼobal jech la jpas. Muʼyuk kʼusi la jlajes xchiʼuk muʼyuk kʼusi laj kuchʼ,+ yuʼun la asaʼ amulik ta stojolal Jeova kʼalal la apasik li kʼusi chopol chil ti jaʼ kap-o sjol avuʼunike.
19 Nik tajek koʼonton ta xiʼel ta skoj ti lik tajek skʼakʼal yoʼonton Jeova ta atojolalike+ ti chapal xa ox sventa slajesboxuk akʼoplalike. Pe li Jeovae laj to xchikintabun yan velta xtok.+
20 »Ilin tajek ta stojolal Aaron li Jeova xtoke xchiʼuk chapal xa ox sventa tslajesbe skʼoplal,+ pe la jkʼan vokol ta stojolal Aaron xtok li vaʼ kʼakʼale.
21 La jtsak li kʼusi toj chopol la apasik ti jaʼ li chʼiom tot vakaxe.+ La jchikʼ ta kʼokʼ, la jlilin xchiʼuk la jnoy ta jyalel jaʼ to ti kʼuxi tan xa kom kuʼune. La jvij batel li ta voʼ ti te chlik talel ta vitse.+
22 »Jech xtok, la asabeik skʼakʼal yoʼonton Jeova ta Tabera,+ ta Masa+ xchiʼuk ta Kibrot-Ataava.+
23 Kʼalal la stakoxuk batel Jeova ti te lalikik batel ta Kades-Barneae,+ ti kʼalal xi laj yalboxuke: ‹¡Muyanik batel, bat uʼuninik li osil ti ta jpʼel skʼoplal chkakʼboxuke!›, li voʼoxuke la atoy abaik ta stojolal li Jeova Dios avuʼunik+ xtoke, muʼyuk xavakʼ xchʼunel avoʼontonik+ ta stojolal xchiʼuk muʼyuk xachʼunbeik smantal.
24 Batsʼi jtoybaoxuk onoʼox ta stojolal Jeova ti kʼuxi laj kojtikinoxuke.
25 »Jaʼ yuʼun, 40 kʼakʼal xchiʼuk 40 akʼobal+ la jkejan jpatan jba ta stojolal Jeova, jech la jpas, yuʼun laj yal Jeova ti ta xa ox slajes akʼoplalike.
26 Xi lik jkʼanbe vokol li Jeovae: ‹Kajval Jeova ti voʼot Mukʼul Jpasmantalote, mu xalajesbe skʼoplal li ateklumale, yuʼun jaʼ avuʼun* atuk+ li jteklum ti la apoj lokʼel ta amukʼulale xchiʼuk ti ta yipal akʼob la alokʼes ta Ejiptoe.+
27 Vuleso ta ajol li avajtunel Abraan, Isaak xchiʼuk Jakobe.+ Mu xavakʼ ta avoʼonton li sbolil, li xchopolil xchiʼuk li smul jteklum liʼe.+
28 Yuʼun mi moʼoje, xi chlik loʼilajuk li jnaklejetik ti bu la alokʼesunkutik tale: «Li Jeovae muʼyuk xuʼ yuʼun xikʼ ochel li ta balumil ti bu yakʼoj ye chakʼbee. Ta skoj ti spʼajoje, la slokʼes batel sventa noʼox chbat smil ta takixokol balumil».+
29 Yuʼun jaʼ avuʼun*+ atuk li jteklum ti ta ajuʼel xchiʼuk ta yipal akʼob la alokʼes tale›.+
Tsʼibetik ta yok vun
^ Jaʼ xkaltik, ti toj toyajtik tajek li smuroaltake.
^ Literal «teʼtsinan anukʼe».
^ Literal «teʼtsinan snukʼ».
^ O «xloklun; xpulpun».
^ O «arexto; apukulal; aparte».
^ O «arexto; apukulal; aparte».
