Eksodo 30:1-38
30 »Paso jun skajleb matanal ti bu xuʼ xachikʼ pome,+ ta akasia teʼ xapas.+
2 Kuadrado xapas, jun xukʼubil* snatil, jun xukʼubil sjamlej xchiʼuk chib xukʼubil li stayleje. Li xulubtake jmoj snitoj sba xapas xchiʼuk li skajleb matanale.+
3 Skʼan xapix ta batsʼi oro li sbae, li xokontake xchiʼuk li xulubtake; skʼan xapasbe xnichimal ta sjoyobal, ta oro xapas.
4 Li ta jujujot xokon skajleb matanale pasbo chib xotbil oro ta yolon li xnichimale, li xotbil oroe jaʼ sventa te xichʼ xojel ochel li steʼeltak yoʼ xichʼ kuchel batele.
5 Ta akasia teʼ xapasbe li steʼeltake xchiʼuk pixo ta oro.
6 Te xavakʼ ta yeloval kortina ti bu nopol oy li xkaxail Mantale,*+ te xavakʼ ta stukʼil li xkaxail Mantal xchiʼuk smake, jaʼ ti bu chkakʼ jba ta ilel ta atojolale.+
7 »Li Aarone+ te+ akʼo xchikʼ pom ti oy sperfumeale+ sventa xtometuk muyel xchʼailal* yuʼun ta skajleb matanal kʼalal jaʼo chchapan jujun sob li kantiletike.+
8 Li Aarone jaʼo chchikʼ pom kʼalal tstsan kantiletik mi chʼayem xa ox batel kʼakʼale.* Jaʼ jun matanal pom ti nopajtik noʼox chichʼ akʼel ta stojolal Jeova ti jaykʼol kuxlejal chtal avuʼunik ta tsʼakale.
9 Mu me teuk xavakʼik yan pom mi muʼyuk akʼbil permiso chichʼ akʼele,+ mi jaʼuk xuʼ te xavakʼik chikʼbil matanal, mi jaʼuk matanal sat tsʼunobiletik, jech xtok, mu me teuk xamalik matanal vino.
10 Li Aarone jun velta ta jabil+ skʼan stunes jutebuk li xchʼichʼel milbil matanal sventa mulile+ sventa te xakʼ ta xulubtak skajleb matanal sventa xchikʼobil pom yoʼ sakuk xkome. Taje jkoj ta jabil jech tspas ti jaykʼol kuxlejal chtal avuʼunik ta tsʼakale. Toj echʼ xa noʼox chʼul ta sventa Jeova».
11 Li Jeovae xi laj yalbe li Moisese:
12 «Jujun velta kʼalal chapas senso xchiʼuk chachap li xnichʼnabtak Israele,+ ta jujuntal skʼan spoj xkuxlejalik ta stojolal Jeova kʼalal jaʼo chichʼ pasel li sensoe. Ti jech tspasike jaʼ sventa mu xtal svokolik kʼalal mi laj yichʼ tsakbel sbiike.
13 Liʼe jaʼ li kʼusitik skʼan xakʼik li buchʼutik chichʼ tsakbel sbiike: j-oʼlol siklo* plata, jaʼ ti kʼu yepal yalal jujun siklo ti bu chʼule.+ Li 20 guerae* jaʼ jun siklo. Li j-oʼlol sikloe jaʼ li kʼu yepal chichʼ akʼbel Jeovae.+
14 Skʼan me jech yepal xakʼik li matanal yuʼun Jeova skotol li buchʼutik chichʼ tsakbel sbiik ti 20 o ti mas ta 20 jabil yichʼojike.+
15 Maʼuk ti jaʼ xa x-echʼ ta j-oʼlol siklo* skʼan xakʼ li buchʼu jkʼuleje o ti jaʼ xa mu sta j-oʼlol siklo skʼan xakʼ li buchʼu povree. J-oʼlol siklo plata skʼan xakʼbeik Jeova sventa spoj li xkuxlejalike.
16 Li plata takʼin chakʼ j-israeletik sventa li stael pertone skʼan xatsob yoʼ xichʼ tunesel li ta abtelaletik chichʼ pasel ta karpana sventa tsobobbaile, ti jech chichʼ pasele jaʼ chtun sventa svulesobil ta sjol Jeova yoʼ stabeik sbalil li j-israeletike».
17 Xi to albat yuʼun Jeova li Moisese:
18 «Paso junuk perol ta kovre xchiʼuk pasbo snakleb,+ te xavakʼ ta oʼlol yuʼunik li skajleb matanal xchiʼuk li karpana sventa tsobobbaile. Nojeso ta voʼ.+
19 Jaʼ te akʼo spok yakanik xchiʼuk skʼobik+ li Aaron xchiʼuk xnichʼnabtake.
20 Sventa mu xchamik kʼalal ch-ochik li ta karpana sventa tsobobbaile o kʼalal chnopajik batel sventa tspas yabtelik li ta skajleb matanale xchiʼuk kʼalal chakʼik chikʼbil matanal ti xtomet muyel xchʼailal* ta stojolal li Jeovae, skʼan spok sbaik ta voʼ.
21 Skʼan spok yakanik xchiʼuk skʼobik sventa mu xchamik. Jaʼ jun mantal sbatel osil chkom ta stojolal Aaron xchiʼuk snitilulal ti jaykʼol kuxlejal chtal yuʼunik ta tsʼakale».+
22 Xi to albat yuʼun Jeova li Moisese:
23 «Ta tsʼakale, tsako li perfumeetik ti mas lekike: voʼob sien siklo yijubem mirra, 250 siklo kanela ti mu tajek yikʼe, 250 siklo kalamo tsʼiʼlel ti mu tajek yikʼe
24 xchiʼuk voʼob sien siklo kasia teʼ, jaʼ jech xapʼis ti kʼu yepal yalal jujun siklo ti bu chʼule.+ Jech xtok, tsako jutuk mu chanibuk litro* s-aseiteal oliva.
25 Skotol taje paso ta chʼul aseite ti chtun kʼalal oy buchʼu chichʼ tʼujele; lekuk me kapbil xkom.*+ Kʼotuk avuʼun ta chʼul aseite ti chtun kʼalal oy buchʼu chichʼ tʼujele.
26 »Akʼbo chʼul aseite ta sba li karpana sventa tsobobbaile+ xchiʼuk li xkaxail Mantal* ti te oy ta yute,
27 jech xtok, vijbo aseite li mexa xchiʼuk skotol kʼusitik te chtune, li kandelero xchiʼuk skotol kʼusitik te chtune, li skajleb matanal sventa xchikʼobil pome,
28 li skajleb chikʼbil matanal xchiʼuk skotol kʼusitik te chtune xchiʼuk li perol xchiʼuk snaklebe.
29 Skʼan xachʼultajes skotol sventa toj echʼ xa noʼox chʼul xkom.+ Skotol li buchʼu tspik li kʼusitik taje skʼan me chʼulikuk.+
30 Tuneso li aseite sventa xatʼuj li Aaron+ xchiʼuk li xnichʼnabtake+ xchiʼuk chʼultajeso sventa xtunik kuʼun ta paleal.+
31 »Chiʼino ta loʼil li j-israeletike, xi xavalbe yaʼiike: ‹Chʼuluk-o me xkom ta jtojolal li aseite ti chtun kʼalal oy buchʼu chichʼ tʼujele, jech-o komuk ti jaykʼol kuxlejal chtal avuʼunik ta tsʼakale.+
32 Mu me xavakʼbeik ta sbekʼtal junuk krixchano xchiʼuk mu me xameltsanik yan aseite jech kʼuchaʼal liʼe, yuʼun jaʼ chʼul aseite. Chʼuluk-o skʼoplal xkom avuʼunik.
33 Mi oy buchʼu tspas jtosuk aseite ti oy sperfumeal jech kʼuchaʼal liʼe xchiʼuk ti chakʼbe ta sbekʼtal junuk krixchano ti muʼyuk akʼbil permiso chichʼe,* skʼan xichʼ milel li ta steklumale›».+
34 Vaʼun, xi albat yuʼun Jeova li Moisese: «Koʼol yepal xatsak li perfumeetik liʼe:+ jtsʼujuk muil xuchʼ, unya teʼ ti mu yikʼe, galbano ti oy sperfumeale xchiʼuk batsʼi sakil pom.*
35 Paso ta pom;+ lek me xakap* skotol li muil tsʼiʼleletike xchiʼuk akʼbo lek atsʼam,+ taje jaʼ sventa lekuk sak xchiʼuk chʼuluk xkom li pome.
36 Lek xanoy jlomuk jaʼ to mi nin xa kome xchiʼuk te xavakʼ jlomuk li ta yeloval xkaxail Mantal ti te oy ta karpana sventa tsobobbaile, jaʼ ti bu chkakʼ jba ta ilel ta atojolale. Skʼan me toj echʼ xa noʼox chʼul xavilik.
37 Ti vaʼ yelan skap li kʼusitik taje mu me xapas ta apom atukik.+ Teuk me ta ajolik ti chʼul chil li Jeovae.
38 Mi oy buchʼu la spas jtosuk ti xkoʼolaj kʼuchaʼal li pom taje ti tskʼan tskʼupinbe li smuil yikʼe, skʼan me xichʼ milel li ta steklumale».
Tsʼibetik ta yok vun
^ Li jun xukʼubile jaʼ 44.5 sentimetro snatil. Kʼelo Apendise B14.
^ O «kaxa ti chtun ta testigoe».
^ O «xchʼayilal».
^ Literal «kʼalal tsta sba li chib mal kʼakʼale».
^ Li jun sikloe jaʼ 11.4 gramo yalal. Kʼelo Apendise B14.
^ Li jun guerae jaʼ 0.57 gramo yalal. Kʼelo Apendise B14.
^ Li jun sikloe jaʼ 11.4 gramo yalal. Kʼelo Apendise B14.
^ O «xchʼayilal».
^ Literal «jun in». Li jun ine jaʼ 3.67 litro. Kʼelo Apendise B14.
^ O «jechuk me kapbil xkom jech kʼuchaʼal tspas li buchʼu jaʼ yabtel-oe».
^ O «kaxa ti chtun ta testigo».
^ Literal «yan krixchano», jaʼ xkaltik, jun krixchano ti maʼuk yutsʼ yalal Aarone.
^ O «jechuk me kapbil xkom avuʼun jech kʼuchaʼal tspas li buchʼu jaʼ yabtel-oe».
