Esekiel 1:1-28
1 Li ta jabil 30 ta svoʼobal kʼakʼal kʼalal xchanibal xa ox ue, kʼalal jaʼo te oyun ta stsʼel ukʼum Kebar+ xchiʼuk li buchʼutik chukbilik batele,+ jam li vinajele xchiʼuk oy kʼusitik laj yakʼbun kil li Diose.
2 Li ta svoʼobal kʼakʼal slikel li ue, jaʼ xkaltik, kʼalal voʼob jabil xa ox xchukel batel li ajvalil Joakine,+
3 li Jeovae la skʼoponun tal ti voʼon Esekielun* ti xnichʼonun li pale Busie, la skʼoponun tal ta stsʼel li ukʼum Kebar ta yosilal jkaldeaetike.+ Jaʼ te vul ta jtojolal li sjuʼel Jeovae.+
4 Vaʼun, oy kʼusi laj kil, laj kil tsatsal ikʼ+ ti chlik tal ta nortee xchiʼuk xvolet tal mukʼta tok ti xleblajet tal skʼakʼale.*+ Li toke xojobinaj ta j-echʼel ta sjoylejal. Ta oʼlol li kʼokʼe oy kʼusi te ti xkoʼolaj kʼuchaʼal li oro ti kapal ta platae.*+
5 Oy kʼusi te ta yut ti xkoʼolaj yilel ta chanvoʼ anjeletike*+ xchiʼuk ti xkoʼolajik yilel kʼuchaʼal jun krixchanoe.
6 Ta jujuntale oy chanjot satik xchiʼuk chanib xikʼik.+
7 Lek tukʼ li yakanike xchiʼuk li xpachʼomal yakanike xkoʼolaj kʼuchaʼal yakan chʼiom tot vakax, stsʼayayet kʼuchaʼal kovre ti lek chʼulbile.+
8 Ta yolon li jujun chanib xikʼike oy jujun skʼobik ti xkoʼolaj kʼuchaʼal skʼob krixchanoe. Oy satik xchiʼuk xikʼik xchanvoʼalik.
9 Tsnup sba li xikʼike. Kʼalal chbatike, muʼyuk chjoypʼijik; ta jujuntal tukʼ chbatik-o.+
10 Xi yelan xvinaj satik ta jujuntale: xchanvoʼalik jech satik kʼuchaʼal jun krixchano, li ta batsʼikʼobe jech satik kʼuchaʼal leon,+ li ta tsʼetkʼobe* jech satik kʼuchaʼal tot vakax+ xchiʼuk jech satik+ kʼuchaʼal aguila.+
11 Jaʼ jech xvinaj li satike. Li xikʼike stoyojik muyel. Ta jujuntale oy chib xikʼik ti tsnup sbae, yan li chib xikʼike jaʼ tsmak-o sbekʼtalik.+
12 Ta jujuntal tukʼ chbatik-o, jaʼ ti bu x-ikʼatik batel yuʼun li espiritue.+ Kʼalal chbatike, muʼyuk chjoypʼijik.
13 Li chanvoʼ anjeletike* xkoʼolajik yilel kʼuchaʼal akʼal ti lek xa tsoje xchiʼuk oy kʼusi te xtal xbat ta stojolal li anjeletik ti xkoʼolaj kʼuchaʼal kʼokʼ ti stsʼayayete xchiʼuk xleblajet saksevul* chlokʼ tal te.+
14 Kʼalal xtal xbatik li anjeletike,* ti kʼu yelan chvilike xkoʼolaj kʼuchaʼal saksevul* ti xleblajete.
15 Kʼalal jaʼo te jkʼeloj li anjeletike,* oy kʼusi laj kil ti xkoʼolaj yilel kʼuchaʼal set-set takʼin ta balumil ti te oy ta xokon li jujun anjeletik ti oy chanjot satike.+
16 Li set-set takʼinetik xchiʼuk ti kʼu yelan pasbile stsʼayayet kʼuchaʼal krisolito ton, koʼol yelan xchanibal. Ti kʼu yelan xvinaje xchiʼuk ti kʼu yelan pasbile xkoʼolaj kʼuchaʼal xojol ochel yan set-set takʼin ta yut li jun set-set takʼine.*
17 Xuʼ xbatik ta buyuk noʼox ta xchanjotal ti bu skʼelojik batel kʼalal chbakʼike, mu persauk chjoypʼijik.
18 Li set-set takʼinetike labal sba tajek ta skoj ti toj mukʼtike xchiʼuk li stiʼiltake noj ta bekʼ satil ta sjoylejal.+
19 Ti bu chbatik li anjeletike* te chbatik li set-set takʼinetik eke xchiʼuk mi totsik muyel ta balumil li anjeletike, chtots muyel ek li set-set takʼinetike.+
20 Buyuk noʼox ti chbat li espiritue te chbatik ek, te chbatik ti bu x-ikʼatik batele. Kʼalal chtots muyel li anjeletike,* chtots muyel ek li set-set takʼinetike, yuʼun li espiritu ti te oy ta stojolal li anjeletike* te oy ta stojolal li set-set takʼinetik eke.
21 Ti bu chbatik li anjeletike* te chbatik li set-set takʼinetik eke; ti bu chpajike te chpajik ek; kʼalal chtots muyel ta balumil li anjeletike, chtots muyel ek li set-set takʼinetike, yuʼun li espiritu ti te oy ta stojolal li anjeletike te oy ta stojolal li set-set takʼinetik eke.
22 Ta yakʼol sjol li anjeletike* oy kʼusi te pechpech ti xkoʼolaj kʼuchaʼal nen ti stsʼayayete xchiʼuk ti labal sbae.+
23 Li anjeletik* ti te oy ta yolon li kʼusi pechpeche oy chanib xikʼik, chib ta jujujot. Li chib xikʼike tukʼ xlichʼojik muyel xchiʼuk snupoj sba. Li yan chib xikʼike jaʼ smakoj-o li jujujot sbekʼtalike.
24 Kʼalal laj kaʼi ti chbakʼ li xikʼike, xkoʼolaj kʼuchaʼal chbakʼ ukʼum ti lek tsots yoke, xkoʼolaj kʼuchaʼal yechʼomal ye li Buchʼu skotol xuʼ yuʼune.+ Kʼalal chvilike, jech ta aʼiel kʼuchaʼal epal soltaroetik. Kʼalal chpajike, tsyales li xikʼike.
25 Ta yakʼol li kʼusi pechpech ti te oy ta sjolike oy buchʼu kʼopoj. (Kʼalal chpajike, tsyales li xikʼike).
26 Ta yakʼol li kʼusi pechpech ti te oy ta sjolike oy kʼusi te ti xkoʼolaj yilel ta safiro tone+ xchiʼuk xkoʼolaj yilel kʼuchaʼal jun chotlebal sventa ajvalil.+ Li ta chotlebale oy buchʼu te chotol ti xkoʼolaj yilel kʼuchaʼal jun krixchanoe.+
27 Oy kʼusi laj kil ti stsʼayayet kʼuchaʼal li oro ti kapal ta platae+ xchiʼuk ti xkoʼolaj kʼuchaʼal kʼokʼ ti xleblajete, te chlokʼ tal yilel li ta xchukbenal* kʼalal to ta akʼole; li ta xchukbenal kʼalal to ta olone oy kʼusi laj kil ti xkoʼolaj yilel kʼuchaʼal kʼokʼe.+ Oy kʼusi xojobinaj ta spat xokon
28 ti xkoʼolaj kʼuchaʼal vaknakʼobal*+ ta tok kʼalal jaʼo chakʼ voʼe. Jaʼ jech xvinaj ti kʼu yelan xojobinaj ta spat xokone. Xkoʼolaj yilel kʼuchaʼal yutsilal Jeova.+ Kʼalal laj kile, la jpatan jba ta balumil, vaʼun laj kaʼi ti oy buchʼu kʼopoje.
Tsʼibetik ta yok vun
^ Jaʼ skʼan xal ‹tstsatsubtasvan li Diose›.
^ O «xvolet tal mukʼta tok xchiʼuk saksevulal (saktselal)».
^ Jaʼ xkaltik, kʼalal chichʼ kapel oro xchiʼuk plata ti stsʼayayet tajeke.
^ Literal «kuxlejaletike».
^ O «surtokʼobe».
^ O «saktsel».
^ Literal «kuxlejaletike».
^ Literal «li kuxlejaletike».
^ O «saktsel».
^ Literal «li kuxlejaletike».
^ Jaʼ van skʼoplal ti jmoj lek napʼajtike.
^ Literal «li kuxlejaletike».
^ Literal «kuxlejaletike».
^ Literal «li s-espiritu anjele».
^ Literal «li kuxlejaletike».
^ Literal «li kuxlejaletike».
^ Literal «Li kuxlejaletik».
^ O «xchʼut».
^ O «vaknebal; arkoiris».
