Esekiel 10:1-22
10 Vaʼun, oy kʼusi laj kil ta yakʼol li kʼusi pechpech ti te oy ta sjolik li keruvinetike, xkoʼolaj yilel kʼuchaʼal safiro ton xchiʼuk xkoʼolaj yilel kʼuchaʼal jun chotlebal sventa ajvalil.+
2 Laje, li Diose xi laj yalbe li vinik ti slapoj lino kʼuʼile:+ «Batan ta oʼlol ti bu oy li set-set takʼinetike,+ batan ta yolon li keruvinetike, nojeso tal ta tsanal akʼal+ xchibal akʼob ti chichʼ lokʼesel tal ti bu oy li keruvinetike xchiʼuk jipo batel ta sba li jteklume».+ Vaʼun, te jkʼeloj och batel li vinike.
3 Kʼalal och batel li vinike, te vaʼajtik ta xokon templo li keruvinetike, te ta batsʼikʼob, vaʼun noj ta tok li bikʼit amakʼe.*
4 Vaʼun, li smukʼulal Jeovae+ toy muyel ti bu toʼox oye, te toʼox ti bu oy li keruvinetike, laje te bat li ta stiʼ temploe. Laj une, kʼunkʼun noj ta tok+ li temploe; li amakʼe* xojobinaj ta j-echʼel ta skoj li smukʼulal Jeovae.
5 Ti kʼu yelan chbakʼ xikʼik li keruvinetike xichʼ to aʼiel li ta mukʼta amakʼe,* jaʼ jech stsatsal kʼuchaʼal chkʼopoj li Dios ti skotol xuʼ yuʼune.+
6 Laje, li Diose xi laj yalbe li vinik ti slapoj lino kʼuʼile: «Bat tsako lokʼel tal kʼokʼ ti bu oy li kʼusi xkoʼolaj yilel ta set-set takʼinetike xchiʼuk ti bu oy li keruvinetike». Och batel li vinike xchiʼuk te vaʼi ta xokon li set-set takʼine.
7 Vaʼun, li jun keruvine laj yakʼ batel skʼob li ta kʼokʼ ti te oy ta oʼlol ti bu oy li keruvinetike.+ La sjop lokʼel tal juteb akʼal xchiʼuk laj yakʼbe ta skʼob li vinik ti slapoj lino kʼuʼile.+ Kʼalal sjopoj xa ox ta xchibal skʼobe, lokʼ batel.
8 Li keruvinetike oy skʼobik ta yolon xikʼik ti xkoʼolaj yilel kʼuchaʼal skʼob krixchanoe.+
9 Kʼalal jaʼo te jkʼeloje, oy kʼusi laj kil ti xkoʼolaj yilel kʼuchaʼal chanib set-set takʼin ta xokon li keruvinetike, jujun set-set takʼin ta xokon jujun keruvin, li set-set takʼinetike stsʼayayet tajek yilel kʼuchaʼal krisolito ton.+
10 Koʼol xvinaj xchanibal, yileluke xojol ochel yan set-set takʼin ta yut li jun set-set takʼine.
11 Xuʼ xbatik ta buyuk noʼox ta xchanjotal ti bu skʼelojik batel kʼalal chbakʼike, mu persauk chjoypʼijik, yuʼun te chbatik ti bu yakʼoj batel sjolik li keruvinetike, mu persauk chjoypʼijik.
12 Sjunul li sbekʼtalike, li spatike, li skʼobike xchiʼuk li xikʼike noj ta bekʼ satil. Li chanvoʼ keruvinetike oy jujun set-set takʼin ta xokonik ti noj ta bekʼ satil ta sjoyobale.+
13 Laj kaʼi jun yechʼomal eil ti xi albatik li set-set takʼinetike: «¡Tselelin* abaik!».
14 Ta jujuntale* oy chanjot satik. Li baʼyel jot satike jaʼ sat keruvin, li xchaʼjotale jaʼ sat krixchano, li yoxjotale jaʼ sat leon xchiʼuk li xchanjotale jaʼ sat aguila.+
15 Li keruvinetike chtotsik muyel, jaʼik onoʼox li anjeletik* ti laj kil ta xokon ukʼum Kebare,+
16 ti bu chbatik li keruvinetike te chbatik li set-set takʼinetik eke xchiʼuk mi la xlichʼ muyel xikʼik li keruvinetik sventa xtotsik likel ta balumile, mu persauk chjoypʼijik li set-set takʼinetike xchiʼuk muʼyuk tsvokʼ sbaik batel.+
17 Ti bu chpajike te chpajik ek li set-set takʼinetike; kʼalal chtotsik muyel ta balumile, chtots muyel ek li set-set takʼinetike, yuʼun li espiritu ti te oy ta stojolal li anjeletike* te oy ta stojolal li set-set takʼinetik eke.
18 Vaʼun, li smukʼulal Jeovae+ lokʼ batel ti te toʼox oy ta sba li stiʼ temploe xchiʼuk te kʼot ta sba li keruvinetike.+
19 Te jkʼeloj la stoy muyel xikʼik li keruvinetike xchiʼuk totsik likel li ta balumile. Li set-set takʼinetike te napʼalik batel ta xokonik kʼalal batike. Te pajik li ta yochebal stiʼ stemplo Jeova ti te xkom ta slokʼeb kʼakʼale, te oy ta stojolalik li smukʼulal Dios yuʼun Israele.+
20 Taje jaʼik li anjeletik* ti laj kil ta xokon ukʼum Kebar+ ti te oyik ta yolon li Dios yuʼun Israele; jaʼ yuʼun laj kakʼ venta ti jaʼik keruvinetike.
21 Oy chanjot sat xchanvoʼalik, oy chanib xikʼik xchiʼuk oy skʼobik ta yolon xikʼik ti xkoʼolaj yilel kʼuchaʼal skʼob krixchanoe.+
22 Ti kʼu yelan xvinaj li satike jaʼ jech kʼuchaʼal laj kil ta xokon ukʼum Kebare.+ Ta jujuntal tukʼ chbatik-o.+
Tsʼibetik ta yok vun
^ O «tiʼ nae».
^ O «tiʼ nae».
^ O «Setetin».
^ Jaʼ xkaltik, ta jujuntal li keruvinetike.
^ Literal «li kuxlejaletik».
^ Literal «li kuxlejaletike».
^ Literal «li kuxlejaletik».
