Esekiel 11:1-25
11 Vaʼun, li espiritue* la stoyun muyel xchiʼuk laj yikʼun batel li ta stiʼ sna Jeovae, jaʼ li tiʼ na ti te skʼeloj batel slokʼeb kʼakʼale.+ Li ta yochebal tiʼ nae te oy laj kil 25 ta voʼ viniketik, te oy ek li Jaasanias ti jaʼ xnichʼon Asure xchiʼuk li Pelatias ti jaʼ xnichʼon Benayae, taje jaʼik bankilaletik yuʼun jteklum.+
2 Laje, xi laj yalbun li Diose: «Xnichʼon krixchano, liʼe jaʼ li viniketik ti oy kʼusi chopol tsnop tspasike xchiʼuk ti chalbeik chopol tojobtasel li jteklume.
3 Xi chalilanike: ‹¿Mi mu jaʼuk xa yorail chichʼ vaʼanel naetik?+ Li jteklume* jaʼ li pʼine,*+ voʼotike jaʼutik li bekʼete›.
4 »Jaʼ yuʼun, alo kʼusi chopol chkʼot ta stojolalik. Xnichʼon krixchano,+ alo kʼusi chkʼot ta stojolalik».
5 Vaʼun, vul ta jtojolal li s-espiritu Jeovae+ xchiʼuk xi laj yalbun li Diose: «Xi xavale: ‹Xi chal li Jeovae: «Jteklum Israel, melel li kʼusi chavalike xchiʼuk jnaʼoj li kʼusi yakal chanopike.
6 Ep buchʼutik chamem avuʼunik liʼ ta jteklume xchiʼuk noj avuʼunik ta animaetik li skayealtake»›».+
7 «Jaʼ yuʼun, xi chal li Ajvalil Jeova ti jaʼ Mukʼul Jpasmantale: ‹Li sbekʼtal animaetik ti solel lamal kom avuʼunik ta sjunul li jteklume jaʼik li bekʼete, li jteklume jaʼ li pʼine.+ Pe li voʼoxuke ta xavichʼik lokʼesel li ta jteklume›».
8 «Xi chal li Ajvalil Jeova ti jaʼ Mukʼul Jpasmantale: ‹Ta xaxiʼik-o li espadae,+ pe ta espada chkakʼoxuk ta milel.
9 Ta jlokʼesoxuk batel li ta jteklume, chkakʼoxuk ta skʼob li jyanlumetike xchiʼuk chkakʼboxuk kastigo.+
10 Chavichʼik milel ta espada.+ Te ta jchapanoxuk li ta stsʼak Israele,+ vaʼun jech chanaʼik ti voʼon Jeovaune.+
11 Li jteklume muʼyuk chkʼot ta apʼinalik xchiʼuk muʼyuk chakʼotik ta bekʼet li ta yut pʼine. Te ta jchapanoxuk li ta stsʼak Israele,
12 vaʼun jech chanaʼik ti voʼon Jeovaune. Yuʼun muʼyuk la achʼunik li jmantaltake xchiʼuk li kʼusitik kʼotem ta nopel kuʼune,+ yuʼun jaʼ noʼox la achʼunik li smantaltak mukʼtik lumetik ti te oy ta apat axokonike›».+
13 Kʼalal naka toʼox laj kal li kʼusi chkʼot ta pasele, cham li Pelatias ti jaʼ xnichʼon Benayae, vaʼun lik jpatan jba ta balumil xchiʼuk xi li-avane: «¡Ay, Kajval Jeova ti Mukʼul Jpasmantalote! ¿Mi yuʼun chalajesbe skʼoplal ta j-echʼel li skomenal* Israele?».+
14 La skʼoponun tal yan velta li Jeovae, xi laj yalbune:
15 «Xnichʼon krixchano, li jnaklejetik ta Jerusalene xi laj yalbe sjunul li jteklum Israele xchiʼuk li achiʼiltak ti jaʼ oy sderechoik ta xchaʼmanel osile: ‹Nomuk-o oyanik ta stojolal li Jeovae. Jaʼ kuʼunkutik maʼ li osile, akʼbilunkutik xa sventa xkʼot ta jpartekutik›.
16 Jaʼ yuʼun, skʼan xi xavale: ‹Xi chal li Ajvalil Jeova ti jaʼ Mukʼul Jpasmantale: «Akʼo mi nom la jtakik batel sventa te xnakiik li ta mukʼtik lumetike xchiʼuk ti tanpuk batik kuʼun li ta jteklumetike,+ chikʼot kʼuk sjaliluk ta stojolalik kʼuchaʼal templo li ta jteklumetik ti bu batemike»›.+
17 »Jaʼ yuʼun, skʼan xi xavale: ‹Xi chal li Ajvalil Jeova ti jaʼ Mukʼul Jpasmantale: «Ta jtsoboxuk sutel tal xtok li ta jteklumetike xchiʼuk ta jtsoboxuk sutel tal li ta mukʼtik lumetik ti bu tanpuk labatike, vaʼun chkakʼboxuk li yosilal Israele.+
18 Ta sutik batel te, vaʼun ta slokʼesik skotol li kʼusitik ibalik sbae* xchiʼuk li kʼusitik toj chopol tspasike.+
19 Ta jpasbe ta jun li yoʼontonike+ xchiʼuk chkakʼ achʼubuk li kʼusi oy ta yoʼontonike;+ jech xtok, ta jlokʼesbe li yoʼontonik ti xkoʼolaj kʼuchaʼal tone,+ vaʼun ta xkakʼbe jun yoʼontonik ti lek kʼune,*+
20 sventa xchʼunik li jmantaltake xchiʼuk sventa spasik li kʼusitik kʼotem ta nopel kuʼune. Vaʼun, chkʼotik ta jteklumal xchiʼuk voʼon chikʼot ta Sdiosik»›.
21 »‹«Pe li buchʼutik oy-o ta yoʼontonik li kʼusitik ibalik sbae xchiʼuk li kʼusitik toj chopol tspasike, chkakʼbe stojik ta skoj ti kʼu yelan stalelalike»,* xi li Ajvalil Jeova ti jaʼ Mukʼul Jpasmantale›».
22 Li keruvinetike la stoy muyel xikʼik xchiʼuk te nopol oy ta stojolalik li set-set takʼinetike.+ Jech xtok, li smukʼulal Dios yuʼun Israele te oy ta stojolalik.+
23 Vaʼun, li smukʼulal Jeovae+ toy muyel li ta jteklume, te bat li ta ba vits ti te xkom ta slokʼeb kʼakʼal yuʼun jteklume.+
24 Oy kʼusi laj yakʼbun kil ta s-espiritu li Diose, vaʼun la stoyun muyel li espiritue* xchiʼuk laj yikʼun sutel ta Kaldea ti jaʼ te ikʼbilik batel li jteklume. Laj une, sakchʼay batel li kʼusi li-akʼbat kile.
25 Vaʼun, skotol li kʼusi laj yakʼbun kil li Jeovae lik kalbe li jteklum ti chukbilik batele.
Tsʼibetik ta yok vun
^ Li ta ebreo kʼope xuʼ van jaʼ skʼoplal li s-espiritu Diose o junuk anjel.
^ Li jteklume jaʼ skʼoplal li Jerusalene, ti jaʼ te chabibil chaʼi sbaik li judaetike.
^ O «jpʼej pʼin ti lek mukʼ stiʼ sventa smeltsanobil veʼlile».
^ O «skomelal».
^ Jaʼ xkaltik, chchʼun li beiltasel chakʼ Diose.
^ Literal «li sbeike».
^ Li ta ebreo kʼope xuʼ van jaʼ skʼoplal li s-espiritu Diose o junuk anjel.
