Esekiel 12:1-28
12 La skʼoponun tal yan velta li Jeovae, xi laj yalbune:
2 «Xnichʼon krixchano, te nakalot ta jun jteklum ti jtoybae. Oy sbekʼ satik, pe mu x-ilvanik; oy xchikinik, pe mu xaʼiik,+ yuʼun jaʼik jun jteklum ti jtoybae.+
3 Li voʼote, xnichʼon krixchano, chapano avikats sventa xavakʼ ta ilel ti chavichʼ chukel batel ta yan lume. Vaʼun, teuk skʼelojik kʼalal jech chapas ta kʼakʼaltike. Teuk skʼelojik kʼalal chalokʼ batel ta anae. Yikʼaluk van xtijbat yoʼontonik, akʼo mi jaʼik jun jteklum ti jtoybae.
4 Li ta kʼakʼaltike, teuk skʼelojik xalokʼes li avikats ti achapanoj chavichʼ batel ti bu chavichʼ chukel batele. Kʼalal ch-ikʼub xa tale, teuk skʼelojik xalokʼ batel jech kʼuchaʼal li buchʼu chichʼ chukel batele.+
5 »Jomo jutebuk spakʼbal ana* te ta yeloval satik, vaʼun te xalokʼes li avikatse.+
6 Kʼalal ikʼ xa osile, teuk ta yeloval satik xakajan lokʼel ta anekeb li avikatse. Pixo asat sventa mu xavil li lumtike, yuʼun chakʼot kuʼun kʼuchaʼal jun senyail ta stojolal li jteklum Israele».+
7 Jech la jpas skotol li kʼusi laj kichʼ albele. Li ta kʼakʼaltike, la jlokʼes batel li kikats jech kʼuchaʼal tspas li buchʼu chichʼ chukel batele, kʼalal ch-ikʼub xa tale, jaʼo la jom ta jkʼob juteb spakʼbal jna.* Kʼalal ikʼub osil une, te ta yeloval satik la jkajan lokʼel ta jnekeb li kikatse.
8 Li ta sob yokʼomale, la skʼoponun tal yan velta li Jeovae, xi laj yalbune:
9 «Xnichʼon krixchano, ¿mi oy xi la sjakʼbot li jteklum Israel ti jtoybae: ‹¿Kʼusi chapas leʼe?›?
10 Xi xavalbe yaʼie: ‹Xi chal li Ajvalil Jeova ti jaʼ Mukʼul Jpasmantale: «Li kʼusi laj yichʼ alele jaʼ ta sventa li bankilal+ ta Jerusalene xchiʼuk skotol li j-israeletik ti te oyik ta jteklume»›.
11 »Xi skʼan xavale: ‹Voʼon chikʼot kʼuchaʼal jun senyail ta atojolalik.+ Jech kʼuchaʼal laj kakʼ ta ilele, jech chkʼot ta stojolalik ek. Chichʼik chukel batel, chichʼik ikʼel batel ta yan lum.+
12 Li bankilal yuʼunike ta skajan batel ta snekeb li kʼusitik chichʼ batele xchiʼuk ta akʼobaltik chlokʼ batel. Ta sjom li muroe xchiʼuk te ta slokʼes echʼel li kʼusitik chichʼ batele.+ Ta xpix sat sventa mu xil li lumtike›.
13 Ta jipbe batel syakobil, vaʼun yakbil chkʼot ta petsʼ.+ Mi laje, chkikʼ batel ta Babilonia, li ta yosilal jkaldeaetike, pe muʼyuk ta xil xchiʼuk te ta xcham.+
14 Skotol li buchʼutik te xchiʼukane, li yajkoltaobbatake xchiʼuk li yajsoltarotake, ta buyuk noʼox tanpuk chbatik kuʼun;+ jech xtok, ta jlokʼes tal jun espada sventa snutsatik batel.+
15 Kʼalal mi la jpukik batel ta mukʼtik lumetik xchiʼuk mi tanpuk batik kuʼun li ta lumetike, jech ta snaʼik ti voʼon Jeovaune.
16 Pe oy jlom ti muʼyuk chkakʼik lajuk ta espada, ta tsatsal viʼnal xchiʼuk ta tsatsal chamel sventa xbat yalik ta mukʼtik lumetik skotol li kʼusitik ibalik sba* la spasike, vaʼun jech ta snaʼik ti voʼon Jeovaune».
17 La skʼoponun tal yan velta li Jeovae, xi laj yalbune:
18 «Xnichʼon krixchano, nikan ta xiʼel kʼalal chaveʼ li apane, jech xtok, ta vul oʼontonuk xchiʼuk ta at-oʼontonuk xavuchʼ li avaʼale.+
19 Xi xavalbe li krixchanoetik ta jteklume: ‹Li Ajvalil Jeova ti jaʼ Mukʼul Jpasmantale xi chalbe li jnaklejetik ta Jerusalen ti te oyik ta yosilal Israele: «Ta vul oʼonton ta sveʼ spanik xchiʼuk ta xiʼel ta xuchʼ yaʼalik, yuʼun li yosilalike solel xokol chkom+ ta skoj ti toj echʼ noʼox saʼik kʼop li buchʼutik te nakajtike.+
20 Li jteklumetik ti oy toʼox yajvale lilijem chkom xchiʼuk solel xokol chkom li lume,+ vaʼun jech ta xanaʼik ti voʼon Jeovaune»›».+
21 La skʼoponun tal yan velta li Jeovae, xi laj yalbune:
22 «Xnichʼon krixchano, ¿kʼu yuʼun nopem xaʼiik xi chalik li ta Israele: ‹Li kʼakʼaletike x-echʼ noʼox, pe muʼyuk kʼotem ta pasel mi junuk albil kʼop›?+
23 Jaʼ yuʼun, xi xavalbe yaʼiike: ‹Xi chal li Ajvalil Jeova ti jaʼ Mukʼul Jpasmantale: «Voʼon ta jlajesbe skʼoplal li kʼusi nopem xaʼiik chalike xchiʼuk muʼyuk xa jech chalik li ta Israele»›. Pe xi xavalbe yaʼiike: ‹Poʼot xa sta skʼakʼalil+ xchiʼuk chkʼot ta pasel skotol li albil kʼopetike›.
24 Yuʼun chlaj skʼoplal li jloʼlavanej j-alkʼope xchiʼuk li jloʼlavanej jtʼunol* ti te oyik ta yut jteklum Israele.+
25 ‹«Yuʼun oy kʼusi chkal ti voʼon Jeovaune. Kʼusiuk noʼox ti chlokʼ ta kee, persa ta xkʼot ta pasel.+ Jtoyba jteklum, ti kʼu sjalil kuxulote+ oy kʼusi chkal xchiʼuk chkʼot ta pasel kuʼun», xi li Ajvalil Jeova ti jaʼ Mukʼul Jpasmantale›».
26 La skʼoponun tal yan velta li Jeovae, xi laj yalbune:
27 «Xnichʼon krixchano, xi yakal chalik li jteklum Israele: ‹Li kʼusi chichʼ akʼbel yile jal to skʼan xkʼot ta pasel xchiʼuk li albil kʼop yakal chale jaʼ sventa mas to jelavel›.+
28 Jaʼ yuʼun, xi xavalbe yaʼiike: ‹Xi chal li Ajvalil Jeova ti jaʼ Mukʼul Jpasmantale: «‹Skotol li kʼusi kaloje mu xa jaluk skʼan xkʼot ta pasel; kʼusiuk noʼox ti chlokʼ ta kee, persa chkʼot ta pasel›, xi li Ajvalil Jeova ti jaʼ Mukʼul Jpasmantale»›».
Tsʼibetik ta yok vun
^ O «spakʼ ana; skʼal ana; xchʼut ana».
^ O «spakʼ jna; skʼal jna; xchʼut jna».
^ Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
