Esekiel 13:1-23
13 La skʼoponun tal yan velta li Jeovae, xi laj yalbune:
2 «Xnichʼon krixchano, alo kʼusi chopol chkʼot ta stojolal li j-alkʼopetik yuʼun Israel+ ti tsnop stukik li albil kʼopetik chalike,+ xi xavalbe yaʼiike: ‹Chikintaik li kʼusi chal Jeovae.
3 Xi chal li Ajvalil Jeova ti jaʼ Mukʼul Jpasmantale: «¡Abol sba li bol j-alkʼopetik ti jaʼ chalik li kʼusi tsnop stukike, yuʼun muʼyuk kʼusi kakʼojbe yilik!+
4 Israel, li j-alkʼopetik avuʼune kʼotemik xa kʼuchaʼal vetetik ti te nakajtik ti bu jinemik kʼusitike.
5 Li voʼoxuke muʼyuk chbat ameltsanik li smuroal jteklum Israel ti jineme.+ Jech oxal, muʼyuk ta xkuch yuʼun Israel kʼalal oy paskʼop li ta skʼakʼalil Jeovae».+
6 «Maʼuk melel li kʼusi akʼbil yilike xchiʼuk jutbil* li kʼusi yalojike; xi chalilanike: ‹Xi chal li Jeovae› xiik, akʼo mi maʼuk takbilik tal yuʼun Jeova xchiʼuk smalaojik ti xkʼot ta pasel li kʼusi chalike.+
7 ¿Mi mu jecheʼuk li kʼusitik avilojike xchiʼuk mi mu jutbiluk* li kʼusi chavalik kʼalal ‹xi chal li Jeovae› xachiike, akʼo mi muʼyuk kʼusi kalojboxuk jutebuk?»›.
8 »‹Jaʼ yuʼun, xi chal li Ajvalil Jeova ti jaʼ Mukʼul Jpasmantale: «‹Ta skoj ti jecheʼ li kʼusi avalojike xchiʼuk ti jutbil* li kʼusi avilojike, ta jkontrainoxuk›, xi li Ajvalil Jeova ti jaʼ Mukʼul Jpasmantale».+
9 Ta jyeʼ batel jkʼob sventa xkakʼbe kastigo li j-alkʼopetik ta skoj ti jecheʼ li kʼusi chilike xchiʼuk ti mu meleluk li kʼusi chalike.+ Muʼyuk te chbat skap sbaik ti bu oy li buchʼutik jpatoj koʼonton ta stojolalike, muʼyuk chichʼ tsakbel sbiik li ta slistail jteklum Israele xchiʼuk muʼyuk tsutik batel li ta yosilal Israele, vaʼun jech tsnaʼik ti voʼon Ajvalil Jeovaun ti Mukʼul Jpasmantalune.+
10 Taje jaʼ ta skoj ti la skʼejpʼunik* batel li jteklumal kʼalal xi laj yalike: «¡Oy jun oʼontonal!», pe chʼabal jun oʼontonal.+ Kʼalal oy buchʼu tsvaʼan jun pakʼbal na* ti muʼyuk tsotse, ta sbonik ta tan›.*+
11 »Li buchʼutik jech tsbonik ta tan li pakʼbal nae* albo yaʼiik ti ta xlome. Ta xtal tsatsal voʼ, bot xchiʼuk tsatsal ikʼ sventa tslomes.+
12 Kʼalal mi lom yalel li pakʼbal nae,* xi chavichʼik jakʼbele: ‹¿Bu bat li pakʼbal na ti la abonik ta tane?›.+
13 »Jaʼ yuʼun, xi chal li Ajvalil Jeova ti jaʼ Mukʼul Jpasmantale: ‹Ta skʼakʼal koʼonton ta xkakʼ talel tsatsal ikʼ, ta skapemal jol ta xkakʼ talel tsatsal voʼ xchiʼuk chkakʼ talel bot ta skapemal jol ti chlajesvane.
14 Li pakʼbal na* ti la abonik ta tane ta jines yalel xchiʼuk ta jlomes yalel ta lumtik, xvinaj xa chkom li snaklebe. Kʼalal mi jin yalel li jteklume, te chachamik, vaʼun jech chanaʼik ti voʼon Jeovaune›.
15 »‹Kʼalal mi la jlokʼes ta j-echʼel skʼakʼal koʼonton ta stojolal li pakʼbal na* ti laj yichʼ bonel ta tane, xi chkalboxuke: «Laj xa skʼoplal li pakʼbal nae xchiʼuk laj xa skʼoplal li buchʼutik la sbonik ta tane.+
16 Chamik xa li j-alkʼopetik yuʼun Israele, jaʼ li buchʼutik chalik albil kʼopetik ta sventa li Jerusalene xchiʼuk ti ch-akʼbat yilik ti ch-ayan jun oʼontonal tee, akʼo mi chʼabal jun oʼontonal»›,+ xi li Ajvalil Jeova ti jaʼ Mukʼul Jpasmantale.
17 »Li voʼote, xnichʼon krixchano, vaʼano aba ta skontrainel li stsebetak ateklumal ti tsnop stukik li albil kʼopetik chalike xchiʼuk alo li kʼusi chopol chkʼot ta stojolalike.
18 Xi xavalbe yaʼiike: ‹Xi chal li Ajvalil Jeova ti jaʼ Mukʼul Jpasmantale: «¡Toj abol sbaik li antsetik ti tstsʼisik xchukobil kʼobiletike* xchiʼuk ti tspasik spokʼal jolil ti jeltos smukʼul sventa tsyakik-o krixchanoetike! ¿Mi voʼoxuk kuxul chakom avalojik ti jech chayakik li jteklumale?
19 Ta jayjop noʼox sevada xchiʼuk ta jayxut* noʼox pan chasokesbeikun jkʼoplal li ta jteklumale,+ yuʼun chamilik li buchʼu* mu sta-o xchame xchiʼuk jaʼ kuxul chaviktaik li buchʼu sta-o xchame. Sventa jech chapasik taje, chaloʼlaik li buchʼutik ta jteklumal ti lek chaʼiik li kʼusi chavalike»›.+
20 »Jaʼ yuʼun, xi chal li Ajvalil Jeova ti jaʼ Mukʼul Jpasmantale: ‹Antsetik, ta jkontrain li xchuk kʼobiletik ti chatunesik sventa chayakik-o li krixchanoetik jech kʼuchaʼal chichʼ yakel mutetike; ta jnit lokʼel ta akʼobik xchiʼuk ta jpoj lokʼel li buchʼutik laj xa ataik ta yakel kʼuchaʼal mutetike.
21 Ta jnit lokʼel li spokʼal ajolike xchiʼuk ta jpoj lokʼel ta akʼobik li jteklumale, jech mu xa stakʼ xayakik-o, vaʼun jech chanaʼik ti voʼon Jeovaune.+
22 Li voʼoxuke la achibajesbeik yoʼonton ta ajutbil kʼopik*+ li buchʼutik tukʼike, akʼo mi mu jechuk oy ta koʼonton ti xil svokolike. Jech xtok, atijojbeik yoʼonton ta spasel kʼusi chopol li jpaschoplejaletik+ sventa mu xikta li xchopol beike, ta skoj taje, muʼyuk chkuxiik.+
23 Jaʼ yuʼun, antsetik, laj xa skʼoplal li kʼusi jecheʼ cha-akʼbat avilike xchiʼuk muʼyuk xa chatʼunolajik;*+ ta jkolta lokʼel ta akʼobik li jteklumale, vaʼun jech chanaʼik ti voʼon Jeovaune›».
Tsʼibetik ta yok vun
^ O «nopbil».
^ O «nopbiluk».
^ O «nopbil».
^ O «stsʼepʼunik».
^ O «pakʼ na; kʼal na; chʼut na».
^ Jaʼ xkaltik, tsvaʼanik jun pakʼbal na ta yut na ti muʼyuk tsotse xchiʼuk ta sbonik ta tan sventa tsotsuk xa xvinaje.
^ O «pakʼ nae; kʼal nae; chʼut nae».
^ O «pakʼ nae; kʼal nae; chʼut nae».
^ O «pakʼ na; kʼal na; chʼut na».
^ O «pakʼ na; kʼal na; chʼut na».
^ Jaʼ xkaltik, xchuk kʼobiletik sventa majia ti chchuk ta xukʼobike o ta snukʼ skʼobike.
^ O «jayxetʼ; jayvokʼ».
^ O «anopbil kʼopik; avepal kʼopik».
^ Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.