Esekiel 14:1-23
14 Oy jayvoʼuk moletik ta Israel talik ta jtojolal xchiʼuk te chotiik ta keloval.+
2 Vaʼun, la skʼoponun tal li Jeovae, xi laj yalbune:
3 «Xnichʼon krixchano, li viniketik liʼe jpʼel ta yoʼonton tstsʼakliik batel li ibal sba santoetik* yuʼunike xchiʼuk smakojbeik* yakan krixchanoetik sventa saʼ smulik. ¿Mi yuʼun chkakʼ to ti oyuk kʼusi sjakʼbeikune?+
4 Jaʼ yuʼun, chiʼinano ta loʼil, xi xavalbe yaʼiike: ‹Xi chal li Ajvalil Jeova ti jaʼ Mukʼul Jpasmantale: «Mi oy junuk j-israel ti jpʼel ta yoʼonton tstsʼakli batel li ibal sba santoetik yuʼune xchiʼuk ti tsmakbe* yakan krixchanoetik sventa saʼ smulike xchiʼuk ti oy kʼusi chbat sjakʼbe jun j-alkʼope, voʼon li Jeovaune, ta jtakʼbe ti kʼu yelan sta-o ta skoj ti toj ep li santotak ti ibalik sbae.
5 Yuʼun ta jtikʼbe xiʼel ta yoʼontonik li jteklum Israel ta skoj ti namaj xa batel skotolik ta jtojolale xchiʼuk ti jaʼ la stsʼakliik batel li ibal sba santoetik yuʼunike»›.+
6 »Jaʼ yuʼun, xi xavalbe yaʼi li jteklum Israele: ‹Xi chal li Ajvalil Jeova ti jaʼ Mukʼul Jpasmantale: «Sutanik tal ta jtojolal, namajanik ta stojolal li ibal sba santoetik avuʼunike xchiʼuk iktaik komel skotol li kʼusitik toj chopol chapasike.+
7 Yuʼun mi oy junuk j-israel o junuk jyanlum ti nakal ta Israel ti chchʼak sba ta jtojolale, ti jpʼel ta yoʼonton tstsʼakli batel li ibal sba santoetik yuʼune, ti tsmakbe* yakan krixchanoetik sventa tsaʼ smulike xchiʼuk ti oy kʼusi chbat sjakʼbe junuk kaj-alkʼope,+ voʼon ta jtakʼbe jtuk, voʼon li Jeovaune.
8 Ta jkontrain li vinik taje xchiʼuk chkakʼ kʼotuk kʼuchaʼal jun senyail ti chpʼijubtasvane xchiʼuk jaʼ skʼelobil chkʼot yuʼunik ti chopol skʼoplale, ta jtuchʼbe lokʼel skʼoplal li ta jteklumale;+ vaʼun jech chanaʼik ti voʼon Jeovaune»›.
9 »‹Pe mi laj ta loʼlael li j-alkʼope xchiʼuk mi oy kʼusi la stakʼe, ta jyeʼ batel jkʼob ta stojolal xchiʼuk ta jtupʼbe skʼoplal li ta jteklum Israele. Voʼon la jloʼla li j-alkʼope,+ voʼon li Jeovaune.
10 Ta stabe stojobil li smul stukike; li buchʼu tsjakʼe xchiʼuk li j-alkʼope koʼol chkʼot smul xchaʼvoʼalik,
11 jaʼ sventa xikta jteklum Israel ti xtal xbatik noʼox yoʼ xnamajik batel ta jtojolale xchiʼuk ti mu xa sokes sbaik ta skotol li spaltailike.* Vaʼun, chkʼotik ta jteklumal xchiʼuk voʼon chikʼot ta Sdiosik›,+ xi li Ajvalil Jeova ti jaʼ Mukʼul Jpasmantale».
12 La skʼoponun tal yan velta li Jeovae, xi laj yalbune:
13 «Xnichʼon krixchano, mi oy junuk jteklum tsaʼ smul ta jtojolal ta skoj ti muʼyuk tukʼ chakʼ sbae, ta jyeʼ batel jkʼob ta stojolal xchiʼuk ta jlajesbe skʼoplal ti bu chlik tal li sveʼelike.*+ Jech xtok, ta jtak batel tsatsal viʼnal li ta jteklume,+ ta jlajesbe skʼoplal li krixchanoetike xchiʼuk li chonbolometik tee.+
14 ‹Ti teuk oyik ta jteklum li oxvoʼ viniketik liʼe: li Noe,+ Daniel+ xchiʼuk Jobe+ jaʼ noʼox kolem ta xkom stukik ta skoj li stukʼilalike›,+ xi li Ajvalil Jeova ti jaʼ Mukʼul Jpasmantale».
15 «‹O jnoptik noʼox ti chkakʼ jelavuk tal jtiʼvanej chonbolometik ta jteklum sventa chʼabaluk yajval xkome* xchiʼuk ti xkʼot ta takixokol balumil yuʼunik ti muʼyuk xa buchʼu te ch-echʼ batel ta skoj li jtiʼvanej chonbolometike.+
16 Jamal chkal ta skoj ti kuxulune, ti liʼuk oyik ta jteklum li oxvoʼ viniketike, mu onoʼox xpoj yuʼunik li skeremtakike mi jaʼuk li stsebetakike; jaʼ noʼox kolem chkom stukik xchiʼuk jecheʼ xokol chkom li jteklume›, xi li Ajvalil Jeova ti jaʼ Mukʼul Jpasmantale».
17 «‹O jnoptik noʼox ti chkakʼ tal jun espada ta stojolal li jteklume+ xchiʼuk ti xi chkale: «Akʼo echʼuk junuk espada li ta jteklume», vaʼun tslajesbe skʼoplal li krixchanoetike xchiʼuk li chonbolometike.+
18 Jamal chkal ta skoj ti kuxulune, ti liʼuk oyik ta jteklum li oxvoʼ viniketike, mu onoʼox xpoj yuʼunik li skeremtakike mi jaʼuk li stsebetakike; jaʼ noʼox kolem chkom stukik›, xi li Ajvalil Jeova ti jaʼ Mukʼul Jpasmantale».
19 «‹O jnoptik noʼox ti chkakʼ tal tsatsal chamel li ta jteklume+ xchiʼuk ti ta jmal talel li skʼakʼal koʼonton ti ep buchʼutik tsmil sventa slajesbe skʼoplal ta jteklum li krixchanoetike xchiʼuk li chonbolometike.
20 Jamal chkal ta skoj ti kuxulune, ti liʼuk oyik ta jteklum li Noe,+ Daniel+ xchiʼuk Jobe+ mu onoʼox xpoj yuʼunik li skeremtakike mi jaʼuk li stsebetakike; jaʼ noʼox kolem chkom stukik ta skoj li stukʼilalike›,+ xi li Ajvalil Jeova ti jaʼ Mukʼul Jpasmantale».
21 «Yuʼun xi chal li Ajvalil Jeova ti jaʼ Mukʼul Jpasmantale: ‹Jaʼ jech chkʼot ta pasel mi la jtak talel li chanib kastigo liʼe:+ li espadae, li tsatsal viʼnale, li jtiʼvanej chonbolometike xchiʼuk li tsatsal chamele.+ Jaʼ ta jtak talel ta Jerusalen sventa slajesbe skʼoplal li krixchanoetike xchiʼuk li chonbolometike.+
22 Pe li buchʼutik kuxul chkomike chjatavik batel xchiʼuk chichʼik ikʼel lokʼel ta jteklum+ kʼalal ta kerem tsebetik. Chtalik ta atojolalik, vaʼun kʼalal chavilik li stalelalik* xchiʼuk li kʼusitik la spasike, ta melel tspat avoʼontonik li vokolil laj kakʼ kʼotuk ta stojolal Jerusalene xchiʼuk skotol li kʼusitik la jpasbee›».
23 «‹Kʼalal chavilbeik li stalelalik* xchiʼuk li kʼusitik la spasike, tspat avoʼontonik xchiʼuk te chavakʼik venta ti oy lek srasonal ti jech la jpasbee›,+ xi li Ajvalil Jeova ti jaʼ Mukʼul Jpasmantale».
Tsʼibetik ta yok vun
^ Li ta ebreo kʼope xuʼ van te nitil skʼoplal ta jpʼel kʼop ti «tsoʼ» skʼan xale, jaʼo chichʼ alel kʼalal oy kʼusi chichʼ pʼajele. Kʼelo Glosario, ibal sba.
^ O «stʼabesojbeik».
^ O «tstʼabesbe».
^ O «tstʼabesbe».
^ O «xchopolilike».
^ Literal «ta jkʼasbe skotol li steʼel spanike». Jaʼ van skʼoplal li teʼetik ti tstunesik sventa tskʼej spanike.
^ O «xpojbat skerem stsebike».
^ Literal «li sbeik».
^ Literal «li sbeik».
