Esekiel 15:1-8
-
Li Jerusalene jaʼ jtekʼ steʼel uva ti mu kʼusi xtun-oe (1-8)
15 La skʼoponun tal yan velta li Jeovae, xi laj yalbune:
2 «Xnichʼon krixchano, ¿kʼusi sjelbenal li steʼel uva xchiʼuk li yan teʼ o junuk skʼob teʼ li ta teʼtikaltike?
3 ¿Mi xuʼ van xichʼ-o tunesel sventa xichʼ pasel jtosuk abtelal li xvachʼile? Li krixchanoetike, ¿mi xuʼ van spasik-o ta sjokʼanobil kʼusitik?
4 ¡Kʼelavil! Jaʼ noʼox chichʼ tunesel sventa chichʼ chikʼel ta kʼokʼ, chlik kʼakʼuk xchaʼjotal sniʼ, vaʼun chkʼakʼ-o sjunul. Avi une, ¿mi xtun xa van sventa xichʼ pasel-o jtosuk abtelal?
5 Mi mu kʼusi xtun-o kʼalal chʼabal toʼox kʼakʼeme, ¡mas to mu kʼusi xtun-o avi ti kʼakʼem xae!».
6 «Jech oxal, xi chal li Ajvalil Jeova ti jaʼ Mukʼul Jpasmantale: ‹Jech kʼuchaʼal li steʼel uva ta yut teʼtikaltik ti kakʼoj sventa chichʼ chikʼel ta kʼokʼe, jaʼ jech ta jpas ta stojolal li jnaklejetik ta Jerusalene.+
7 Ta jkontrainik. Kolik li ta kʼokʼe, pe chichʼik chikʼel ta kʼokʼ ta tsʼakal. Vaʼun, jech chanaʼik ti voʼon Jeovaun kʼalal mi laj kakʼbeik kastigoe›».+
8 «Xi chal li Ajvalil Jeova ti jaʼ Mukʼul Jpasmantale: ‹Chkakʼ ti jecheʼ xokoluk xkom li jteklume,+ yuʼun muʼyuk tukʼ laj yakʼ sbaik›».+
