Esekiel 16:1-63
-
Ti kʼu yelan skʼanoj Jerusalen li Diose (1-63)
-
Laj yichʼ tael kʼuchaʼal jun olol ti jipbil komele (1-7)
-
Li Diose la skʼupiltas xchiʼuk la spas jun trato sventa xnupun xchiʼuk (8-14)
-
Lik xchon sba (15-34)
-
Laj yichʼ akʼbel kastigo kʼuchaʼal jun ants ti chmukul sativane (35-43)
-
Laj yichʼ koʼoltasel ta Samaria xchiʼuk Sodoma (44-58)
-
Li Diose tsvules ta sjol li trato la spase (59-63)
-
16 La skʼoponun tal yan velta li Jeovae, xi laj yalbune:
2 «Xnichʼon krixchano, albo yaʼi Jerusalen li kʼusitik toj chopol tspase.+
3 Xi skʼan xavalbee: ‹Li Ajvalil Jeova ti jaʼ Mukʼul Jpasmantale xi chalbe li Jerusalene: «Te ta yosilal jkanaanetik likemot xchiʼuk te lavokʼ. Jaʼ j-amorreo vinik+ li atote xchiʼuk jaʼ j-et+ ants li ameʼe.
4 Kʼalal lavokʼe, muʼyuk la xtuchʼik li amixikʼe, muʼyuk la spokoxuk, muʼyuk la xjaxboxuk atsʼam xchiʼuk muʼyuk la xpixoxuk ta pokʼetik.
5 Muʼyuk buchʼu lakʼuxubaj ta yoʼonton sventa spasbot jtosuk li kʼusitik taje. Chʼabal buchʼu abol aba laj yilot. Jaʼ noʼox laj avichʼ jipel batel ta jamal osiltik, yuʼun pʼajbilot onoʼox kʼalal lavokʼe.
6 »›»Kʼalal te lijelav batele, laj kil ti te xbechlajet avakan ti bu oy achʼichʼele. Kʼalal te telelot ti bu oy achʼichʼele, xi laj kalbote: ‹¡Mu xacham!›. Jech, xi laj kalbot kʼalal te telelot ti bu oy achʼichʼele: ‹¡Mu xacham!›.
7 Solel la jpʼolesot jech kʼuchaʼal tsʼiʼleletik ti chchʼi ta osiltike, lachʼi xchiʼuk lapas ta ants xchiʼuk jaʼ anatsʼinoj li kʼupil sba natsʼiletike.* Lek xa tsinajtik li achuʼe xchiʼuk chʼi li stsotsil ajole; pe tʼanalot-o xchiʼuk muʼyuk akʼuʼ apokʼ»›.
8 »Xi chal li Ajvalil Jeova ti jaʼ Mukʼul Jpasmantale: ‹Kʼalal te lijelav batele xchiʼuk kʼalal laj kilote, laj kil ti oy xa ajabilal sventa xamalije. Jaʼ yuʼun, la jlam ta aba li jkʼuʼ jpokʼe+ xchiʼuk la jpixot ta skoj ti tʼanalote, jamal laj kal ti ta jkʼanote xchiʼuk la jpas jun trato ta atojolal, vaʼun laj kuʼuninot.
9 Jech xtok, la jpokot, la jpok lokʼel li achʼichʼele xchiʼuk la jaxbot aseite.+
10 Vaʼun, laj kakʼ alap jlik kʼuʼil pokʼil ti oy lek xluchale* xchiʼuk laj kakʼbot axonob ti pasbil ta lekil nukule,* la jpixot ta lekil lino xchiʼuk laj kakʼ alap kʼuʼil pokʼil ti toyolik stojole.
11 La jkʼupiltasot ta natsʼiletik,* laj kakʼbot xchuktak akʼob xchiʼuk laj kakʼbot snatsʼil anukʼ.
12 Jech xtok, la jtikʼbe s-areteal aniʼ, s-areteal achikin xchiʼuk la jxoj ta ajol jun kʼupil sba korona.
13 Jech-o la akʼupiltas aba ta oro xchiʼuk ta plata, li akʼuʼ apokʼ xtoke pasbil ta lekil lino, toyolik stojol li kʼusi pasbil-oe xchiʼuk jaʼ jlik kʼuʼil pokʼil ti oy lek xluchale.* La alajes lekil arina, pom xchiʼuk aseite, toj echʼ xa noʼox kʼupil aba labat+ xchiʼuk chapalot xa ox sventa xakʼot ta meʼ ajvalil›».*
14 «Xi chal li Ajvalil Jeova ti jaʼ Mukʼul Jpasmantale: ‹Ta skoj ti toj kʼupil abae, lik vinajuk batel akʼoplal* li ta mukʼtik lumetike,+ yuʼun toj echʼ xa noʼox kʼupil aba ta skoj ti kakʼoj kutsilal ta atojolale›».+
15 «‹Pe lik apat avoʼonton ta skoj ti kʼupil abae+ xchiʼuk lik achon aba ta skoj ti vinaj batel akʼoplale.+ Toj echʼ xa noʼox chopol ti kʼu yelan la achon aba ta stojolal ti buchʼuuk noʼox te ch-echʼe+ xchiʼuk laj avakʼ aba ta stojolal.
16 La atunes jaylikuk akʼuʼ apokʼ ti jeltos skoloral sventa xakʼupiltas li tayal kʼopojebaletik* ti bu chamulivaje.+ Taje mu stakʼ jech xapas ti jechuke, mi jsetʼuk* onoʼox stakʼ jech xkʼot ta pasel.
17 Jech xtok, la atunes li kʼupil sba natsʼiletik* avuʼun ti jaʼ pasbil li ta oro xchiʼuk ta plata ti voʼon laj kakʼbote, jaʼ la apas-o slokʼol viniketik xchiʼuk lamulivaj xchiʼukik.+
18 Maʼuk noʼox, jaʼ la apix-o* li akʼuʼ apokʼtak ti oy lek xluchale,* laj avakʼbe li j-aseitee xchiʼuk li jpome.+
19 Jech xtok, li pan laj kakʼbot ti pasbil ta lekil arina, ta aseite xchiʼuk ta pom ti laj kakʼ alajese, laj avakʼbe ta smoton sventa lekuk xmuet yikʼ xkʼot ta stojolalik.*+ Taje jech kʼot ta pasel›, xi li Ajvalil Jeova ti jaʼ Mukʼul Jpasmantale».
20 «‹Li akeremtak xchiʼuk atsebetak ti ayan avuʼun sventa xkuʼunine+ la amil sventa xkʼot ta smoton li lokʼoletike.+ ¿Mi mu toj echʼemuk xa ti kʼu yelan lamulivaje?
21 La amil li jnichʼnabe xchiʼuk la achikʼ ta kʼokʼ sventa xavakʼ ta matanal.+
22 Kʼalal jaʼo yakal chapas skotol li kʼusitik toj chopol taje xchiʼuk kʼalal jaʼo chamulivaje, muʼyuk xavules ta ajol ti kʼalal tsebot toʼoxe, kʼalal tʼanalot toʼox xchiʼuk kʼalal chʼabal toʼox akʼuʼ apokʼe, kʼalal te xbechlajet avakan ti bu oy achʼichʼele.
23 Ay, toj abol aba ta skoj li kʼusitik chopol la apase›,+ xi li Ajvalil Jeova ti jaʼ Mukʼul Jpasmantale.
24 ‹La avaʼan ti bu xuʼ xavichʼ ta mukʼ li jecheʼ diosetike xchiʼuk la apas jun tayal kʼopojebal li ta jujun kayee.*
25 La apas tayal kʼopojebaletik ti butik mas ojtikinbil li ta jujun kayee xchiʼuk toj chopol kom li avutsilal ta skoj ti laj avakʼ aba* ta skotol li buchʼutik te ch-echʼike.+ Jech xtok, muʼyuk xa noʼox spʼisol ti kʼu yelan la achon abae.+
26 La achon aba ta stojolal li xnichʼnabtak Ejipto+ ti jaʼ li alakʼnatak ti oy tajek ta yoʼontonik chchiʼinvanik ta vayele,* la asabun-o jol ta skoj ti toj echʼ xa noʼox la achon abae.
27 Avi une, ta jyeʼ tal jkʼob ta atojolal, ta jutukajesbot li aveʼele+ xchiʼuk ta xkakʼot ta stojolal li antsetik ti spʼajojikot sventa spasbeikot ti kʼusi xal yoʼontonike,+ jaʼ li stsebetak jfilisteaetik ti chʼayal to kʼot yoʼontonik ta skoj li kʼusitik kʼexlal sba chapase.+
28 »›Ta skoj ti muʼyuk x-echʼ avoʼontone, bat achon aba ta stojolal li skeremtak Asiriae,+ pe muʼyuk bu x-echʼ-o avoʼonton xtok kʼalal la achon aba ta stojolalike.
29 Jaʼ yuʼun, mas to laj avakʼbe yipal ti chachon abae, lik achon aba batel li ta yosilal jpʼolmajeletike* xchiʼuk ta stojolal li jkaldeaetike.+ Akʼo mi jech, muʼyuk bu x-echʼ-o avoʼonton xtok.
30 ¡Yan xa noʼox sba xchamel* avoʼonton* kʼalal jech la apas skotol taje, ti muʼyuk xa noʼox akʼexlal la achon abae!›,+ xi li Ajvalil Jeova ti jaʼ Mukʼul Jpasmantale.
31 ‹Pe kʼalal la avaʼan ti bu xuʼ xavichʼ ta mukʼ li jecheʼ diosetik ti butik mas ojtikinbil li ta jujun kayee xchiʼuk kʼalal la apas tayal kʼopojebaletik ti bu oy ep krixchanoetike,* mu xakoʼolaj kʼuchaʼal li jun jchonbail antse, yuʼun muʼyuk la akʼan atojol.
32 ¡Jaʼot jun ajnilal ti chaloʼla amalale, jaʼ chachʼam li yan vinike, maʼuk li amalale!+
33 Li krixchanoetike jaʼ chakʼbeik smoton li jchonbail antse,+ pe li voʼote mu jechuk chapas, yuʼun voʼot chavakʼbe smoton skotol li buchʼutik oy tajek ta yoʼontonik chchiʼinikot ta vayele,+ chatoj ta takʼin* sventa xtalik ta atojolal ta buyuk noʼox yoʼ xamulivaj xchiʼukike.+
34 Li voʼote jelelot kʼuchaʼal li yan antsetik ti chchon sbaike. ¡Muʼyuk buchʼu yan jech chchon sba kʼuchaʼal chapase! Voʼot chatoj li yantike, maʼuk tstojoxuk. Toj yanot-o li voʼote›.
35 »Jaʼ yuʼun, jchonbail ants,+ chikintao li kʼusi chal Jeovae.
36 Xi chal li Ajvalil Jeova ti jaʼ Mukʼul Jpasmantale: ‹Ta skoj ti avakʼoj xa ta ilel ti chakʼan tajek chiʼinel ta vayele, ti lavinaj xa ti tʼanalot kʼalal jaʼo chamulivaj xchiʼuk li amalaltake xchiʼuk skotol li asantotak ti toj ibalik sba*+ xchiʼuk ti toj chopolike, ti laj avakʼbe ta smotonin li xchʼichʼel avalabtake,+
37 ta jtsob tal skotol li amalaltak ti laj avakʼ akʼo skʼupinikote, jaʼ skotol li buchʼutik la akʼane xchiʼuk skotol li buchʼutik la apʼaje. Ta buyuk noʼox ta jtsob talel sventa skontrainikot xchiʼuk ta jtʼananot ta yeloval satik, vaʼun chilikot ti tʼanalot ta j-echʼele.+
38 »›Jech chkakʼbot kastigo kʼuchaʼal staik-o li antsetik ti chmukul sativanike+ xchiʼuk ti tsmalik chʼichʼe;+ ta skʼakʼal koʼonton xchiʼuk ta yitʼixal koʼonton ta jmal achʼichʼel.+
39 Ta xkakʼot ta skʼobik xchiʼuk jaʼ tsjinesik ti bu chavichʼ ta mukʼ li jecheʼ diosetike xchiʼuk tslomesik li tayal kʼopojebaletik avuʼune;+ ta slokʼik akʼuʼ apokʼ+ xchiʼuk chichʼik batel li anatsʼtak*+ ti kʼupilik sbae, vaʼun tʼanal chiktaikot, muʼyuk akʼuʼ apokʼ chakom.
40 Ep buchʼutik chikʼik tal sventa skontrainikot,+ vaʼun chakʼbeikot ton+ xchiʼuk tsmilikot ta s-espadaik.+
41 Ta xchikʼik ta kʼokʼ li anatake+ xchiʼuk chavichʼ chapanel ta yeloval sat epal antsetik. Ta jlajesbe skʼoplal ti chachon abae,+ vaʼun muʼyuk xa buchʼu chatoj.
42 Jech ta xpaj li skʼakʼal koʼonton ta atojolale+ xchiʼuk chlamaj li skapemal jol ta atojolale;+ jun xa koʼonton xchiʼuk muʼyuk xa chi-ilin›.
43 »‹Ta skoj ti muʼyuk xavules ta ajol ti kʼalal tsebot toʼoxe+ xchiʼuk ti la asabun jol ta skoj li kʼusitik la apase, chkakʼ atoj ta skoj ti kʼu yelan atalelale,* vaʼun chavikta li kʼusitik kʼexlal sbae xchiʼuk li kʼusitik ibalik sba chapase›, xi li Ajvalil Jeova ti jaʼ Mukʼul Jpasmantale.
44 »‹¡Kʼelavil! Xi chalik ta atojolal li buchʼutik chalik pʼijil loʼile: «Jlokʼ meʼil li tseb leʼe».+
45 Xakoʼolaj kʼuchaʼal ameʼ ti la spʼaj li smalale xchiʼuk li yalabe. Xakoʼolaj kʼuchaʼal li avix amuk ti la spʼaj li smalalike xchiʼuk li yalabike. Jaʼ j-et ants li ameʼike xchiʼuk jaʼ j-amorreo vinik+ li atotike›».
46 «‹Jaʼ avix li Samaria+ ti te oy ta norte* xchiʼuk stsebetake,*+ jech xtok, jaʼ amuk li Sodoma+ ti te oy ta sur* xchiʼuk stsebetake.+
47 Maʼuk noʼox ti jech la achanbe stalelalike xchiʼuk ti la apas li kʼusitik toj chopol tspasike, yuʼun ta anil noʼox mas to toj chopol li kʼusitik lik apase›.+
48 Xi chal li Ajvalil Jeova ti jaʼ Mukʼul Jpasmantale: ‹Jamal chkal ta skoj ti kuxulune, li amuk Sodoma xchiʼuk li stsebetake muʼyuk jech spasojik jech kʼuchaʼal la apas xchiʼuk li atsebetake.
49 ¡Kʼelavil! Liʼe jaʼ spaltail* li amuk Sodomae: la stoy sbaik+ xchiʼuk li stsebetake,+ oy toʼox ep sveʼelik+ xchiʼuk jun toʼox yoʼontonik;+ akʼo mi jech, muʼyuk la skoltaik li buchʼu oy svokole mi jaʼuk li buchʼu povree.+
50 Jech-o la stoy sbaik+ xchiʼuk jech-o la spasik li kʼusitik toj chopol chkile,+ jaʼ yuʼun laj kakʼ venta ti skʼan xichʼik lajesele.+
51 »›Jech xtok, li Samariae+ mi jaʼuk sta j-oʼlol jech la spas smul kʼuchaʼal la asaʼ amul li voʼote. Mas to toj ep li kʼusitik toj chopol la apase, jaʼ mu sta li avix amuke. Ta skoj ti toj chopolik li kʼusitik apasoje, jaʼ xa muʼyuk smul komik yilel.+
52 Li avi une, skʼan xatsʼik li kʼexlale, yuʼun apakojbe skʼoplal li avix amuke. Jaʼ xa muʼyuk smul komik avuʼun ta skoj ti mas to ibalik sba li amul la apase. Jaʼ yuʼun, kʼexavan xchiʼuk tsʼiko labanel ta skoj ti muʼyuk xa smulik kom avuʼun yilel li avix amuke›.
53 »‹Ta jtsob sutel li buchʼutik chukbilik lokʼel ta Sodoma xchiʼuk stsebetake xchiʼuk li buchʼutik chukbilik lokʼel ta Samaria xchiʼuk stsebetake; jech xtok, koʼol ta jtsob sutel xchiʼuk li buchʼutik chukbil lokʼel ta alumal+
54 sventa xavaʼi ti kʼu yelan li kʼexlale; chakʼexav-o ta skoj li kʼusi la apase, yuʼun jaʼ xkom to smul laj yaʼi sba avuʼun li avix amuke.
55 Li amuk Sodoma xchiʼuk stsebetake ta xchaʼta yav ti kʼu toʼox yelanike, li avix Samaria xchiʼuk stsebetake ta xchaʼta yav ti kʼu toʼox yelanike, li voʼot xchiʼuk atsebetake ta xchaʼta yav ti kʼu toʼox avelanike.+
56 Li amuk Sodomae mu sta-o ti laj avalbe skʼoplal kʼalal jaʼo lik atoy abae,
57 ti kʼalal muʼyuk toʼox vinajem li achoplejale.+ Avi une, ta xchopol kʼoptaikot li stsebetak Siria xchiʼuk li slakʼnatake. Jech xtok, spʼajojikot li stsebetak jfilisteaetik+ ti te oy ta apat axokone.
58 Chatabe stojobil li kʼusitik kʼexlal sba chapase xchiʼuk li kʼusitik ibalik sba chapase›, xi li Jeovae».
59 «Yuʼun xi chal li Ajvalil Jeova ti jaʼ Mukʼul Jpasmantale: ‹Avi une, jech ta jpasbot avaʼi jech kʼuchaʼal la apase,+ yuʼun muʼyuk xapas li kʼusi jamal laj avale, jech muʼyuk xkʼot ta pasel avuʼun li jtratoe.+
60 Pe li voʼone ta jvules ta jol li trato la jpastik kʼalal tsebot toʼoxe xchiʼuk ta jpastik jun trato ti chjalij ta sbatel osile.+
61 Ta xvul ta ajol ti kʼu toʼox yelan atalelale, vaʼun chakʼexav+ kʼalal mi la achʼam li avixobtak xchiʼuk amukobtake; jech xtok, chkakʼ ti xkʼot ta atsebetake, pe maʼuk ta skoj li trato la jpastike›.
62 »‹Ta jpas jun trato ta atojolal; vaʼun jech chanaʼ ti voʼon Jeovaune.
63 Vaʼun, chvul ta ajol li kʼusitik la apase xchiʼuk solel chmak ave ta kʼexlal+ kʼalal mi laj kakʼot ta pertone, akʼo mi ep kʼusitik la apas›,+ xi li Ajvalil Jeova ti jaʼ Mukʼul Jpasmantale».
Tsʼibetik ta yok vun
^ Te tsakal skʼoplal arete, aniyo, xchuk kʼobil xchiʼuk yan kʼusitik.
^ O «stsʼisbenale».
^ O «snukulil fokae».
^ Te tsakal skʼoplal arete, aniyo, xchuk kʼobil xchiʼuk yan kʼusitik.
^ O «stsʼisbenale».
^ O «sventa xata junuk avabtel li ta pasob mantale».
^ Literal «abi».
^ O «jutebuk».
^ Te tsakal skʼoplal arete, aniyo, xchuk kʼobil xchiʼuk yan kʼusitik.
^ Jaʼ xkaltik, jaʼ la xpix-o li slokʼol viniketike.
^ O «stsʼisbenale».
^ O «junuk yoʼontonik avuʼun». Literal «slamajesbe yoʼontonik».
^ O «ta jujun chʼivite; ti bu oy ep krixchanoetike».
^ Literal «la alevan aba».
^ Literal «ti mukʼtik sbekʼtalike».
^ Literal «ta yosilal Kanaane».
^ O «Solel kʼunibem».
^ O jaʼ van skʼoplal «Solel kapem jol ta atojolal».
^ O «li ta chʼivitetike; li ta kayeetike».
^ O «chavakʼbe michʼob kʼabal».
^ Li ta ebreo kʼope xuʼ van te nitil skʼoplal ta jpʼel kʼop ti «tsoʼ» skʼan xale, jaʼo chichʼ alel kʼalal oy kʼusi chichʼ pʼajele. Kʼelo Glosario, ibal sba.
^ Te tsakal skʼoplal arete, aniyo, xchuk kʼobil xchiʼuk yan kʼusitik.
^ Literal «li abee».
^ Literal «ta atsʼetkʼob».
^ Xuʼ van jaʼ skʼoplal li bikʼtal lumetik ti te noʼox nopajtike.
^ Literal «ta abatsʼikʼob».
^ O «xchopolil».
