Esekiel 17:1-24
17 La skʼoponun tal yan velta li Jeovae, xi laj yalbune:
2 «Xnichʼon krixchano, alo jtosuk loʼil ti chukul ta aʼiele xchiʼuk alo junuk pʼijil loʼil ta sventa li jteklum Israele.+
3 Xi skʼan xavale: ‹Xi chal li Ajvalil Jeova ti jaʼ Mukʼul Jpasmantale: «Li mukʼta aguila+ ti natik tajek xikʼe, ti pim xchiʼuk natik skʼukʼumal xchiʼuk ti ep ta tos skolorale, tal ta Libano+ xchiʼuk la skʼasbe sniʼ li sedro teʼe.+
4 La skʼokbe batel li sniʼ ti bu mas toyol oye, laj yichʼ batel li ta yosilal jpʼolmajeletike* xchiʼuk te la stsʼun li ta slumal jpʼolmajeletike.+
5 Laje, la stam ta lumtik jpʼej sbekʼ tsʼunobil+ xchiʼuk te la stsʼun ta jsep osil ti lek yoxe. La stsʼun kʼuchaʼal sause teʼ ti te tekʼel ta stiʼ ukʼume.
6 Vaʼun, vokʼ li sbekʼ tsʼunobile, jech pas ta jpets uva ti lek pim yanale xchiʼuk ti pekʼel noʼoxe.+ Jech xtok, nijajtik yalel li skʼobkʼobtake xchiʼuk te noʼox ta yolon la stsʼun sba yalel li yibele. Jaʼ jech pas ta jpets uva, lokʼ yanaltak xchiʼuk skʼobkʼobtak.+
7 »›»Tal to yan mukʼta aguila+ xtok ti natik tajek xikʼe xchiʼuk ti natik tajek skʼukʼumale.+ Vaʼun, li jpets uva taje ta anil noʼox laj yakʼ batel yibel ti bu oy li aguilae, lik lokʼanuk batel ti bu tsʼunule; jech xtok, li skʼobkʼobtake la slin sba batel ti bu oy li aguila sventa x-atʼesate.*+
8 Lek xa onoʼox li osil ti bu tsʼunbil sventa xakʼ skʼobkʼobtake, sventa xakʼ sate xchiʼuk sventa xkʼot ta mukʼta teʼel uvae, te tsʼunbil ta tiʼ ukʼum»›.+
9 »Xi skʼan xavale: ‹Xi chal li Ajvalil Jeova ti jaʼ Mukʼul Jpasmantale: «¿Mi ta van xchʼi lek? ¿Mi muʼyuk van buchʼu chtal sbulbe lokʼel li yibel+ sventa xkʼaʼ li sate xchiʼuk sventa xmatsʼ li yuninaltak* skʼobe?+ Ta skoj ti solel takin chkome, mu xa persauk jaʼ tsbul lokʼel li buchʼu tsots yipe xchiʼuk mu xa persauk ep yajval sventa xichʼ bulel lokʼel kʼalal to ta yibel.
10 Akʼo mi xichʼ chaʼtsʼunel, ¿mi ta to van xchʼi lek? ¿Mi mu tauk xtakij ta j-echʼel mi vul ta stojolal li ikʼ ti chlik tal ta slokʼeb kʼakʼale? Te ta xtakij li ta yavil ti bu vokʼ tale»›».
11 La skʼoponun tal yan velta li Jeovae, xi laj yalbune:
12 «Avokoluk, xi xavalbe li jteklum ti jtoybae: ‹¿Mi yuʼun mu xavakʼik venta kʼusitik skʼan xal taje?›. Xi xavalbe yaʼie: ‹¡Kʼelavilik! Li ajvalil ta Babiloniae tal ta Jerusalen, vaʼun la xchuk li ajvalil xchiʼuk li bankilaletik ta Jerusalene xchiʼuk laj yikʼan batel ta Babilonia.+
13 Jech xtok, laj yikʼbe batel jun snitilulal ajvalil,+ laj yalbe ti oyuk kʼusi xal ta jamale xchiʼuk la spas jun trato xchiʼuk.+ Laje, laj yikʼ batel li viniketik ti tsots skʼoplalik ta jteklum+
14 sventa xbikʼtaj skʼoplal li jteklume xchiʼuk sventa mu xa stam-o sba likel. Jech oxal, sventa mu xlaj skʼoplalike, persa skʼan stsakik ta venta li trato la spas ajvalil ta Babiloniae.+
15 Pe li ajvalile* la stoy sba ta stojolal li ajvalil ta Babiloniae,+ yuʼun la stak batel yaj-almantaltak ta Ejipto sventa xtakbat tal kaʼetik+ xchiʼuk epal soltaroetik.+ ¿Mi ta van spas kanal? ¿Mi muʼyuk van chichʼ kastigo ta skoj li kʼusitik tspase? ¿Mi xuʼ van ta jech noʼox slajesbe skʼoplal li tratoe xchiʼuk ti mu xichʼ kastigoe?›.+
16 »‹Xi chal li Ajvalil Jeova ti jaʼ Mukʼul Jpasmantale: «Jamal chkal ta skoj ti kuxulune, li ajvalile* te chcham ta Babilonia, jaʼ ti bu nakal li ajvalil* ti jaʼ tikʼat yuʼun ta ajvalile, yuʼun muʼyuk xkʼot ta pasel yuʼun li kʼusi jamal laj yalike xchiʼuk li trato la spasike.+
17 Kʼalal mi laj yakʼ stekʼobik xchiʼuk mi la svaʼanik muro sventa stsakik ta kʼop jteklum li jbabiloniaetik yoʼ slajesbeik skʼoplal epal krixchanoetike,* muʼyuk sbalil chkʼot ta paskʼop li sviniktak faraon xchiʼuk li yajsoltarotak ti mu albajuk yepale.+
18 Yuʼun li ajvalile muʼyuk xkʼot ta pasel yuʼun li kʼusi jamal laj yale xchiʼuk li trato la spase. Akʼo mi laj yakʼ ye,* laj onoʼox spas skotol li kʼusitik taje. Jaʼ yuʼun, muʼyuk onoʼox bu chkol»›.
19 »‹Jaʼ yuʼun, xi chal li Ajvalil Jeova ti jaʼ Mukʼul Jpasmantale: «Jamal chkal ta skoj ti kuxulune, chkakʼbe stoj ta skoj ti muʼyuk xkʼot ta pasel yuʼun li kʼusi jamal laj kale+ xchiʼuk li jtratoe.
20 Ta jipbe batel syakobil, vaʼun yakbil chkʼot ta petsʼ.+ Chkikʼ batel ta Babilonia xchiʼuk te ta jchapan ta skoj ti muʼyuk tukʼ laj yakʼ sba ta jtojolale.+
21 Skotol li yajsoltarotak ti chjatavik batele chlajik ta espada, yan li buchʼutik te chkomike tanpuk chbatik ta buyuk noʼox.*+ Vaʼun, jech chanaʼik ti jech lokʼem ta ke jtuke, voʼon li Jeovaune»›.+
22 »‹Xi chal li Ajvalil Jeova ti jaʼ Mukʼul Jpasmantale: «Li natil sedro teʼe ta jkʼasbe li jun sniʼ ti bu mas toyol oye,+ vaʼun ta jtsʼun. Ta jtuchʼbe lokʼel li jun yuninal* sniʼe,+ laje chbat jtsʼun jtuk ta jpʼej vits ti toyol tajeke.+
23 Te ta jtsʼun ta jpʼej tayal vits ta Israel, ta xchʼi batel li skʼobkʼobtake, ta xakʼ sat xchiʼuk chpas ta jpets mukʼta sedro teʼ. Te chnakiik jeltos mutetik li ta yolone xchiʼuk te chkux yoʼontonik ta yaxinal* skʼobkʼobtak.
24 Skotol li teʼetik ta osiltike chakʼik venta ti la jbikʼtajesbe skʼoplal li jtekʼ natil teʼe xchiʼuk ti voʼon la jmukʼibtasbe skʼoplal li jpets komkom teʼe,+ voʼon li Jeovaune; laj kakʼ takijuk li yaxal teʼe xchiʼuk laj kakʼ kʼelomajuk li takin teʼe.+ Jech lokʼem ta ke jtuk xchiʼuk jech kʼotem ta pasel kuʼun, voʼon li Jeovaune»›».
Tsʼibetik ta yok vun
^ Literal «ta yosilal Kanaane».
^ O «xmaltaate».
^ O «yunenaltak».
^ Jaʼ xkaltik, Sedekias.
^ Jaʼ xkaltik, Sedekias.
^ Jaʼ xkaltik, Nabukodonosor.
^ Literal «laj yakʼ skʼob».
^ Literal «ti bu chbat ta jujujot li ikʼe».
^ O «yunenal».
^ O «skeoval».
