Esekiel 2:1-10
2 Vaʼun, xi laj yalbune: «Xnichʼon krixchano,* vaʼano lek aba sventa jchiʼinot ta loʼil».+
2 Kʼalal la skʼoponune, vul ta jtojolal li s-espiritu Diose, vaʼun la svaʼanun+ sventa xkaʼi kʼusi chalbun li buchʼu la skʼoponune.
3 Xi to laj yalbune: «Xnichʼon krixchano, ta jtakot batel ta stojolal li jteklum Israele,+ ta stojolal li jpʼajmantal mukʼtik lumetik ti stoyoj sbaik ta jtojolale.+ Li stukik xchiʼuk li smoltotakike saʼoj smulik ta jtojolal, jech spasojik-o tal kʼalal to avie.+
4 Ta jtakot batel ta stojolal li jtoyba nichʼnabiletik ti yijubem yoʼontonike,+ xi skʼan xavalbe yaʼiike: ‹Xi chal li Ajvalil Jeova ti jaʼ Mukʼul Jpasmantale›.
5 Manchuk mi xchikintaik o mi mu skʼan xchikintaik, jpʼel skʼoplal tsnaʼik ti oy echʼ jun j-alkʼop ta stojolalike,+ yuʼun jaʼik jun jteklum ti jtoybae.+
6 »Jaʼuk li voʼote, xnichʼon krixchano, mu xaxiʼ ta stojolalik+ xchiʼuk mu xaxiʼo yuʼun li kʼusi chalike, akʼo mi joyolot ta chʼixetik*+ xchiʼuk akʼo mi te achiʼuk ta naklej li tseketike.* Mu xaxiʼo li kʼusi chalike+ xchiʼuk mu xaxiʼo li satike,+ yuʼun jaʼik jun jteklum ti jtoybae.
7 Skʼan xavalbe yaʼiik li kʼusi chkale, manchuk mi xchikintaik o mi muʼyuk, yuʼun jaʼik jun jteklum ti jtoybae.+
8 »Jaʼuk li voʼote, xnichʼon krixchano, chikintao li kʼusi yakal chkalbote. Mu xatoy aba jech kʼuchaʼal li jun jteklum ti jtoybae. Jachʼo li avee xchiʼuk lajeso li kʼusi chkakʼbote».+
9 Kʼalal la jkʼele, laj kil ti oy buchʼu syeʼoj tal skʼob ta jtojolale+ xchiʼuk ti te stsakoj jun balbalvun ti oy kʼusi te tsʼibabile.+
10 Kʼalal la xlichʼan tal ta yeloval jsate, laj kil ti tsʼibabil xchaʼjotale.+ Te tsʼibabil son sventa at-oʼonton xchiʼuk li kʼusitik chakʼ okʼel xchiʼuk at-oʼontone.+
Tsʼibetik ta yok vun
^ Li «xnichʼon krixchano» xie jaʼ baʼyel velta chvinaj liʼe, oy 93 ta velta chvinaj ta sjunul li slivroal Esekiele.
^ O «eskorpionetike».
^ O jaʼ van skʼoplal «akʼo mi solel pimik ta mantal xchiʼuk akʼo mi xkoʼolajik kʼuchaʼal li kʼusitik chyayijesvanike».
