Esekiel 20:1-49
20 Li ta svukubal jabil,* li ta slajunebal kʼakʼal ta svoʼobal ue, oy jayvoʼuk moletik ta Israel talik ta jtojolal xchiʼuk te chotiik ta keloval sventa sjakʼik kʼusi chal li Jeovae.
2 Vaʼun, la skʼoponun tal li Jeovae, xi laj yalbune:
3 «Xnichʼon krixchano, kʼopono li moletik ta Israele, xi xavalbe yaʼiike: ‹Xi chal li Ajvalil Jeova ti jaʼ Mukʼul Jpasmantale: «¿Mi yuʼun oy kʼusi tal ajakʼbeikun? ‹Jamal chkal ta skoj ti kuxulune, muʼyuk ta jtakʼboxuk li kʼusi chajakʼike›,+ xi li Ajvalil Jeova ti jaʼ Mukʼul Jpasmantale»›.
4 »¿Mi chapalot xa sventa xachapanan?* Xnichʼon krixchano, ¿mi chapalot xa sventa xachapanan? Akʼbo snaʼik li kʼusitik toj chopol la spasik li smoltotakike.+
5 Xi xavalbe yaʼiike: ‹Xi chal li Ajvalil Jeova ti jaʼ Mukʼul Jpasmantale: «Kʼalal la jtʼuj li Israele,+ oy kʼusi jamal laj kal* ta stojolal li snitilulal Jakobe xchiʼuk laj kakʼ jba ta ojtikinel ta stojolalik li ta yosilal Ejiptoe.+ Jech, xi jamal laj kalbeike: ‹Voʼon li Jeova ti Adiosikune›.
6 Li vaʼ kʼakʼale, laj kalbeik ta jamal ti ta jlokʼesik tal li ta yosilal Ejiptoe xchiʼuk ti chkikʼik batel ta jun balumil ti jtʼujoj* xa onoʼoxe, ti bu oy lek leche xchiʼuk pome.+ Ti jaʼ li mas kʼupil sba xvinaj ta skotol li yan lumetike.
7 Vaʼun, xi laj kalbeike: ‹Ta jujuntal jipik batel li kʼusitik ibal sba ti te oy ta yeloval asatike; mu xasokes abaik li ta ibal sba santoetik* ta Ejiptoe.+ Voʼon li Jeova ti Adiosikune›.+
8 »›»Pe la stoy sbaik ta jtojolal xchiʼuk muʼyuk la skʼan la xchikintabeikun. Muʼyuk la sjipik batel li kʼusitik ibal sba ti te oy ta yelovalike mi jaʼuk laj yiktaik li ibal sba santoetik ta Ejiptoe.+ Jaʼ yuʼun, laj kal ta jamal ti ta jmal tal skapemal jol ta stojolalike xchiʼuk ti ta jlokʼes skotol skʼakʼal koʼonton ta stojolalik li ta yosilal Ejiptoe.
9 Pe oy kʼusi la jpas ta skoj jbi sventa mu xichʼ sokesbel skʼoplal ta yeloval li mukʼtik lumetik ti bu batemik ta nakleje.+ Yuʼun kʼalal la jlokʼesik* tal li ta yosilal Ejiptoe,+ jech laj kakʼ jba ta ojtikinel ta stojolalik* ta yeloval li mukʼtik lumetike.
10 Jaʼ yuʼun, la jlokʼesik tal li ta yosilal Ejiptoe xchiʼuk la jbeiltasik batel ta takixokol balumil.+
11 »›»Vaʼun, laj kakʼbeik li jmantaltake xchiʼuk laj kakʼbe snaʼik li kʼusitik chapanbil kuʼune,+ jech mu xcham li buchʼu chchʼun batele.+
12 Jech xtok, laj kakʼbeik jun savado+ sventa xkʼot ta jun senyail ta stojolalik xchiʼuk ta jtojolal+ yoʼ snaʼik ti voʼon ta jchʼultajesike, voʼon li Jeovaune.
13 »›»Pe li jteklum Israele la stoy sbaik ta jtojolal te ta takixokol balumil.+ Muʼyuk la xchʼunik li jmantaltake xchiʼuk la spʼajik li kʼusitik chapanbil kuʼun ti jaʼ tsta-o xkuxlejal li buchʼu chchʼun batele. La sokesbeik skʼoplal ta j-echʼel li savado kakʼojbeike. Jaʼ yuʼun, laj kal ta jamal ti ta jmal tal skapemal jol ta stojolalik te ta takixokol balumil sventa jtupʼbe skʼoplalike.+
14 Oy kʼusi la jpas ta skoj jbi sventa mu xichʼ sokesbel skʼoplal ta yeloval li mukʼtik lumetike, ti laj yilik kʼu yelan la jlokʼesik* tale.+
15 Jech xtok, laj kalbeik ta jamal te ta takixokol balumil ti muʼyuk chkikʼik batel li ta balumil ti kalojbeik xa ox chkakʼbeike,+ jaʼ ti bu oy lek leche xchiʼuk pome, ti jaʼ li bu mas kʼupil sba xvinaj ta skotol li yan lumetike.+
16 Taje jaʼ ta skoj ti la spʼajik li kʼusitik chapanbil kuʼune, ti muʼyuk la xchʼunik li jmantaltake xchiʼuk ti la sokesbeik skʼoplal li savado kakʼojbeike, yuʼun jaʼ bat ta yoʼontonik stsʼakliel li ibal sba santoetik yuʼunike.+
17 »›»Pe kʼuxubajik ta koʼonton, jech oxal muʼyuk la jlajesbe skʼoplalik; muʼyuk la jtupʼbe skʼoplalik li ta takixokol balumile.
18 Xi laj kalbe ta takixokol balumil li xnichʼnabike:+ ‹Mu me xapasik li kʼusi yaloj amoltotakike,+ mu xachʼunik li kʼusitik kʼotem ta nopel yuʼunike mi jaʼuk xasokes abaik li ta ibal sba santoetik yuʼunike.
19 Voʼon li Jeova ti Adiosikune. Chʼunik li jmantaltake xchiʼuk pasik li kʼusitik chapanbil kuʼune, kʼotuk ta pasel avuʼunik.+
20 Chʼultajesik li savado kakʼojboxuke,+ taje jaʼ chkʼot ta jun senyail ta atojolalik xchiʼuk ta jtojolal sventa xanaʼik ti voʼon li Jeova ti Adiosikune›.+
21 »›»Pe li nichʼnabiletike lik stoy sbaik ta jtojolal.+ Muʼyuk la xchʼunik li jmantaltake xchiʼuk muʼyuk la spasik li kʼusitik chapanbil kuʼun ti jaʼ tsta-o xkuxlejal li buchʼu chchʼun batele. La sokesbeik skʼoplal li savado kakʼojbeike. Jaʼ yuʼun, laj kal ta jamal ti ta jmal tal skapemal jol ta stojolalike xchiʼuk ti ta jlokʼes skotol skʼakʼal koʼonton ta stojolalik te ta takixokol balumile.+
22 Pe la jpajes jba+ xchiʼuk oy kʼusi la jpas sventa mu xichʼ sokesbel skʼoplal jbi+ ta yeloval li mukʼtik lumetike, ti laj yilik kʼu yelan la jlokʼesik* tale.
23 Jech xtok, laj kalbeik ta jamal te ta takixokol balumil ti tanpuk chbatik kuʼun li ta mukʼtik lumetike xchiʼuk ti ta jtaniik batel ta lumetike.+
24 Yuʼun muʼyuk la xchʼunik li jmantaltake xchiʼuk la spʼajik li kʼusitik chapanbil kuʼune,+ la sokesbeik skʼoplal li savado kakʼojbeike xchiʼuk jaʼ la stsʼakliik batel* li ibal sba santoetik yuʼun smoltotakike.+
25 Jech xtok, laj kakʼ ti akʼo xchʼunik li mantaletik ti muʼyuk lekike xchiʼuk li kʼusitik chapanbil ti muʼyuk tsta-o xkuxlejalike.+
26 Laj kakʼ ti sokes sbaik li ta milbil matanaletik laj yakʼik kʼalal la xchikʼik ta kʼokʼ li sba xnichʼnabike,+ taje jaʼ sventa xlaj skʼoplalik xchiʼuk sventa snaʼik ti voʼon Jeovaune»›.
27 »Jaʼ yuʼun, xnichʼon krixchano, kʼopono li jteklum Israele, xi xavalbee: ‹Xi chal li Ajvalil Jeova ti jaʼ Mukʼul Jpasmantale: «Jaʼ jech la xchopol kʼoptaikun li amoltotakik eke, muʼyuk tukʼ laj yakʼ sbaik ta jtojolal.
28 Laj kikʼik batel li ta balumil ti bu kalojbeik xa onoʼox chkakʼbeike.+ Kʼalal laj yilik skotol li tayal vitsetike xchiʼuk li teʼetik ti lek pim yanale,+ te lik yakʼik milbil matanaletik xchiʼuk yan matanaletik ti tsaʼ skʼakʼal koʼontone. Laj yakʼik matanaletik ti xmuet yikʼe* xchiʼuk la smalik matanal vino.
29 Vaʼun, xi la jakʼbeike: ‹¿Kʼusi sventa ti chabatik li ta tayal kʼopojebale?›.* (Jech-o Tayal Kʼopojebal sbi kʼalal to avi)»›.+
30 »Avi une, xi xavalbe li jteklum Israele: ‹Xi chal li Ajvalil Jeova ti jaʼ Mukʼul Jpasmantale: «¿Mi mu jechuk chasokes abaik kʼuchaʼal la spas amoltotakik ti chatsʼakliik batel li ibal sba santoetik yuʼunike xchiʼuk ti muʼyuk tukʼ chavakʼ abaik ta jtojolale?+
31 ¿Mi mu jechuk chasokes-o abaik avi kʼalal chachikʼik ta kʼokʼ anichʼnabik+ sventa xkʼot ta smoton li ibal sba santoetik avuʼunike? Jteklum Israel, ¿mi yuʼun ta jtakʼboxuk avalojik li kʼusi chajakʼbeikun ti jech chapasik taje?»›.+
»‹Jamal chkal ta skoj ti kuxulune, muʼyuk ta jtakʼboxuk li kʼusi chajakʼike›,+ xi li Ajvalil Jeova ti jaʼ Mukʼul Jpasmantale.
32 ‹Muʼyuk onoʼox bu chkʼot ta pasel li kʼusi anopojik kʼalal xi chavalike: «Jechuk jpastik kʼuchaʼal li mukʼtik lumetike, li lumetik ta yantik balumil ti jaʼ chichʼik ta mukʼ* li teʼ xchiʼuk tone»›».+
33 «Xi chal li Ajvalil Jeova ti jaʼ Mukʼul Jpasmantale: ‹Jamal chkal ta skoj ti kuxulune, ta jventainoxuk kʼuchaʼal jun ajvalil. Ta jyeʼ talel li jkʼob ti oy yip xchiʼuk ti oy sjuʼel sventa xkakʼboxuk kastigoe. Ta jmal tal skapemal jol ta atojolalik.+
34 Ta yip xchiʼuk ta sjuʼel jkʼob xchiʼuk ta skʼakʼal koʼonton ta jlokʼesoxuk tal li ta jteklumetike xchiʼuk ta jtsoboxuk lokʼel tal li ta lumetik ti butik tanpuk labatike.+
35 Ta xkikʼoxuk batel li ta takixokol balumil yuʼun jteklumetike xchiʼuk te jkʼelojbe jba jsatik ta jchapan jkʼoptik.+
36 »›Jech kʼuchaʼal la jchapan jkʼopkutik xchiʼuk li amoltotakik ta takixokol balumil ta yosilal Ejiptoe, jaʼ jech ta jchapan jkʼoptik ek›, xi li Ajvalil Jeova ti jaʼ Mukʼul Jpasmantale.
37 ‹Te chkakʼ jelavanik ta yolon xvachʼ li jchabichije+ xchiʼuk chkakʼ akʼo kʼotuk ta pasel avuʼunik li tratoe.
38 Pe ta jvokʼ lokʼel ta atojolalik li jtoybaetike xchiʼuk li buchʼutik tsaʼ smulik ta jtojolale.+ Yuʼun ta jlokʼesik tal li ta jteklum ti bu nakalik kʼuchaʼal jyanlumetike, pe muʼyuk ch-ochik li ta yosilal Israele.+ Vaʼun, jech chanaʼik ti voʼon Jeovaune›.
39 »Li voʼoxuke, jteklum Israel, xi chalboxuk li Ajvalil Jeova ti jaʼ Mukʼul Jpasmantale: ‹Bat tunanik ta stojolal li ibal sba santoetik avuʼunike.+ Pe mi muʼyuk laj aviktaik spasel taje, voʼoxuk chatabeik stojobil. Muʼyuk xa chavikʼubtasbeikun jchʼul bi kʼalal chavakʼik milbil matanaletike xchiʼuk kʼalal chavichʼik ta mukʼ li ibal sba santoetik avuʼunike›.+
40 »‹Yuʼun li ta chʼul vits kuʼune, li ta tayal vits ta yosilal Israele,+ jaʼ te chichʼikun ta mukʼ skotol li j-israeletike.+ Te chlik muyubajkun ta atojolalik xchiʼuk chlik jkʼanboxuk matanaletik xchiʼuk li sba sat atsʼunobike, skotol li kʼusitik chʼul avuʼunike›,+ xi li Ajvalil Jeova ti jaʼ Mukʼul Jpasmantale.
41 ‹Ta skoj li matanaletik ti xmuet yikʼe,* chlik muyubajkun ta atojolalik. Taje jaʼo chkʼot ta pasel kʼalal mi la jtsoboxuk tal xchiʼuk mi la jlokʼesoxuk tal li ta jteklumetike, jaʼ li ta lumetik ti bu tanpuk labatike;+ jech chkichʼ chʼultajesel ta atojolalik ta yeloval sat li mukʼtik lumetike›.+
42 »‹Chlik anaʼik ti voʼon Jeovaun+ kʼalal mi laj kikʼoxuk batel li ta yosilal Israele,+ li ta balumil ti kalojbeik xa onoʼox chkakʼbeik li amoltotakike.
43 Te chvul ta ajolik ti kʼu toʼox yelan atalelalik xchiʼuk skotol li kʼusitik toʼox chapasik ti jaʼ la asokes-o abaike,+ vaʼun chlik ibuk avoʼontonik ta skoj li kʼusitik chopol la apasike.+
44 Jteklum Israel, jech chlik anaʼik ti voʼon Jeovaun kʼalal mi jech la jpasboxuk ta skoj li jbie,+ maʼuk jech ta jpasboxuk ti kʼu yelan li achopol talelalike xchiʼuk li kʼusitik chopol la apasike›, xi li Ajvalil Jeova ti jaʼ Mukʼul Jpasmantale».
45 Vaʼun, la skʼoponun tal yan velta li Jeovae, xi laj yalbune:
46 «Xnichʼon krixchano, akʼo batel asat ta stukʼil sur, oyuk kʼusi xaval ta stojolal li sure xchiʼuk alo kʼusi chkʼot ta stojolal li teʼtikaltik ta yosilal sure.
47 Xi xavalbe li teʼtikaltik ta sure: ‹Aʼio li kʼusi chal Jeovae. Xi chal li Ajvalil Jeova ti jaʼ Mukʼul Jpasmantale: «Kʼelavil, ta jtsanbot akʼakʼal,+ chkʼakʼ skotol li yaxal teʼetik xchiʼuk takin teʼetik tee. Muʼyuk chtupʼ li skʼakʼale,+ skotol chlik yaʼiik kʼu to yelan li skʼakʼale, chlik ta sur kʼalal to ta norte.
48 Skotol krixchanoetik ta xilik ti voʼon la jtsanbe skʼakʼal sventa mu xtupʼe, voʼon li Jeovaune»›».+
49 Vaʼun, xi laj kale: «¡Ay, Kajval Jeova ti Mukʼul Jpasmantalote! Xi chalik ta jtojolale: ‹¡Naka babakʼop li kʼusi chale!›».
Tsʼibetik ta yok vun
^ Jaʼ skʼoplal ti svukubal xa ox jabil yichʼoj chukel batel li ajvalil Joakin, Esekiel xchiʼuk yan judaetike. Kʼelo Esekiel 1:2.
^ O «sventa xaval kʼusi chkʼot ta stojolalik».
^ Literal «la jtoy jkʼob».
^ O «jpaʼioj».
^ Li ta ebreo kʼope xuʼ van te nitil skʼoplal ta jpʼel kʼop ti «tsoʼ» skʼan xale, jaʼo chichʼ alel kʼalal oy kʼusi chichʼ pʼajele. Kʼelo Glosario, ibal sba.
^ Jaʼ xkaltik, Israel.
^ Jaʼ xkaltik, Israel.
^ Jaʼ xkaltik, Israel.
^ Jaʼ xkaltik, Israel.
^ Literal «jaʼ te laj yakʼ batel satik ta stojolal».
^ O «ti chakʼ jun oʼontonale». Literal «ti tslamajes oʼontonale».
^ O «chtunik ta stojolal».
^ O «ti chakʼ jun oʼontonale». Literal «ti tslamajes oʼontonale».
