Esekiel 21:1-32
21 La skʼoponun tal yan velta li Jeovae, xi laj yalbune:
2 «Xnichʼon krixchano, kʼelo batel li Jerusalene xchiʼuk alo kʼusi chopol chkʼot ta stojolal ti butik chʼule xchiʼuk alo kʼusi chopol chkʼot ta stojolal li yosilal Israele.
3 Xi xavalbe yaʼi li yosilal Israele: ‹Xi chal li Jeovae: «Ta xlik jtsakot ta kʼop, ta jlokʼes ta yavil li j-espadae+ xchiʼuk ta jlajesbe skʼoplal li buchʼu tukʼ xchiʼuk li buchʼu toj chopol ti te oyik ta atojolale.
4 Ta skoj ti ta jlajesbe skʼoplal li buchʼu tukʼe xchiʼuk li buchʼu toj chopol ti te oy ta atojolale, ta jlokʼes ta yavil li j-espada sventa jmil skotol li krixchanoetike, chlik ta sur kʼalal to ta norte.
5 Skotol li krixchanoetike tsnaʼik ti voʼon jtuk la jlokʼes ta yavil li j-espadae, voʼon li Jeovaune. Muʼyuk xa ta jtikʼ sutel ta yavil li j-espadae»›.+
6 »Li voʼote, xnichʼon krixchano, jikʼo avoʼonton kʼalal jaʼo chanik ta xiʼele. Xachamuk xa ta jikʼ oʼonton ta yelovalik.+
7 Mi xi la sjakʼbeikote: ‹¿Kʼu yuʼun ti chajikʼ avoʼontone?›. Xi xatakʼbe yaʼiike: ‹Jaʼ ta skoj jun aʼyej›. Yuʼun jpʼel skʼoplal chkʼot ta pasel. Chnik ta xiʼel yoʼonton skotolik, chʼabal xa yip te majajtik* chkom li skʼobike, solel chibajem chkomik xchiʼuk stsʼujlajet yaʼlel li sjol yakanike.*+ ‹Jpʼel skʼoplal chkʼot ta pasel, muʼyuk ta stselpʼuj›, xi li Ajvalil Jeova ti jaʼ Mukʼul Jpasmantale».
8 La skʼoponun tal yan velta li Jeovae, xi laj yalbune:
9 «Xnichʼon krixchano, xi xaval li kʼusi chkʼot ta pasele: ‹Xi chal li Jeovae: «¡Oy jun espada! Jun espada+ ti juxbil lek yee xchiʼuk ti lek stsʼayayet pasbile.
10 Juxbil xa lek ye sventa ep buchʼutik smil; lek juxbil sventa stsʼaytsʼunuk kʼuchaʼal saksevul»›».*
Xi la sjakʼ li jteklume: «¿Mi mu tauk ximuyubajkutik?».
Pe xi laj yal li Diose: «‹Li espadae,* ¿mi ta van spʼaj li xvaxton jnichʼon+ jech kʼuchaʼal tspas ta stojolal kʼusuk teʼale?
11 »›Oy buchʼu laj yichʼ akʼbel sventa xjux xchiʼuk sventa stsak lek ta skʼob. Li espada taje lek juxbil ye xchiʼuk lek stsʼayayet pasbil sventa xichʼ akʼbel ta skʼob li jmilvaneje.+
12 »›Xnichʼon krixchano, avanan xchiʼuk okʼan,+ yuʼun li espadae tal xa ta stojolal li jteklumale; tsmil skotol li bankilaletik ta Israele.+ Koʼol ta xlajik ta espada xchiʼuk li jteklumale. Jaʼ yuʼun, majo avoʼ sventa xavakʼ ta ilel ti kʼux chavaʼie.
13 Yuʼun laj xa yichʼ chajel ta kʼelel li jteklumale.+ ¿Kʼusi van chkʼot ta pasel mi la spʼaj vaxton li espadae? Chlaj skʼoplal li vaxtone›,+ xi li Ajvalil Jeova ti jaʼ Mukʼul Jpasmantale.
14 »Li voʼote, xnichʼon krixchano, alo li kʼusi chkʼot ta pasele, tʼaxo akʼob xchiʼuk oxib velta xi xavale: ‹¡Oy jun espada!›. Jaʼ li espada ti chmilvane, li espada ti ep buchʼutik tsmile xchiʼuk ti chmakvan ta jujujote.+
15 Chnik ta xiʼel yoʼontonik+ xchiʼuk ep buchʼutik te chyalik ta lum li ta yochebal slumalike; chkakʼ ti epuk buchʼutik xlajik ta milel ta espadae. ¡Lek stsʼaytsʼun kʼuchaʼal saksevul* xchiʼuk juxbil xa lek sventa xmilvan!
16 ¡Akʼo ta ilel ti lek juxbil avee, milvanan batel ta batsʼikʼob xchiʼuk ta tsʼetkʼob!* ¡Te xabat ti bu chavichʼ yeʼel batele!
17 Li voʼon eke ta jtʼax jkʼob xchiʼuk ta jlokʼes li skʼakʼal koʼontone.+ Jech lokʼem ta ke, voʼon li Jeovaune».
18 La skʼoponun tal yan velta li Jeovae, xi laj yalbune:
19 «Li voʼote, xnichʼon krixchano, akʼbo senyail chibuk be sventa te xtal s-espada li ajvalil ta Babiloniae. Jmoj yosilal bu chlik tal li chib bee, skʼan xichʼ vaʼanel jun poste sventa senyail ti bu chchʼak sba li chib be ti ch-ikʼvan batel ta chib jteklume.
20 Skʼan xavakʼbe senyail jun be sventa te xbat li espada ta Raba+ ti jaʼ slumal li j-ammonetike xchiʼuk akʼbo senyail li yan be sventa te xbat ta Jerusalen ti lek joyol ta muro+ ti te oy ta Judae.
21 Yuʼun li ajvalil ta Babiloniae te chpaj ti bu chchʼak sba li chib be sventa skʼelbe skʼoplal ta tʼunole.* Tsyeʼolan li flechaetike. Ta sjakʼbe li santotake* xchiʼuk tskʼelbe skʼoplal ta sekub chonbolom.
22 Li kʼusi la skʼelbe skʼoplal li ta tʼunol* ti te oy ta sbatsʼikʼobe jaʼ chakʼ batel ta ilel li Jerusalen yoʼ xichʼ akʼel abtejebaletik tee, yoʼ xichʼ alel mantal ti chlik milbaile, yoʼ x-avanik ta sventa li paskʼope, yoʼ xichʼ akʼel li abtejebaletik sventa xichʼ lajesel li ochebaletike, yoʼ spas stekʼobik xchiʼuk jun muro sventa stsakik ta kʼop.+
23 Akʼo mi jech, li buchʼutik* oy kʼusi jamal yalojbeike+ mu meleluk laj yilik li kʼusi la skʼel ta tʼunol* li ajvalile. Pe chvul ta sjol li kʼusitik chopol spasojike xchiʼuk chbat xchukanan tal.+
24 »Jaʼ yuʼun, xi chal li Ajvalil Jeova ti jaʼ Mukʼul Jpasmantale: ‹Voʼoxuk ta akojik ti laj yichʼ vulesel ta jolil li apaltailike.* Vinaj li kʼusitik chopol apasojike xchiʼuk li amulike, vinaj li achopol talelalike. Ta skoj ti laj avichʼik vulesel ta jolile, chavichʼik tsatsal tsakel batel›.
25 »Voʼot ti yayijemot tajeke, voʼot li chopol bankilalot ta Israele,+ kʼot xa li avoraile, sta xa yorail ti chavichʼ akʼbel li slajeb kastigoe.
26 Xi chal li Ajvalil Jeova ti jaʼ Mukʼul Jpasmantale: ‹Lokʼeso li stsʼotobil ajole xchiʼuk li akoronae.+ Yuʼun ta xjel skotol.+ Toyo muyel li buchʼu ta pekʼel oye+ xchiʼuk jipo yalel li buchʼu ta toyol oye.+
27 Chtal slajeb, chtal slajeb, chtal slajeb li ajvalilale.* Muʼyuk buchʼu yan chichʼ akʼbel, jaʼ to mi tal li buchʼu oy sderecho chichʼe,+ jaʼ ta xkakʼbe›.+
28 »Li voʼote, xnichʼon krixchano, xi xaval li kʼusi chkʼot ta pasele: ‹Li Ajvalil Jeova ti jaʼ Mukʼul Jpasmantale xi chal ta stojolal li j-ammonetike xchiʼuk ta sventa ti kʼu yelan chchopol kʼopojike: «¡Oy jun espada! Jun espada ti lokʼem xa ta yavil ti chmilvane; juxbil xa lek sventa xmilvan xchiʼuk sventa stsʼaytsʼunuk kʼuchaʼal saksevul.*
29 Ta skoj ti mu meleluk li kʼusi laj yilik ta atojolal li j-alkʼopetike, ta skoj ti jecheʼ li kʼusi laj yalik ta atojolal li jtʼunoletike,* te chavichʼ akʼel ti bu busul li animaetike, jaʼ li chopol viniketik ti kʼot xa yorailike, li yorail ti laj yichʼik akʼbel li slajeb kastigoe.
30 Tikʼo sutel ta yavil li espadae. Te ta jchapanot ti bu likemot talele, jaʼ li ta alumale.
31 Ta jmal talel ta atojolal li skʼakʼal koʼontone. Ta xchikʼot kʼuchaʼal kʼokʼ li skapemal jole xchiʼuk chkakʼot ta skʼob li viniketik ti muʼyuk xkʼuxul yoʼontonike, ti chanemik lek ta lajesvaneje.+
32 Chakʼot ta stilesobil kʼokʼ;+ chichʼ malel ta balumil li achʼichʼele, vaʼun muʼyuk xa chavichʼ vulesel ta jolil, yuʼun jech lokʼem ta ke jtuk, voʼon li Jeovaune»›».
Tsʼibetik ta yok vun
^ O «jokʼajtik».
^ Jaʼ xkaltik, tskʼabta sba skotolik ta skoj ti ta xiʼike.
^ O «saktsel».
^ Jaʼ xkaltik, li s-espada Jeovae.
^ O «saktsel».
^ O «surtokʼob».
^ Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
^ O «terafimetike».
^ Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
^ Jaʼ xkaltik, li jnaklejetik ta Jerusalene.
^ Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
^ O «achopolilike».
^ O «saktsel».
^ Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
