Esekiel 22:1-31
22 La skʼoponun tal yan velta li Jeovae, xi laj yalbune:
2 «Xnichʼon krixchano, ¿mi chapalot xa sventa xavalbe kʼusi chkʼot ta stojolal* li jteklum ti staoj smul ta smalel chʼichʼe+ xchiʼuk mi chapalot xa sventa xavalbe yaʼi skotol li kʼusitik toj chopol tspase?+
3 Xi skʼan xavale: ‹Xi chal li Ajvalil Jeova ti jaʼ Mukʼul Jpasmantale: «Jteklum ti chamalbe xchʼichʼel+ li jnaklejetik avuʼune, ti chtal xa avoraile,+ ti chapas ibal sba santoetik* sventa chasokes abae,+
4 ataoj amul ta skoj ti amaloj chʼichʼe+ xchiʼuk sokesojot li ibal sba santoetik avuʼune.+ La akomkomtajes akʼakʼalil atuk xchiʼuk chkʼot xa sjabilal ti chavichʼ kastigoe. Jech oxal, laj kakʼ ti xavichʼ pʼajel yuʼun li mukʼtik lumetike xchiʼuk ti xavichʼ labanel yuʼun skotol li lumetike.+
5 Li jteklumetik ti nom xchiʼuk nopol oyik ta atojolale ta slabanikot,+ voʼot ti sokem abie xchiʼuk ti nojot ta choplejale.
6 ¡Kʼelavil! Skotol li bankilaletik ta Israel ti te oy ta atojolale smalojik chʼichʼ ta skoj ti oy tsots yabtelike.+
7 Li krixchanoetik tee spʼajoj stot smeʼik.+ Tsloʼlaik li jyanlumetike, chilbajinik li buchʼu chamem stote* xchiʼuk li ants ti chamem smalale»›».+
8 «‹Apʼajoj ti butik chʼul kuʼune xchiʼuk asokesojbe skʼoplal li savado kuʼune.+
9 Oy jutmuliletik* te ti jpʼel ta yoʼonton tsmalik chʼichʼe.+ Oy buchʼutik te ti tstiʼik milbil matanal ta vitsetike. Jech xtok, oy buchʼutik te ti toj kʼexlal sba kʼusitik tspasike.+
10 Oy buchʼutik te xtok ti chchiʼinbeik ta vayel li yajnil stotike+ xchiʼuk ti tstsatsal tsakik jun ants ti yakal chil xchamele.+
11 Oy buchʼu te ti oy kʼusi toj chopol tspasbe li yajnil xchiʼile,+ li yan xtoke tsokes* yalib ta skoj ti oy kʼusi toj kʼexlal sba tspasbee,+ li yan xtoke tstsatsal tsak li yixlel ti jaʼ stseb li stote.+
12 Oy buchʼutik te ti chchon sbaik ta takʼin* sventa tsmalik chʼichʼe.+ Chakʼanbe sjol li kʼusi chavakʼ ta chʼome+ o chapas-o kanal* xchiʼuk chatsatsal kʼanbe takʼin li achiʼile.+ Ta j-echʼel la achʼayun ta ajol›, xi li Ajvalil Jeova ti jaʼ Mukʼul Jpasmantale.
13 »‹¡Kʼelavil!, toj ibal sba chkil ti chaloʼlavan sventa xapas kanal takʼine xchiʼuk ti te chichʼ malel chʼichʼ ta atojolale.
14 ¿Mi tsots-o van avoʼonton xchiʼuk mi tsots-o van akʼob mi kʼot skʼakʼalil chkakʼbot kastigoe?+ Jech lokʼem ta ke jtuk, voʼon li Jeovaune xchiʼuk jech ta jpas.
15 Tanpuk chabat kuʼun li ta mukʼtik lumetike xchiʼuk ta jtaniot batel li ta lumetike;+ ta jchʼaybe skʼoplal li achopolile.+
16 Chavichʼ kʼexlaltasel ta yeloval mukʼtik lumetik, vaʼun jech chanaʼ ti voʼon Jeovaune›».+
17 Laje, la skʼoponun tal yan velta li Jeovae, xi laj yalbune:
18 «Xnichʼon krixchano, li jteklum Israele kʼotem chkil kʼuchaʼal yikʼobal takʼin ti muʼyuk kʼusi xtun-oe. Xkoʼolajik kʼuchaʼal kovre, estanyo takʼin, tsatsal takʼin xchiʼuk plomo ti te tikʼil ta ornoe. Xkoʼolajik kʼuchaʼal yikʼobal plata.+
19 »Jaʼ yuʼun, xi chal li Ajvalil Jeova ti jaʼ Mukʼul Jpasmantale: ‹Ta skoj ti kʼotemoxuk kʼuchaʼal yikʼobal takʼin ti muʼyuk kʼusi xtun-oe,+ ta jtsoboxuk ta yut Jerusalen.
20 Jech kʼuchaʼal chichʼ tsobel ta yut orno li plata, kovre, tsatsal takʼin, plomo xchiʼuk estanyo takʼin sventa xichʼ tsanbel skʼakʼale xchiʼuk sventa xichʼ unijesele, jaʼ jech ta jtsoboxuk ta skʼakʼal koʼonton xchiʼuk ta skapemal jol, ta jtsan akʼakʼalik xchiʼuk ta xkunijesoxuk.+
21 Ta jtsoboxuk xchiʼuk ta jtsan akʼakʼalik ta skʼakʼal koʼonton,+ vaʼun te chavichʼik unijesel ta yut jteklum.+
22 Jech kʼuchaʼal chichʼ unijesel ta yut orno li platae, jaʼ jech ta xkunijesoxuk ta yut jteklum ek; vaʼun jech chanaʼik ti voʼon la jmal tal ta atojolalik li skʼakʼal koʼontone, voʼon li Jeovaune›».
23 Laje, la skʼoponun tal yan velta li Jeovae, xi laj yalbune:
24 «Xnichʼon krixchano, xi xavalbee: ‹Jaʼot jun jteklum ti muʼyuk chavichʼ lekubtasele, muʼyuk chakʼ voʼ ta atojolal li ta yorail skʼakʼal koʼontone.
25 Li j-alkʼopetik avuʼune oy kʼusitik chopol tsnop tspasik,+ xkoʼolajik kʼuchaʼal jkot leon ti xloket snukʼ* ta slilin ta tiʼel li sveʼele.+ Ta smilik li krixchanoetike.* Ta xuʼuninbeik li skʼulejalike xchiʼuk li kʼusitik yuʼunik ti ep sbalile. Epajem yuʼunik te li antsetik ti chamem smalalike.
26 Muʼyuk tstsakik ta venta jmantal li paleetik avuʼune+ xchiʼuk yakal tsokesik ti butik chʼul kuʼune.+ Koʼol xa noʼox chilik li kʼusi chʼul xchiʼuk li kʼusi muʼyuke,+ muʼyuk chakʼik ta ojtikinel li kʼusi ibal sba xchiʼuk li kʼusi sake;+ mu skʼan stsakik ta venta li savado kuʼune xchiʼuk tsokesbeikun jkʼoplal.
27 Li bankilaletik avuʼune xkoʼolajik kʼuchaʼal loboetik* ti tslilin ta tiʼel sveʼelike; tsmalik chʼichʼ xchiʼuk tsmilik krixchanoetik* sventa spasik kanal takʼin.+
28 Li j-alkʼopetik avuʼune xpixojik ta tan li kʼusitik spasojike. Maʼuk melel li kʼusi akʼbil yilike xchiʼuk jecheʼ li kʼusi laj yalik ta tʼunole*+ xchiʼuk xi chalike: «Xi chal li Ajvalil Jeova ti jaʼ Mukʼul Jpasmantale», akʼo mi muʼyuk jech yaloj li Jeovae.
29 Li krixchanoetik ta jteklume loʼlavanemik xchiʼuk elkʼajemik,+ yilbajinojik li buchʼu abol sbae xchiʼuk li buchʼu povree, sloʼlaojik li jyanlume xchiʼuk muʼyuk tukʼ li kʼusi spasojbeike›.
30 »‹La jsaʼ mi oy junuk vinik te ta stojolalik sventa smeltsan li muro pasbil ta tone o ti te svaʼan sba ta keloval ti bu javem li muro yoʼ xkʼopoj ta stojolal li jteklum sventa mu xichʼ lajesele,+ pe muʼyuk la jta.
31 Jaʼ yuʼun, ta jmal tal skapemal jol ta stojolalik xchiʼuk ta jlajesbe skʼoplalik ta skʼakʼal koʼonton ti xkoʼolaj kʼuchaʼal kʼokʼe. Chkakʼbe stojik ta skoj ti kʼu yelan stalelalike›,* xi li Ajvalil Jeova ti jaʼ Mukʼul Jpasmantale».
Tsʼibetik ta yok vun
^ Literal «sventa xachapan, xachapan».
^ Li ta ebreo kʼope xuʼ van te nitil skʼoplal ta jpʼel kʼop ti «tsoʼ» skʼan xale, jaʼo chichʼ alel kʼalal oy kʼusi chichʼ pʼajele. Kʼelo Glosario, ibal sba.
^ O «meʼone».
^ O «jnopmuliletik».
^ O «chutsʼinta».
^ O «o toj toyol chakʼanbe sjol».
^ O «tstsakik michʼob kʼabal».
^ O «xlaket snukʼ; x-avet».
^ Li loboe xkoʼolajtik kʼuchaʼal okʼil.
^ Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
^ Literal «li sbeike».
