Esekiel 23:1-49
23 La skʼoponun tal yan velta li Jeovae, xi laj yalbune:
2 «Xnichʼon krixchano, oy toʼox chaʼvoʼ antsetik ti koʼol smeʼike.+
3 Lik xchon sbaik ta Ejipto;+ ta stsebalik noʼox lik xchon sbaik tal. Te laj yichʼ petolanbel xchuʼik, te jaxolanbatik ta pikel li xchuʼik kʼalal tojol tsebik toʼoxe.
4 Li vixile Oola* sbi, li mukile Ooliba* sbi. Laj kuʼuninan toʼox, vaʼun ayan skeremik xchiʼuk stsebik. Li Oolae jaʼ li Samariae,+ li Oolibae jaʼ li Jerusalene.
5 »Li Oolae lik xchon sba+ kʼalal jaʼ toʼox kuʼune. Solel oy tajek ta yoʼonton tskʼupin li smalaltake,+ jaʼik li j-asiriaetik+ ti te nopol nakalike.
6 Taje jaʼik ajvaliletik ti asul lek skʼuʼ spokʼ slapojike xchiʼuk jaʼik itsʼinal jpasmantaletik, skotolik jaʼik kʼupil sba keremetik ti kajajtik ta kaʼe.
7 Jech-o la xchon sba ta stojolal li j-asiriaetik ti mas tʼujomike. La sokes sba+ xchiʼuk li viniketik ti solel oy tajek ta yoʼonton tskʼupine xchiʼuk li ibal sba santoetik* yuʼunike.
8 Muʼyuk laj yikta xchonel sba jech kʼuchaʼal la spas ta Ejiptoe, yuʼun kʼalal stsebal toʼoxe, chiʼinat ta vayel yuʼun li jnaklejetik tee, jaxolanbat ta pikel li xchuʼ kʼalal tojol tseb toʼoxe xchiʼuk solel laj yetʼes yoʼontonik ta xchiʼinel ta vayel.+
9 Jaʼ yuʼun, laj kakʼ ta skʼob li smalaltak ti jaʼik li j-asiriaetike,+ ti solel oy tajek ta yoʼonton tskʼupine.
10 La stʼananik komel+ xchiʼuk la xchukbeik batel li skerem stsebetake,+ vaʼun la smilik komel ta espada. Puk batel skʼoplal ta stojolal antsetik ti kʼu yelane xchiʼuk laj yichʼ chapanel yuʼun li j-asiriaetike.
11 »Kʼalal laj yil Ooliba li kʼusi la spas xvixe, mas to toj echʼem ayan ta yoʼonton li mulivajele xchiʼuk mas to lik xchon sba kʼuchaʼal li xvixe.+
12 Solel ayan tajek ta yoʼonton skʼupinel li j-asiriaetik+ ti te nopol nakalike, jaʼik ajvaliletik xchiʼuk itsʼinal jpasmantaletik ti kʼupil sba skʼuʼ spokʼ slapojike xchiʼuk ti chkajiik ta kaʼe, skotolik jaʼik kʼupil sba keremetik.
13 Kʼalal la sokes sbae, laj kakʼ venta ti jmoj li be bu la stamik batel xchaʼvoʼalike.+
14 Pe maʼuk noʼox ti la xchon sbae, oy to kʼusi la spas. La skʼel li slokʼol viniketik ti te lokʼtabil ta muroe, jaʼ slokʼol li jkaldeaetik ti bonbil ta tsoje,
15 oy lek xchukik, jamal lek li stsʼotobil sjolike, xkoʼolajik kʼuchaʼal jpaskʼopetik yilel, jaʼ slokʼol li jbabiloniaetik ti te vokʼemik ta yosilal jkaldeaetike.
16 Kʼalal laj yile, solel ayan tajek ta yoʼonton skʼupinel xchiʼuk la stakbe batel j-almantaletik li viniketik ta Kaldeae.+
17 Jaʼ yuʼun, li jbabiloniaetike jech-o chtalilanik ta stem* sventa xchiʼinik ta vayel xchiʼuk la sokesik ta skoj ti mulivajik xchiʼuke. Kʼalal la sokesik xa oxe, ib yoʼonton yuʼunik, vaʼun namaj lokʼel ta stojolalik.
18 »Kʼalal muʼyuk xkʼexlal jech-o la xchon sbae xchiʼuk ti laj yakʼ sba ta ilel ti tʼanale,+ solel x-ibet koʼonton linamaj batel ta stojolal, jech kʼuchaʼal x-ibet koʼonton linamaj batel ta stojolal li xvixe.+
19 Mas to lik xchon sba ta jyalel,+ vul ta sjol kʼalal la xchon sba ta stsebal li ta yosilal Ejiptoe.+
20 Solel ayan tajek ta yoʼonton skʼupinel li smalaltake. Jech kʼuchaʼal oy tajek ta yoʼonton skʼupinel smalalik li tsʼakal ajnilaletik ti xkoʼolaj kʼuchaʼal skʼunil vuro xchiʼuk skʼunil kaʼ li skʼunil smalalike.
21 La anaʼ sutel li kʼusitik toj kʼexlal sba la apas ta atsebal te ta Ejiptoe,+ jaʼo kʼalal la xjaxolanboxuk ta pikel li achuʼ kʼalal tojol tsebot toʼoxe.+
22 »Jaʼ yuʼun, Ooliba, xi chal li Ajvalil Jeova ti jaʼ Mukʼul Jpasmantale: ‹Ta jtijbe tal yoʼonton li amalaltake,+ ti x-ibet avoʼonton lanamaj batel ta stojolalike xchiʼuk chkikʼik tal ta buyuk noʼox sventa skontrainikot:+
23 jaʼ li jbabiloniaetik+ xchiʼuk skotol li jkaldeaetike,+ li viniketik ta Pekod,+ ta Soa, ta Koa xchiʼuk skotol li j-asiriaetike. Skotolik jaʼik kʼupil sba keremetik, jaʼik ajvaliletik xchiʼuk itsʼinal jpasmantaletik, jpaskʼopetik xchiʼuk viniketik ti tʼujbilik leke,* kajajtik ta kaʼ skotolik.
24 Chtal stsakikot ta kʼop ta epal karetaetik sventa paskʼop xchiʼuk chtal epal soltaroetik ti stsakojik tal smukʼta eskudoik* xchiʼuk xkʼox eskudoike* xchiʼuk ti slapoj tal skaskoike. Ta buyuk noʼox ta setuikot, vaʼun chkakʼ ti xchapanikote, jech chchapanikot jech kʼuchaʼal lek chil stukike.+
25 Chkakʼ ta ilel skapemal jol ta atojolal, solel muʼyuk xkʼuxul yoʼonton kʼusi tspasboxuk. Ta setboxuk lokʼel aniʼ xchiʼuk achikin, jech xtok, chlajik ta espada li buchʼutik kuxul to chkome. Ta spojbeikot batel li akerem atsebetake, yan li buchʼutik kuxul to chkome chlajik ta kʼokʼ.+
26 Ta slokʼbeikot li akʼuʼ apokʼe+ xchiʼuk tspojbeikot batel li anatsʼtak* ti kʼupilik sbae.+
27 Ta jlajesbe skʼoplal li kʼusitik toj kʼexlal sba chapase xchiʼuk ti chachon abae,+ ti te lik apas talel ta yosilal Ejiptoe.+ Muʼyuk xa chakʼel batel xchiʼuk muʼyuk xa chavules ta ajol li Ejiptoe›.
28 »Yuʼun xi chal li Ajvalil Jeova ti jaʼ Mukʼul Jpasmantale: ‹Poʼot xa xkakʼot ta skʼob li buchʼutik apʼajojane, jaʼik li buchʼutik solel x-ibet avoʼonton lanamaj batel ta stojolalike.+
29 Ta spʼajikot xchiʼuk chichʼik batel skotol li kʼusitik oy avuʼun ti tsots la-abtej ta staele+ xchiʼuk tʼanal ta xiktaikot, chʼabal akʼuʼ apokʼ chakom. Skotolik ta xilik ti tʼanalote, ta xilik li kʼusitik ibal sba la apase, jech, ta xakʼik venta ti jchonbail antsote.+
30 Jech chkʼot ta atojolal ta skoj ti la atsʼakli batel mukʼtik lumetik kʼuchaʼal jun jchonbail antse,+ yuʼun la asokes aba xchiʼuk li ibal sba santoetik yuʼunike.+
31 Jmoj li be bu la atam batel xchiʼuk li avixe,+ jech oxal chkakʼ atsak li skopae›.+
32 »Xi chal li Ajvalil Jeova ti jaʼ Mukʼul Jpasmantale:
‹Chavuchʼbe svinoal skopa li avixe,+ li skopa ti lek pulpul xchiʼuk ti lek jamal stiʼe.Noj ta labanel li kopae, jaʼ yuʼun tstseʼintaikot li krixchanoetike xchiʼuk tslabanikot.+
33 Chavuchʼbe skotol svinoal skopa li avix Samariae,vaʼun chayakub xchiʼuk chavil avokol,xibal aba chakom xchiʼuk xokol chakom.
34 Chavuchʼbe skotol li sbele+ xchiʼuk chlik akʼux li kopae.Laje, chajos lokʼel li achuʼe.
«Yuʼun jech lokʼem ta ke», xi li Ajvalil Jeova ti jaʼ Mukʼul Jpasmantale›.
35 »Jaʼ yuʼun, xi chal li Ajvalil Jeova ti jaʼ Mukʼul Jpasmantale: ‹Ta skoj ti la achʼayun ta ajole xchiʼuk ti la apʼajun ta j-echʼele,*+ chatabe stojobil li kʼusitik toj kʼexlal sba la apase xchiʼuk ti la achon abae›».
36 Vaʼun, xi laj yalbun li Jeovae: «Xnichʼon krixchano, ta jkʼan ti akʼo xaval li kʼusi chopol chkʼot ta stojolal li Oola xchiʼuk Oolibae+ xchiʼuk ti xavalbe ta jamal li kʼusitik toj chopol la spasike.
37 Mulivajik*+ xa xchiʼuk balal* ta chʼichʼ li skʼobike. Maʼuk noʼox mulivajik xchiʼuk li ibal sba santoetik yuʼunike, yuʼun li yalabik ti la svokʼesik sventa xkuʼunine la xchikʼik ta kʼokʼ yoʼ xkʼot ta sveʼel li santotakike.+
38 Jech xtok, xi la spasbeikun li vaʼ kʼakʼale: la sokesbeik skʼoplal ti bu chʼul kuʼune xchiʼuk la sokesbeik skʼoplal li savado kuʼune.
39 Li vaʼ kʼakʼal xtoke, kʼalal laj xa ox smil li yalabik sventa xakʼbeik ta smoton li ibal sba santotakike,+ talik ti bu chʼul kuʼun sventa sokesbeik skʼoplale.+ Taje jaʼ jech la spasik li ta yut jnae.
40 La stakik batel jun j-almantal xtok sventa xtalik li viniketik ti nom to oyike.+ Kʼalal ta be xa xtalike, la-atin, la abon asat xchiʼuk la akʼupiltas aba ta anatsʼtak.*+
41 Lachoti ta jun kʼupil sba chotlebal+ ti te chapanbil jun mexa ta yelovale,+ jaʼ te laj avakʼ li jpome+ xchiʼuk li j-aseitee.+
42 Xkaʼitik ti jun yoʼontonik te xvochlajetik* epal viniketike, jlome jaʼik li jyakubeletik ti ikʼbilik tal ta takixokol balumile. La xojbeik spulserail skʼobik li chaʼvoʼ antsetike xchiʼuk la xojbeik kʼupil sba korona ta sjolik.
43 »Vaʼun, xi laj kal ta stojolal li buchʼu lubtsajem xa ta skoj mulivajele: ‹Jech-o ta xchon sba›.
44 Jaʼ yuʼun, jech-o xlokʼ x-ochik ti bu oye, jech kʼuchaʼal chbatik ta stojolal jun jchonbail antse. Jaʼ jech ochik batel ti bu oy li Oola xchiʼuk Oolibae, jaʼ li antsetik ti toj kʼexlal sba kʼusitik tspasike.
45 Pe chchapanat yuʼun tukʼil viniketik ti kʼu yelan sta-o ta skoj ti mulivaje+ xchiʼuk ti la smal chʼichʼe;+ yuʼun jaʼik jmulavil antsetik xchiʼuk balal* ta chʼichʼ li skʼobike.+
46 »Yuʼun xi chal li Ajvalil Jeova ti jaʼ Mukʼul Jpasmantale: ‹Chichʼ ikʼel tal epal soltaroetik ta stojolalik sventa xibal sba xkomik xchiʼuk sventa xichʼik pojbel batel li kʼusitik yuʼunike.+
47 Chichʼik akʼbel ton+ xchiʼuk chichʼik milel ta espada yuʼun li soltaroetike. Chichʼik milbel li skerem stsebike+ xchiʼuk chchikʼbat ta kʼokʼ li snaike.+
48 Chkakʼbe slajeb li kʼusitik toj kʼexlal sba tspasik ta lume. Jech chichʼ-o yoʼonton* skotol li antsetike, vaʼun muʼyuk tspasik li kʼusitik toj kʼexlal sba la apasike.+
49 Li soltaroetike chakʼ atojik li kʼusitik toj kʼexlal sba la apasike xchiʼuk li kʼusitik toj chopol la apasik xchiʼuk li ibal sba santoetik avuʼunike. Vaʼun, jech chanaʼik ti voʼon Ajvalil Jeovaun ti Mukʼul Jpasmantalune›».+
Tsʼibetik ta yok vun
^ Jaʼ skʼan xal ‹li jkarpanae te oy ta stojolal›.
^ Jaʼ skʼan xal ‹skarpana›.
^ Li ta ebreo kʼope xuʼ van te nitil skʼoplal ta jpʼel kʼop ti «tsoʼ» skʼan xale, jaʼo chichʼ alel kʼalal oy kʼusi chichʼ pʼajele. Kʼelo Glosario, ibal sba.
^ O «svayeb».
^ Literal «ti takbilik ta ikʼele».
^ O «makobbailik».
^ Kʼox makobbail ti jaʼ mas tstunesik li j-akʼflechaetike.
^ Te tsakal skʼoplal arete, aniyo, xchuk kʼobil xchiʼuk yan kʼusitik.
^ Literal «ti la ajipun batel ta apate».
^ Jaʼ xkaltik, mulivajel ta mantal.
^ O «balem; bonol».
^ Te tsakal skʼoplal arete, aniyo, xchuk kʼobil xchiʼuk yan kʼusitik.
^ O «x-avlajetik».
^ O «balem; bonol».
^ O «ta xchan-o».
