Esekiel 24:1-27
24 Li ta sbalunebal jabil,* li ta slajunebal kʼakʼal ta slajunebal ue, la skʼoponun tal yan velta li Jeovae, xi laj yalbune:
2 «Xnichʼon krixchano, tsako ta vun ti kʼusi kʼakʼalil* avie. Yuʼun li avie, li ajvalil ta Babiloniae lik xa stsak ta kʼop li Jerusalene.+
3 Jech xtok, alo junuk pʼijil loʼil* ta sventa li jtoyba jteklume, xi xavale:
»‹Xi chal li Ajvalil Jeova ti jaʼ Mukʼul Jpasmantale:
«Kajano ta ba kʼokʼ li pʼine* xchiʼuk akʼbo yaʼlel.+
4 Tikʼo ochel li bekʼet ti bikʼitik bojbile,+ tikʼo ochel ti bu mas lekike,jaʼ li yoʼe xchiʼuk li sbekʼtal snekebe; tikʼo ochel li sbakiltak ti bu mas lekike.
5 Tʼujo jaykotuk chij ti bu mas lekike.+ Latsbo lek siʼil ta xokontak li pʼine.
Te akʼo vokanuk ta pʼin li bekʼete xchiʼuk li sbakiltake»›.
6 »Yuʼun xi chal li Ajvalil Jeova ti jaʼ Mukʼul Jpasmantale:
‹¡Abol sba li jteklum ti tsmal chʼichʼe,+ jaʼ li pʼin ti kuxinem xae, ti muʼyuk xjuxojbeik lokʼel xkuxe!
Maso lokʼel ta jujun li bekʼete.+ Mu tʼujbiluk xamas lokʼel.
7 Yuʼun te oy-o ta jteklum li chʼichʼ ti la smal li jnaklejetik tee;+ te la smal ta sba ton ti muʼyuk kʼusi te oye.
Maʼuk te la smal ta balumil sventa xichʼ mukel ta lum.+
8 Sventa mu xichʼ mukel li chʼichʼe,te la jkomtsan-o li ta sba ton ti stsʼayayete xchiʼuk ti muʼyuk kʼusi te oye.Taje jaʼ sventa xlik-o skʼakʼal koʼonton xchiʼuk ti jpak sutele›.+
9 »Jaʼ yuʼun, xi chal li Ajvalil Jeova ti jaʼ Mukʼul Jpasmantale:
‹¡Abol sba li jteklum ti tsmal chʼichʼe!+
Ta jtokanbe lek siʼil.
10 Busanbo lek siʼil xchiʼuk tsanbo skʼakʼal.Akʼo taʼajuk lek li bekʼete, malbo li skaltoale xchiʼuk akʼo kʼakʼuk li sbakiltake.
11 Kajano ta sba akʼal li xokol pʼin sventa xkʼakʼube,sventa stsajub lek li pʼine.*
Te chvos ta yut li yikʼobale+ xchiʼuk te ch-ul batel li xkuxe.
12 Taje jecheʼ noʼox chakʼ lubel xchiʼuk vokol,yuʼun toj echʼ xa noʼox xkux ti mu stakʼ lokʼesele.+
¡Jipo ochel ta kʼokʼ xchiʼuk xkux!›.
13 »‹Jaʼ la-ikʼub-o ta skoj li kʼusitik toj kʼexlal sba la apase.+ Laj kakʼ persa sakubtaselot, pe jech ikʼot-o. Muʼyuk chasakub-o jaʼ to mi paj li skʼakʼal koʼonton ta atojolale.+
14 Jech lokʼem ta ke, voʼon li Jeovaune. Persa chkʼot ta pasel. Jpʼel koʼonton jech ta jpas, muʼyuk chopol chkaʼi jba mi jaʼuk xlaj xa jnaʼ.+ Jech chchapanikot ta skoj ti kʼu yelan atalelale xchiʼuk ti kʼusitik la apase›, xi li Ajvalil Jeova ti jaʼ Mukʼul Jpasmantale».
15 La skʼoponun tal yan velta li Jeovae, xi laj yalbune:
16 «Xnichʼon krixchano, poʼot xa jpojbot batel ta anil li buchʼu akʼanoj tajeke.+ Mu me xavat avoʼonton,* mu me xa-okʼ mi jaʼuk xamal yaʼlel asat.
17 Ta avoʼontonuk noʼox xavaʼibe li xkʼuxule. Mu jechuk xapas kʼuchaʼal nopem xaʼi chokʼita yanimaike.+ Akʼo stsʼotobil ajol+ xchiʼuk lapo axonob.+ Mu xamak avisim*+ xchiʼuk mu xaveʼ li pan ti chichʼboxuk tal yantike».*+
18 Vaʼun, li ta sobe, la jkʼopon li jteklume, li ta mal kʼakʼal une, cham li kajnile. Jaʼ yuʼun, li ta sob yokʼomale, jech la jpas ti kʼu yelan laj kichʼ albele.
19 Xi laj yalbun li jteklume: «¿Mi muʼyuk chavalbunkutik kʼusi smelolal ta jventakutik li kʼusitik chapase?».
20 Vaʼun, xi la jtakʼbeike: «La skʼoponun tal li Jeovae, xi laj yalbune:
21 ‹Xi xavalbe li jteklum Israele: «Xi chal li Ajvalil Jeova ti jaʼ Mukʼul Jpasmantale: ‹Poʼot xa jsokesbe skʼoplal ti bu chʼul kuʼune,+ ti jaʼ xamuyubajik-o yuʼune, ti akʼanojike xchiʼuk ti oy tajek ta avoʼontonike. Chlajik ta espada li akerem atsebik ti te laj aviktaik komele.+
22 Vaʼun, skʼan jech xapasik jech kʼuchaʼal la jpase. Muʼyuk chamak avisimik* xchiʼuk muʼyuk chaveʼik li pan ti chichʼboxuk tal yantike.+
23 Muʼyuk chalokʼesik li stsʼotobil ajolike xchiʼuk muʼyuk chalokʼ li axonobike. Muʼyuk chavat avoʼontonik xchiʼuk muʼyuk cha-okʼik. Jaʼ xa noʼox chakʼunibik batel yuʼun li apaltailike*+ xchiʼuk chavaʼibeik xkʼuxul ta jujuntal.
24 Li Esekiele kʼotem kʼuchaʼal jun senyail ta atojolalik.+ Jech chapasik kʼuchaʼal la spase. Kʼalal mi kʼot ta pasele, jech chanaʼik ti voʼon Ajvalil Jeovaun ti Mukʼul Jpasmantalune›»›».
25 «Li voʼote, xnichʼon krixchano, kʼalal mi kʼot skʼakʼalil ta jpojbeik li skerem stsebike+ xchiʼuk li stsatsal nakʼobbailike, jaʼ li kʼusi kʼupil sba ti jaʼ xmuyubajik-o yuʼune, ti skʼanojike xchiʼuk ti oy tajek ta yoʼontonike,
26 jaʼ chtal yalbot li buchʼu kuxul chkome.+
27 Li vaʼ kʼakʼale, chajam li avee xchiʼuk chachiʼin ta loʼil li buchʼu kuxul chkome; chlaj skʼoplal ti umaʼote.+ Chakʼot kʼuchaʼal jun senyail ta stojolalik, vaʼun jech tsnaʼik ti voʼon Jeovaune».
Tsʼibetik ta yok vun
^ Jaʼ skʼoplal ti sbalunebal xa ox jabil yichʼoj chukel batel li ajvalil Joakin, Esekiel xchiʼuk yan judaetike. Kʼelo Esekiel 1:2.
^ O «fechail».
^ O «lokʼolkʼop».
^ O «jpʼej pʼin ti lek mukʼ stiʼ sventa smeltsanobil veʼlile».
^ O «li pʼin pasbil ta kovree».
^ O «xamaj stiʼ avoʼonton».
^ O «yakʼol yanal ave».
^ Literal «li span viniketike».
^ O «yakʼol yanal aveik».
^ O «achopolilike».
