Esekiel 25:1-17
25 La skʼoponun tal yan velta li Jeovae, xi laj yalbune:
2 «Xnichʼon krixchano, akʼo batel asat ta stojolal li j-ammonetike+ xchiʼuk alo kʼusi chopol chkʼot ta stojolalik.+
3 Xi xavalbe li j-ammonetike: ‹Chikintaik kʼusi chal li Ajvalil Jeova ti jaʼ Mukʼul Jpasmantale. Xi chal li Ajvalil Jeova ti jaʼ Mukʼul Jpasmantale: «Ta skoj ti ‹¡sta-o maʼ leʼe!› xachiik kʼalal laj yichʼ sokesbel skʼoplal ti bu chʼul kuʼune xchiʼuk kʼalal xokol kom li jteklum Israele xchiʼuk kʼalal laj yichʼik ikʼel batel ta yan lum li jteklum Judae,
4 chkakʼoxuk ta stojolal li krixchanoetik ta Slokʼeb Kʼakʼale. Te tspas skarpanaik* xchiʼuk te chakʼ yaxibalnaik ti bu oyoxuke. Ta stun ta slajesik li kʼusi chlokʼ ta avosilike xchiʼuk ta xuchʼik li yaʼlel xchuʼ achonbolomike.
5 Ta jpas ta sveʼeb kameyoetik li jteklum Rabae+ xchiʼuk chkʼot ta xkuxobil yoʼonton chijetik* li yosilal j-ammonetike; vaʼun jech chanaʼik ti voʼon Jeovaune»›».
6 «Yuʼun xi chal li Ajvalil Jeova ti jaʼ Mukʼul Jpasmantale: ‹Ta skoj ti la atʼax akʼob,+ ti lapʼitomaj xchiʼuk ti lamuyubaj tajek ta slabanel li jteklum Israel kʼalal laj avil li kʼusi kʼot ta stojolale,+
7 ta jyeʼ talel jkʼob ta atojolal xchiʼuk chkakʼot ta skʼob lumetik sventa spojik batel li kʼusitik oy avuʼune. Ta jtupʼ lokʼel akʼoplal li ta jteklumetike xchiʼuk ta jlajes akʼoplal li ta lumetike.+ Ta xkulesot, vaʼun jech chanaʼ ti voʼon Jeovaune›.
8 »Xi chal li Ajvalil Jeova ti jaʼ Mukʼul Jpasmantale: ‹Xi yalojik li Moab+ xchiʼuk Seire:+ «¡Kʼelavil! Li jteklum Judae xkoʼolaj xchiʼuk li yan mukʼtik lumetike».
9 Ta skoj taje, ta xkakʼ ti stsakat ta kʼop yuʼun yajkontratak li jteklumetik ti jaʼ skʼupiltasobil li Moabe, jaʼ li jteklumetik Bet-Jesimot, Baal-Meon xchiʼuk li Kiryataim+ ti ta tsʼak xa oyike.
10 Chkakʼ ti jmojuk x-ochik ta skʼob krixchanoetik ta Slokʼeb Kʼakʼal+ li jmoabetike xchiʼuk li j-ammonetike. Taje jaʼ sventa mu xa xichʼ vulesel ta jolil ta mukʼtik lumetik li j-ammonetike.+
11 Ta xkakʼbe kastigo li Moabe,+ vaʼun jech tsnaʼik ti voʼon Jeovaune›.
12 »Xi chal li Ajvalil Jeova ti jaʼ Mukʼul Jpasmantale: ‹Li Edome la spakbe sutel li jteklum Judae, vaʼun tsots la spas smul kʼalal la spakbe sutele.+
13 Jaʼ yuʼun, xi chal li Ajvalil Jeova ti jaʼ Mukʼul Jpasmantale: «Li voʼon eke ta jyeʼ batel jkʼob ta stojolal li Edome xchiʼuk ta jlajesbe skʼoplal li krixchanoetike xchiʼuk li tsʼunbal chonbolometik tee, vaʼun xokol chkom kuʼun.+ Te chlik yichʼik milel ta espada ta Teman kʼalal to ta Dedan.+
14 ‹Ta jpakbe sutel li Edome, jaʼ ta jtunes li jteklumal Israele.+ Jaʼ chakʼbeik yaʼi kʼu yelan skapemal jol xchiʼuk skʼakʼal koʼonton li Edome, jech chaʼiik ti kʼu yelan ta jpak sutele›,+ xi li Ajvalil Jeova ti jaʼ Mukʼul Jpasmantale»›.
15 »Xi chal li Ajvalil Jeova ti jaʼ Mukʼul Jpasmantale: ‹Li jfilisteaetike jech-o kontrainvanik, toj chopol ti kʼu yelan la spak skʼoplalike xchiʼuk ti kʼu yelan lajesvanike.+
16 Jaʼ yuʼun, xi chal li Ajvalil Jeova ti jaʼ Mukʼul Jpasmantale: «Ta jyeʼ batel jkʼob ta stojolal li jfilisteaetike.+ Ta jlajesbe skʼoplal li jkeretitaetike+ xchiʼuk chkakʼbe slajeb li jnaklejetik ta tiʼ nab ti kuxul to komemike.+
17 Ep kʼusitik labalik sba ta jpas sventa ta jpakbeik sutel, ta skapemal jol ta xkakʼbeik kastigo, vaʼun jech tsnaʼik ti voʼon Jeovaun kʼalal mi la jpakbeik sutele»›».
