Esekiel 26:1-21
26 Li ta jabil 11,* li ta sba kʼakʼal yochel li ue, la skʼoponun tal yan velta li Jeovae, xi laj yalbune:
2 «Xnichʼon krixchano, xi laj yal Tiro ta stojolal li Jerusalene:+ ‹¡Sta-o maʼ leʼe! ¡Laj xa yichʼ lilinel li yochebal jteklumetike!+ Chkuʼunin skotol li kʼusitik oye xchiʼuk chipas ta jkʼulej ta skoj ti laj xa yichʼ lajesele›.
3 Ta skoj taje, xi chal li Ajvalil Jeova ti jaʼ Mukʼul Jpasmantale: ‹Tiro, likʼot xa ta avajkontra, ta jtoy tal epal mukʼtik lumetik ta atojolal jech kʼuchaʼal li nab ti tstoy muyel syukʼbenale.
4 Jaʼ ta sjinesik li smuroaltak Tiroe xchiʼuk jaʼ ta slilinik li tayal kʼelob osiletik yuʼune,+ voʼon ta jbekʼ* lokʼel li slilijemale xchiʼuk jech chkom kuʼun kʼuchaʼal jpʼej ton ti stsʼayayete xchiʼuk ti muʼyuk kʼusi te oye.
5 Ta xkʼot ta stakijesobil nutiʼ sventa tsakob choy ti ta oʼlol nab oye›.+
»‹Yuʼun jech lokʼem ta ke›, xi li Ajvalil Jeova ti jaʼ Mukʼul Jpasmantale. ‹Jech xtok, chichʼ ichʼbel batel yuʼun mukʼtik lumetik li kʼusitik oy yuʼune.
6 Li bikʼtal lumetik yuʼun ti te oy ta spat xokone chlajik ta espada, vaʼun li krixchanoetike tsnaʼik ti voʼon Jeovaune›.
7 »Yuʼun xi chal li Ajvalil Jeova ti jaʼ Mukʼul Jpasmantale: ‹Chkikʼ talel ta norte li Nabukodonosor* ti jaʼ ajvalil ta Babilonia sventa xtal skontrain li Tiroe,+ jaʼ li bankilal yuʼun ajvaliletike.+ Chtal xchiʼuk skaʼtak,+ skaretatak+ sventa paskʼop, jkajlejetik ta kaʼ xchiʼuk epal soltaroetik.*
8 Tsmil ta espada li jnaklejetik ta bikʼtal lumetik avuʼun ti te oy ta apat axokone, tsvaʼan muro sventa setuot xchiʼuk tsvaʼan stekʼob sventa stsakot ta kʼop xchiʼuk tstoy muyel smukʼta eskudo* sventa skontrainot.
9 Ta svokʼ ochel ta yabtejeb li amuroaltake xchiʼuk ta slomes ta yekʼel* li tayal kʼelob osiletik avuʼune.
10 Pixil ta pukuk* chakom ta skoj ti solel ep skaʼtake. Ta skoj ti xkʼulet tal li kaʼetik ti kajajtik yajvale xchiʼuk ti xkʼojlajet tal syantailtak li karetaetik sventa paskʼope, chnik li amuroaltak kʼalal mi och talel li ta ochebaletik avuʼune. Jaʼ jech ch-och tal kʼuchaʼal viniketik ti anil ch-ochik ta jun jteklum ti lomem smuroaltake.
11 Li svoytak skaʼe chtal xpechʼilanik ta tekʼel skotol li akayetake;+ tsmil ta espada li ateklumale xchiʼuk chlomanuk yalel ta lumtik li tsatsal oyetik avuʼune.
12 Chichʼik batel li kʼusitik oy avuʼune, tspojik batel li apʼolmale,+ tsjinesik li amurotake xchiʼuk tslomesik li lekil naetik avuʼune; vaʼun tsjipik batel ta nab li tonetik avuʼune, li teʼetik avuʼune xchiʼuk li alilijemale›.
13 »‹Ta slajesbe skʼoplal ti xnik noʼox asone xchiʼuk muʼyuk xa chichʼ aʼiel li yechʼomal a-arpae.+
14 Chakʼot kuʼun kʼuchaʼal jpʼej ton ti stsʼayayete xchiʼuk ti muʼyuk kʼusi te oye.+ Ta xakʼot ta stakijesobil nutiʼ sventa tsakob choy. Muʼyuk xa chavichʼ-o chaʼvaʼanel, yuʼun jech lokʼem ta ke, voʼon li Jeovaune›, xi li Ajvalil Jeova ti jaʼ Mukʼul Jpasmantale.
15 »Li Ajvalil Jeova ti jaʼ Mukʼul Jpasmantale xi chalbe li Tiroe: ‹Kʼalal xajinin to yalele, kʼalal te x-ijetik* li buchʼutik chchamik xae,* kʼalal chvul milbail tee, ¿mi muʼyuk van chnikik li lumetik ti joyol ta nabe?+
16 Skotol li bankilaletik ta nabe chyalik li ta xchotlebik sventa ajvalile, tslokʼ li snatil kʼuʼik ti muʼyuk skʼobe, tsjipik lokʼel li skʼuʼ spokʼik ti oy lek xluchale* xchiʼuk chlik tʼelikuk* ta xiʼel. Solel xniklajetik ta xiʼel kʼalal chchotiike xchiʼuk chʼayal to chkʼot yoʼontonik kʼalal tskʼelikote.+
17 Chlik skʼejintaik jun kʼejoj sventa at-oʼonton+ ta atojolal, xi chalike:
«¡Kʼuxi xa noʼox ti lalaje,+ voʼot ti laj avichʼ naklebinel yuʼun li krixchanoetik ti likemik talel ta nabe, voʼot ti kʼupil kʼoptabilote!¡Lek toʼox xuʼ avuʼunik ta nab xchiʼuk li jnaklejetik avuʼune,+chavakʼik toʼox xiʼel ta stojolal skotol li jnaklejetik ta balumile!
18 Li lumetik joyol ta nabe ta xnikik kʼalal mi lajin yalele,li lumetik joyol ta nabe ta svul yoʼontonik kʼalal mi kʼot alajebe»›.+
19 »Yuʼun xi chal li Ajvalil Jeova ti jaʼ Mukʼul Jpasmantale: ‹Kʼalal mi xokol lakom kuʼun kʼuchaʼal li jteklumetik ti chʼabal jnaklejetik tee, kʼalal mi lamukij li ta voʼ ti xyukʼlajete xchiʼuk kʼalal mi la smukiot li nabe,+
20 chkikʼot batel ta chʼen* jech kʼuchaʼal chkikʼik batel li yantike, jaʼ ti bu oy li krixchanoetik ti voʼne xa slajelike. Te chkakʼ naklan ta yutil to balumil jech kʼuchaʼal kʼot ta stojolalik li voʼneal lumetik ti laj yichʼik jinesele. Sventa mu xa xavichʼ naklebinele, jmoj chayalik batel xchiʼuk li buchʼutik chyalik batel ta chʼene.+ Laj une, ta jkʼupiltasbe slumal li buchʼutik kuxulike.
21 »›Ta anil noʼox chkakʼ talel xiʼel ta atojolal, vaʼun chlaj akʼoplal.+ Ta to saʼikot, pe muʼyuk xa chavichʼ tael›, xi li Ajvalil Jeova ti jaʼ Mukʼul Jpasmantale».
Tsʼibetik ta yok vun
^ Jaʼ skʼoplal ti 11 xa ox jabil yichʼoj chukel batel li ajvalil Joakin, Esekiel xchiʼuk yan judaetike. Kʼelo Esekiel 1:2.
^ O «jmes».
^ Literal «Nabukodorosor», jech ta stsʼibaik li yantike.
^ Literal «jteklumetik».
^ O «makobbail».
^ O «s-espada».
^ O «lum».
^ O «x-ajajetik».
^ Literal «li buchʼutik laj yichʼik milele».
^ O «stsʼisbenale».
^ O «nikikuk».
^ O «mukinal».
