Esekiel 3:1-27
3 Vaʼun, xi laj yalbune: «Xnichʼon krixchano, lajeso li kʼusi te oy ta avelovale.* Lajeso* li balbalvun liʼe, vaʼun bat kʼopono li jteklum Israele».+
2 Jaʼ yuʼun, la jachʼ li kee xchiʼuk laj yakʼbun jlajes li balbalvune.
3 Xi to laj yalbune: «Xnichʼon krixchano, lajeso li balbalvun chkakʼbot liʼe xchiʼuk nojeso-o achʼut». Jech oxal, lik jlajes, toj lek chiʼ laj kaʼi kʼuchaʼal pom.+
4 Xi laj yalbune: «Xnichʼon krixchano, batan ti bu oyik li jteklum Israele xchiʼuk bat albo yaʼiik li kʼusi chkale.
5 Yuʼun maʼuk te chavichʼ takel batel ta stojolal jun jteklum ti tsots ta aʼibel skʼopike o ti vokol ta aʼibel skʼopike, jaʼ ta stojolal li jteklum Israele.
6 Maʼuk te chavichʼ takel batel ta stojolal epal jteklumetik ti tsots ta aʼibel skʼopike o ti vokol ta aʼibel skʼopik xchiʼuk ti mu xavaʼibe smelolale. Ti jaʼuk te ta jtakot batel ta stojolalike, ta xchikintabeikot ti jechuke.+
7 Pe li jteklum Israele muʼyuk ta xchikintabeikot, yuʼun mu skʼan xchikintabeikun.+ Sjunul li jteklum Israele pimubemik ta mantal* xchiʼuk yijubem yoʼontonik.+
8 ¡Kʼelavil!, ta jpas ta tsots avoʼonton jech kʼuchaʼal tsots tajek yoʼonton tstoy sbaike.*+
9 Ta jtsatsubtasot lek* kʼuchaʼal jpʼej diamante, mas to ta jtsatsubtasot kʼuchaʼal li tsatsal tone.+ Mu xaxiʼ ta stojolalik mi jaʼuk xaxiʼo yuʼun li satike,+ yuʼun jaʼik jun jteklum ti jtoybae».
10 Vaʼun, xi to laj yalbune: «Xnichʼon krixchano, akʼo ta avoʼonton xchiʼuk chikintao skotol li kʼusi chkalbote.
11 Batan ti bu oy li ateklumal* ti chukbilik batele+ xchiʼuk bat chiʼinano ta loʼil. Manchuk mi xchikintaik o mi mu skʼan xchikintaik,+ xi xavalbe yaʼiike: ‹Xi chal li Ajvalil Jeova ti jaʼ Mukʼul Jpasmantale›».
12 Vaʼun, li espiritue* laj yikʼun batel+ xchiʼuk laj kaʼi jun tsatsal yechʼomal eil ta jpat ti xi chale: «Akʼo yichʼ kʼupil kʼoptabel yutsilal Jeova ti bu oye».
13 Laj kaʼi ti bakʼ xikʼik li anjeletik* kʼalal la sta sbaik ta tijele+ xchiʼuk ti kʼu yelan bakʼ li set-set takʼinetik te ta xokonike+ xchiʼuk laj kaʼi ti oy kʼusi tsots tajek bakʼe.
14 La stoyun likel xchiʼuk laj yikʼun batel li espiritue,* jaʼo chopol tajek chkaʼi jba kʼalal laj yikʼun batele xchiʼuk jaʼo ilinemun. Jech xtok, laj kaʼi ti tsots abtej ta jtojolal li sjuʼel Jeovae.
15 Jaʼ yuʼun, libat ta Tel-Abib ti jaʼ te oyik li buchʼutik chukbilik batele, ti jaʼ te nakalik ta xokon li ukʼum Kebare+ xchiʼuk te likom ti bu nakalike. Te likom vukub kʼakʼal, pe mu xa jnaʼ kʼusi ta jpas laj kaʼi.+
16 Kʼalal tsʼaki vukub kʼakʼale, la skʼoponun tal li Jeovae:
17 «Xnichʼon krixchano, laj xa jvaʼanot ta jkʼel-osil ta toyol ta stojolal li jteklum Israele.+ Kʼalal mi laj avaʼi li kʼusi chlokʼ ta kee, skʼan xavalbe yaʼiik li kʼusi chkale.+
18 Kʼalal mi xi laj kalbe li buchʼu toj chopole: ‹Jpʼel skʼoplal chacham›, pe mi muʼyuk xapʼijubtas xchiʼuk mi muʼyuk laj avalbe ti xikta xchopol be sventa kuxul xkome,+ chcham ta skoj smul, yuʼun toj chopol.+ Pe voʼot chkom ta aba kuʼun li xchʼichʼele.+
19 Pe mi la apʼijubtas li buchʼu toj chopole xchiʼuk mi mu xikta li xchoplejale xchiʼuk li xchopol bee, chcham ta skoj smul stuk, pe li voʼote jpʼel skʼoplal kuxul chakom.*+
20 Pe mi oy buchʼu tukʼ ti chikta spasel li kʼusi tukʼe xchiʼuk ti jaʼ chbat spas li kʼusi chopole,* oy kʼusi chkakʼ ta sbe sventa smak* yakan, vaʼun ta xcham.+ Mi muʼyuk la apʼijubtase, chcham ta skoj smul stuk xchiʼuk muʼyuk xa chichʼ vulesel ta jolil li kʼusitik tukʼ la spase. Pe voʼot chkom ta aba kuʼun li xchʼichʼele.+
21 Pe mi la apʼijubtas li buchʼu tukʼ sventa mu spas smule xchiʼuk mi la xchʼune, jpʼel skʼoplal kuxul chkom, yuʼun laj yichʼ pʼijubtasel+ xchiʼuk li voʼot eke kuxul chakom».*
22 Vaʼun, te vul ta jtojolal li skʼob Jeovae xchiʼuk xi laj yalbune: «Likan, batan li ta stenlejaltike, te ta jkʼoponot».
23 Jaʼ yuʼun, lilik xchiʼuk libat li ta stenlejaltike. Jaʼ to chkile te oy li smukʼulal Jeovae,+ jech kʼuchaʼal laj kil ta xokon ukʼum Kebar+ li smukʼulale, laje la jpatan jba ta balumil.
24 Vaʼun, och ta jtojolal li chʼul espiritue xchiʼuk la svaʼanun+ xchiʼuk la skʼoponun li Diose, xi laj yalbune:
«Batan, bat bajo aba li ta yut anae.
25 Li voʼote, xnichʼon krixchano, ta xchukikot ta chʼojon sventa mu xakol lokʼel xchiʼuk sventa mu xabat ti bu oyike.
26 Chkakʼ ti spakʼ sba ta apakʼov* li avokʼe xchiʼuk umaʼ chakom, mu xa xlokʼ xakʼopoj sventa xatukʼibtasan, yuʼun jaʼik jun jteklum ti jtoybae.
27 Pe kʼalal mi la jkʼoponote, ta jam li avee xchiʼuk xi chavalbe yaʼiike:+ ‹Xi chal li Ajvalil Jeova ti jaʼ Mukʼul Jpasmantale›. Li buchʼu tskʼan chchikintae akʼo xchikinta,+ li buchʼu mu skʼan xchikintae akʼo mu xchikinta, yuʼun jaʼik jun jteklum ti jtoybae.+
Tsʼibetik ta yok vun
^ O «Veʼan».
^ Literal «lajeso ti kʼusi xatae».
^ Literal «yijubem sjolik».
^ O «jtsatsubtasojbot asat jech kʼuchaʼal tsots satike xchiʼuk jtsatsubtasojbot atiba jech kʼuchaʼal tsots li stibaike».
^ O «Jtsatsubtasojbot lek atiba».
^ Literal «li xnichʼnab ateklumal».
^ Li ta ebreo kʼope xuʼ van jaʼ skʼoplal li s-espiritu Diose o junuk anjel.
^ Literal «li kuxlejaletik».
^ Li ta ebreo kʼope xuʼ van jaʼ skʼoplal li s-espiritu Diose o junuk anjel.
^ Literal «chpoj avuʼun li akuxlejale».
^ O «li kʼusi muʼyuk tukʼe».
^ O «xtʼab».
^ Literal «chpoj avuʼun li akuxlejale».
^ O «yakʼol ave».
