Esekiel 30:1-26
30 La skʼoponun tal yan velta li Jeovae, xi laj yalbune:
2 «Xnichʼon krixchano, alo kʼusi chkʼot ta pasel, xi xavale: ‹Xi chal li Ajvalil Jeova ti jaʼ Mukʼul Jpasmantale:
«Xi xa-avanik ta okʼele: ‹¡Ay, chtal xa li skʼakʼalile!›.
3 Yuʼun nopol xa li skʼakʼalile, jech, jutuk xa skʼan xtal li skʼakʼalil Jeovae.+
Li vaʼ kʼakʼale, chvinaj tok ti solel ikʼ tajeke,+ jaʼ li yorail akʼbil ta sventa li mukʼtik lumetike.+
4 Chtal jun espada ta stojolal li Ejiptoe. Kʼalal mi cham li krixchanoetik ta Ejiptoe, mi laj yichʼ pojbel batel li skʼulejale xchiʼuk kʼalal mi laj yichʼ jinesel li snaklebtake,+chchʼay xchʼulel ta xiʼel li Etiopiae.
5 Li Etiopia,+ Put,+ Lud xchiʼuk skotol li yan mukʼtik lumetike,li Kub xchiʼuk li nichʼnabiletik ta yosilal Israel ti spasojik jun tratoe*koʼol chlajik ta espada skotolik»›.
6 Xi chal li Jeovae:
‹Ta xlajik ek li buchʼutik ta stikʼ sbaik ta skoltael li Ejiptoe;chichʼ lajesel xtok li yip xchiʼuk li stoyobbail Ejiptoe›.+
»Xi chal li Ajvalil Jeova ti jaʼ Mukʼul Jpasmantale: ‹Te chlajik ta milel ta espada li ta lume, chlik ta Migdol+ kʼalal to ta Siene.+
7 Mas to xokol chkom kʼuchaʼal li yan lumetike, li jteklumetik yuʼun xtoke mas to jinem chkom kʼuchaʼal li yan jteklumetike.+
8 Kʼalal mi la jtsanbe skʼakʼal li Ejiptoe xchiʼuk mi la jlajesbe skʼoplal li buchʼutik jmoj sjolik xchiʼuke, jech tsnaʼik ti voʼon Jeovaune.
9 Li vaʼ kʼakʼale, ta jtak batel j-almantaletik ta varkoetik sventa xkakʼ nikuk ta xiʼel li Etiopia ti spatoj yoʼonton ta stojolal stuke; li j-etiopiaetike chchʼay xchʼulelik ta xiʼel mi kʼot skʼakʼalil li Ejiptoe, yuʼun jpʼel skʼoplal chkʼot ta pasel›.
10 »Xi chal li Ajvalil Jeova ti jaʼ Mukʼul Jpasmantale: ‹Ta jtunes li Nabukodonosor* ti jaʼ ajvalil ta Babilonia+ sventa jlajesbe skʼoplal li yajsoltarotak Ejiptoe.
11 Li Nabukodonosor xchiʼuk li yajsoltarotak ti jaʼik li buchʼutik mas to toj simaronik ta mukʼta lumetike+ chichʼik ikʼel tal sventa xakʼbeik slajeb li jteklume. Tslokʼes s-espadaik sventa skontrainik li Ejiptoe xchiʼuk noj chkom yuʼunik ta anima li lume.+
12 Ta jtakijes li yoktak ukʼum Niloe+ xchiʼuk li lume chkakʼ ti x-och ta skʼob* li buchʼutik toj chopolike. Chkakʼ ti slajesbeik skʼoplal jteklum li jyanlumetike+ xchiʼuk skotol li kʼusitik oy tee. Jech lokʼem ta ke, voʼon li Jeovaune›.
13 »Xi chal li Ajvalil Jeova ti jaʼ Mukʼul Jpasmantale: ‹Ta jlajesbe skʼoplal xtok li ibal sba santoetike* xchiʼuk ta jlajesbe skʼoplal li diosetik ta Nof*+ ti muʼyuk kʼusi xtunik-oe. J-echʼel muʼyuk xa chvaʼi junuk bankilal li ta yosilal Ejiptoe xchiʼuk chkakʼ ti oyuk xiʼel tee.+
14 Xokol chkom kuʼun li Patrose,+ ta jtsanbe skʼakʼal li Soane xchiʼuk chkakʼbe kastigo li Noe.*+
15 Ta jmal tal skapemal jol ta stojolal li Sin ti jaʼ li stsatsal pojobbail Ejiptoe xchiʼuk ta jlajesbe skʼoplal li jnaklejetik ta Noe.
16 Ta jtsanbe skʼakʼal li Ejiptoe xchiʼuk chchʼay xchʼulel ta xiʼel li Sine. Ta sjomik ochel li Noe xchiʼuk ta kʼakʼaltik lek chichʼ tsakel ta kʼop li Nofe.*
17 Li keremetik ta On* xchiʼuk ta Pibesete chlajik ta espada xchiʼuk chichʼik chukel batel li jnaklejetik tee.
18 Ta x-ikʼub osil ta Teafnees kʼalal mi te la jkʼasbe skʼatlom teʼ li Ejiptoe.+ Chlaj skʼoplal li yipe xchiʼuk li stoyobbaile,+ ta xmak ta tok xchiʼuk chichʼik chukel batel li jnaklejetik yuʼune.+
19 Chkakʼbe kastigo li Ejiptoe, vaʼun jech tsnaʼik ti voʼon Jeovaune›».
20 Li ta jabil 11,* li ta svukubal kʼakʼal ta baʼyel ue, la skʼoponun tal li Jeovae, xi laj yalbune:
21 «Xnichʼon krixchano, laj xa jkʼasbe skʼob li faraon ti jaʼ ajvalil ta Ejiptoe; muʼyuk ta xpixbeik sventa xkol mi jaʼuk ta stsʼotbeik ta pokʼ sventa stsatsub lek sventa stsak yuʼun li espadae».
22 «Jaʼ yuʼun, xi chal li Ajvalil Jeova ti jaʼ Mukʼul Jpasmantale: ‹Ta jkontrain li faraon ti jaʼ ajvalil ta Ejiptoe.+ Ta jkʼasbe xchibal li skʼobe, ti bu lek toe xchiʼuk ti bu kʼasem xa onoʼoxe.+ Chkakʼ koluk yalel ta skʼob li espadae.+
23 Vaʼun, tanpuk chbat kuʼun ta lumetik li j-ejiptoetike xchiʼuk ta jtaniik batel ta mukʼtik lumetik.+
24 Ta jtsatsubtasbe skʼob* li ajvalil ta Babiloniae+ xchiʼuk chkakʼbe ta skʼob li j-espadae.+ Yan li faraone ta jkʼasbe li skʼobe, vaʼun solel tsots x-ijet* ta yeloval* jech kʼuchaʼal x-ijet li buchʼu chcham xae.
25 Ta jtsatsubtasbe skʼob li ajvalil ta Babiloniae, yan li skʼob faraone jecheʼ xa te majajtik* chkom; kʼalal mi laj kakʼbe ta skʼob ajvalil ta Babilonia li j-espadae xchiʼuk kʼalal mi la stunes sventa skontrain li yosilal Ejiptoe,+ li krixchanoetike jech tsnaʼik ti voʼon Jeovaune.
26 Jech xtok, tanpuk chbat kuʼun ta lumetik li j-ejiptoetike xchiʼuk ta jtaniik batel ta mukʼtik lumetik,+ vaʼun tsnaʼik ti voʼon Jeovaune›».
Tsʼibetik ta yok vun
^ Xuʼ van jaʼ skʼoplal li j-israeletik ti spasoj ta jmoj sjolik xchiʼuk li Ejiptoe.
^ Literal «Nabukodorosor», jech ta stsʼibaik li yantike.
^ Literal «ta jchonbe».
^ O «Menfis».
^ Li ta ebreo kʼope xuʼ van te nitil skʼoplal ta jpʼel kʼop ti «tsoʼ» skʼan xale, jaʼo chichʼ alel kʼalal oy kʼusi chichʼ pʼajele. Kʼelo Glosario, ibal sba.
^ Jaʼ xkaltik, Tebas.
^ O «Menfise».
^ Jaʼ xkaltik, Eliopolis.
^ Jaʼ skʼoplal ti 11 xa ox jabil yichʼoj chukel batel li ajvalil Joakin, Esekiel xchiʼuk yan judaetike. Kʼelo Esekiel 1:2.
^ O «Ta xkepajesbe yip».
^ O «x-ajajet».
^ Jaʼ xkaltik, ta yeloval li ajvalil ta Babiloniae.
^ O «jokʼajtik».