Esekiel 31:1-18
-
Chyal ta lum li Ejipto ti jaʼ li natil sedro teʼe (1-18)
31 Li ta jabil 11,* li ta baʼyel kʼakʼal ta yoxibal ue, la skʼoponun tal yan velta li Jeovae, xi laj yalbune:
2 «Xnichʼon krixchano, xi xavalbe yaʼi li faraon ti jaʼ ajvalil ta Ejiptoe xchiʼuk li yajsoltarotake:+‹¿Buchʼu xa noʼox jech smukʼul kʼuchaʼal li amukʼulale?
3 Xakoʼolaj kʼuchaʼal jun j-asiria vinik, xakoʼolaj kʼuchaʼal jtekʼ sedro teʼ ta Libano,ti kʼupilik sba skʼobkʼobtake, ti lek pim yanal ti chakʼ yaxinale* xchiʼuk ti toj nate;ti kʼotem kʼalal to ta tok li sniʼe.
4 Mukʼ tajek bat ta skoj ti oy lek voʼe, li voʼ ti lek nat xyale jaʼ laj yakʼ chʼiuk.
Te xcholchun ch-echʼ yok voʼ li ta yosilal bu tekʼele;li yoktak voʼe jaʼ chatʼes* skotol li yan teʼetik te tekʼajtike.
5 Jaʼ yuʼun, mas to nat bat kʼuchaʼal li yan teʼetik ti te tekʼajtik ta osile.
Epaj li skʼobkʼobtake xchiʼuk la slin sba batelta skoj ti lek tsots yok li voʼe.
6 Skotol li mutetik ta vinajele te la spas stasik li ta skʼobkʼobtake,skotol li chonbolometik ta osiltike te ay svokʼes yalabik ta yolon li skʼobkʼobtakexchiʼuk li epal mukʼtik lumetike te nakiik ta yaxinal.*
7 Toj kʼupil tajek sba bat xchiʼuk la slin tajek sba batel li skʼobkʼobtake,yuʼun li yibeltake la stsʼun lek sba yalel ti bu oy lek voʼe.
8 Mu xkoʼolaj xchiʼuk jtekʼuk sedro teʼ li ta nichimaltik yuʼun Diose.+
Li skʼobkʼobtake mi jsetʼuk* xkoʼolaj kʼuchaʼal skʼobkʼobtak enebro teʼxchiʼuk mu xkoʼolaj skʼobkʼobtak kʼuchaʼal li armon teʼe.*
Mu xkoʼolaj yutsil xchiʼuk li yan teʼetik ta nichimaltik yuʼun Diose.
9 Kʼupil sba la jpas, ep tajek skʼobkʼobtak;skotol li teʼetik ta Eden ti jaʼ li nichimaltik yuʼun melel Diose itʼix yoʼontonik ta stojolal›.
10 »Jaʼ yuʼun, xi chal li Ajvalil Jeova ti jaʼ Mukʼul Jpasmantale: ‹Ta skoj ti toj nat bate, ti kʼotem kʼalal to ta tok li sniʼe xchiʼuk ti la stoy sba ta skoj ti nat bate,
11 chkakʼ ochuk ta skʼob li ajvalil ta mukʼtik lumetik ti tsots lek xuʼ yuʼune.+ Jpʼel skʼoplal chlik skontrain; li voʼon eke chlik jpʼaj ta skoj li xchopolile.
12 Li jyanlumetik ti jaʼik li buchʼutik mas to toj simaronik ta mukʼta lumetike ta stsʼetik lokʼel xchiʼuk chiktaik komel ta vitsetik. Te lamal chkom ta stenlejaltik li skʼobkʼobtake xchiʼuk te chexajtik chkom ta skotol ukʼumetik ta jteklum li skʼobkʼobtak ti kʼasemik xae.+ Skotol li jteklumetike ta xlokʼik batel li ta yaxinale* xchiʼuk te chiktaik komel.
13 Skotol li mutetik ta vinajele te chnakiik li ta teʼ ti lomem xae xchiʼuk skotol li chonbolometik ta osiltike te chnakiik ta skʼobkʼobtak.+
14 Taje jaʼ sventa mu xlik natubuk tajek jtekʼuk teʼ ti te chʼiem ti bu oy lek voʼe o ti mu xkʼot kʼalal to ta tok li sniʼe xchiʼuk ti mu xkʼot kʼalal to ta tok mi jtekʼuk teʼ ti lek atʼesbile.* Yuʼun chlaj skotolik, ch-ochik batel ta yut balumil, koʼol chyalik batel ta chʼen* xchiʼuk li xnichʼnab krixchanoetike›.
15 »Xi chal li Ajvalil Jeova ti jaʼ Mukʼul Jpasmantale: ‹Kʼalal mi la sta yorail chyal batel ta Mukinale,* chkakʼ ti x-okʼik ta at-oʼonton li krixchanoetike. Jaʼ yuʼun, chlik jmak li natil voʼe xchiʼuk ta jpajesbe li yok ti lek tsotse. Chkakʼ ti x-ikʼub osil ta Libano ta skoj li teʼe xchiʼuk chtakij skotol li teʼetik ta osiltike.
16 Chiʼik kuʼun mukʼtik lumetik kʼalal mi laj yaʼiik ti kʼu yelan xvochʼlajet yalel li teʼe, kʼalal mi koʼol laj kakʼ yaluk batel ta Mukinal* xchiʼuk li buchʼu yakal chyalik batel ta chʼene.* Jech xtok, skotol li teʼetik ta Eden+ ti jaʼ li bu mas lekik ta Libanoe, skotol li teʼetik ti lek atʼesbile,* chichʼ patbel yoʼontonik ta yut balumil.
17 Koʼol xa yalik batel ta Mukinal* xchiʼuk, jaʼ te ti bu oy li buchʼutik chamemik ta espadae,+ jmoj yal batel xchiʼuk li buchʼutik chkoltaat toʼoxe, jaʼ li buchʼutik te toʼox nakalik ta yaxinal* ti te oyik ta mukʼtik lumetike›.+
18 »‹Muʼyuk jtekʼuk teʼ ta Eden ti jech smukʼul xchiʼuk yutsilal kʼuchaʼal li voʼote.+ Akʼo mi jech, jpʼel skʼoplal chavichʼ jipel yalel ta lum xchiʼuk li teʼetik ta Edene. Te telel chakom ti bu oy li buchʼutik muʼyuk yichʼojik sirkunsisione,* jaʼ li buchʼutik chamemik ta espadae. Taje jaʼ jech chkʼot ta stojolal li faraone xchiʼuk skotol li yajsoltarotake›, xi li Ajvalil Jeova ti jaʼ Mukʼul Jpasmantale».
Tsʼibetik ta yok vun
^ Jaʼ skʼoplal ti 11 xa ox jabil yichʼoj chukel batel li ajvalil Joakin, Esekiel xchiʼuk yan judaetike. Kʼelo Esekiel 1:2.
^ O «skeovale».
^ O «tsmalta».
^ O «skeoval».
^ O «jutebuk».
^ Jaʼ jpets teʼ ti mukʼtik skʼobtake xchiʼuk ti stakʼ chobel spate.
^ O «skeovale».
^ O «maltabile».
^ O «mukinal».
^ O «mukinale».
^ O «maltabile».
^ O «skeoval».
