Esekiel 32:1-32
32 Li ta jabil 12,* li ta baʼyel kʼakʼal ta yuilal 12, la skʼoponun tal yan velta li Jeovae, xi laj yalbune:
2 «Xnichʼon krixchano, kʼejintao junuk son sventa at-oʼonton ta stojolal li faraon ti jaʼ ajvalil ta Ejiptoe, xi xavalbee:‹Xakoʼolaj toʼox kʼuchaʼal jkot chʼiom tsatsal leon* ta stojolal li mukʼtik lumetike,pe laj xa avichʼ tsʼijtsanel.*
Xakoʼolaj toʼox kʼuchaʼal jkot mukʼta chanul nab,+ te toʼox xapukʼlajet ta ukʼum,chatatubtas ta avakan li voʼe xchiʼuk chavikʼubtas li ukʼume›.
3 Xi chal li Ajvalil Jeova ti jaʼ Mukʼul Jpasmantale:
‹Ta jtunes jtsop mukʼtik lumetik sventa sjipboxuk ta aba li jnutiʼ sventa tsakob choye,vaʼun jaʼ ta xjochikot-o lokʼel li ta jnutiʼ sventa tsakob choye.
4 Te ta jipot komel ta lumtik;ta jtenot batel ta jamal osiltik.
Chkakʼ ti te xkoti ta aba li mutetik ta vinajelexchiʼuk chkakʼ ti xetʼes yoʼontonik ta stiʼel abekʼtal li jtiʼvanej chonbolometik ta sjunul li balumile.+
5 Ta jip batel ta vitsetik li abekʼtalexchiʼuk ta jnojes ta skomenal* abekʼtal li stenlejaltike.+
6 Li achʼichʼel ti xchororet chlokʼe ta jmal ta balumil, chkʼot kʼalal to ta vitstikaltik;xchiʼuk chnoj yuʼun li beoʼetike.
7 Kʼalal mi laj akʼoplale, ta jmak li vinajele xchiʼuk ta jtupʼbe xojobal li kʼanaletike.
Ta jpix ta tok li kʼakʼalexchiʼuk muʼyuk xa chakʼ xojobal li lunae.*+
8 Voʼot ta akoj chkakʼ ikʼubuk skotol li kʼusitik chakʼ xojobal ta vinajelexchiʼuk ta jpix ta ikʼal osil li avosilale›, xi li Ajvalil Jeova ti jaʼ Mukʼul Jpasmantale.
9 ‹Chkakʼ ti akʼo xat yoʼonton epal jteklumetik kʼalal mi la jchukik batel ta yantik lumetik li jnaklejetik avuʼune,jaʼ te chbatik li ta lumetik ti mu xavojtikine.+
10 Chkakʼ ti xbat xchʼulelik ta xiʼel epal jteklumetike.Jech xtok, li ajvaliletik yuʼunike chtʼelik* ta xiʼel ta akoj kʼalal mi laj yilik ta jtunes li j-espadae.
Mi kʼot yorail chayal ta lume,solel te xtʼelajetik-o ta xiʼel ta skoj ti mu skʼan xchamike›.
11 Yuʼun xi chal li Ajvalil Jeova ti jaʼ Mukʼul Jpasmantale:
‹Chtal ta atojolal li s-espada ajvalil ta Babiloniae.+
12 Li avajsoltarotake chkakʼ ti xlajik ta s-espada li tsatsal jpaskʼopetike,skotolik taje jaʼik li buchʼutik mas to toj simaronik ta mukʼta lumetike.+
Tslajesbeik skʼoplal li stoyobbail Ejiptoe xchiʼuk tstupʼbeik skʼoplal skotol li yajsoltarotake.+
13 Ta jmilbe skotol li stsʼunbal chonbolom ti te oyik yoʼ bu oy lek voʼ ta yosilale;+mi jaʼuk yakan jun krixchano mi jaʼuk svoy tsʼunbal chonbolom tstatubtas yan velta li voʼe›.+
14 ‹Li vaʼ kʼakʼale, ta jsakubtas li voʼ te ta yosilalexchiʼuk chkakʼ ti jechuk xbein kʼuchaʼal aseite li ukʼumetik tee›, xi li Ajvalil Jeova ti jaʼ Mukʼul Jpasmantale.
15 ‹Kʼalal mi la jkʼatajes ta xokol balumil li Ejiptoe, mi laj skotol li kʼusitik x-ayan tee+xchiʼuk mi la jlajes skotol li jnaklejetik tee,tsnaʼik ti voʼon Jeovaune.+
16 Taje jaʼ jun son sventa at-oʼonton xchiʼuk jpʼel skʼoplal tskʼejintaik li krixchanoetike;jaʼ tskʼejintaik li stsebetak mukʼta lumetike.
Tskʼejintaik ta sventa Ejipto xchiʼuk ta sventa li yajsoltarotake›, xi li Ajvalil Jeova ti jaʼ Mukʼul Jpasmantale».
17 Vaʼun, li ta jabil 12,* ta skʼakʼalil 15 li ta ue,* la skʼoponun tal li Jeovae, xi laj yalbune:
18 «Xnichʼon krixchano, okʼitao li yajsoltarotak Ejiptoe xchiʼuk alo ti chyal batel* ta yut balumile, chyal batel xchiʼuk li stsebetak tsatsal mukʼtik lumetike, koʼol chyalik batel xchiʼuk li buchʼutik yakal chyalik batel ta chʼene.*
19 »‹¿Mi yuʼun mas to kʼupil aba avaloj kʼuchaʼal li yantike? ¡Yalan batel ta mukinal, te xbat atelan aba xchiʼuk li buchʼutik muʼyuk yichʼojik sirkunsisione!›.*
20 »‹Li j-ejiptoetike te chyalik ta lum ti bu telajtik li buchʼutik lajik ta espadae.+ Laj xa yichʼ lajesel* ta espada; jochik batel xchiʼuk skotol li yajsoltarotake.
21 »›Li tsatsal jpaskʼopetike te to ta yutil Mukinal* tskʼoponik tal* xchiʼuk li yajkoltaobbatake. Jpʼel skʼoplal chyalik batel xchiʼuk te telajtik chkomik ti bu oy li buchʼutik muʼyuk yichʼojik sirkunsision ti chamik ta espadae.
22 Te oyik ek li Asiria xchiʼuk li yajsoltarotake. Te oy ta spat xokon ajvalil li smukinal j-asiriaetike, jaʼ li buchʼutik chamik ta espadae.+
23 Li smukinalike te oy ta yutil to chʼen,* te joyobtabil smukinal yuʼun li yajsoltarotake, jaʼ li buchʼutik chamik ta espadae, yuʼun la sibtasik li buchʼutik kuxulik toe.
24 »›Li Elame+ te oy ek xchiʼuk li yajsoltarotake, te joyol ta spat xokon smukinal li yajsoltarotake, jaʼ li buchʼutik chamik ta espadae. Muʼyuk yichʼojik sirkunsision yalik batel ta yutil to balumil, jaʼik li buchʼutik la sibtasik li buchʼutik kuxulik toe. Jaʼ yuʼun, jmoj chlajik ta kʼexlal xchiʼuk li buchʼutik yakal chyalik batel ta chʼene.*
25 Te la spasbeik* stem* ti bu oy li buchʼutik chamemike, te joyol ta spat xokon smukinal* li yajsoltarotake. Muʼyuk yichʼojik sirkunsision skotolik, jaʼ li buchʼutik chamik ta espadae, yuʼun la sibtasik li buchʼutik kuxulik toe. Jmoj chlajik ta kʼexlal xchiʼuk li buchʼutik yakal chyalik batel ta chʼene.* Te laj yichʼ telanel ti bu oy li animaetike.
26 »›Jaʼ te oyik ek li Mesek, Tubal+ xchiʼuk skotol li yajsoltarotakike. Li smukinalik buchʼutik sventainoje te joyol ta spat xokon.* Muʼyuk yichʼojik sirkunsision cham skotolik, laj yichʼik pajbel espada, yuʼun la sibtasik li buchʼutik kuxulik toe.
27 ¿Mi mu koʼoluk te telel chkomik xchiʼuk li tsatsal jpaskʼopetik ti muʼyuk yichʼojik sirkunsisione, jaʼ li buchʼutik yalemik xa batel ta Mukinal* xchiʼuk li yabtejebik sventa paskʼope? Chakʼ ta xon sjolik li s-espadaike* xchiʼuk te napʼal chbat ta sbakilik li smulike, yuʼun skotol li tsatsal jpaskʼopetik taje la sibtasik li buchʼutik kuxulik toe.
28 Yan li voʼote* te chavichʼ lajesel ti bu oy li buchʼutik muʼyuk yichʼojik sirkunsisione xchiʼuk te telel chakom xchiʼuk li buchʼutik chamik ta espadae.
29 »›Te xa oy li Edom+ eke, li ajvaliletik yuʼune xchiʼuk li bankilaletik yuʼune. Akʼo mi toj echʼem xuʼ yuʼunik, te telajtik komik ti bu oy li buchʼutik chamik ta espadae; jech xtok, te telajtik chkomik xchiʼuk li buchʼutik muʼyuk yichʼojik sirkunsisione+ xchiʼuk li buchʼutik yakal chyalik batel ta chʼene.*
30 »›Te oy skotol li bankilaletik ta nortee xchiʼuk skotol li jsidonetike,+ jaʼ li buchʼutik ta kʼexlal yalik batel xchiʼuk li animaetike, akʼo mi laj yakʼik toʼox xiʼel ta skoj ti tsots xuʼ yuʼunike. Muʼyuk yichʼojik sirkunsision chchamik, te telel chkomik xchiʼuk li buchʼutik chamik ta espadae xchiʼuk jmoj chlajik ta kʼexlal xchiʼuk li buchʼutik yakal chyalik batel ta chʼene.*
31 »›Kʼalal chil faraon skotolik taje, tsta spatobil yoʼonton ta sventa li kʼusi kʼot ta stojolal li yajsoltarotake;+ li faraon xchiʼuk skotol li yajsoltarotake chichʼik milel ta espada›, xi li Ajvalil Jeova ti jaʼ Mukʼul Jpasmantale.
32 »‹Ta skoj ti la sibtas li buchʼutik kuxulik toe, li faraon xchiʼuk skotol li yajsoltarotake te telajtik chkomik xchiʼuk li buchʼutik muʼyuk yichʼojik sirkunsisione, jaʼik li buchʼutik chamik ta espadae›, xi li Ajvalil Jeova ti jaʼ Mukʼul Jpasmantale».
Tsʼibetik ta yok vun
^ Jaʼ skʼoplal ti 12 xa ox jabil yichʼoj chukel batel li ajvalil Joakin, Esekiel xchiʼuk yan judaetike. Kʼelo Esekiel 1:2.
^ O «chʼiom leon ti xtinlajet sjol».
^ O «tsʼijlanel».
^ O «skomelal».
^ O «ue».
^ O «chnikik».
^ Jaʼ skʼoplal ti 12 xa ox jabil yichʼoj chukel batel li ajvalil Joakin, Esekiel xchiʼuk yan judaetike. Kʼelo Esekiel 1:2.
^ Xuʼ van jaʼ skʼoplal li yuilal 12. Kʼelo versikulo 1.
^ Jaʼ xkaltik, li Ejiptoe.
^ O «mukinale».
^ Jaʼ xkaltik, li Ejiptoe.
^ Jaʼ van skʼoplal li faraone.
^ O «mukinal».
^ O «mukinale».
^ O «mukinale».
^ Literal «smukinaltak».
^ O «svayeb».
^ Jaʼ xkaltik, li jteklum Elame.
^ Jaʼ van skʼoplal li ajvalil ta Mesek xchiʼuk Tubale.
^ Xuʼ van jaʼ skʼoplal li jpaskʼopetik ti laj yichʼik mukel xchiʼuk li s-espadaik ta skoj ti lek ichʼbilik ta mukʼe.
^ Xuʼ van jaʼ skʼoplal li faraone o li Ejiptoe.
^ O «mukinale».
^ O «mukinale».
