Esekiel 34:1-31
34 La skʼoponun tal yan velta li Jeovae, xi laj yalbune:
2 «Xnichʼon krixchano, alo kʼusi chkʼot ta stojolal li jchabichijetik ta Israele. Alo kʼusi chkʼot ta pasel xchiʼuk xi xavalbe li jchabichijetike: ‹Xi chal li Ajvalil Jeova ti jaʼ Mukʼul Jpasmantale: «¡Abol sba li jchabichijetik ta Israel+ ti jaʼ noʼox yakal tsmakʼlin sba stukike! ¿Mi mu jaʼuk skʼan smakʼlinik jechuk li chijetike?+
3 Li voʼoxuke chalajesbeik li xepuʼal chijetike, chakʼuʼinbeik li stsotsile xchiʼuk chamilik ti bu mas jupʼemike,+ pe muʼyuk chavakʼbeik sveʼel.+
4 Muʼyuk xatsatsubtasik li bu kʼunibemike, mi jaʼuk la apoxtaik li bu ipike, mi jaʼuk la apixik li bu yayijemike, mi jaʼuk ay avikʼik sutel tal ti jaykot kʼejpʼujemik* lokʼel ta bee, mi jaʼuk ay asaʼik tal ti jaykot chʼayemike;+ kʼajomal toj tsots la apasik ta mantal xchiʼuk muʼyuk xkʼuxul avoʼontonik la aventainik.+
5 Jaʼ yuʼun, tanpuk batik ta skoj ti muʼyuk jchabichij yuʼunike;+ tanpuk batik xchiʼuk kʼotik ta sveʼel jtiʼvanej chonbolometik ta osiltik.
6 Li jchijtake kʼejpʼujik* batel ta vitsetik xchiʼuk ta bikʼtal vitsetik; li jchijtake tanpuk batik ta sjunul balumil, muʼyuk buchʼu ay saʼ talel mi jaʼuk oy buchʼu ay stsob talel.
7 »›»Jaʼ yuʼun, jchabichijetik, chikintaik li kʼusi chal Jeovae:
8 ‹Xi chal li Ajvalil Jeova ti jaʼ Mukʼul Jpasmantale: «Jamal chkal ta skoj ti kuxulune, ta skoj ti chʼabal buchʼu xchabiatik li jchijtake, ti kʼotik xa ta veʼlile, ti kʼotik xa ta sveʼel jtiʼvanej chonbolometik ta osiltike, yuʼun li jchabichijetik kuʼune muʼyuk bat saʼik tal li jchijtake; kʼajomal noʼox la smakʼlin sba stukik, muʼyuk la smakʼlinik li jchijtake»›,
9 jaʼ yuʼun, jchabichijetik, chikintaik li kʼusi chal Jeovae.
10 Xi chal li Ajvalil Jeova ti jaʼ Mukʼul Jpasmantale: «Chkakʼbe kastigo li jchabichijetike xchiʼuk ta jkʼanbeik sutel li jchijtake,+ muʼyuk xa chkakʼ ti smakʼlinike* xchiʼuk muʼyuk xa tsmakʼlin sba stukik li jchabichijetike. Ta jpojbeik lokʼel ta yeik li jchijtake xchiʼuk muʼyuk xa chkʼot ta sveʼelik›».
11 »›Yuʼun xi chal li Ajvalil Jeova ti jaʼ Mukʼul Jpasmantale: «Kʼelavil, voʼon chbat jsaʼ tal jtuk li jchijtake xchiʼuk voʼon ta jchabiik.+
12 Ta jchabi li jchijtake, jech ta jpas kʼuchaʼal jun jchabichij kʼalal tsta li xchijtak ti tanpuk toʼox batemike xchiʼuk ti tsmakʼline.+ Chbat jpojik lokʼel tal ti butik tanpuk batik li ta skʼakʼalil kʼalal jaʼo oy toke xchiʼuk kʼalal jaʼo ikʼ tajek osile.+
13 Ta jlokʼes talel li ta jteklumetike xchiʼuk ta jtsobik lokʼel tal li ta lumetike, chkikʼik tal ta yosilalik xchiʼuk ta jmakʼlinik ta vitstikaltik yuʼun Israel,+ te ta stsʼel ti bu oy tsots lek yok voʼe xchiʼuk ta stsʼel li jteklumetik ti oy jnaklejetik tee.
14 Te ta jmakʼlin ti bu oy lek yaxaltike xchiʼuk te chveʼik li ta tayal vitsetik yuʼun Israele.+ Te ta sluban sbaik* ta pulem yaxaltik+ xchiʼuk jaʼ tsloʼik li lekikil yaxal* ta vitsetik yuʼun Israele».
15 »›Xi chal li Ajvalil Jeova ti jaʼ Mukʼul Jpasmantale: «Voʼon ta jmakʼlin jtuk li jchijtake+ xchiʼuk chkakʼ ti xkux yoʼontonike.+
16 Chbat jsaʼ tal li jchij ti chʼayeme,+ chbat kikʼ sutel tal li jchij ti kʼejpʼujem* lokʼel ta bee, ta jpixbe syayijemal li jchij ti yayijeme xchiʼuk ta jtsatsubtas li jchij ti kʼunibeme. Pe ta jlajesbe skʼoplal li jupʼemike xchiʼuk ti bu lek tsotsike. Ta jchapanik xchiʼuk chkakʼbeik kastigo jech kʼuchaʼal staik-oe».
17 »›Aʼio avaʼiik, jchijtak, xi chkal voʼon li Ajvalil Jeovaun ti Mukʼul Jpasmantalune: «Ta jchapan li jchijtake, ta jchapan li tot chijetike xchiʼuk li tot tentsunetike.+
18 ¿Mi mu baluk noʼox chavaʼiik ti chalajesik li lekil yaxale?* ¿Mi yuʼun chapechʼilanik ta tekʼel xtok li skomenal* yaxale? Jech xtok, ¿mi yuʼun chatatubtas ta avakanik li sakil voʼ kʼalal mi avuchʼojik xa oxe?
19 Li avi une, ¿mi jaʼ xa tslajes jchijtak li yaxal* ti laj xa apechʼilanik ta tekʼele xchiʼuk mi jaʼ xa chuchʼik li voʼ ti la atatubtasik ta avakanike?».
20 »›Jaʼ yuʼun, li Ajvalil Jeova ti jaʼ Mukʼul Jpasmantale xi chalbe li chijetike: «Kʼelavilik, ta jchapan li jupʼem chijetike xchiʼuk li bakil chijetike,
21 yuʼun la axujik batel ta axokonik xchiʼuk ta anekebik li chijetik ti ipike xchiʼuk la aluchik batel ta axulubik jaʼ to ti tanpuk bat avuʼunik ta nome.
22 Voʼon ta jkolta li jchijtake; muʼyuk xa chkakʼ ti xichʼik tsakel batele.+ Ta jchapan ta jujukot li chijetike.
23 Ta jvaʼan jun jchabichij ta stojolalik,+ jaʼ li kajtunel Davide+ xchiʼuk jaʼ ta xmakʼlinatik. Jaʼ chmakʼlinatik yuʼun xchiʼuk jaʼ chkʼot ta jchabivanej yuʼunik.+
24 Voʼon chikʼot ta Sdiosik,+ voʼon li Jeovaune, jech xtok, jaʼ chkʼot ta bankilal yuʼunik li kajtunel Davide.+ Jech lokʼem ta ke jtuk, voʼon li Jeovaune.
25 »›»Ta jpas jun trato xchiʼukik ti chakʼ jun oʼontonale+ xchiʼuk ta jlajesbe skʼoplal ta jteklum li jtiʼvanej chonbolometik+ sventa junuk yoʼonton xnakiik li ta takixokol balumile xchiʼuk ti xvayik li ta teʼtikaltike.+
26 Chkʼotik kuʼun ta jun bendision li jchijtake xchiʼuk li spat xokon bikʼit vits kuʼune,+ jech xtok, chkakʼ ti xakʼ voʼ ta yoraile. Li bendisione ta xmal talel jech kʼuchaʼal chakʼ voʼe.+
27 Chakʼ sat li teʼetik ta osiltike xchiʼuk oy kʼusi lek chakʼ li balumile,+ vaʼun jun yoʼonton chnakiik li ta jteklume. Kʼalal mi la jkʼasbe li skʼatlom teʼalike+ xchiʼuk mi la jpojik lokʼel ta skʼob li buchʼu mosoinatike, jech tsnaʼik ti voʼon Jeovaune.
28 Muʼyuk xa chichʼik tsakel batel yuʼun li mukʼtik lumetike xchiʼuk muʼyuk xa chichʼik lilinel ta tiʼel yuʼun li jtiʼvanej chonbolometike. Jech xtok, jun yoʼonton chnakiik, muʼyuk kʼusi tsibtasatik.+
29 »›»Oy kʼusi ta jtsʼun ta sventaik yoʼ xichʼik-o ojtikinele; muʼyuk xa chchamik ta viʼnal li ta jteklume+ xchiʼuk muʼyuk xa chichʼik kʼexlaltasel yuʼun li mukʼtik lumetike.+
30 ‹Vaʼun, tsnaʼik ti te jchiʼukike, voʼon li Jeovaune, voʼon li Sdiosikune xchiʼuk tsnaʼik ti jaʼ jlumal li jteklum Israele›,+ xi li Ajvalil Jeova ti jaʼ Mukʼul Jpasmantale»›.
31 »‹Li voʼoxuke, jchijtak,+ li chijetik ti voʼon ta jchabie, krixchanooxuk noʼox, voʼon Adiosikun›, xi li Ajvalil Jeova ti jaʼ Mukʼul Jpasmantale».
Tsʼibetik ta yok vun
^ O «kʼejevemik; tsʼepʼujemik».
^ O «kʼejevik».
^ O «xchabiike».
^ O «xpuchʼan sbaik».
^ O «tsʼiʼlel».
^ O «kʼejevem; tsʼepʼujem».
^ O «tsʼiʼlele».
^ O «skomelal».
^ O «tsʼiʼlel».
