Esekiel 35:1-15
-
Chichʼ alel kʼusi chkʼot ta stojolal li vitstikaltik yuʼun Seire (1-15)
35 La skʼoponun tal yan velta li Jeovae, xi laj yalbune:
2 «Xnichʼon krixchano, akʼo batel asat li ta vitstikaltik yuʼun Seire+ xchiʼuk alo kʼusi chopol chkʼot ta stojolal.+
3 Xi xavalbee: ‹Xi chal li Ajvalil Jeova ti jaʼ Mukʼul Jpasmantale: «Vitstikaltik yuʼun Seir, likʼot xa ta avajkontra. Ta jyeʼ batel jkʼob ta atojolal xchiʼuk xokol chkiktaot.+
4 Ta jlilin li jteklumetik avuʼune xchiʼuk xokol chakom kuʼun;+ vaʼun jech chanaʼ ti voʼon Jeovaune.
5 Yuʼun muʼyuk spajeb ti kʼu yelan la akontrain li j-israeletike+ xchiʼuk laj avakʼ ta milel ta espada kʼalal jaʼo oy svokolike, kʼalal jaʼo laj yichʼik li slajeb kastigoe»›.+
6 »Xi chal li Ajvalil Jeova ti jaʼ Mukʼul Jpasmantale: ‹Jamal chkal ta skoj ti kuxulune, laj xa jtʼujot sventa xavichʼ milel, muʼyuk chajatav.+ Yuʼun la amil li buchʼutik apʼajoje, jaʼ yuʼun persa chavichʼ milel.+
7 Xokol chkom kuʼun+ li vitstikaltik yuʼun Seire, ta jtupʼbe skʼoplal li buchʼutik te ch-echʼike xchiʼuk li buchʼutik tsutik batel tee.
8 Ta jnojes ta anima li vitsetik avuʼune; li buchʼutik chlajik ta espadae te lamal chkomik li ta bikʼtal vitsetik avuʼune, li ta stenlejaltik avuʼune xchiʼuk li ta beoʼetik avuʼune.
9 Xokol chkiktaot ta sbatel osil xchiʼuk muʼyuk xa chichʼ naklebinel li jteklumetik avuʼune;+ vaʼun jech chanaʼik ti voʼon Jeovaune›.
10 »Ta skoj ti xi laj avale: ‹Li chib mukʼtik lumetik liʼe, li chib lumetik liʼe ta xkuʼunin xchiʼuk ch-och ta jkʼob xchibal›,+ akʼo mi te oy li Jeovae,
11 ‹jaʼ yuʼun jamal chkal ta skoj ti kuxulune, jech ta jpasbot jech kʼuchaʼal laj avakʼ ta ilel skapemal ajol ta stojolal li jlumale, ti kʼu yelan laj avitʼixtae xchiʼuk ti kʼu yelan la apʼaje;+ chkakʼ jba ta ojtikinel ta stojolalik kʼalal mi la jchapanote›, xi li Ajvalil Jeova ti jaʼ Mukʼul Jpasmantale.
12 ‹Vaʼun, jech chanaʼ ti laj kaʼi skotol li kʼusitik chopol laj aval ta stojolal li vitsetik yuʼun Israele, voʼon li Jeovaune, laj kaʼi kʼalal xi laj avale: «Xokol xa kom xchiʼuk laj xa kichʼtik akʼbel sventa jlajesbetik skʼoplal».*
13 Xatoyetik la achopol kʼoptaikun xchiʼuk ep kʼusitik chopol laj avalik ta jtojolal.+ Laj kaʼi skotol li kʼusi laj avalike›.
14 »Xi chal li Ajvalil Jeova ti jaʼ Mukʼul Jpasmantale: ‹Kʼalal mi xokol xa ox laj kiktaote, ta xmuyubaj sjunul li balumile.
15 Ta skoj ti lamuyubaj kʼalal xokol kom li xrexto* jteklum Israele, jaʼ jech xokol chkiktaot ek.+ Vitstikaltik yuʼun Seir, stuk xa noʼox alilijemal chkom, jaʼ jech chkom sjunul Edom;+ vaʼun jech tsnaʼik ti voʼon Jeovaune›».
