Esekiel 36:1-38
36 «Li voʼote, xnichʼon krixchano, alo kʼusi chkʼot ta stojolal li vitsetik yuʼun Israele xchiʼuk xi xavalbee: ‹Vitsetik yuʼun Israel, chikintaik li kʼusi chal Jeovae.
2 Xi chal li Ajvalil Jeova ti jaʼ Mukʼul Jpasmantale: «Xi yaloj ta atojolalik li jkontrainvaneje: ‹¡Sta-o maʼ leʼe! ¡Laj xa kuʼunintik li tayal kʼopojebaletik* ta voʼnee!›»›.+
3 »Jaʼ yuʼun, alo kʼusi chkʼot ta pasel, xi xavale: ‹Xi chal li Ajvalil Jeova ti jaʼ Mukʼul Jpasmantale: «La slilinoxuk li jkontrainvanejetike xchiʼuk ta buyuk noʼox tal stsakoxuk ta kʼop, vaʼun laj yuʼuninoxuk li buchʼutik kuxul komik ta* mukʼtik lumetike xchiʼuk oy kʼusi chalilanik ta atojolalik li krixchanoetike xchiʼuk tsjut* amulik.+
4 Ta skoj taje, vitsetik yuʼun Israel, ¡chikintaik kʼusi chal li Ajvalil Jeova ti jaʼ Mukʼul Jpasmantale! Li Ajvalil Jeova ti jaʼ Mukʼul Jpasmantale xi chalbe li vitsetike xchiʼuk li bikʼtal vitsetike, li beoʼetike xchiʼuk li stenlejaltike, li sjinemal jteklum ti laj yichʼ lajesele+ xchiʼuk li jteklumetik ti chʼabal yajval kome, ti laj yichʼik pojbel batel li kʼusitik oy yuʼunike xchiʼuk ti laj yichʼik labanel yuʼun li buchʼutik kuxul komik ta mukʼtik lumetik ti te nopol oyike;+
5 li Ajvalil Jeova ti jaʼ Mukʼul Jpasmantale xi chalbe yaʼiike: ‹Xtiltun skʼakʼal koʼonton+ ta jkʼopon li buchʼutik kuxul komik ta mukʼtik lumetike xchiʼuk sjunul li Edome, jaʼik li buchʼutik xmuyubajik tajeke xchiʼuk ti solel chlabanvanik+ kʼalal chalik ti jaʼ yuʼunik li kosil sventa xuʼuninik ti bu oy lek yaxaltike xchiʼuk ti spojik batel li kʼusitik oy tee›»›.+
6 »Jaʼ yuʼun, alo kʼusi chkʼot ta stojolal li yosilal Israele xchiʼuk xi xavalbe li vitsetike xchiʼuk li bikʼtal vitsetike, li beoʼetike xchiʼuk li stenlejaltike: ‹Xi chal li Ajvalil Jeova ti jaʼ Mukʼul Jpasmantale: «Ta skʼakʼal koʼonton xchiʼuk ta skapemal jol chikʼopoj ta skoj ti laj avichʼik labanel yuʼun li mukʼtik lumetike»›.+
7 »Jaʼ yuʼun, xi chal li Ajvalil Jeova ti jaʼ Mukʼul Jpasmantale: ‹Ta jtoy jkʼob sventa jamal chkal ti chlajik ta kʼexlal+ li mukʼtik lumetik ti nopol oyike.
8 Yan li voʼoxuke vitsetik yuʼun Israel, te chchʼi ta atojolalik teʼetik ti ep chakʼ skʼobkʼobtake xchiʼuk ti chakʼ ep sat ta sventa li jteklumal Israele,+ yuʼun poʼot xa sutik tal.
9 Yuʼun te jchiʼinojoxuk xchiʼuk chkakʼ talel jsat ta atojolalik. Chavichʼik abtelanel xchiʼuk oy kʼusi chavichʼik tsʼunbel.
10 Chkepajes li jnaklejetik avuʼune, jaʼ sjunul li jteklum Israele, chichʼ naklebinel yan velta li jteklumetike+ xchiʼuk chichʼ chaʼmeltsanel ti bu jinemike.+
11 Ta xkepajes li jnaklejetik avuʼunike xchiʼuk li atsʼunbal chonbolomike;+ ta xpʼolik xchiʼuk ta x-epajik. Chkakʼ ti xavichʼik naklebinel yan velta jech kʼuchaʼal ta baʼyuke+ xchiʼuk mas to chkakʼboxuk bendision jech kʼuchaʼal ta voʼnee;+ vaʼun jech chanaʼik ti voʼon Jeovaune.+
12 Vitsetik, chkakʼ ti te xanavik ta atojolalik li jteklumal Israele xchiʼuk chayuʼuninoxuk.+ Chakʼotik ta xrextoik* xchiʼuk chlaj skʼoplal ti mu junuk xnichʼnabik ta xaviktabeike›».+
13 «Xi chal li Ajvalil Jeova ti jaʼ Mukʼul Jpasmantale: ‹Ta skoj ti xi chalboxuke: «Li voʼote jaʼot jun lum ti chalajes li jnaklejetike xchiʼuk ti chapojbe xnichʼnab li mukʼtik lumetik avuʼune»›,
14 ‹jaʼ yuʼun, muʼyuk xa chalajes li jnaklejetike xchiʼuk muʼyuk xa chatupʼbe skʼoplal xnichʼnab li mukʼtik lumetik avuʼune›, xi li Ajvalil Jeova ti jaʼ Mukʼul Jpasmantale.
15 ‹Muʼyuk xa chkakʼ ti xchopol kʼoptaikot li mukʼtik lumetike mi jaʼuk chkakʼ ti slabanikot li krixchanoetike+ xchiʼuk muʼyuk xa chamakbe* yakan li mukʼtik lumetik avuʼune›, xi li Ajvalil Jeova ti jaʼ Mukʼul Jpasmantale».
16 La skʼoponun tal yan velta li Jeovae, xi laj yalbune:
17 «Xnichʼon krixchano, kʼalal te toʼox nakal ta yosilal li jteklum Israele, la sokesik ta skoj ti kʼu yelan stalelalike+ xchiʼuk li kʼusitik tspasike. Toj ibal sba* laj kil li stalelalike, jech kʼuchaʼal ibal sba kʼalal chil xchamel jun antse.+
18 Jaʼ yuʼun, la jmal talel skʼakʼal koʼonton ta stojolalik ta skoj ti la smalik chʼichʼ li ta osile+ xchiʼuk ta skoj ti la sokesik ta ibal sba santoetik* yuʼunike.+
19 Jaʼ yuʼun, tanpuk batik kuʼun li ta mukʼtik lumetike xchiʼuk la jpukik batel li ta lumetike.+ Jech la jchapanik ta skoj ti kʼu yelan stalelalike xchiʼuk ta skoj li kʼusitik la spasike.
20 Pe kʼalal kʼotik li ta mukʼtik lumetik taje, li krixchanoetike la sokesbeik skʼoplal jchʼul bi+ kʼalal xi laj yalik ta stojolal li jteklumale: ‹Leʼe jaʼ steklumal li Jeovae, pe nutsatik lokʼel li ta osil ti akʼbatik toʼoxe›.
21 Jaʼ yuʼun, oy kʼusi ta jpas ta skoj li jchʼul bie, yuʼun li jteklum Israele la sokesbeik skʼoplal li ta mukʼtik lumetik ti bu tanpuk batike».+
22 «Jaʼ yuʼun, xi xavalbe li jteklum Israele: ‹Xi chal li Ajvalil Jeova ti jaʼ Mukʼul Jpasmantale: «Jteklum Israel, maʼuk ta akojik ti oy kʼusi ta jpase, jaʼ ta skoj li jchʼul bie, yuʼun la asokesbeik skʼoplal li ta mukʼtik lumetik ti bu tanpuk labatike»›.+
23 ‹Jpʼel skʼoplal ta jchʼultajes li jmukʼul bi+ ti laj yichʼ sokesbel skʼoplal li ta mukʼtik lumetike, ti voʼoxuk la asokesbeik skʼoplal tee; kʼalal mi laj kichʼ chʼultajesel ta atojolalik ta yeloval sat li mukʼtik lumetike, tsnaʼik ti voʼon Jeovaune›,+ xi li Ajvalil Jeova ti jaʼ Mukʼul Jpasmantale.
24 ‹Ta jlokʼesoxuk talel li ta mukʼtik lumetike xchiʼuk ta jtsoboxuk lokʼel talel ta skotol li lumetike, vaʼun chkikʼoxuk batel li ta avosilalike.+
25 Ta jvijboxuk lekil voʼ, vaʼun lek sak chakomik;+ ta jpokboxuk lokʼel skotol li achopolilike+ xchiʼuk ta jsakubtasoxuk ta skoj ti asokesoj abaik li ta ibal sba santoetik avuʼunike.+
26 Chkakʼ achʼubuk li kʼusi oy ta avoʼontonike+ xchiʼuk chkakʼ achʼubuk li anopbenike.+ Jech xtok, ta jlokʼesboxuk li avoʼontonik ti xkoʼolaj kʼuchaʼal tone,+ vaʼun chkakʼboxuk jun avoʼontonik ti lek kʼune.*
27 Ta jtunes juʼel sventa jel li anopbenike xchiʼuk chkakʼ ti xachʼunik li jmantaltake+ xchiʼuk ti xapasik li kʼusitik chapanbil kuʼune.
28 Laj une, chanakiik li ta osil ti laj kakʼbe li amoltotakike, vaʼun chakʼotik ta jteklumal xchiʼuk voʼon chikʼot ta Adiosik›.+
29 »‹Ta jlokʼes skotol li achopolilike xchiʼuk chkalbe li sat tsʼunobil ti xakʼ lek sate. Jech xtok, muʼyuk xa chkakʼ talel viʼnal ta atojolalik.+
30 Chkakʼ ti xakʼ lek sat li teʼetike xchiʼuk ti oyuk kʼusi lek xchʼi li ta osiltik sventa mu xa xavichʼik kʼexlaltasel ta mukʼtik lumetik ta skoj li viʼnale.+
31 Vaʼun, li voʼoxuke chvul ta ajolik li achopol talelalike xchiʼuk li kʼusitik la apasik ti muʼyuk lekike, ch-ib-o avoʼontonik yuʼun li amulike xchiʼuk li kʼusitik toj chopol la apasike.+
32 Pe teuk me ta ajol, jteklum Israel, ti maʼuk ta akojik ti jech ta jpase,+ yuʼun jaʼ noʼox ta jkʼan ti xakʼexavike xchiʼuk ti chopoluk xavaʼi abaik ta skoj li atalelalike›, xi li Ajvalil Jeova ti jaʼ Mukʼul Jpasmantale.
33 »Xi chal li Ajvalil Jeova ti jaʼ Mukʼul Jpasmantale: ‹Kʼalal mi la jpokbot lokʼel skotol li amule, chkakʼ ti xichʼ naklebinel yan velta li jteklumetike+ xchiʼuk ti xichʼ chaʼmeltsanel ti bu jinemike.+
34 Chichʼ abtelanel yan velta li osil ti xokol toʼox kome, akʼo mi xokol toʼox chilik li buchʼutik te ch-echʼike.
35 Xi chal li krixchanoetike: «Kʼot xa kʼuchaʼal nichimaltik Eden+ li osil ti xokol toʼox kome, jech xtok, li jteklumetik ti lilijem kome, ti xokol kome xchiʼuk ti jinem kome joyol xa lek ta muro xchiʼuk oy xa jnaklejetik te».+
36 Li mukʼtik lumetik ti te to oyik ta apat axokonike ta snaʼik ti voʼon la jvaʼan li kʼusi jinem toʼoxe xchiʼuk ti oy xa kʼusi la jtsʼun ti bu xokol toʼoxe, voʼon li Jeovaune. Jech lokʼem ta ke jtuk xchiʼuk jech kʼotem ta pasel kuʼun, voʼon li Jeovaune›.+
37 »Xi chal li Ajvalil Jeova ti jaʼ Mukʼul Jpasmantale: ‹Jech xtok, chkakʼ ti skʼanbeikun jteklum Israel ti xkepajesik kʼuchaʼal epal chij li jnaklejetik yuʼune, vaʼun jech ta jpas.
38 Jech kʼuchaʼal li xchijtak li buchʼutik chʼule, jech kʼuchaʼal li chijetik ta Jerusalen* ta yorail kʼinetike,+ li jteklumetik ti jinemik toʼoxe chnoj ta epal krixchanoetik ti xkoʼolaj kʼuchaʼal epal chijetike,+ vaʼun tsnaʼik ti voʼon Jeovaune›».
Tsʼibetik ta yok vun
^ Literal «li skomenal».
^ O «tsnop».
^ O «spukulalik; sparteik».
^ O «chatʼabesbe».
^ Li ta ebreo kʼope xuʼ van te nitil skʼoplal ta jpʼel kʼop ti «tsoʼ» skʼan xale, jaʼo chichʼ alel kʼalal oy kʼusi chichʼ pʼajele.
^ Jaʼ xkaltik, chchʼun li beiltasel chakʼ Diose.
^ O jaʼ van skʼoplal «Jech kʼuchaʼal chijetik ta Jerusalen ti jaʼ chichʼ akʼel ta milbil matanal».
