Esekiel 37:1-28
37 Laj yakʼ talel skʼob ta jtojolal li Jeovae xchiʼuk laj yikʼun batel ta s-espiritu li Jeovae, vaʼun te laj yakʼun ta oʼlol stenlejaltik+ ti bu busul baketike.
2 Te laj yakʼ jelavkun ti bu busul baketike, laj kil ti toj echʼ xa noʼox ep bak li ta stenlejaltike xchiʼuk ti solel takijemike.+
3 Xi la sjakʼbune: «Xnichʼon krixchano, ¿mi xuʼ to van xkuxi li baketik liʼe?». Vaʼun, xi la jtakʼbee: «Kajval Jeova ti Mukʼul Jpasmantalote, voʼot anaʼoj atuk».+
4 Jaʼ yuʼun, xi laj yalbune: «Alo kʼusi chkʼot ta stojolal li baketike, xi xavalbee: ‹Takin baketik, chikintaik kʼusi chal li Jeovae:
5 »›Li Ajvalil Jeova ti jaʼ Mukʼul Jpasmantale xi chalbe li baketike: «Ta xkakʼ ti xavichʼik ikʼe, vaʼun chakuxiik yan velta.+
6 Chkakʼ achʼuxuvilik, abekʼtalik, anukulilik xchiʼuk chkakʼ ti xavichʼik ikʼe, vaʼun chakuxiik yan velta; jech chanaʼik ti voʼon Jeovaune»›».
7 Vaʼun, laj kal li kʼusi chkʼot ta pasel jech kʼuchaʼal laj kichʼ albele. Kʼalal laj kale, ta anil noʼox oy kʼusi lik bakʼuk, xkʼojlajet xa lik stsʼakan sba li baketike, ta jujun bak lik stsʼakan sba.
8 Laje, laj kil ti lik ayanuk xchʼuxuvilike, sbekʼtalike xchiʼuk snukulilike. Pe muʼyuk toʼox chichʼik ikʼ.
9 Vaʼun, xi to laj yalbun li Diose: «Oyuk kʼusi xavalbe li ikʼe. Xnichʼon krixchano, xi xavalbe yaʼi li ikʼe: ‹Xi chal li Ajvalil Jeova ti jaʼ Mukʼul Jpasmantale: «Ikʼ,* laʼ, te to xalik talel li ta xchanjotal stiʼiltak balumile xchiʼuk vuchʼtao* talel ti bu oy li buchʼutik yichʼojik milel sventa xkuxiik yan veltae»›».
10 Vaʼun, laj kal li kʼusi chkʼot ta pasel jech kʼuchaʼal laj yalbune. Laje, lik yichʼik ikʼ,* lik kuxiikuk yan velta xchiʼuk lik vaʼiikuk,+ solel epik tajek, xkoʼolaj kʼuchaʼal epal soltaroetik.
11 Laje, xi laj yalbune: «Xnichʼon krixchano, li baketike jaʼ skʼoplal sjunul li jteklum Israele.+ Kʼelavil, xi chalike: ‹Takijem xa tajek li jbakiltike xchiʼuk chʼabal xa spatobil koʼontontik.+ Laj xa kichʼtik lajesel ta j-echʼel›.
12 Jaʼ yuʼun, xi xavalbe yaʼiik li kʼusi chkʼot ta pasele: ‹Xi chal li Ajvalil Jeova ti jaʼ Mukʼul Jpasmantale: «Jteklumal, ta jambe stiʼ li amukinalike+ xchiʼuk ta jtotsoxuk lokʼel tal te, vaʼun chkikʼoxuk tal li ta yosilal Israele.+
13 Jteklumal, jech ta xanaʼik ti voʼon Jeovaun mi la jambe stiʼ li amukinalike xchiʼuk mi la jtotsoxuk lokʼel tal tee»›.+
14 ‹Chkakʼ talel j-espiritu ta atojolalik, vaʼun chakuxiik yan velta;+ te chanakiik kuʼun li ta avosilalike. Vaʼun, jech chanaʼik ti jech lokʼem ta ke jtuke xchiʼuk ti jech kʼotem ta pasel kuʼune, voʼon li Jeovaune›, xi li Jeovae».
15 La skʼoponun tal yan velta li Jeovae, xi laj yalbune:
16 «Li voʼote, xnichʼon krixchano, tsako jteluk teʼ xchiʼuk xi xatsʼiba tee: ‹Ta sventa Juda xchiʼuk li j-israeletik ti jmoj sjolik xchiʼuke›.+ Laje, tsako yan jteluk teʼ xchiʼuk xi xatsʼiba tee: ‹Ta sventa Jose ti jaʼ li steʼ Efraine xchiʼuk skotol li j-israeletik ti jmoj sjolik xchiʼuke›.+
17 Vaʼun, loto xchaʼtelal sventa jteluk xa noʼox xvinaj kʼalal atsakoje.+
18 Kʼalal mi xi la sjakʼbot li ateklumale:* ‹¿Mi muʼyuk chavalbunkutik kʼusi smelolal li kʼusi chapase?›,
19 xi xatakʼbe yaʼiike: ‹Xi chal li Ajvalil Jeova ti jaʼ Mukʼul Jpasmantale: «Ta jtsakbe li steʼ Jose ti te oy ta skʼob li Efraine. Li teʼ xtoke jaʼ skʼoplal li snitilulal Israel ti koʼol sjolik xchiʼuk li Efraine, li nitilulaletik taje ta jpas ta jmoj xchiʼuk li steʼ Judae.+ Vaʼun, jtel xa noʼox chkʼotik kuʼun kʼalal jtsakoje»›.
20 Li chaʼtel teʼ chatsʼibae skʼan teuk atsakoj sventa xilik.
21 »Xi xavalbe yaʼiike: ‹Xi chal li Ajvalil Jeova ti jaʼ Mukʼul Jpasmantale: «Ta jlokʼes talel li j-israeletik ti batemik ta mukʼtik lumetike xchiʼuk ta jtsobik sutel tal ti butik tanpuk batemike, vaʼun chkikʼik sutel tal ta yosilalik.+
22 Ta xkʼotik kuʼun ta jun xa noʼox jteklum li ta yosilalike,+ jaʼ li ta vitstikaltik yuʼun Israele, jun xa noʼox ajvalil chventainatik skotolik+ xchiʼuk muʼyuk xa chchʼak sbaik ta chib jteklum; muʼyuk xa chʼakal li yosilalike.+
23 Muʼyuk xa tsokes sbaik li ta ibal sba santoetik* yuʼunike, mi jaʼuk li ta kʼusitik toj chopol tspasike, mi jaʼuk li ta smulike.+ Ta jkoltaik sventa xiktaik spasel li kʼusitik chopole xchiʼuk ta jsakubtasik. Vaʼun, voʼon chikʼot ta Sdiosik xchiʼuk chkʼotik ta jteklumal.+
24 »›»Jaʼ chkʼot ta ajvalil yuʼunik li kajtunel Davide+ xchiʼuk jun xa noʼox jchabichij chkʼot yuʼun skotolik.+ Tspasik li kʼusitik chapanbil kuʼune xchiʼuk ta xchʼunik lek li jmantaltake.+
25 Te chnakiik li ta balumil ti laj kakʼbe li kajtunel Jakob ti jaʼ te naki li amoltotakike.+ Te chnakiik ta sbatel osil+ xchiʼuk li xnichʼnabike* xchiʼuk li xnichʼnab skeremtakike;+ xchiʼuk jaʼ chkʼot ta bankilal yuʼunik ta sbatel osil li kajtunel Davide.+
26 »›»Ta jpas jun trato xchiʼukik ti chakʼ jun oʼontonale,+ jaʼ jun trato ti chjalij ta sbatel osile. Ta xkakʼbe yosilik, chkakʼ ti xpʼolike+ xchiʼuk te chkakʼ ta stojolalik ta sbatel osil li jtemploe.
27 Te chkakʼ jna* ti bu oyike, vaʼun voʼon chikʼot ta Sdiosik xchiʼuk chkʼotik ta jteklumal.+
28 Li mukʼtik lumetike tsnaʼik ti voʼon ta jchʼultajes li Israel kʼalal mi te laj kakʼ ta stojolalik ta sbatel osil li jtemploe, voʼon li Jeovaune»›».+
Tsʼibetik ta yok vun
^ O «Yip kuxlejal».
^ O «juchʼtao».
^ O «yip kuxlejal».
^ Literal «li xnichʼnab ateklumale».
^ Li ta ebreo kʼope xuʼ van te nitil skʼoplal ta jpʼel kʼop ti «tsoʼ» skʼan xale, jaʼo chichʼ alel kʼalal oy kʼusi chichʼ pʼajele. Kʼelo Glosario, ibal sba.
^ Literal «skeremtakike».
^ O «kaxibalna».
