Esekiel 38:1-23
38 La skʼoponun tal yan velta li Jeovae, xi laj yalbune:
2 «Xnichʼon krixchano, akʼo batel asat ta stojolal li Gog ta yosilal Magogue,+ jaʼ li mero bankilal yuʼunik Mesek xchiʼuk Tubale,+ jech xtok, alo kʼusi chkʼot ta stojolal.+
3 Xi xavale: ‹Xi chal li Ajvalil Jeova ti jaʼ Mukʼul Jpasmantale: «Gog, ta jkontrainot, voʼot ti mero bankilalot yuʼunik li Mesek xchiʼuk Tubale.
4 Ta joypʼinot sutel xchiʼuk ta jtikʼ xotxot takʼin li ta sbakil avee,+ chkakʼ batan ta paskʼop xchiʼuk skotol li avajsoltarotake.+ Li avajsoltarotake jun yepalik, stsakojan smukʼta eskudoik* xchiʼuk xkʼox eskudoik,* stsakojan s-espada skotolik, li akaʼtake xchiʼuk li jkajlejetik ta kaʼ avuʼune kʼupilik sba skʼuʼ spokʼ slapojik.
5 Li Persia, Etiopia xchiʼuk li Pute+ te xchiʼukik ek, skotolik oy xkʼox eskudoik* xchiʼuk skaskoik;
6 li Gomer xchiʼuk skotol li yajsoltarotake, li snitilulal Togarma+ ti likemik tal ti bu mas to nom xkom ta nortee xchiʼuk skotol li yajsoltarotake. Epal jteklumetik te xchiʼukot.+
7 »›»Chapano abaik, tsako avabtejebik xchiʼuk skotol li avajsoltarotak ti stsoboj sbaik tal ta atojolale, voʼot chakʼot ta komandante* yuʼunik.
8 »›»Kʼalal mi echʼ xa ox epal kʼakʼale, chavichʼ takel ta ikʼel. Kʼalal mi echʼ xa ox epal jabile, cha-och ta persa ta yosilal jun jteklum ti jaʼ to tstsatsub tal ta skoj ti laj ta espadae, ti yichʼojik tsobel lokʼel tal ta epal jteklumetik sventa xtalik li ta vitsetik yuʼun Israele, ti jal xa ox tajek lilijem komeme. Li jnaklejetik ta jteklum taje laj yichʼik tsobel lokʼel tal li ta lumetike, jun xa yoʼonton nakal skotolik.+
9 Kʼalal mi tal atsak ta kʼope, jech chatal kʼuchaʼal tsatsal ikʼaloʼ xchiʼuk jech kʼuchaʼal tok chapix li jteklume, koʼol chatal xchiʼuk avajsoltarotak xchiʼuk epal jteklumetik»›.
10 »Xi chal li Ajvalil Jeova ti jaʼ Mukʼul Jpasmantale: ‹Li vaʼ kʼakʼale, oy kʼusi chlik ayanuk ta avoʼonton spasel xchiʼuk chlik anop kʼusi chopol chapas.
11 Xi chavale: «Chi-och batel ta persa li ta jteklumetik ti ta jamal osiltik oye.+ Chtal jtsak ta kʼop li buchʼutik jun yoʼonton nakalike, ti mu noʼox kʼusi snaʼike; skotolik taje nakalik ta jteklumetik ti ta jamal osiltik oye, chʼabal smuroal, mi jaʼuk stiʼ, mi jaʼuk stakʼinaltak».
12 Yuʼun oy ta avoʼonton chbat avichʼ tal xchiʼuk chbat apoj tal li kʼusitik oy tee, chbat atsak ta kʼop li lumetik ti jinemik toʼox ti oy xa yajval li avie+ xchiʼuk li jun jteklum ti yichʼoj tsobel lokʼel tal ta mukʼtik lumetike,+ ti yakalik stsobel skʼulejalik xchiʼuk kʼusitik yuʼunike,+ ti jaʼik li buchʼutik nakalik ta oʼlol balumile.
13 »›Li Saba+ xchiʼuk Dedane,+ jaʼ li jpʼolmajeletik ta Tarsise+ xchiʼuk skotol li yajsoltarotakike,* xi chalbeikote: «¿Mi ta van xa-och ta persa sventa xavichʼ batel xchiʼuk xapoj batel li kʼusitik oy tee? ¿Mi la atsob avajsoltarotak sventa xavichʼ batel plata, oro, kʼulejal xchiʼuk kʼusitik oy sventa mu albajuk yepal li kʼusitik chavichʼ batele?»›.
14 »Jaʼ yuʼun, xnichʼon krixchano, alo li kʼusi chkʼot ta pasele xchiʼuk xi xavalbe li Gogue: ‹Xi chal li Ajvalil Jeova ti jaʼ Mukʼul Jpasmantale: «Li vaʼ kʼakʼale, ¿mi mu tauk xavakʼ venta kʼalal jun xa yoʼonton nakal li jteklumal Israele?+
15 Te to chalik tal ta avavil, jaʼ ti bu mas to nom xkom ta nortee,+ epal jteklumetik chchiʼinot tal, kajajtik chtalik ta kaʼ skotolik, jun yepal xvoletik tal, epal soltaroetik chtalik.+
16 Gog, chtal akontrain li jteklumal Israele, jech chatal kʼuchaʼal li tok ti chpix li jteklume. Li ta slajebaltik batel kʼakʼale, chkikʼot talel sventa xakontrain li jteklumale,+ taje jaʼ sventa xojtikinikun li mukʼtik lumetik kʼalal mi la jchʼultajes jba ta atojolal ta yeloval satike»›.+
17 »Xi chal li Ajvalil Jeova ti jaʼ Mukʼul Jpasmantale: ‹¿Mi mu voʼotuk ti laj kal akʼoplal ta voʼne ta stojolal li kajtuneltak ti jaʼik j-alkʼopetik ta Israele? Taje jaʼik li buchʼutik ta epal jabil xa onoʼox laj yalik ti chavichʼ ikʼel tal sventa xtal akontrain li jteklumale›.
18 »‹Li vaʼ kʼakʼale, kʼalal mi och ta persa ta yosilal Israel li Gogue, chlik tsanuk li skʼakʼal koʼontone›, xi li Ajvalil Jeova ti jaʼ Mukʼul Jpasmantale.+
19 ‹Oy kʼusi chkal ta skapemal jol xchiʼuk ta skʼakʼal koʼonton ti xkoʼolaj kʼuchaʼal kʼokʼe; li vaʼ kʼakʼale, ch-echʼ jun tsatsal nikel li ta yosilal Israele.
20 Li choyetik ta nabe, li mutetik ta vinajele, li chonbolometik ta osiltike, skotol li kʼusitik xkilet chanavike xchiʼuk skotol li krixchanoetik ta sba balumile ta xkakʼ xiʼikuk. Ta xjin yalel li vitsetike,+ ta xlom li tayal chʼentikaltike xchiʼuk ta xyal ta lum li muroetike›.
21 »Xi chal li Ajvalil Jeova ti jaʼ Mukʼul Jpasmantale: ‹Ta jtak talel jun espada ta stojolal li Gog ta sjunlejal li vitstikaltik kuʼune. Chlik smil sba ta s-espada stukik ta jujuntal, akʼo mi xchiʼil noʼox sbaik.+
22 Chkakʼbe kastigo ta tsatsal chamel+ xchiʼuk chkakʼ ti ep buchʼutik xchamike. Chkakʼ ti xtal tsatsal voʼ, bot,+ kʼokʼ+ xchiʼuk asufre+ ta stojolale, ta stojolal li yajsoltarotake xchiʼuk ta stojolal li epal jteklumetik chchiʼinat tale.+
23 Jpʼel skʼoplal ta jmukʼibtas jkʼoplal, ta jchʼultajes jba xchiʼuk chkakʼ jba ta ojtikinel ta yeloval sat epal mukʼtik lumetik; vaʼun jech tsnaʼik ti voʼon Jeovaune›.
Tsʼibetik ta yok vun
^ O «makobbailik».
^ Kʼox makobbail ti jaʼ mas tstunesik li j-akʼflechaetike.
^ O «makobbailik».
^ Literal «jchabivanej».
^ O «li xchʼiom leontakik ti xtinlajet sjolike».
