Esekiel 39:1-29
39 »Xnichʼon krixchano, alo kʼusi chkʼot ta stojolal li Gogue+ xchiʼuk xi xavalbee: ‹Xi chal li Ajvalil Jeova ti jaʼ Mukʼul Jpasmantale: «Gog, ta jkontrainot, voʼot ti mero bankilalot yuʼunik li Mesek xchiʼuk Tubale.+
2 Ta joypʼinot sutel tal, ta jbeiltasot tal xchiʼuk te to chalik tal kuʼun ti bu mas to nom xkom ta nortee+ xchiʼuk chkikʼot tal li ta vitsetik yuʼun Israele.
3 Ta jipbot yalel li a-arko ti te atsakoj ta atsʼetkʼobe* xchiʼuk chkakʼ ti xkol yalel ta abatsʼikʼob li aflechae.
4 Te chayal ta lum li ta vitsetik yuʼun Israele,+ te chyal ta lum li avajsoltarotake xchiʼuk li epal jteklumetik te xchiʼukote. Chakʼot kuʼun ta sveʼel xulemetik xchiʼuk ta sveʼel jtiʼvanej chonbolometik ta osiltik»›.+
5 »Xi chal li Ajvalil Jeova ti jaʼ Mukʼul Jpasmantale: ‹Te chayal ta lum li ta jamal osiltike,+ yuʼun jech lokʼem ta ke jtuk.
6 »›Chkakʼ batel kʼokʼ ta stojolal li Magogue xchiʼuk ta stojolal li jnaklejetik ti jun yoʼonton nakalik li ta lumetik ti joyol ta nabe;+ vaʼun jech tsnaʼik ti voʼon Jeovaune.
7 Chkakʼ ta ojtikinel ta stojolal jteklumal Israel li jchʼul bie xchiʼuk muʼyuk xa chkakʼ ti xichʼ sokesbel skʼoplale; vaʼun li mukʼtik lumetike jech tsnaʼik ti voʼon Jeovaune,+ ti voʼon li Buchʼu chʼul yuʼun Israele›.+
8 »Xi chal li Ajvalil Jeova ti jaʼ Mukʼul Jpasmantale: ‹Poʼot xa xkʼot ta pasel li kʼusi laj yichʼ alele xchiʼuk jpʼel skʼoplal chkʼot ta pasel. Taje jaʼ li skʼakʼalil ti laj kalbe skʼoplale.
9 Li jnaklejetik ta jteklumetik yuʼun Israele chlokʼik batel xchiʼuk tstsanik-o kʼokʼ skotol li abtejebaletik sventa paskʼope: li mukʼta eskudoetike* xchiʼuk li kʼox eskudoetike,* li arkoetike xchiʼuk li flechaetike, li teʼetik sventa paskʼope* xchiʼuk li lansaetike. Vukub jabil jaʼ tstsanik-o kʼokʼ.+
10 Mu persauk xbat saʼik tal teʼ ta osiltik mi jaʼuk persa chbat saʼik tal siʼ ta teʼtikaltik, yuʼun jaʼ tstunesik sventa stsanik-o kʼokʼ li abtejebaletik sventa paskʼope›.
»‹Ta spojbeik kʼusitik yuʼunik li buchʼutik pojbatik kʼusitik yuʼunike xchiʼuk ta xichʼbeik kʼusitik yuʼunik li buchʼutik ichʼbatik kʼusitik yuʼunike›, xi li Ajvalil Jeova ti jaʼ Mukʼul Jpasmantale.
11 »‹Li vaʼ kʼakʼale, chkakʼbe smukinal ta Israel li Gogue,+ jaʼ li ta stenlejaltik ta slokʼeb kʼakʼal yuʼun nab ti te chjelav krixchanoetike, jech chmak sbeik li buchʼutik te ch-echʼik batele. Jaʼ te chichʼ mukel li Gog xchiʼuk skotol li yajsoltarotake. Taje chichʼ biiltasel stenlejaltik Amon-Gog.*+
12 Li jteklum Israele vukub u chichʼ yuʼun smukel li animaetik sventa sakubtas li balumile.+
13 Skotol li krixchanoetik ta jteklume tskolta sbaik ta smukel li animaetike. Ta skoj taje, chpuk-o batel skʼoplalik kʼalal mi kʼot skʼakʼalil ta jtoy jkʼoplale›,+ xi li Ajvalil Jeova ti jaʼ Mukʼul Jpasmantale.
14 »‹Sventa xichʼ sakubtasel li jteklume, ta xichʼ vaʼanel viniketik sventa xanik li jteklume xchiʼuk sventa smukik li animaetik ti te busul ta sba balumile. Vukub u jech ta saʼilanik li animaetike.
15 Kʼalal mi laj yilbeik sbakil krixchano li buchʼutik ta xanik li jteklume, ta xakʼbeik senyail ta xokon. Vaʼun, li buchʼutik oy ta sbaik smukel animae te chbat smukik li ta stenlejaltik Amon-Gogue.+
16 Li te xtoke chlik ayanuk jun jteklum ti Amona* sbie. Jech xtok, jaʼ tsakubtasik li jteklume›.+
17 »Li voʼote, xnichʼon krixchano, xi chalbot li Ajvalil Jeova ti jaʼ Mukʼul Jpasmantale: ‹Xi xavalbe skotol li jeltos mutetike xchiʼuk skotol li jtiʼvanej chonbolometik ta osiltike: «Laʼik, tsobo abaik tal. Tsobo abaik ta sjoyobal li milbil matanal ti yakal ta jchapan ta aventaike, li epal milbil matanal chkakʼ ta vitstikaltik yuʼun Israele.+ Chatiʼik bekʼet xchiʼuk chavuchʼik chʼichʼ.+
18 Chatibeik sbekʼtal li buchʼutik tsots yipike xchiʼuk chavuchʼbeik xchʼichʼel li bankilaletik ta balumile, li tot chijetike, li chʼiom chijetike, li tentsunetike xchiʼuk li tot vakaxetike, skotol li chonbolometik ta Basan ti jupʼesbilike.
19 Li ta milbil matanal ti yakal ta jchapan ta aventaike jaʼ te chavetʼes avoʼontonik ta slajesel xepuʼ xchiʼuk chavuchʼik chʼichʼ jaʼ to ti kʼuxi xayakubik-oe»›.
20 »‹Li ta jmexae te chtal avetʼes avoʼontonik ta sbekʼtal kaʼetik xchiʼuk ta sbekʼtal li buchʼutik tsbeiltasik karetaetike, ta sbekʼtal li buchʼutik tsots yipike xchiʼuk ta sbekʼtal jeltos jpaskʼopetik›,+ xi li Ajvalil Jeova ti jaʼ Mukʼul Jpasmantale.
21 »‹Chkakʼ ta ilel jmukʼulal ta yeloval li mukʼtik lumetike, vaʼun skotol li mukʼtik lumetike chakʼik venta ti kʼu yelan lichapanvane xchiʼuk ti kʼu yelan laj kakʼ ta ilel juʼel* ta yelovalike.+
22 Li vaʼ kʼakʼale, li jteklum Israele chlik snaʼik ti voʼon Jeovaune, ti voʼon Sdiosikune.
23 Li mukʼtik lumetike tsnaʼik ti jaʼ ta smul stuk jteklum Israel ti laj yichʼ chukel batele, yuʼun muʼyuk tukʼ laj yakʼ sbaik ta jtojolal.+ Jaʼ yuʼun, la jnakʼ* jsat ta stojolalik+ xchiʼuk laj kakʼik ta skʼob li yajkontraike,+ jech lajik ta espada skotolik.
24 Jech la jpasbeik ti kʼu yelan xchopolilike xchiʼuk ti kʼu yelan smulike, vaʼun la jnakʼ* jsat ta stojolalik›.
25 »Jaʼ yuʼun, xi chal li Ajvalil Jeova ti jaʼ Mukʼul Jpasmantale: ‹Chkakʼ ti sutik tal li snitilulal Jakob ti chukbilik batele+ xchiʼuk ta jkʼuxubin sjunul li jteklum Israele;+ xchiʼuk ta sjunul koʼonton ta jpakbe skʼoplal li jchʼul bie.+
26 Kʼalal mi laj xa ox yichʼik akʼel ta kʼexlal ta skoj ti muʼyuk tukʼ laj yakʼ sbaik ta jtojolale,+ jun yoʼonton chnaki li ta yosilalike, muʼyuk kʼusi tsibtasatik.+
27 Kʼalal mi laj kikʼik lokʼel tal li ta jteklumetike xchiʼuk mi la jtsobik sutel tal li ta yosilal yajkontraike,+ ta jchʼultajes jba ek ta stojolalik ta yeloval sat li mukʼtik lumetike›.+
28 »‹Jech tsnaʼik ti voʼon Jeovaun, ti voʼon Sdiosikun kʼalal mi laj kakʼ ti xichʼik chukel batel ta mukʼtik lumetike xchiʼuk mi laj kikʼik sutel tal ta yosilalike, mi junuk ta xkikta komel te.+
29 Muʼyuk xa ta jnakʼ* jsat ta stojolalik,+ yuʼun chkakʼ tal jchʼul espiritu ta stojolal li jteklum Israele›,+ xi li Ajvalil Jeova ti jaʼ Mukʼul Jpasmantale».
Tsʼibetik ta yok vun
^ O «asurtokʼobe».
^ O «makobbailetike».
^ O jaʼ van skʼoplal «teʼ» ti tsʼubajtik sniʼ ti tstunesik sventa paskʼope.
^ Kʼox makobbail ti jaʼ mas tstunesik li j-akʼflechaetike.
^ O «stenlejaltik Sviniktak Gog».
^ Jaʼ skʼan xal ‹epal krixchanoetik›.
^ Literal «jkʼob».
^ O «jmuk».
^ O «jmuk».
^ O «jmuk».
