Esekiel 4:1-17
4 »Li voʼote, xnichʼon krixchano, tsako junuk ladriyo xchiʼuk akʼo ta aveloval. Te xapasbe slokʼol jun jteklum, jaʼ li Jerusalene.
2 Akʼo ta ilel kʼuxi ta xichʼ setuel li jteklume,+ pasbo jun smuroal sventa xichʼ joyobtael,+ paso junuk tekʼobal sventa xichʼ tsakel ta kʼop,+ paso karpanaetik sventa paskʼop ta spat xokon xchiʼuk joyobtao ta abtejebaletik sventa xichʼ lajesel.+
3 Tsako junuk pechpech takʼin xchiʼuk tselano ta oʼlol sventa xchʼakot xchiʼuk li jteklume, ti xkʼot kʼuchaʼal jun muro ti pasbil ta takʼine. Vaʼun, tukʼ xakʼel batel li jteklume, akʼo ta ilel ti kʼu yelan chichʼ joyobtael li jteklume. Taje jaʼ jun senyail ta sventa li jteklum Israele.+
4 »Skʼan xatsʼeʼan aba ta atsʼetkʼob* xchiʼuk te xalaman ta aba* li smul jteklum Israele.+ Te lamal ta aba smulik ti kʼu sjalil jech tsʼeʼelote.
5 Ta jkʼan ti akʼo jech xapas 390 kʼakʼale, jaʼ ti jayib jabil tspas smulike+ xchiʼuk chakuchbe smul li jteklum Israele.
6 Skʼan stsʼaki avuʼun.
»Vaʼun, skʼan xatsʼeʼan aba yan velta, jaʼ noʼoxe ta abatsʼikʼob xa, 40 kʼakʼal chakuchbe smul li jteklum Judae.+ Li jun kʼakʼale jaʼ jun jabil, jaʼ li kʼusi kakʼoj apase.
7 Xchiʼuk balo skʼob akʼuʼ apokʼ kʼalal tukʼ chakʼel batel ti kʼu yelan joyobtabil li Jerusalene+ xchiʼuk skʼan xaval li kʼusi chopol chkʼot ta stojolale.
8 »¡Kʼelavil! Ta jchukot ta chʼojon sventa mu xajoyij ta jujujot jaʼ to mi tsʼaki ti jayib kʼakʼal chasetu li jteklume.
9 »Skʼan xatsob trigo, sevada, javax, lenteja, mijo* xchiʼuk jtos-o ta trigo* xchiʼuk jmoj yavil xavakʼ, vaʼun jaʼ xapas-o apan. Yuʼun jaʼ chalajes ti jayib kʼakʼal te tsʼeʼelot ta jot axokone, 390 kʼakʼal.+
10 Skʼan xapʼis ti kʼu yepal chalajese, jaʼ 20 siklo* jujun kʼakʼal. Oy lek yorail skʼan xalajes.
11 »Skʼan pʼisbil ti kʼu yepal chavuchʼ voʼe, oʼlol litro noʼox.* Oy lek yorail skʼan xavuchʼ.
12 »Jech veʼan kʼuchaʼal chaveʼ jun set-set pan ti pasbil ta sevadae; te skʼelojik kʼalal chataʼajese, jaʼ chatunes kʼuchaʼal siʼ li yikʼobal* krixchanoetik ti takijeme».
13 Xi to laj yal li Jeovae: «Li j-israeletike jaʼ jech ibal sba* ta sveʼ spanik ti bu tanpuk chbatik kuʼun li ta mukʼtik lumetike».+
14 Vaʼun, xi laj kalbee: «¡Kajval Jeova ti Mukʼul Jpasmantalote! Muʼyuk ta jpas maʼ taje, yuʼun ta jbikʼtal onoʼox muʼyuk jsokesoj jba ta slajesel li sbekʼtal chonbolom ti chamem chichʼ tael o ti lilinbil ta tiʼel ta yan chonbolome+ xchiʼuk muʼyuk jtikʼoj ta ke jtosuk bekʼet ti ibal sbae».+
15 Jaʼ yuʼun, xi laj yalbune: «Lek oy, jaʼ chkakʼ atunes li yikʼobal* vakax sventa xataʼajes-o li apane, maʼukuk xa li yikʼobal krixchanoe».
16 Vaʼun, xi laj yalbune: «Xnichʼon krixchano, muʼyuk xa chkakʼ ochuk veʼlil* li ta Jerusalene+ xchiʼuk ta vul oʼonton tslajesik li pan ti pʼisbil chichʼik akʼbele+ xchiʼuk ta xiʼel chuchʼik li voʼ ti pʼisbil chichʼik akʼbele.+
17 Taje jaʼ jech chkʼot ta pasel ti kʼu sjalil chʼabal pan xchiʼuk voʼe, xiʼemik xa tskʼel sbaik ta jujuntal xchiʼuk ta kʼunkʼun chlajik batel ta skoj li smulike.
Tsʼibetik ta yok vun
^ O «asurtokʼob».
^ Jaʼ xkaltik, ta slaman ta stsʼetkʼob li Esekiele.
^ Jaʼ jtos tsʼiʼlel ti chakʼ bikʼitik sbekʼ ti jaʼ tspasik-o pane.
^ Li jpʼel kʼop ta ebreoe jaʼ chalbe skʼoplal jtos trigo ti muʼyuk mas leke xchiʼuk ti te tstsʼunik ta voʼneal Ejiptoe.
^ Literal «jvokʼ ta vakvokʼ jun in». Kʼelo Apendise B14.
^ O «stsoʼ».
^ O «stsoʼ».
^ Literal «ta jkʼasbe skotol li steʼel pane». Jaʼ van skʼoplal li teʼetik ti tstunesik sventa tskʼej spanike.
