Esekiel 41:1-26
-
Ti bu chʼul ta temploe (1-4)
-
Li spakʼbal temploe xchiʼuk li kuartoetik ta spat xokone (5-11)
-
Mukʼta na ta smaleb kʼakʼal (12)
-
La spʼis li temploe xchiʼuk li mukʼta nae (13-15 sbavokʼal)
-
Li yut ti bu chʼule (15 xchaʼvokʼal kʼalal ta 26)
41 Vaʼun, laj yikʼun ochel ti bu chʼule,* laje la spʼis li oyetik ta xokontake; vakib xukʼubil* sjamlej ta jot xchiʼuk vakib xukʼubil sjamlej li ta jot xtoke.
2 Li ochebale lajuneb xukʼubil sjamlej, li spakʼbaltak* xokon ochebale voʼob xukʼubil smukʼul li ta jote xchiʼuk voʼob xukʼubil smukʼul li ta jot xtoke. La spʼis kʼu snatil ti bu chʼule, jaʼ 40 xukʼubil snatil xchiʼuk 20 xukʼubil sjamlej.
3 Laje, och batel* xchiʼuk la spʼis li jun oy ti te oy ta xokon ochebale, chib xukʼubil syijil; li ochebale vakib xukʼubil sjamlej. Li spakʼbal* ta jujujot xokon ochebale jaʼ vukub xukʼubil sjamlej.
4 Laje, la spʼis li kuarto ti te napʼal ti bu chʼule, 20 xukʼubil snatil xchiʼuk 20 xukʼubil sjamlej.+ Vaʼun, xi laj yalbune: «Liʼe jaʼ li Batsʼi Lekil Chʼul Kuartoe».+
5 Laje, la spʼisbe li spakʼbal* temploe, jaʼ vakib xukʼubil spimil. Li kuartoetik ti te oy ta spat xokon temploe jaʼ chanib xukʼubil sjamlej.+
6 Li kuartoetik ta spat xokone oxkoj pasbil, oy jpʼej kuarto ta sba li jujun kuartoe, oy 30 kuartoetik ta jujukoj. Oy kʼusitik kechajtik pasbil ta sjoylejal spakʼbal* li templo ti jaʼ chtun sventa te xichʼ kajanel li stsʼamteʼaltak kuartoetik ta spat xokone, jaʼ yuʼun muʼyuk jelavem ta spakʼbal templo li tsʼamteʼetike.+
7 Li ta jujujot xokon temploe oy jun eskalera ti stsʼototet chmuye xchiʼuk ti chmukʼib batel kʼalal chijmuy batel li ta kuartoetik ta akʼole.+ Kʼalal chijmuy batel ta xchibal pisoe, li kuartoetike mas mukʼtik kʼuchaʼal li ta baʼyel pisoe. Li kuartoetik ta yoxibal piso xtoke mas to mukʼtik kʼuchaʼal li ta xchibal pisoe.
8 Laj kil ti pasbil lek toyol skajleb li templo ta sjoylejale. Ti kʼu staylej li snaklebtak kuartoetik ta xokontak temploe jaʼ jtel aj ti vakib xukʼubil snatile.
9 Li spakʼbal* spat kuartoetik ti te oy ta spat xokon temploe jaʼ voʼob xukʼubil spimil. Li ta spat xokon li kuartoetike oy to kʼuk sjamlej komem* ti jaʼ to onoʼox snitobal* li temploe.
10 Li ta jujujot xokon templo xchiʼuk li ta veʼebaletike*+ jaʼ 20 xukʼubil snamal xil sbaik.
11 Li kuartoetik te oy ta xokontak temploe oy chib yochebal, oy jun ta norte xchiʼuk oy jun ta sur, li chib ochebale te oy ti bu xokol komem kʼuk sjamleje. Ti bu xokol komeme jaʼ voʼob xukʼubil sjamlej ta sjoylejal.
12 Oy jpʼej mukʼta na ti te xkom ta yeloval ti bu xokol komem kʼuk sjamlej ta smaleb kʼakʼale, li mukʼta nae jaʼ 70 xukʼubil sjamlej xchiʼuk 90 xukʼubil snatil; li spakʼbal* ta spat xokone jaʼ voʼob xukʼubil spimil.
13 La spʼis li temploe, jaʼ sien xukʼubil snatil. Ti bu xokol komeme, li mukʼta nae* xchiʼuk li spakʼbaltake* jaʼ sien xukʼubil snatil xtok.
14 Li yeloval templo ti skʼeloj batel slokʼeb kʼakʼale, ti te tsakal skʼoplal ti bu xokol komem kʼuk sjamleje, jaʼ sien xukʼubil sjamlej.
15 La spʼis li mukʼta na ti te oy ta yeloval ti bu xokol komem kʼuk sjamlej ta spat temploe, te tsakal skʼoplal li skoriyolal* ta xokontake, jaʼ sien xukʼubil snatil.
Jech xtok, la spʼis ti bu chʼule, li Batsʼi Lekil Chʼul Kuartoe+ xchiʼuk li skoriyolal* amakʼe,*
16 la spʼis xtok li yolon ochebale, li ventanaetik ti jaʼ bikʼit xvinaj li ta spate ti jaʼ mas mukʼ xvinaj li ta yute+ xchiʼuk li koriyoletik* tee. Li ta stsʼel yolon ochebale pakʼbil lek teʼetik+ ti chlik ta pisoe xchiʼuk ti chkʼot kʼalal to ta ventanaetike, jech xtok, pixil lek ta teʼetik li ventanaetike.
17 Laj yichʼ pʼisel kʼu snatil xchiʼuk kʼu sjamlej li yakʼol ochebale, li yut xchiʼuk spat temploe xchiʼuk li sjoylejal spakʼbale.*
18 Te lokʼtabil keruvinetik+ xchiʼuk te slokʼol teʼel xanetik;+ oy chaʼvoʼ keruvin ta xokon jujun teʼel xan xchiʼuk oy chaʼjot sat li jujun keruvine.
19 Li sat krixchanoe skʼeloj batel li teʼel xan ta jote, yan li sat leone* skʼeloj batel li teʼel xan ti oy ta jot xokone.+ Jech lokʼtabil ta sjunul li temploe.
20 Li ta spakʼbal* ti bu chʼule noj ta slokʼol keruvinetik xchiʼuk ta slokʼol teʼel xanetik, chlik ta piso xchiʼuk chkʼot kʼalal to yakʼol li ochebale.
21 Li yoyaltak stiʼ* ti bu chʼule jaʼ kuadrado.+ Li ta yeloval ti bu chʼule* oy kʼusi laj kil ti xkoʼolajtik ta
22 skajleb matanal ti pasbil ta teʼe, ti oxib xukʼubil stayleje xchiʼuk ti chib xukʼubil snatile. Oy spostealtak ta jujujot xchikin, jech xtok, li skajanobile xchiʼuk li xokontake pasbil ta teʼ.+ Vaʼun, li vinike xi laj yalbune: «Liʼe jaʼ li mexa ti te oy ta yeloval li Jeovae».+
23 Oy chaʼpech stiʼ ti bu chʼule xchiʼuk oy chaʼpech stiʼ li Batsʼi Lekil Chʼul Kuartoe.+
24 Li jujun stiʼe oy chaʼchaʼpech ta jujujot ti chpux sbae.
25 Te lokʼtabil keruvinetik xchiʼuk te slokʼol teʼel xanetik li ta stiʼ ti bu chʼule, jaʼ jech kʼuchaʼal lokʼtabil ta pakʼbal nae.*+ Jech xtok, oy xlechlechul sjol ti pasbil ta teʼ ti te ta yeloval koriyole,* taje te oy ta spat.
26 Jech xtok, oy sventanailtak ti jaʼ bikʼit xvinaj li ta spate ti jaʼ mas mukʼ xvinaj li ta yute+ xchiʼuk oy slokʼol steʼeltak xan ta jujujot xokon li koriyole,* te lokʼtabil xtok li ta xokon kuartoetik ta spat xokon temploe xchiʼuk li ta xlechlechul sjole.
Tsʼibetik ta yok vun
^ Literal «li ta temploe». Kʼalal ti bu chʼul xi li ta kapitulo 41 xchiʼuk 42 jaʼ chalbe skʼoplal ti bu chʼule o jaʼ sjunul li temploe (jaʼ sjunul ti bu Chʼule xchiʼuk li Batsʼi Lekil Chʼul Kuartoe).
^ Jaʼ skʼoplal li natil xukʼubile. Kʼelo Apendise B14.
^ O «spakʼtak; skʼaltak; xchʼutak».
^ Jaʼ xkaltik, li ta Batsʼi Lekil Chʼul Kuartoe.
^ O «spakʼ; skʼal; xchʼut».
^ O «spakʼ; skʼal; xchʼut».
^ O «spakʼ; skʼal; xchʼut».
^ O «spakʼ; skʼal; xchʼut».
^ Yaʼeluke, jaʼ ti oy to kʼuk sjamlej xokol komem ta sjoylejal li temploe.
^ O «stsʼak».
^ O «kuartoetike».
^ O «spakʼ; skʼal; xchʼut».
^ Jaʼ xkaltik, li mukʼta na ti te oy spat ti bu chʼule.
^ O «spakʼtake; skʼaltake; xchʼutake».
^ O «skorredoral».
^ O «skorredoral; sportikoal».
^ O «skorredoraltak».
^ O «spakʼe; skʼale; xchʼute».
^ O «chʼiom leon ti xtinlajet sjole».
^ O «spakʼ; skʼal; xchʼut».
^ Yaʼeluke, jaʼ skʼoplal li Batsʼi Lekil Chʼul Kuartoe.
^ Literal «yoyal stiʼ». Yaʼeluke, jaʼ skʼoplal li yochebal ti bu chʼule.
^ O «spakʼ nae; skʼal nae; xchʼut nae».
^ O «korredore; portikoe».
^ O «korredore; portikoe».
