Esekiel 42:1-20
42 Vaʼun, laj yikʼun batel li ta mukʼta amakʼe,* te ta norte.+ Laj yikʼun batel ti bu cholol veʼebaletik ta xokon ti bu xokol komem kʼuk sjamlej+ ta nortee, ta xokon li mukʼta nae.+
2 Li veʼebaletike sien xukʼubil* snatil xchiʼuk 50 xukʼubil sjamlej, te xkom li ta ochebal ta nortee.
3 Li jot xokone jaʼ skʼeloj li bikʼit amakʼ* ti 20 xukʼubil sjamleje,+ li jot xokone jaʼ skʼeloj batel li mukʼta amakʼe. Li skoriyolaltake* skʼelojbe sba stiʼtak xchiʼuk oxib piso staylej pasbil.
4 Li ta yeloval li veʼebaletike* oy jun bikʼit be+ ti lajuneb xukʼubil sjamleje xchiʼuk ti sien xukʼubil snatile,* li ochebaletik yuʼune skʼeloj batel norte.
5 Li veʼebaletik ta yoxkojale mas bikʼitik kʼuchaʼal li ta baʼyel piso xchiʼuk ta xchibal pisoe, yuʼun jaʼ bikʼtajem-o ta skoj li skoriyolaltake.*
6 Yuʼun oxib piso staylej, pe muʼyuk yoyaltak kʼuchaʼal li yoyaltak amakʼe.* Jech oxal, mas xa bikʼit komem li yoxibal pisoe, mas mukʼtik li xchibal pisoe xchiʼuk li baʼyel pisoe.
7 Oy jun muro ta spat ti pasbil ta ton ti 50 xukʼubil snatile, te oy ta xokon li veʼebaletik ti skʼeloj batel mukʼta amakʼ* ti te oy ta yeloval li yan veʼebaletike.
8 Yuʼun li veʼebaletik ti te oy ta xokon mukʼta amakʼe* 50 xukʼubil snatil, yan li veʼebaletik ti te nopol oy ti bu chʼule sien xukʼubil snatil.
9 Li veʼebaletike oy jun yochebal ti te chlik tal ta mukʼta amakʼe,* te xkom ta slokʼeb kʼakʼal.
10 Li ta sure oy veʼebaletik xtok ta yut li muro pasbil ta ton ti skʼeloj batel slokʼeb kʼakʼale xchiʼuk ti nopol xil ti bu xokol komem kʼuk sjamleje, ta xokon li mukʼta nae.+
11 Oy jun bikʼit be ti xkoʼolaj kʼuchaʼal li ta veʼebaletik+ ta stukʼil nortee. Koʼol snatil xchiʼuk sjamlej, koʼol bu xkom yochebaltak xchiʼuk koʼol ti kʼu yelan meltsanbile. Li ochebaletik yuʼune
12 xkoʼolaj kʼuchaʼal li ochebaletik yuʼun veʼebaletik ta sure. Oy jun ochebal ti bu chlik batel li bikʼit bee, te ta yeloval li muro ti pasbil ta ton ti skʼeloj batel slokʼeb kʼakʼale,+ ti xuʼ xij-och batel tee.
13 Xi laj yalbune: «Li veʼebaletik ta norte xchiʼuk li veʼebaletik ta sur ti nopol xil ti bu xokol komem kʼuk sjamleje+ jaʼ chʼul veʼebaletik, li paleetik ti chnopajik ta stojolal Jeovae jaʼ xuʼ slajesik te li matanaletik ti toj echʼ xa noʼox chʼule.+ Jaʼ te chakʼik li matanaletik ti toj echʼ xa noʼox chʼule, li matanal sat tsʼunobiletike, li matanal sventa mulile xchiʼuk li matanal sventa skʼanel pertone, yuʼun chʼul li veʼebaletike.+
14 Kʼalal mi ochik batel te li paleetike, mi te oyik ti bu chʼule, baʼyel skʼan slokʼ skʼuʼ spokʼik sventa yabtelik mi chlokʼik batel+ li ta mukʼta amakʼe,* yuʼun chʼul li skʼuʼ spokʼike. Tsjel skʼuʼ spokʼik mi lokʼik batel ti bu stakʼ x-och skotol krixchanoetike».
15 Kʼalal la spʼis sjunul li yosilal temploe, laj yikʼun lokʼel, te lilokʼkutik batel li ta ochebal ti skʼeloj batel slokʼeb kʼakʼale,+ laje la spʼis sjunul li spat xokone.
16 La spʼis ta jtel aj sventa spʼisobil kʼusitik* ti bu skʼeloj batel slokʼeb kʼakʼale. Voʼob sien aj sjamlej ti chlik ta jot stiʼil kʼalal to ta jot stiʼile.
17 La spʼis li jot xokon ta nortee, voʼob sien aj sjamlej xtok.
18 La spʼis li jot xokon ta sure, voʼob sien aj sjamlej xtok.
19 Joyij batel ta smaleb kʼakʼal. La spʼis ta jtel aj, voʼob sien aj sjamlej.
20 La spʼis ta xchanjotal. Oy smuroal ta sjoylejal+ ti voʼob sien aj snatile xchiʼuk ti voʼob sien aj sjamleje,+ jaʼ sventa xvinaj bu kʼalal ti bu chʼule xchiʼuk ti bu kʼalal muʼyuk chʼule.+
Tsʼibetik ta yok vun
^ Jaʼ skʼoplal li natil xukʼubile. Kʼelo Apendise B14.
^ O «tiʼ templo».
^ O «skorredoraltake».
^ O «kuartoetike».
^ Li Septuaginta ta griego kʼope chal ti sien xukʼubil snatile. Li ta ebreo kʼope chal ti jaʼ jun be ti jun xukʼubile. Kʼelo Apendise B14.
^ O «skorredoraltake».
^ O «tiʼ na».
^ O «tiʼ nae».
^ Kʼelo Apendise B14.
