Esekiel 43:1-27
43 Vaʼun, laj yikʼun batel li ta ochebal ti skʼeloj batel slokʼeb kʼakʼale.+
2 Te laj kilbe yutsilal li Dios yuʼun Israel ti te chlik talel ta slokʼeb kʼakʼale;+ li yechʼomal yee xkoʼolaj kʼuchaʼal voʼ ti tsots xvoʼoʼete;+ sakjaman kom yuʼun balumil ta skoj li yutsilale.+
3 Li kʼusi laj kile xkoʼolaj kʼuchaʼal li kʼusi li-akʼbat kil kʼalal ay jlajes* li jteklume; jech xtok, xkoʼolaj kʼuchaʼal li kʼusi laj kil ta xokon ukʼum Kebare,+ vaʼun la jpatan jba ta balumil.
4 Laje, och batel ta templo* li yutsilal Jeovae, te och batel li ta ochebal ti skʼeloj batel slokʼeb kʼakʼale.+
5 Vaʼun, li espiritue* la stoyun muyel xchiʼuk laj yikʼun ochel li ta mukʼta amakʼe,* laje laj kil ti noj ta yutsilal Jeova li temploe.+
6 Laj une, laj kaʼi ti oy buchʼu la skʼoponun lokʼel talel ta temploe, vaʼun li vinike tal vaʼluk ta jxokon.+
7 Xi laj yalbune:
«Xnichʼon krixchano, liʼe jaʼ li yavil jchotleb sventa ajvalile+ xchiʼuk jaʼ kʼotem ta skaj kakan,+ jaʼ ti bu chinaki sbatel osil ta stojolal li jteklum Israele.+ Li jteklum Israele xchiʼuk li ajvaliletik yuʼunike muʼyuk xa ta xikʼubtasik jchʼul bi+ ta skoj ti chchon sbaike* xchiʼuk ta skoj li sbekʼtal ajvaliletik yuʼunik ti chamemike.
8 Te nopol la spasbeik yochebal snaik li ta yochebal jnae xchiʼuk te la svaʼanbeik sposteal stiʼ snaik ta xokon li sposteal stiʼ jnae, jkʼol noʼox pakʼbal na* xchʼakojunkutik,+ jech laj yikʼubtasbeikun jchʼul bi ta skoj li kʼusitik toj chopol la spasike, jaʼ yuʼun ta skʼakʼal koʼonton la jtupʼbe skʼoplalik.+
9 Akʼo yiktaik ti chchon sbaike* xchiʼuk akʼo snamajesik ta jtojolal li sbekʼtal ajvaliletik yuʼunike, vaʼun te ta jchiʼinik ta naklej ta sbatel osil.+
10 »Li voʼote, xnichʼon krixchano, albo yaʼi jteklum Israel ti kʼu yelan xvinaj li templo+ sventa xkʼexavik ta skoj li smulike,+ vaʼun akʼo skʼelbeik lek li splanoale.
11 Mi kʼexavik ta skoj li kʼusitik spasojike, akʼbo yilik ti kʼu yelan splanoal li temploe, ti kʼu yelan meltsanbile, li yochebaltak xchiʼuk li lokʼebaletik yuʼune.+ Akʼbo yilik li splanoaltake xchiʼuk li mantaletik sventa temploe, teuk skʼelojik xalokʼtabe splanoal sventa spasik skotol li kʼusi chale xchiʼuk teuk skʼelojik xatsʼiba li mantaletik sventa xchʼunike.+
12 Liʼe jaʼ li mantal ta sventa temploe: skotol li osil ta sjoylejal ba vitse toj chʼul.+ Taje jaʼ li mantal ta sventa li temploe.
13 »Liʼe jaʼ spʼisol li skajleb matanal ti pʼisbil ta xukʼubile+ (li ta jujun xukʼubile chanib kʼob to jelavem snatil).* Li skajlebe jun xukʼubil staylej xchiʼuk jun xukʼubil sjamlej li xkechkechule. Oy yuni lechlechul ta sjoylejal stiʼiltak ti jchʼix* sjamleje. Taje jaʼ te kajal li skajleb matanale.
14 Li skajleb ti te oy ta lumtike xchiʼuk li xchaʼkojale jaʼ chib xukʼubil staylej xchiʼuk jun xukʼubil sjamlej li xkechkechule. Li ta xchaʼkojal kʼalal to ta yoxkojal ti mas mukʼe jaʼ chanib xukʼubil staylej xchiʼuk jun xukʼubil sjamlej li xkechkechule.
15 Li ta xchankojal ti bu chichʼ chikʼel matanale jaʼ chanib xukʼubil staylej xchiʼuk bichajtik muyel chanib xulub+ ti bu chichʼ chikʼel matanale.
16 Ti bu chichʼ chikʼel li matanale jaʼ kuadrado, 12 xukʼubil snatil xchiʼuk 12 xukʼubil sjamlej.+
17 Ta jujujot xokon li yoxkojale jaʼ 14 xukʼubil snatil xchiʼuk 14 xukʼubil sjamlej; li skajlebe jaʼ jun xukʼubil ta jujujot xokon xchiʼuk li yuni lechlechul ta sjoylejal stiʼiltake j-oʼlol xukʼubil sjamlej.
»Li s-eskaleraile skʼeloj batel slokʼeb kʼakʼal».
18 Vaʼun, xi laj yalbune: «Xnichʼon krixchano, xi chal li Ajvalil Jeova ti jaʼ Mukʼul Jpasmantale: ‹Taje jaʼ skʼan xichʼ tsakel ta venta kʼalal mi laj yichʼ pasel li skajleb matanale, jaʼ te chichʼ akʼel li skotlej chikʼbil matanaletike xchiʼuk chichʼ vijbel chʼichʼ›.+
19 »Xi chal li Ajvalil Jeova ti jaʼ Mukʼul Jpasmantale: ‹Chavakʼ ta matanal sventa mulil jkot chʼiom tot vakax,+ jaʼ chavakʼbe li paleetike, jaʼ li jlevietik ti jaʼ snitilulal Sadoke,+ ti jaʼ chnopajik tal sventa xtunik ta jtojolale.
20 Skʼan xatsakbe jutebuk xchʼichʼel li matanale xchiʼuk te xavakʼ ta xchanibal xulub li skajleb matanale, ta xchanjotal xchikin li ta yoxkojale xchiʼuk li ta yuni lechlechul ti oy ta sjoylebal sventa xichʼ lekubtasel xchiʼuk chʼultajesel li skajleb matanale.+
21 Laje, tsako li jkot chʼiom tot vakax ti jaʼ li matanal sventa mulile, te xbat achikʼ ti bu akʼbil yavil ta temploe, ta spat ti bu chʼule.+
22 Li ta xchibal kʼakʼale, chavakʼ ta matanal sventa mulil jkot tot tentsun ti muʼyuk ipe;* vaʼun li paleetike ta slekubtasik li skajleb matanale, jech kʼuchaʼal la slekubtasik ta chʼiom tot vakaxe›.
23 »‹Mi laj xa ox asakubtas li skajleb matanale, chavakʼ ta matanal jkot chʼiom tot vakax ti muʼyuk ipe* xchiʼuk jkot tot chij ti muʼyuk ipe.
24 Chavakʼbe ta smoton li Jeovae, vaʼun li paleetike ta xakʼbeik atsʼam ta sba+ xchiʼuk chakʼik kʼuchaʼal skotlej chikʼbil matanal ta sventa li Jeovae.
25 Vukub kʼakʼal chavakʼ ta matanal sventa mulil jkot tot tentsun,+ jkot chʼiom tot vakax xchiʼuk jkot tot chij; skʼan muʼyuk xchopolil jutebuk* li chonbolometik chavakʼe xchiʼuk jujun kʼakʼal skʼan jech xapas.
26 Vukub kʼakʼal ta xchʼultajesik li skajleb matanale, skʼan slekubtasik xchiʼuk skʼan chapaluk xiktaik sventa xichʼ tunesel.
27 Kʼalal mi tsʼaki li vukub kʼakʼale, li ta xvaxakibal kʼakʼale,+ li paleetike chlik yakʼik ta skajleb matanal li skotlej chikʼbil matanal avuʼunike* xchiʼuk li milbil matanal sventa jun oʼontonale; vaʼun chimuyubaj avuʼunik›,+ xi li Ajvalil Jeova ti jaʼ Mukʼul Jpasmantale».
Tsʼibetik ta yok vun
^ O jaʼ van skʼoplal «ay slajes».
^ Literal «ta na».
^ Li ta ebreo kʼope xuʼ van jaʼ skʼoplal li s-espiritu Diose o junuk anjel.
^ Jaʼ xkaltik, muʼyuk tukʼ chakʼ sbaik ta stojolal Dios.
^ O «pakʼ na; skʼal na; xchʼut na».
^ Jaʼ xkaltik, muʼyuk tukʼ chakʼ sbaik ta stojolal Dios.
^ Jaʼ skʼoplal li natil xukʼubile. Kʼelo Apendise B14.
^ Jaʼ xkaltik, ti kʼu sjamlej xakʼ li jkʼobtike, te van 22.2 sentimetro sjamlej. Kʼelo Apendise B14.
^ O «muʼyuk xchopolile».
^ O «muʼyuk xchopolile».
^ O «skʼan lekik ta jyalel».
^ Jaʼ xkaltik, li jteklume.
