Esekiel 44:1-31
44 Laj yikʼun sutel li ta yochebal smukʼta amakʼil* templo ti skʼeloj batel slokʼeb kʼakʼale,+ pe bajal li stiʼe.+
2 Vaʼun, xi laj yalbun li Jeovae: «Li ochebal liʼe makal-o chkom. Muʼyuk chichʼ jamel-o xchiʼuk mi junuk krixchano xuʼ x-och batel te; yuʼun li Jeova ti jaʼ Dios yuʼun Israele och batel te,+ jaʼ yuʼun skʼan makal-o xkom.
3 Pe li bankilal ta jteklume te chchoti sventa te sveʼ pan ta yeloval Jeova,+ yuʼun jaʼ bankilal ta jteklum. Ch-och batel li ta skoriyolal* ochebale xchiʼuk te onoʼox chlokʼ xtok».+
4 Laje, laj yikʼun batel ta yeloval templo, te laj yikʼun ochel li ta ochebal ti skʼeloj batel nortee. Jaʼ to laj kile noj xa ta yutsilal Jeova li stemplo Jeovae.+ Vaʼun, la jpatan jba ta balumil.+
5 Vaʼun, xi laj yalbun li Jeovae: «Xnichʼon krixchano, tsʼetano lek achikin,* kʼelo lek xchiʼuk aʼio lek skotol li mantaletik chkalbote xchiʼuk li kʼusitik skʼan pasel ta stemplo Jeovae. Kʼelo lek li yochebal temploe xchiʼuk skotol li slokʼebal ti bu chʼule.+
6 Xi xavalbe li jteklum Israel ti jtoybae: ‹Xi chal li Ajvalil Jeova ti jaʼ Mukʼul Jpasmantale: «Jteklum Israel, ¡taʼluk-o xa li kʼusitik toj chopol chapasike!
7 Kʼalal chavikʼik tal ta jtemplo li jyanlumetik ti muʼyuk yichʼojik sirkunsision* ta yoʼontonik xchiʼuk ta sbekʼtalike, ta xikʼubtasik. Chavakʼbeikun matanal ti jaʼ li xepuʼ xchiʼuk chʼichʼe, pe muʼyuk chkʼot ta pasel avuʼunik li jtrato ta skoj ti jaʼ chapasik skotol li kʼusitik toj chopole.
8 Muʼyuk apasojik li kʼusitik chʼul skʼan pasel ta jtemploe.+ Jaʼ chavakʼbeik spas yantik li kʼusitik skʼan pasel ti bu chʼul kuʼune»›.
9 »‹Xi chal li Ajvalil Jeova ti jaʼ Mukʼul Jpasmantale: «Ti bu chʼul kuʼune mu stakʼ x-och mi junuk jyanlum ti muʼyuk yichʼoj sirkunsision ta yoʼonton xchiʼuk ta sbekʼtal ti te nakal ta Israele»›.
10 »‹Li jlevietike tstabeik stojobil spaltailik* ta skoj ti namajik batel ta jtojolal+ kʼalal laj yiktaun li Israel sventa stsʼakli batel li ibal sba santoetik* yuʼune.
11 Pe chkʼotik ta jtuneletik ti bu chʼul kuʼun sventa xchabibeik li yochebaltak temploe+ xchiʼuk sventa te xtunik li ta temploe. Jaʼ tsmilik li chonbolometik sventa skotlej chikʼbil matanale xchiʼuk li milbil matanal ta sventa jteklume, jech xtok, jaʼ te chtunik ta stojolal li jteklume.
12 Ta skoj ti tunik ta stojolal jteklum ta yeloval li ibal sba santoetik yuʼunike xchiʼuk ti la smakbeik* yakan jteklum Israel sventa saʼ smulike,+ jtoyoj muyel jkʼob xchiʼuk oy kʼusi kaloj ta jamal ta stojolalik, tstabeik stojobil li spaltailike›,* xi li Ajvalil Jeova ti jaʼ Mukʼul Jpasmantale.
13 ‹Muʼyuk chnopajik ta jtojolal sventa xtunik ta kajpaletak mi jaʼuk xuʼ xnopajik batel ti bu oy li kʼusitik chʼul kuʼune o li kʼusitik toj chʼul kuʼune xchiʼuk chkʼexavik ta skoj li kʼusitik toj chopol la spasike.
14 Pe chkakʼbe sbainik li kʼusitik skʼan pasel ta templo sventa spasik li kʼusitik skʼan pasel tee xchiʼuk sventa spasik skotol li abtelaletik tee›.+
15 »Xi chal li Ajvalil Jeova ti jaʼ Mukʼul Jpasmantale: ‹Li paleetik ti jaʼ jlevietik xchiʼuk ti jaʼ xnichʼnab Sadoke,+ ti jaʼ toʼox sbainojik spasel li kʼusitik skʼan pasel ti bu chʼul kuʼun kʼalal laj yiktaikun li j-israeletike,+ ta xnopajik tal sventa xtunik ta jtojolal xchiʼuk tsvaʼan sbaik ta keloval sventa xakʼbeikun li xepuʼ+ xchiʼuk li chʼichʼe.+
16 Jaʼ ta x-ochik ti bu chʼul kuʼune xchiʼuk jaʼ chnopajik tal ta jmexa sventa xtunik ta jtojolal+ xchiʼuk jaʼ tsbainik spasel li kʼusitik skʼan pasel ta jventae.+
17 »›Kʼalal mi ochik batel li ta yochebal bikʼit amakʼe,* skʼan pasbiluk ta lino li skʼuʼ spokʼ tslapik ochele.+ Mu stakʼ slapik kʼuʼil pokʼil ti pasbil ta tsots* kʼalal te chtunik li ta yochebal bikʼit amakʼe o mi te chtunik ta yute.
18 Skʼan xakʼ stsʼotobil sjolik ti pasbil ta linoe xchiʼuk skʼan slap skomkom vexik ti pasbil ta linoe.+ Mu stakʼ slapik jtosuk kʼuʼil pokʼil ti chchikʼinajik-oe.
19 Kʼalal chlokʼik batel ta mukʼta amakʼe,* jaʼ li mukʼta amakʼ ti bu oy li jteklume, baʼyel skʼan slokʼ skʼuʼ spokʼik sventa yabtelik+ xchiʼuk skʼan te xiktaik li ta chʼul veʼebaletike.*+ Yan-o skʼuʼ spokʼ skʼan slapik lokʼel sventa mu xchʼultajesik ta skoj skʼuʼ spokʼik li jteklume.
20 Mu me xjux li stsotsil sjolike+ mi jaʼuk xakʼik natubuk. Ta yutsiluk noʼox akʼo slokʼik.
21 Kʼalal ch-ochik batel ta bikʼit amakʼ* li paleetike, skʼan me mu xuchʼik vino.+
22 Mu stakʼ xikʼik junuk ants ti chamem smalale o junuk ants ti suteme;+ pe xuʼ xikʼik junuk tojol tseb ti jaʼ j-israele o xuʼ xikʼbeik yajnil junuk anima pale›.+
23 »‹Skʼan xchanubtasik jteklumal sventa snaʼik ti jelel li kʼusi chʼul xchiʼuk li kʼusi muʼyuk chʼule; skʼan xchanubtasik xtok ti jelel li kʼusi sak xchiʼuk li kʼusi muʼyuk sake.+
24 Skʼan xkʼotik kʼuchaʼal jchapanvanejetik kʼalal oy kʼusi skʼan chapanele;+ skʼan jechuk xchapanvanik kʼuchaʼal chal li jmantaltake.+ Skʼan xchʼunik li jmantaltak xchiʼuk li kʼusitik kaloj ta sventa li kʼinetik kuʼune,+ jech xtok, skʼan xchʼultajesik li savado kuʼune.
25 Mu me stakʼ xnopajik ta stojolal junuk anima, yuʼun mi jech tspasike, ta xikʼubtas sbaik. Pe xuʼ xikʼubtas sbaik mi jaʼ ta skoj li stotike, li smeʼike, li skeremike, li stsebike, li sbankil o yitsʼinike, li xvixik o yixlelik ti muʼyuk to nupuneme.+
26 Kʼalal mi laj yichʼ sakubtasel li palee, skʼan smala vukub kʼakʼal.
27 Skʼan xakʼ matanal sventa mulil+ ti kʼusi ora ch-och batel tunuk ti bu chʼule, jaʼ li ta bikʼit amakʼe›,* xi li Ajvalil Jeova ti jaʼ Mukʼul Jpasmantale.
28 »‹Oy kʼusi chkʼot ta xrextoik,* voʼon chikʼot ta xrextoik.+ Skʼan me mu xavakʼbeik sparteik li ta Israele, yuʼun voʼon chikʼot ta sparteik.
29 Jaʼ tslajesik li matanal sat tsʼunobiletike,+ li matanal sventa mulile xchiʼuk li matanal sventa skʼanel pertone;+ jech xtok, jaʼ chichʼik skotol li kʼusi laj yichʼ akʼel ta stojolal Dios ta Israele.+
30 Jaʼ chichʼ paleetik li sba sat kʼusitik atsʼunojik ti lek xa yijik xchiʼuk ti bu mas lekike xchiʼuk skotol li kʼusitik chavakʼike.+ Jech xtok, skʼan xavakʼbeik paleetik li arina ti jaʼ to sba velta chichʼ juchʼel ti vochʼ noʼoxe.+ Mi jech chapasike, chvul bendision ta anaik.+
31 Li paleetike mu stakʼ stiʼik jkotuk mut o jkotuk chonbolom ti chamem xa chichʼ taele o ti yichʼoj lilinel ta tiʼel ta jkotuk chonbolome›.+
Tsʼibetik ta yok vun
^ O «skorredoral; sportikoal».
^ Literal «akʼo ta avoʼonton».
^ O «xchopolilik».
^ Li ta ebreo kʼope xuʼ van te nitil skʼoplal ta jpʼel kʼop ti «tsoʼ» skʼan xale, jaʼo chichʼ alel kʼalal oy kʼusi chichʼ pʼajele. Kʼelo Glosario, ibal sba.
^ O «stʼabesbeik».
^ O «xchopolilike».
^ Taje jaʼ stsotsil chij o stsotsil yan chonbolometik.
^ O «tiʼ temploe».
^ O «tiʼ nae».
^ O «chʼul kuartoetike».
^ O «tiʼ templo».
^ O «tiʼ temploe».
^ O «spukulalik; sparteik».
