Esekiel 45:1-25
45 »‹Kʼalal mi la achʼakik ta rextoil* li osile,+ chʼakik komel jvokʼuk ta sventa Jeova ti chkʼot ta jsep chʼul osile.+ Jaʼ 25 mil xukʼubil* snatil xchiʼuk lajunmil xukʼubil sjamlej.+ Ti kʼu sjamlej taje* chkʼot ta jsep chʼul osil.
2 Ti bu taje chkom jsep osil ti kuadrado ti jaʼ sventa li temploe, jaʼ voʼob sien xukʼubil sjamlej xchiʼuk voʼob sien xukʼubil snatil,+ li ta jujujot xokone chkom kʼuk sjamlej yaxaltik ti 50 xukʼubil sjamleje.+
3 Li jsep chʼul osile skʼan xapʼis 25 mil xukʼubil snatil xchiʼuk lajunmil xukʼubil sjamlej; li ta yut une chkʼot ta yavil li temploe, toj echʼ xa noʼox chʼul.
4 Chkʼot ta jsep chʼul osil ta sventa li paleetik+ ti chtunik ti bu chʼule xchiʼuk ti jaʼ oy ta sbaik ti nopol xtunik ta stojolal Jeovae.+ Chkʼot ta yavil snaik xchiʼuk chkʼot ta xchʼul avil templo.
5 »›Ta sventa li jlevietik ti chtunik ta temploe chichʼik akʼbel jvokʼuk osil ti 25 mil xukʼubil snatil xchiʼuk ti lajunmil xukʼubil sjamleje+ xchiʼuk chichʼik 20 veʼebaletik*+ sventa xkʼot ta sparteik.
6 »›Skʼan xavakʼbeik jsepuk yav li jteklum ti 25 mil xukʼubil snatile (xkoʼolaj snatil kʼuchaʼal li jsep chʼul osile) xchiʼuk ti voʼmil xukʼubil sjamleje.+ Li osil taje jaʼ chuʼunin li jteklum Israele.
7 »›Jech xtok, skʼan xichʼ vokʼbel komel yosil li bankilal ta jteklum ta jujujot xokon li chʼul osil xchiʼuk li yav jteklume. Te stsʼakinoj li chʼul osile xchiʼuk li yav jteklume. Oy jvokʼ ta smaleb kʼakʼal xchiʼuk oy jvokʼ ta slokʼeb kʼakʼal. Ti bu kʼalal stsʼakil li osil ta smaleb kʼakʼal xchiʼuk ta slokʼeb kʼakʼale, jaʼ koʼol chlik batel stsʼakil xchiʼuk li yosil jun nitilulale.+
8 Li osil taje jaʼ chkʼot ta sparte ta Israel li bankilale. Muʼyuk xa chilbajinik jteklumal li bankilaletik jvaʼanoje,+ jech xtok, chakʼbeik yosilik li jujun nitilulal ta jteklum Israele›.+
9 »Xi chal li Ajvalil Jeova ti jaʼ Mukʼul Jpasmantale: ‹Bankilaletik ta Israel, ¡taʼluk-o xa li kʼusi chapasike!›.
»‹Iktaik li saʼkʼope xchiʼuk li ilbajinvaneje, jaʼ pasik li kʼusi tukʼ xchiʼuk li kʼusi leke.+ Mu xa xapojbeik kʼusitik oy yuʼun li jteklumale›,+ xi li Ajvalil Jeova ti jaʼ Mukʼul Jpasmantale.
10 ‹Jaʼ tunesik li kilo ti lek tsʼakale, li jun efa* ti lek tsʼakale xchiʼuk li jun bato* ti lek tsʼakale.+
11 Skʼan junuk noʼox spʼisol xkom li efa xchiʼuk li batoe. Li lajuneb batoe jaʼ jun jomer,* li lajuneb efae jaʼ jun jomer. Jaʼ spʼisol chkom li jomere.
12 Li jun sikloe*+ jaʼ 20 guera.* Li jun manee* jaʼ 60 siklo›.
13 »‹Xi yepal skʼan xavakʼik li matanale: mi oy avuʼunik jun jomer trigoe, chʼakik lokʼel jun efa, pasik ta vakvokʼ li jun efae, vaʼun jvokʼ chavakʼik ta matanal, jech xtok, mi oy avuʼunik jun jomer sevadae, chʼakik lokʼel jun efa, pasik ta vakvokʼ li jun efae, vaʼun jvokʼ chavakʼik ta matanal.
14 Ti kʼu yepal chichʼ akʼel li aseitee jaʼ chichʼ pʼisel-o li batoe. Li lajuneb batoe jaʼ jun koro* xchiʼuk li lajuneb batoe jaʼ jun jomer. Yuʼun li lajuneb batoe xkoʼolaj kʼuchaʼal jun jomer.
15 Li ta chib sien xchij Israele jkot chichʼ akʼel ta matanal. Skotol taje jaʼ chtun sventa xichʼ akʼel li matanal sat tsʼunobile,+ li skotlej chikʼbil matanale+ xchiʼuk li milbil matanal sventa jun oʼontonal+ yoʼ sta perton li jteklume›,+ xi li Ajvalil Jeova ti jaʼ Mukʼul Jpasmantale.
16 »‹Skotol li krixchanoetik ta jteklume jaʼ skʼan xakʼbeik bankilal ta Israel li matanaletik+ taje.
17 Pe li bankilale jaʼ oy ta sba yakʼel skotlej chikʼbil matanal,+ matanal sat tsʼunobil+ xchiʼuk matanal vino li ta yorail kʼinetike,+ li ta jujun achʼ lunae,* li ta savadoetike+ xchiʼuk ta skotol li kʼinetik ti akʼbil yorail ta sventa li jteklum Israele.+ Jaʼ chakʼ li matanal sventa mulile, li matanal sat tsʼunobile, li skotlej chikʼbil matanale xchiʼuk li milbil matanal sventa jun oʼontonal yoʼ sta perton li jteklum Israele›.
18 »Xi chal li Ajvalil Jeova ti jaʼ Mukʼul Jpasmantale: ‹Li ta baʼyel kʼakʼal ta baʼyel ue, skʼan xavakʼ jkot chʼiom tot vakax ti muʼyuk ipe* xchiʼuk skʼan xasakubtas ti bu chʼule.+
19 Li paleetike ta stsakbeik jutebuk xchʼichʼel li matanal sventa mulile, vaʼun chakʼbeik li sposteal stiʼ temploe,+ ta xchanjotal xchikin ti bu oy skajanobil li skajleb matanale xchiʼuk li sposteal stiʼ li yochebal bikʼit amakʼe.*
20 Li ta svukubal kʼakʼal yochel li baʼyel ue, skʼan jech xapas mi oy buchʼu la saʼ smul ti mu yolbajuk jech tspase o ta skoj ti mu snaʼe;+ skʼan xasakubtasik li temploe.+
21 »›Li ta skʼakʼalil 14 yochel li baʼyel ue, skʼan xapas li Kʼin Koltaele.+ Vukub kʼakʼal chichʼ veʼel pan ti muʼyuk slevaduraile.*+
22 Li vaʼ kʼakʼal xtoke, li bankilale chakʼ jkot chʼiom tot vakax sventa xkʼot ta matanal sventa smul stuk xchiʼuk sventa skotol li krixchanoetik ta jteklume.+
23 Li ta vukub kʼakʼal+ kʼine, jujun kʼakʼal skʼan xakʼ vukot chʼiom tot vakax ti muʼyuk ipe* xchiʼuk vukot tot chij ti muʼyuk ip sventa xkʼot ta skotlej chikʼbil matanal ta stojolal Jeovae, jech xtok, chichʼ akʼel jkot tot tentsun jujun kʼakʼal sventa xkʼot ta matanal sventa mulil.
24 Jech xtok, skʼan xakʼ jun efa matanal sat tsʼunobil kʼalal chakʼ jkot chʼiom tot vakaxe, skʼan xakʼ jun efa matanal sat tsʼunobil kʼalal chakʼ jkot tot chije xchiʼuk skʼan xakʼ jutuk mu chanibuk litro* aseite li ta jujun efa chichʼ akʼele.
25 »›Li ta skʼakʼalil 15 yochel li svukubal ue, chlik li kʼin ti vukub kʼakʼal chjalije,+ svukubal kʼakʼal jaʼ onoʼox jech skʼan xakʼ li matanal sventa mulile, li skotlej chikʼbil matanale, li matanal sat tsʼunobile xchiʼuk li aseitee›».
Tsʼibetik ta yok vun
^ O «pukulal; parteil».
^ Jaʼ skʼoplal li natil xukʼubile. Kʼelo Apendise B14.
^ O «Ti bu kʼalal chpaj li stsʼakiltake».
^ O «20 kuartoetik».
^ Li jun efae jaʼ 22 litro. Kʼelo Apendise B14.
^ Li jun batoe jaʼ 22 litro. Kʼelo Apendise B14.
^ Li jun jomere jaʼ 220 litro. Kʼelo Apendise B14.
^ O «jun minae». Kʼelo Apendise B14.
^ Li jun guerae jaʼ 0.57 gramo yalal. Kʼelo Apendise B14.
^ Li jun sikloe jaʼ 11.4 gramo yalal. Kʼelo Apendise B14.
^ Li jun koroe jaʼ 220 litro. Kʼelo Apendise B14.
^ O «achʼ ue».
^ O «muʼyuk xchopolile».
^ O «muʼyuk xchopolile».
^ Literal «jun in». Li jun ine jaʼ 3.67 litro. Kʼelo Apendise B14.
