Esekiel 46:1-24
46 «Xi chal li Ajvalil Jeova ti jaʼ Mukʼul Jpasmantale: ‹Li yochebal bikʼit amakʼ* ti skʼeloj batel slokʼeb kʼakʼale+ skʼan makaluk-o+ li vakib kʼakʼal yorail abtele,+ pe skʼan xichʼ jamel li ta skʼakʼalil savadoe xchiʼuk li ta skʼakʼalil achʼ lunae.*
2 Li bankilal ta jteklume te ch-och batel li ta skoriyolal* yochebal+ mukʼta amakʼe* xchiʼuk te vaʼal ta xkom li ta stsʼel sposteal ochebale. Li paleetike chakʼik li skotlej chikʼbil matanale xchiʼuk li milbil matanal sventa jun oʼontonal ti jaʼ yuʼun li bankilale, li stuk une tskejan sba ta yolon li ochebale, vaʼun chlokʼ batel. Pe li ochebale skʼan jamaluk-o kʼalal to ta mal kʼakʼal.
3 Li krixchanoetik ta jteklum eke tskejan sbaik ta yeloval Jeova te ta stiʼ ochebal li ta jujun savadoe xchiʼuk li ta jujun achʼ lunae.*+
4 »›Li skotlej chikʼbil matanal chakʼbe Jeova li bankilale jaʼ vakot chʼiom tot chij ti muʼyuk ipe* xchiʼuk jkot tot chij ti muʼyuk ipe,+ taje jaʼ ta skʼakʼalil savado chakʼ.
5 Mi laj yakʼ jkot tot chije, chakʼ jun efa* matanal sat tsʼunobil xchiʼuk mi laj yakʼ chʼiom tot chijetike, chakʼ matanal sat tsʼunobil ti kʼu yepal xuʼ yuʼun yakʼele. Jech xtok, skʼan xakʼ jutuk mu chanibuk litro* aseite li ta jujun efae.+
6 Li matanal chichʼ akʼel li ta skʼakʼalil achʼ lunae* jaʼ jkot chʼiom tot vakax ti muʼyuk ipe,* vakot chʼiom tot chij xchiʼuk jkot tot chij ti muʼyuk ipike.+
7 Skʼan xakʼ jun efa matanal sat tsʼunobil kʼalal chakʼ jkot chʼiom tot vakaxe, skʼan xakʼ jun efa matanal sat tsʼunobil kʼalal chakʼ jkot tot chije xchiʼuk mi laj yakʼ chʼiom tot chijetike, chakʼ matanal sat tsʼunobil ti kʼu yepal xuʼ yuʼun yakʼele. Jech xtok, skʼan xakʼ jutuk mu chanibuk litro* aseite li ta jujun efa chichʼ akʼele.
8 »›Kʼalal mi och batel li bankilale, skʼan te x-och li ta skoriyolal* ochebale xchiʼuk skʼan te xlokʼ batel xtok.+
9 Kʼalaluk mi tal yichʼik ta mukʼ Jeova ta yorail kʼin+ li krixchanoetik ta jteklume, li buchʼutik ch-ochik tal li ta ochebal ti te xkom ta nortee+ skʼan te xlokʼik batel li ta ochebal ti te xkom ta sure.+ Yan li buchʼutik ch-ochik tal li ta ochebal ti te xkom ta sure skʼan te xlokʼik batel li ta ochebal ti te xkom ta nortee. Skʼan mu teuk xlokʼik batel ti bu ochik tale, skʼan ta jot-o xa ochebal xlokʼik batel.
10 Kʼalal te oy ta stojolal jteklum li bankilale, skʼan x-och batel mi och batel li jteklume xchiʼuk skʼan xlokʼ tal mi lokʼik talele.
11 Li ta yorail kʼinetike* skʼan xakʼ jun efa matanal sat tsʼunobil kʼalal chakʼ jkot chʼiom tot vakaxe, skʼan xakʼ jun efa matanal sat tsʼunobil kʼalal chakʼ jkot tot chije xchiʼuk mi laj yakʼ chʼiom tot chijetike, chakʼ matanal sat tsʼunobil ti kʼu yepal xuʼ yuʼun yakʼele. Jech xtok, skʼan xakʼ jutuk mu chanibuk litro* aseite li ta jujun efa chichʼ akʼele.+
12 »›Mi tskʼan chakʼ skotlej chikʼbil matanal+ li bankilale o mi chakʼ milbil matanal sventa jun oʼontonal ti jaʼ li matanal ti chlokʼ ta oʼontonal ta sventa Jeovae, ta xichʼ jambel li ochebal ti te xkom ta slokʼeb kʼakʼale. Vaʼun, chakʼ li skotlej chikʼbil matanale xchiʼuk li milbil matanal sventa jun oʼontonal jech kʼuchaʼal tspas ta skʼakʼalil savadoe.+ Kʼalal mi lokʼ batele, skʼan xichʼ makel li ochebale.+
13 »›Skʼan xavakʼbe jujun kʼakʼal skotlej chikʼbil matanal li Jeovae,+ skʼan xavakʼ jkot chʼiom tot chij ti muʼyuk ipe* xchiʼuk ti jun to jabil yichʼoje. Skʼan jech xapas jujun sob.
14 Jech xtok, skʼan xavakʼ jujun sob matanal sat tsʼunobil, jaʼ jvokʼ li ta jun efa ti chʼakbil ta vakvokʼe, chavakʼ xtok mas jutuk ta jun litro* aseite sventa xichʼ vijbel ta sba li lekil arinae. Taje jaʼ li matanal sat tsʼunobil ta sventa Jeova ti jech-o chichʼ akʼele; jaʼ jun mantal ti chjalije.
15 Skʼan xichʼ akʼel ta skotlej chikʼbil matanal ta jujun sob li chʼiom tot chije, li matanal sat tsʼunobile xchiʼuk li aseitee›.
16 »Xi chal li Ajvalil Jeova ti jaʼ Mukʼul Jpasmantale: ‹Mi la skʼelanbe yosil jujun xnichʼnab li bankilal sventa xkʼot ta xrextoike,* li osil taje jaʼ chuʼunin li xnichʼnabe. Jaʼ chuʼuninik ta skoj ti jaʼ xrextoike.
17 Pe mi laj yakʼbe ta smoton junuk yajtunel li xrexto* osile, jaʼ chuʼunin, jaʼ to chakʼ sutel mi kʼot li sjabilal kolebale,+ vaʼun chchaʼichʼ sutel li bankilale. Pe jaʼuk li xnichʼnab bankilale ta xuʼuninik-o li xrextoike.
18 Li bankilale skʼan mu spojbe xrexto* li jteklume xchiʼuk ti snuts lokʼel li ta yosilike. Jaʼ noʼox xuʼ xakʼbe ta xrexto xnichʼnab li sparte osil stuke, jech mu xichʼ nutsel lokʼel ta yosilik li jteklumale›».
19 Laje, laj yikʼun batel li ta yochebal+ chʼul veʼebaletik* sventa paleetik ta nortee, taje te xkom ta xokon li ochebale,+ vaʼun oy kʼusi laj kil ta smaleb kʼakʼal ti te ta xokon li veʼebaletike.
20 Xi laj yalbune: «Liʼe jaʼ ti bu tslakanik matanal sventa skʼanel perton xchiʼuk matanal sventa mulil li paleetike, te tstaʼajesik ta orno li matanal sat tsʼunobil+ sventa mu kʼusi xichʼik lokʼel li ta mukʼta amakʼe* xchiʼuk sventa mu xchʼultajesik li jteklume».+
21 Laje, laj yikʼun lokʼel li ta mukʼta amakʼe* xchiʼuk te li-echʼ batel yuʼun ta xchanjotal xchikin li amakʼe, vaʼun laj kil ti oy jun amakʼ ta jujujot xchikin li mukʼta amakʼe.
22 Li ta xchanjotal xchikin mukʼta amakʼe* oy chanib bikʼit amakʼetik. 40 xukʼubil* snatil xchiʼuk 30 xukʼubil sjamlej; koʼol smukʼul xchanibal.
23 Li ta jujujot xokon li bikʼit amakʼetike* oy yuni kʼox muroal ta yut xchiʼuk li ta yolon kʼox muroe oy kʼusi te pasbil ti jaʼ te tslakanik li matanaletike.
24 Vaʼun, xi laj yalbune: «Taje jaʼ li naetik ti bu tslakanik matanaletik li jtuneletik ta temploe, jaʼ li matanaletik chakʼ li jteklume».+
Tsʼibetik ta yok vun
^ O «achʼ ue».
^ O «skorredoral; sportikoal».
^ O «tiʼ nae».
^ O «achʼ ue».
^ O «muʼyuk xchopolile».
^ Literal «jun in». Li jun ine jaʼ 3.67 litro. Kʼelo Apendise B14.
^ Li jun efae jaʼ 22 litro. Kʼelo Apendise B14.
^ O «achʼ ue».
^ O «muʼyuk xchopolile».
^ Literal «xakʼ jun in».
^ O «skorredoral; sportikoal».
^ Literal «Li ta kʼinetike xchiʼuk li ta yorail kʼinetike».
^ Literal «xakʼ jun in».
^ O «muʼyuk xchopolile».
^ Literal «jvokʼ ta oxvokʼ jun in».
^ O «spukulalike; sparteike».
^ O «spukulal; sparte».
^ O «spukulal; sparte».
^ O «chʼul kuartoetik».
^ O «tiʼ nae».
^ O «tiʼ nae».
^ O «tiʼ nae».
^ Jaʼ skʼoplal li natil xukʼubile. Kʼelo Apendise B14.
^ O «tiʼ naetike».
