Esekiel 47:1-23
47 Vaʼun, laj yikʼun sutel li ta yochebal temploe,+ te laj kil chlokʼ tal voʼ li ta yolon yochebal templo+ ti chbein batel ta slokʼeb kʼakʼale, yuʼun li yeloval temploe skʼeloj batel li slokʼeb kʼakʼale. Li voʼe te chlokʼ tal ta yolon li ta jot xokon templo ta batsʼikʼobe, ta sural li skajleb matanale.
2 Laj une, laj yikʼun lokʼel li ta ochebal ti te xkom ta nortee+ xchiʼuk ay joy tal yuʼun ta spat, jaʼ to kʼuxi likʼot li ta yochebal mukʼta amakʼ* ti skʼeloj batel slokʼeb kʼakʼale,+ vaʼun laj kil ti te chbein lokʼel tal voʼ li ta batsʼikʼobe.
3 Bat ta stukʼil slokʼeb kʼakʼal li vinike xchiʼuk stsakoj batel jlik chʼojon sventa spʼisobil kʼusitik,+ la spʼis batel jmil xukʼubil,* vaʼun laj yalbun ti akʼo jtuchʼ jelavel li yok voʼe; kʼot kʼalal to ta snukʼ kakan li voʼe.
4 Laje, la spʼis to batel jmil xukʼubil xtok, vaʼun laj yalbun ti akʼo jtuchʼ jelavel li yok voʼe; kʼot kʼalal to ta sjol kakan li voʼe.
La spʼis to batel jmil xukʼubil xtok, vaʼun laj yalbun ti akʼo jtuchʼ jelavel li yok voʼe; kʼot kʼalal to ta jchukbenal* li voʼe.
5 Kʼalal la spʼis to batel jmil xukʼubil xtoke, pas xa ox ta ukʼum ti mu stakʼ jtuchʼ jelavel ta kakane, yuʼun nat xa tajek ti jaʼ noʼox xuʼ xichʼ tuchʼel ta nuxe; tsots tajek yok ti mu xa stakʼ xijelav ta kakantike.
6 Xi la sjakʼbune: «Xnichʼon krixchano, ¿mi laj xa avil?».
Vaʼun, laj yalbun ti xisut batele, te lixanav batel ta stiʼil li ukʼume.
7 Kʼalal lisut batele, laj kil ti solel ep te tekʼajtik teʼ ta xchaʼjotal stiʼil li ukʼume.+
8 Laje, xi laj yalbune: «Li voʼe chkʼot kʼalal to ta yosilal slokʼeb kʼakʼal, te ch-echʼ batel ta Araba,*+ vaʼun chkʼot ta nab. Mi kʼot ta nabe, chlik lekubuk* li yaʼlel nabe.+
9 Ti bu chanav batel li yok voʼe,* ep kʼusitik xuʼ xkuxiik te. Ta x-ayan epal choyetik, yuʼun te chanav batel li voʼe. Chlik lekubuk* li yaʼlel nabe xchiʼuk chkuxi skotol li kʼusitik oy ti bu ch-echʼ batel li yok voʼe.
10 »Li jtsakchoyetike te chvaʼiik li ta tiʼ nabe, te chlik ta En-Guedi kʼalal to ta En-Eglaim,+ jaʼ ti bu tstakijes snutiʼik sventa tsakob choye. Ch-ayan ep ta tos choyetik li ta nabe, jech kʼuchaʼal oy ep ta tos choyetik li ta Mukʼta nabe.*+
11 »Pe li tsʼantsʼan voʼtik xchiʼuk li achʼeltik ti te nopol oy ta nabe muʼyuk ta xlekubik.* Jech-o chiʼpikʼan chkomik.+
12 »Li ta xchaʼjotal stiʼil ukʼume chchʼi ep ta tos jsatinom teʼetik. Muʼyuk ta xtakij li yanaltake xchiʼuk jech-o chakʼ sat. Jujun u chchʼi tal yan sat, yuʼun li yaʼlele te chlik tal ti bu chʼule.+ Li sate jaʼ sventa xichʼ loʼel, li yanale jaʼ sventa chpoxtavan».+
13 Xi chal li Ajvalil Jeova ti jaʼ Mukʼul Jpasmantale: «Liʼe jaʼ li osil ti chachʼakik sventa xkʼot ta xrexto* osil li 12 ta vokʼ nitilulal yuʼun Israele, li Josee jaʼ chib parte chichʼ.+
14 Voʼoxuk charextoinik,* koʼol yepakil chavichʼik.* Laj kalbeik ta jamal amoltotakik ti chkakʼbeik li balumil liʼe,+ avi une chavichʼik akʼbel sventa xkʼot ta arextoik.
15 »Liʼe jaʼ li stsʼakil osil ta nortee: chlik batel ta Mukʼta nab, te chjelav ta Etlon,+ ta stukʼil Sedad,+
16 ta Amat,+ Berota+ xchiʼuk ta Sibraim, ti te oy ta yosilal Damasko xchiʼuk ta yosilal Amate, te to chkʼot kʼalal ta Aser-Atikon, ti te oy ta stsʼakil Aurane.+
17 Jaʼ yuʼun, li stsʼakile chlik ta nab kʼalal to ta Asar-Enon,+ ta stsʼel li stsʼakil Damasko ti te xkom ta nortee xchiʼuk li ta stsʼakil Amate.+ Taje jaʼ li stsʼakil osil ta nortee.
18 »Li stsʼakil ta slokʼeb kʼakʼale te ch-echʼ batel ta Auran xchiʼuk ta Damasko, te chjelav batel ta sjunul ti kʼu snatil li ukʼum Jordane, te ta oʼlol yuʼun li Galaad+ xchiʼuk li yosilal Israele. Skʼan te xlik apʼisik li ta tsʼak ti skʼeloj batel nortee xchiʼuk kʼalal to ta nab ti te oy ta slokʼeb kʼakʼale.* Taje jaʼ li stsʼakil osil ta slokʼeb kʼakʼale.
19 »Li stsʼakil ta sure chlik ta Tamar xchiʼuk chkʼot kʼalal to ti bu oy voʼ ta Meribat-Kadese,+ chkʼot kʼalal to ta Stenlejaltik* xchiʼuk kʼalal to ta Mukʼta nab.+ Taje jaʼ li stsʼakil osil ta sure.
20 »Li stsʼakil ta smaleb kʼakʼale te oy ta Mukʼta nab, te chlik ta tsʼak ta sur xchiʼuk te to chpaj ta yeloval Lebo-Amat.*+ Taje jaʼ li stsʼakil osil ta smaleb kʼakʼale».
21 «Skʼan xachʼakbe abaik li osil liʼe, chachʼakbe abaik li ta 12 ta vokʼ nitilulal yuʼun Israele.
22 Skʼan xachʼakbe abaik sventa xkʼot ta arextoik* xchiʼuk skʼan xavakʼbeik ek li jyanlumetik ti te achiʼukik ta nakleje xchiʼuk ti ayan yalab xnichʼnabik kʼalal jaʼo te achiʼukike. Skʼan ti abatsʼi chiʼilik ta israelal xavilike. Skʼan xichʼ xrextoik ti bu chichʼ xrextoik li snitilulal Israele, koʼol chavichʼ arextoik.
23 Ti bu junukal nitilulal chkʼot ta naklej li jyanlume, jaʼ te skʼan xichʼ akʼbel xrexto»,* xi li Ajvalil Jeova ti jaʼ Mukʼul Jpasmantale.
Tsʼibetik ta yok vun
^ Jaʼ skʼoplal li natil xukʼubile. Kʼelo Apendise B14.
^ O «jchʼut».
^ O «stenlejaltik ti takine».
^ Literal «poxtajuk».
^ Literal «li chib ukʼume».
^ Literal «poxtajuk».
^ Jaʼ xkaltik, li nab Mediterraneoe.
^ Literal «xpoxtajik».
^ O «spukulal; sparte».
^ O «chavichʼ ta apukulalik; chavichʼ ta aparteik».
^ Literal «koʼol yepakil chavichʼik xchiʼuk li achiʼiltakike».
^ Jaʼ xkaltik, li nab Muertoe.
^ Jaʼ xkaltik, stenlejaltik Ejipto.
^ O «li ta yochebal Amate».
^ O «apukulalik; aparteik».
^ O «spukulal; sparte».