Esekiel 48:1-35
48 «Liʼe jaʼ li sparte chichʼik li nitilulaletike, te ta xlik ta jot xokon norte: li sparte Dane+ te ch-echʼ batel ta stukʼil Etlon kʼalal ta Lebo-Amat*+ xchiʼuk kʼalal to ta Asar-Enan, ta stsʼak Damasko ta norte, te ta xokon Amat;+ li stsʼakile chlik ta slokʼeb kʼakʼal kʼalal to ta smaleb kʼakʼal.
2 Ti bu stsʼak yosil Dane, jaʼ te chlik batel yosil li Asere,+ jech stsʼakinoj sbaik ta slokʼeb kʼakʼal kʼalal to ta smaleb kʼakʼal.
3 Ti bu stsʼak yosil Asere, jaʼ te chlik batel yosil li Neftalie,+ jech stsʼakinoj sbaik ta slokʼeb kʼakʼal kʼalal to ta smaleb kʼakʼal.
4 Ti bu stsʼak yosil Neftalie, jaʼ te chlik batel yosil li Manasese,+ jech stsʼakinoj sbaik ta slokʼeb kʼakʼal kʼalal to ta smaleb kʼakʼal.
5 Ti bu stsʼak yosil Manasese,+ jaʼ te chlik batel yosil li Efraine, jech stsʼakinoj sbaik ta slokʼeb kʼakʼal kʼalal to ta smaleb kʼakʼal.
6 Ti bu stsʼak yosil Efraine, jaʼ te chlik batel yosil li Rubene,+ jech stsʼakinoj sbaik ta slokʼeb kʼakʼal kʼalal to ta smaleb kʼakʼal.
7 Ti bu stsʼak yosil Rubene, jaʼ te chlik batel yosil li Judae,+ jech stsʼakinoj sbaik ta slokʼeb kʼakʼal kʼalal to ta smaleb kʼakʼal.
8 Li ta stsʼakil yosil Juda chlik ta slokʼeb kʼakʼal kʼalal to ta smaleb kʼakʼale, skʼan xachʼakik komel jsep osil ti vokʼbil sventa Dios ti 25 mil xukʼubil* sjamleje,+ yan li snatile xkoʼolaj snatil xchiʼuk li yosil nitilulaletik ti chlik ta slokʼeb kʼakʼal kʼalal to ta smaleb kʼakʼale. Li temploe te chkom ta oʼlol.
9 »Li jsep osil ti chachʼakik komel ta sventa Jeovae jaʼ 25 mil xukʼubil snatil xchiʼuk lajunmil xukʼubil sjamlej.
10 Taje chkʼot ta jsep chʼul osil ta sventa li paleetike.+ Jaʼ 25 mil xukʼubil snatil li ta nortee, lajunmil xukʼubil sjamlej li ta smaleb kʼakʼale, lajunmil xukʼubil sjamlej li ta slokʼeb kʼakʼale xchiʼuk 25 mil xukʼubil snatil li ta sure. Li stemplo Jeovae te chkom ta oʼlol.
11 Jaʼ chuʼuninik li paleetik ti chʼultajesbilike, jaʼ li snitilulal Sadoke,+ jaʼ li buchʼutik la spasik li kʼusitik sbainojik kuʼune, ti muʼyuk namajik batel kʼalal namajik batel li j-israeletik xchiʼuk jlevietike.+
12 Ta xichʼik jvokʼuk li ta jsep osil ti vokʼbil sventa Dios ti toj chʼule, ti te oy ta stsʼak yosil jlevietike.
13 »Te noʼox ta stsʼak yosil li paleetike, li jlevietike ta xichʼ sparteik ti 25 mil xukʼubil snatile xchiʼuk ti lajunmil xukʼubil sjamleje. (Ti kʼu sjamlej ta skotole jaʼ 25 mil xukʼubil snatil xchiʼuk lajunmil xukʼubil sjamlej).
14 Mu stakʼ xchonik, mu stakʼ sjelik o xakʼbeik yan krixchano jvokʼuk li osil taje, jaʼ li osil ti mas leke, yuʼun chʼul chil li Jeovae.
15 »Li yan jvokʼ osil ti voʼmil xukʼubil sjamleje xchiʼuk ti 25 mil xukʼubil snatile, jaʼ sventa jmoj stunesik li jteklume,+ sventa naetik xchiʼuk sventa yaxaltik. Li jteklume te chkom ta oʼlol.+
16 Liʼe jaʼ spʼisoltak li jteklume: 4,500 xukʼubil sjamlej ta norte; 4,500 xukʼubil sjamlej ta sur; 4,500 xukʼubil sjamlej ta slokʼeb kʼakʼal xchiʼuk 4,500 xukʼubil sjamlej ta smaleb kʼakʼal.
17 Li yaxaltik ta spat xokon jteklume jaʼ 250 xukʼubil sjamlej ta norte; 250 xukʼubil sjamlej ta sur; 250 xukʼubil sjamlej ta slokʼeb kʼakʼal xchiʼuk 250 xukʼubil sjamlej ta smaleb kʼakʼal.
18 »Li snatil jvokʼ osile xkoʼolaj snatil kʼuchaʼal li jsep chʼul osile:+ lajunmil xukʼubil snatil ta slokʼeb kʼakʼal xchiʼuk lajunmil xukʼubil snatil ta smaleb kʼakʼal. Xkoʼolaj kʼuchaʼal li jsep chʼul osile, jech xtok, li kʼusitik chlokʼ tee jaʼ tslajesik li j-abteletik te ta jteklume.
19 Li j-abteletik ta jteklum ta skotol snitilulal Israele jaʼ chabtelanik li osile.+
20 »Sjunul li osil ti vokʼbil sventa Diose jaʼ kuadrado, jaʼ 25 mil xukʼubil jujujot. Skʼan vokʼbiluk xkom sventa xkʼot ta jsep chʼul osil xchiʼuk ta yav jteklum.
21 »Li osiletik ti te xkom ta jujujot xokon li jsep chʼul osil xchiʼuk yav jteklume jaʼ chichʼ li bankilal ta jteklume.+ Te stsʼakinoj sba xchiʼuk li stsʼak jsep chʼul osil ti 25 mil xukʼubil sjamlej ta slokʼeb kʼakʼal xchiʼuk ti 25 mil xukʼubil sjamlej ta smaleb kʼakʼale. Ti bu kʼalal stsʼakil yosil li bankilale xkoʼolaj xchiʼuk li stsʼakil yosil li chib nitilulale. Li jsep chʼul osile xchiʼuk li temploe te chkom ta oʼlol.
22 »Ta jujujot xokon li yosil jlevietike xchiʼuk li yav jteklume te oy yosil li bankilale. Li yosil bankilale jaʼ stsʼakinoj li stsʼak yosil Judae+ xchiʼuk li stsʼak yosil Benjamine.
23 »Ta sventa li yan nitilulaletike, li stsʼak yosil Benjamine te chlik ta slokʼeb kʼakʼal kʼalal to ta smaleb kʼakʼal.+
24 Ti bu stsʼak yosil Benjamine, jaʼ te chlik batel yosil li Simeone,+ jech stsʼakinoj sbaik ta slokʼeb kʼakʼal kʼalal to ta smaleb kʼakʼal.
25 Ti bu stsʼak yosil Simeone, jaʼ te chlik batel yosil li Isakare,+ jech stsʼakinoj sbaik ta slokʼeb kʼakʼal kʼalal to ta smaleb kʼakʼal.
26 Ti bu stsʼak yosil Isakare, jaʼ te chlik batel yosil li Sabulone,+ jech stsʼakinoj sbaik ta slokʼeb kʼakʼal kʼalal to ta smaleb kʼakʼal.+
27 Ti bu stsʼak yosil Sabulone, jaʼ te chlik batel yosil li Gade,+ jech stsʼakinoj sbaik ta slokʼeb kʼakʼal kʼalal to ta smaleb kʼakʼal.
28 Li stsʼakil yosil Gad ta sure chlik batel ta Tamar+ xchiʼuk chkʼot kʼalal to ti bu oy voʼ ta Meribat-Kadese,+ chkʼot kʼalal to ta Stenlejaltik*+ xchiʼuk kʼalal to ta Mukʼta nab.*
29 »Taje jaʼ li osil ti chachʼakik sventa xkʼot ta xrexto* osil li snitilulal Israele+ xchiʼuk jech yepakil tstaik ta jujun nitilulal»,+ xi li Ajvalil Jeova ti jaʼ Mukʼul Jpasmantale.
30 «Liʼe jaʼ li lokʼebaletik ta jteklume: li jot xokon ti skʼeloj batel nortee jaʼ 4,500 xukʼubil sjamlej.+
31 »Li yochebaltak jteklume jaʼ jech tsbiin kʼuchaʼal sbiik li jujun nitilulal yuʼun Israele. Oy oxib ochebal ta norte: jun ochebal sventa Ruben, jun ochebal sventa Juda xchiʼuk jun ochebal sventa Levi.
32 »Li jot xokon ti skʼeloj batel slokʼeb kʼakʼale jaʼ 4,500 xukʼubil sjamlej. Oy oxib ochebal te: jun ochebal sventa Jose, jun ochebal sventa Benjamin xchiʼuk jun ochebal sventa Dan.
33 »Li jot xokon ti skʼeloj batel sure jaʼ 4,500 xukʼubil sjamlej. Oy oxib ochebal te: jun ochebal sventa Simeon, jun ochebal sventa Isakar xchiʼuk jun ochebal sventa Sabulon.
34 »Li jot xokon ti skʼeloj batel smaleb kʼakʼale jaʼ 4,500 xukʼubil sjamlej. Oy oxib ochebal te: jun ochebal sventa Gad, jun ochebal sventa Aser xchiʼuk jun ochebal sventa Neftali.
35 »Ta xchanjotal xokon li jteklume jaʼ 18 mil xukʼubil smukʼul. Xi chlik yichʼ biiltasel li jteklume: te oy li Jeovae».+
Tsʼibetik ta yok vun
^ O «ta yochebal Amat».
^ Jaʼ skʼoplal li natil xukʼubile. Kʼelo Apendise B14.
^ Jaʼ xkaltik, li nab Mediterraneoe.
^ Jaʼ xkaltik, stenlejaltik Ejipto.
^ O «spukulal; sparte».