Esekiel 6:1-14
6 La skʼoponun tal yan velta li Jeovae, xi laj yalbune:
2 «Xnichʼon krixchano, kʼelo batel li vitsetik yuʼun Israele xchiʼuk alo li kʼusi chopol chkʼot ta stojolalike.
3 Xi skʼan xavale: ‹Vitsetik yuʼun Israel, chikintao kʼusi chal li Ajvalil Jeova ti jaʼ Mukʼul Jpasmantale: li Ajvalil Jeova ti jaʼ Mukʼul Jpasmantale xi chalbe li vitsetike, li bikʼtal vitsetike, li ukʼumetike xchiʼuk li stenlejaltike: «¡Kʼelavilik! Ta jtak tal jun espada ta atojolalik xchiʼuk ta jlilin li tayal kʼopojebaletik* avuʼunike.
4 Chichʼ jinesel li skajlebtak matanal avuʼunike, chichʼ lilinel li xchikʼobil pome+ xchiʼuk li buchʼutik chcham avuʼunike ta jip batel ti bu oy li asantoik ti ibal sbae.*+
5 Li buchʼutik chamem yuʼun jteklum Israele ta jip batel ta yeloval li ibal sba santoetik yuʼunike xchiʼuk tanpuk chbat kuʼun abakilik ta sjoyobal li skajleb matanaletik avuʼunike.+
6 Buyuk noʼox ti nakaloxuke, chichʼ lajesel li jteklumetike+ xchiʼuk chichʼ jinesel li tayal kʼopojebaletik avuʼunike, lajem chkom ta j-echʼel.+ Chichʼ lilinel li skajlebtak matanal avuʼunike xchiʼuk chʼuchʼultik chkom, chlaj skʼoplal li ibal sba santoetik avuʼunike, chichʼ lajesel li xchikʼobil pom avuʼunike xchiʼuk chichʼ tupʼbel skʼoplal li yabteltak akʼobike.
7 Te chyalik ta lum ta axokonik li buchʼutik chlajik ta milele,+ vaʼun jech chanaʼik ti voʼon Jeovaune.+
8 »›»Pe oy jlom ti muʼyuk chalajik ta espadae, yuʼun chabatik li ta mukʼtik lumetike, tanpuk chabatik li ta jteklumetike.+
9 Li buchʼutik kuxul chkomike chivul ta sjolik kʼalal chukbilik xa ox batel li ta mukʼtik lumetike.+ Te chakʼik venta ti yayijem kom koʼonton yuʼunik ta skoj ti muʼyuk tukʼ laj yakʼ sbaike,* ti la svalopatinikun komel+ xchiʼuk ti jaʼ lik ayanuk tajek ta yoʼontonik* li ibal sba santoetik yuʼunike.+ Ta xkʼexavik xchiʼuk ch-ib-o yoʼontonik li kʼusitik la spasik ti toj chopol xchiʼuk ti toj ibal sbae.+
10 Jech tsnaʼik ti voʼon Jeovaune xchiʼuk ti mu jecheʼuk noʼox laj kal ti chkakʼ tal vokolil ta stojolalike»›.+
11 »Xi chal li Ajvalil Jeova ti jaʼ Mukʼul Jpasmantale: ‹Tʼaxo akʼob ta at-oʼonton, tekʼilano* avakan ta balumil xchiʼuk chopoluk xavaʼi aba ta skoj li kʼusitik chopol la spas xchiʼuk li kʼusitik solel muʼyuk lek la spas li jteklum Israele, yuʼun chlajik ta espada, ta tsatsal viʼnal xchiʼuk ta tsatsal chamel.+
12 Li buchʼu nom oye chlaj ta tsatsal chamel, li buchʼu nopol oye chlaj ta espada, pe li yantike chchamik ta tsatsal viʼnal. Ta jlokʼes skotol li skʼakʼal koʼonton ta stojolalike.+
13 Jech tsnaʼik ti voʼon Jeovaun+ kʼalal te lamal chkom yanimaik ta spat xokon li ibal sba santoetik yuʼunike, ta spat xokon li skajleb matanaletik yuʼunike,+ li ta sba tayal bikʼtal vitsetike, ta skotol li jol vitsetike, ta yolon teʼetik ti lek pim yanale xchiʼuk ta yolon skʼob mukʼta teʼetik ti te laj yakʼik muil chikʼbil matanaletik* sventa xlamaj yoʼonton yuʼunik li ibal sba santoetike.+
14 Ta jyeʼ batel jkʼob sventa xkakʼbeik kastigo xchiʼuk xokol chkom kuʼun li jteklume; skotol ti bu toʼox nakalike xokol tajek chkom, jaʼ xkom to li takixokol balumil ti nopol xil Diblae. Vaʼun, jech tsnaʼik ti voʼon Jeovaune›».
Tsʼibetik ta yok vun
^ Li ta ebreo kʼope xuʼ van te nitil skʼoplal ta jpʼel kʼop ti «tsoʼ» skʼan xale, jaʼo chichʼ alel kʼalal oy kʼusi chichʼ pʼajele. Kʼelo Glosario, ibal sba.
^ O «lik mulivajikuk kʼalal la stsʼakliik».
^ O «ti mulivajike; ti la xchiʼinik ta vayel epal krixchanoetike».
^ O «majulano».
^ O «kʼusitik muik yikʼ».
